Qhov uas Peb Ua Raws Li Peb tej Kev Khi Lus Pov Hwm Peb, Npaj Peb, thiab Muab Hwj Chim rau Peb
Los ntawm Rosemary M. Wixom
Lub Koom Haum Me Nyuam Yaus tus Tuam Thawj Tswj Hwm
Peb yog cov poj niam khi lus uas taug txoj kev hauv lub ntiaj teb no kom rov qab mus cuag Nws, tsis hais cov laus cov hluas los yog.
Cov viv ncaus, es, peb hlub nej. Tsis ntev tas los, thaum kuv mus xyuas Mev Teb, ua rau kuv pom tias peb txhua tus yog viv ncaus ib yam li peb pom hmo no. Cia li xav txog qhov no: Peb nyuam qhuav kawm hauv lub Koom Haum Me Nyuam Yaus tiav lawm thaum Hnub Caiv sawv ntxov, thiab cov me nyuam, cov xib hwb, thiab kuv peb sawv daws tab tom nkag mus rau hauv qhov chaw kis tsev. Tam sim ntawd, lub qhov rooj ntawm Koom Haum Ntxhais Hluas txawm qhib, thiab kuv pom cov ntxhais hluas thiab lawv cov thawj coj. Peb txhua tus tau ncav tes xav puag lawv. Cov me nyuam tuav kuv daim tiab thiab cov poj niam nyob ze kuv, es kuv xav qhia tias muaj dab tsi nyob hauv kuv lub siab thaum ntawd.
Kuv tsis hais lus Mev, kuv thiaj li tau xav txog lus Akiv xwb. Kuv tau saib lawv tej ntsej muag thiab hais tias, “Peb yog cov ntxhais ntawm peb Leej Txiv Saum Ntuj Ceeb Tsheej, uas hlub peb, thiab peb hlub Nws.” Txhua tus pib hais lus nrog kuv, lawv hais lus Mev. Peb nyob hauv qhov chaw kis tsev, koom ua ke hais Koom Haum Ntxhais Hluas ntsiab lus hais tias, “Peb yuav sawv ua Vajtswv tej tim khawv txhua lub sij hawm, thiab txog txhua yam, thiab nyob hauv txhua qhov chaw.”
Hmo no peb koom ua ke nyob thoob plaws lub ntiaj teb, peb yog Nws cov thwj tim, uas xav tiv thaiv thiab txhawb nqa Vajtswv lub nceeg vaj. Peb yog peb Leej Txiv Saum Ntuj Ceeb Tsheej cov ntxhais. Peb yog cov poj niam khi lus uas taug txoj kev hauv lub ntiaj teb no kom rov qab mus cuag Nws, tsis hais cov laus cov hluas los yog. Qhov uas peb ua raws li peb tej kev khi lus pov hwm peb, npaj peb, thiab muab hwj chim rau peb.
Muaj ntxhais hluas uas nyob nrog peb hmo no uas nyob hauv lub Koom Haum Me Nyuam Yaus. Tsis ntev tas los nej ib txhia tau pib taug txoj kev uas mus rau txoj sia nyob mus ib txhis los ntawm kev cai raus dej.
Cia li saib ncig nej. Ua rau nej paub tias yav tom ntej yuav ci ntsa iab vim nej pom cov poj niam uas tau khi lus thiab qhia tias yav tom ntej yuav zoo li cas.
Yog tias nej muaj 8, 9, 10, los yog 11 xyoos, txawm nej nyob hauv lub Tsev Rau Rooj Sab Laj, nyob hauv tsev, los yog nyob hauv ib lub tsev sib ntsib los yog, nej puas kam sawv ntsug? Zoo siab tos txais nej rau cov poj niam kev sib ntsib. Nim no, thov sawv li no: peb xav caw nej koom tes nrog peb hmo no. Kuv yuav seev suab ntawm lub Koom Haum Me Nyuam Yaus ib zaj nkauj. Ces thaum twg nej paub zaj nkauj no, thov pib hu nkauj nrog kuv. Nej yuav tsum hu nkauj kom txhua tus hnov tau nej.
Qhia kuv los ua raws li Vajtswv txoj lus;
Qhia kuv kom kuv paub thov Vajtswv txhua hnub;
Qhia kuv kom kuv thiaj muaj lub siab uas ntseeg;
Qhia kuv, qhia kuv los xyaum kev ncaj ncees.
Xav kom nej sawv ntxiv, cov ntxhais hluas, thaum txhua tus uas muaj 12 xyoos rov saud hu nkauj nqe 2.
Kuv tus me nyuam los wb yuav kawm ua ke
Txog nws txoj kev cai; txog nws txoj hau kev
Uas yuav kom peb nrog Leej Txiv nyob saum ntuj—
Nrog nws, nrog nws los nyob kaj siab lug.1
Nej hu nkauj zoo kawg. Nej zaum tau. Ua tsaug.
Peb cov poj niam taug Nws txoj kev kaj txawm yog peb muaj hnub nyoog li cas los yog. Tus Cawm Seej txoj kev kaj ci ntsa iab rau peb txhua tus thaum peb taug kev.
Peb nkag mus hauv qhov rooj ntawm txoj sia nyob mus ib txhis thaum peb khi lus thiab ua kev cai raus dej, ces peb txais tau lub txiaj ntsim Vaj Ntsuj Plig Dawb Huv. Txwj Laug Robert D. Hales tau nug hais tias, “[Peb] puas to taub thiab [peb] cov me nyuam puas to taub hais tias thaum [peb] ua kev cai raus dej [peb] hloov siab mus ib txhis?”
Nws kuj piav hais tias “qhov uas peb to taub peb txoj kev khi lus thaum peb ua kev cai raus dej thiab to taub lub txiaj ntsim Vaj Ntsuj Plig Dawb Huv, yuav hloov peb lub neej thiab ua rau peb koom siab tag nrho nrog Vajtswv nyob hauv Nws lub nceeg vaj.” Thaum peb raug ntxias, yog peb yuav mloog zoo, tus Vaj Ntsuj Plig Dawb Huv yuav ua rau peb nco txog qhov uas peb tau cog lus tias peb yuav nco ntsoov peb tus Cawm Seej thiab ua raws li Vajtswv tej lus txib.”2
Txhua lub lim tiam thaum peb noj lub cim nco txog, peb rov qab khi lus zoo li thaum peb ua kev cai raus dej. Txwj Laug David A. Bednar hais tias: “Thaum peb ua kev cai raus dej, peb tsom ntsoov rau lub tuam tsev. Thaum peb noj lub cim nco txog, peb tsom ntsoov rau lub tuam tsev. Peb cog lus tias peb yuav nco ntsoov tus Cawm Seej thiab ua raws li Nws cov lus txib kom npaj peb ua cov kab ke dawb ceev hauv lub tuam tsev.”3
Cov kab ke hauv lub tuam tsev ua rau peb txais tau koob hmoov zoo kawg nkaus dhau los ntawm Yexus Khetos txoj Kev Theej Txhoj. Yog cov kab ke uas yuav tsum ua kom txais kev tsa nto nyob hauv lub nceeg vaj xilethi-aus. Thaum peb ua raws li peb tej kev khi lus, qhov uas peb xav tias peb tsis tsim nyog thiab tsis zoo tag nrho yuav ploj mus, thiab peb yuav to taub cov kab ke thiab kev khi lus ntawm lub tuam tsev. Txhua tus yeej muaj cai taug txoj kev uas mus rau txoj sia nyob mus ib txhis ntawd.
Kuv xav tsis thoob txog cov ntxhais hluas thiab cov poj niam lub zog uas kuv tau ntsib nyob thoob plaws lub ntiaj teb uas taug txoj kev no ruaj nrees. Cia kuv qhia nej txog ib txhia ntawm cov ntxhais hluas thiab cov poj niam khi lus uas kuv tau ntsib.
Luana muaj 11 xyoos thaum kuv mus xyuas nws tsev neeg nyob hauv Buenos Aires, Argentina. Vim nws raug mob thaum nws yog ib tug me nyuam yaus, Luana hais tsis taus lus. Nws tsis tau hais lus tau ntau xyoo. Nws nyob twj ywm thaum peb sawv daws sib tham. Kuv pheej xav kom nws hais ib lo lus xwb. Nws ntsia ntsoov kuv zoo li nws tsis tas hais lus kom kuv paub nws lub siab. Tom qab peb thov Vajtswv, peb sawv thiab Luana muab ib daim duab rau kuv. Nws tau kos duab txog Yexus Khetos nyob hauv lub Vaj Khexemanes. Ua rau kuv paub nws zaj lus tim khawv uas nrov thiab meej. Luana tau khi lus thaum nws ua kev cai raus dej kom nws sawv ua tim khawv txog Vajtswv “txhua lub sij hawm, thiab txog txhua yam, thiab nyob hauv txhua qhov chaw.”4 Nws to taub Yexus Khetos txoj Kev Theej Txhoj, uas nws daim duab ua tim khawv txog. Nws puas tau paub tias, txoj Kev Theej Txhoj uas txhawb nqa thiab muaj hwj chim yeej kho tau nws kom nws rov qab hais tau? Txij thaum hnub ntawd peb xyoos tas los, Luana tau rov qab hais lus dua. Nim no nws koom tes nrog Koom Haum Ntxhais Hluas thiab nws cov phooj ywg. Nws muaj siab ntseeg ua raws li nws txoj kev khi lus thaum nws ua kev cai raus dej, thiab tseem ua tim khawv txog tus Cawm Seej.
Cov tub hluas ntxhais hluas nyob thoob plaws lub ntiaj teb xav mus rau lub tuam tsev. Nyob hauv Lima, Peru, kuv tau ntsib ib tug txiv tsev thiab nws peb tug ntxhais nyob lub tuam tsev sab nraud. Kuv pom qhov kaj nyob hauv lawv lub ntsej muag. Ob tug ntxhais uas xiam hoob khab heev zaum hauv rooj zaum uas muaj log. Tus ntxhais thib peb, thaum nws tab tom pab nws ob tug viv ncaus, piav hais tias nws muaj ob tug viv ncaus ntxiv nyob tim tsev. Nkawd kuj zaum hauv lub rooj zaum muaj log thiab. Nkawd mus tsis tau deb li 14 teev mus rau lub tuam tsev. Lub tuam tsev tseem ceeb heev rau tus txiv tsev no thiab nws cov ntxhais lawv plaub leeg thiaj tau tuaj rau lub tuam tsev hnub ntawd—ob tug tuaj saib tus ntxhais uas sawv cev ua kev cai raus dej thiab ua txoj kab ke dawb ceev ntawd. Zoo li Nifais, lawv “zoo siab rau tus Tswv tej kev khi lus.”5
Ib tug poj niam uas tsis tau yuav txiv paub tias kev txais lub cim nco txog thiab kev cog lus tias “[nws] yuav muaj tus Ntsuj Plig nrog [nws] nyob” muaj nqi heev.6 Qhov uas nws muaj tus Ntsuj Plig nrog nraim nws nyob yog ib txoj kev cog lus uas pab kom nws tsis txhob kho siab. Ua rau nws muaj zog ua kom nws tej txuj ci loj hlob tuaj thiab ua rau nws xav ua hauj lwm rau tus Tswv. Nws muaj kev xyiv fab los ntawm txoj kev tu me nyuam, thiab thaum twg nws xav nyob kaj siab lug, ces nej yuav nrhiav tau nws nyob hauv lub tuam tsev.
Tus kawg kuv yuav hais txog yog ib tug poj niam uas muaj 90 xyoo tawm uas tau saib nws cov me nyuam thiab cov xeeb leej xeeb ntxwv loj hlob tuaj thiab saib lawv muaj me nyuam ib yam thiab. Ib yam li peb, nws twb muaj kev tu siab, kev txom nyem, thiab kev xyiv fab loj kawg nkaus nyob hauv nws lub neej. Nws lees hais tias, yog nws sau ntawv txog nws lub neej, ces muaj tej yam uas nws yuav tsis xav sau txog. Tiam sis, nws luag nyav thiab hais tias, “Kuv yuav tsum nyob me ntsis ntxiv thiab saib thaum kawg yuav zoo li cas!” Nws tseem ua raws li nws tej kev khi lus thaum nws taug kev.
Nifais qhia hais tias:
“Tom qab uas nej tau los rau hauv txoj kev ti thiab nqaim no lawm, kuv yuav nug tias seb txhua yam puas tau tiav? Saib seb, kuv hais rau nej tias, yeej tsis tau tiav …
“Yog li ntawd, nej yuav tsum thawb mus lawm tom hauv ntej nrog txoj kev ntseeg Khetos [uas khov kho], muaj ib txoj kev cia siab uas ci kawg nkaus, thiab muaj ib txoj kev hlub ntawm Vajtswv thiab ntawm tib neeg sawv daws. Yog li ntawd, yog tias nej yuav thawb lawm tom hauv ntej, mloog nkaus rau Khetos tej lus, thiab tiv kom mus txog thaum kawg, saib seb, Leej Txiv hais li no tias: Nej yuav muaj txoj sia nyob mus ib txhis.”7
Peb txhua tus taug txoj kev ntawd. Hmo no, peb tau hu nkauj txog kev taug txoj kev ntawd nyob hauv qhov kaj. Peb txhua tus muaj zog. Tiam sis thaum peb koom ua ke nrog Vajtswv, tsis muaj dab tsi cheem tau peb.
Tus Tswv hais rau Emma Smith kom nws txhawb nws lub siab thiab xyiv fab, thiab ua raws li tej kev khi lus uas nws tau ua.8
Peb zoo siab uas peb hnov tau Leej Txiv Saum Ntuj Ceeb Tsheej thiab tus Cawm Seej, Yexus Khetos, txoj kev hlub thaum peb ua raws li peb tej kev khi lus. Kuv ua tim khawv hais tias Nkawd muaj txoj sia nyob. Los ntawm Yexus Khetos lub npe, amees.