Kōjparok Bujen ko rej Kōjparok Kōj, Kōpooj Kōj, im Kōkajoor Kōj

O, Jejtōr raņ, kōmij iakwe kom̧. Tōre eo ikar loļo̧k Mexico, ikar maron̄ en̄jake jemdo̧o̧n eo an kōrā ro me jej aolep en̄jake jotenin. Ekar dedeļo̧k am̧ loļo̧k Būraimere juon jibbon̄in Jabōt im ajri ro, rūkaki ro, im n̄a kōm ar diwōjļo̧k ijo eobrak kōn armej. Innām kōjem eo n̄an kūlaaj eo an Doulul eo an Jiron̄ ro ekar peļļo̧k im ikar lo jiron̄ ro im ritōl ro aer. Kōm kar aolep atōbakoje doon. Ippān an ajri ro dāpij ilo nuknuk eo aō im kōrā ro epaake eō, ikar kōņaan kwaļo̧k en̄jake eo iaar en̄jake ilo tōre eo.

Ijaje kajin Spanish, naan in Pālle wōt men ko raar itok n̄an kōlmenļo̧kjeņ eo aō. Ikar kalimjek turin mejāer aolep im ba, ‟Kōj jej leddik ro Nejin Jemedwōj Ilan̄, eo ej iakwe kōj, im jej iakwe E.” Em̧ōkaj an aolep jino ba naan ko ilo kajin Spanish. Ijeņ kōm kar pād ilowaan jikin diwōj deļo̧n̄ eo eobrak kōn armej, kōnono ippān doon Unin Tōl eo an Doulul eo an Jiron̄ ro ilo am kar ba,‟Jenaaj jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko.”

Joten in jej koba ippān doon ilo aolepen peļakūn laļin, āinwōt rikaļoor ro An, kōn juon ikdeleel n̄an bōbrae im rejtak e aelōn̄ in kiin̄ an Anij. Kōj jej leddik ro nejin Jemedwōj Ilan̄. Kōj jej kōrā in kōm̧m̧an bujen ko jen aolep iiō etetal ilo iaļen mour in n̄an jepļaakļo̧k n̄an Ippān. Kōjparok bujen ko rej kōjparok kōj, kōpooj kōj, im kōkajoor kōj.

Ewōr leddik ro ilubwijid jotenin ro rej iiō in Būraimere. Jet iaami leddik raņ ej kab m̧ōj ami bōk bun̄tōn nee eo kein kajuon ilo iaļ eo n̄an mour indeeo kōn kain̄i eo an pepteij.

Reito reitak ipeļakūmi. Ilju jekļaaj eobrak kōn kōjatdikdik ilo ami lo kōrā ro raar barāinwōt kōm̧m̧ani bujen ko im repojak n̄an kwaļo̧k iaļ eo n̄an kom̧ im̧aan.

Eļan̄n̄e kōm̧ij 8, 9, 10, ak 11 iiō dettami, men̄e ilo Conference Center eo, ilo m̧oko m̧ōmi, ak ilo im̧ōn kweilo̧k ko peļaakin laļ in, kom̧ maron̄ ke jouj im jutak? Kom̧ ruwainene n̄an kweilo̧k eo eļap an kōrā. Kiiō, jouj im jutak wōt kōnke kōm kōņaan karuwaineneik kom̧ n̄an bōk koņaam̧i. N̄aij tin al kōn juon al an Būraimere. Ilo iien eo kom̧ij kūle al eo, kom̧ jino al ippa? Kiiō, kom̧ij aikuj al ilo ainikien eļap bwe aolep ren maron̄ ron̄ ainikūmi.

Jutak wōt, leddik ro, ilo iien eo aolep 12 im rūtto ļok kiiō rej al eoon ruo.

Eļap an aiboojoj. Kōm maron̄ jijet. Kom̧ em̧m̧ol.

Āinwōt kōrā ro kōn aolep iiō ko, jej etetal ilo meram eo An. Tūreep eo ad ilo iaļ eo ej ami makmake im naaj kalikkare kōn wōt iakwe eo an Rilo̧mo̧o̧r eo.

Jej deļo̧n̄e wōrwōr eo n̄an iaļ an mour indeeo kōn kain̄i im bujen an peptaij, innām jej bōk Jetōb Kwojarjar. Elder Robert D. Hales eaar kajjitōkin kōj, ‟Jej ke meļeļe im ajri ro nejid rej ke meļeļe bwe eļan̄n̄e jej peptaij jej oktak n̄an indeeo?”

Eaar barāinwōt kōmeļeļeik bwe ‟Eļan̄n̄e jej meļeļe kōn bujen peptaij eo ad im menin letok an Jetōb Kwojarjar, enaaj ukōt mour ko ad im enaaj kōļapļo̧k jon̄an kalim̧m̧ur eo ad n̄an aelōn̄ in kiin̄ an Anij. Eļan̄n̄e jej ioon menin kapo ko, n̄e jenaaj ron̄jake, Jetōb Kwojarjar enaaj kakeememej kōj bwe jaar kalim̧m̧ur n̄an keememej ad Rilo̧mo̧o̧r im pokake kien ko an Anij.” ²

Kajjojo wiik ilo ad bōk m̧ōttan kwojkwoj eo, jej kōkāāl bujen peptaij eo ad. Elder David A. Bednar eaar ba: “Ilo ad jutak ilo dānin peptaij ko, jej reim̧aan ļo̧k n̄an tampel. Ilo ad bōk m̧ōttan kwojkwoj eo, jej kalimjōk tampel. Jej kalim̧m̧ur n̄an iien otemjej keememej Rilo̧mo̧o̧r eo im n̄an kōjparok kien ko An ilo kōppopo n̄an pād ilo kain̄i ko rekwojarjar an tampel.” ³

Kain̄i ko an tampeļ rej tōl ļo̧k n̄an kōjeram̧m̧an ko repād kōn Pinmuur eo an Jisōs Kraist. Rej kain̄i ko rekkar n̄an lan̄lōn̄ eo eutiej ad ilo Celestial Kingdom. Ilo ad kajion̄ kōjparok bujen ko ad, en̄jake ko ad kōn abōņōņō im jab weppen rej jino rej makūnļo̧k. Ilo tōre eo kain̄i im bujen ko an tampel eļap tokjāer im kajoor. Aolep rej ruwainene n̄an jipadōk ial n̄an mour indeeo.

Ij bwilōn̄ kōn kajoor eo an leddik ro, jiron̄ ro, im kōrā ro iaar iioon er peļakūn laļin ro neer retōt im kijn̄en̄e ilo iaļ in. In kwaļo̧k jet waanjon̄ok ko kōn leddik im kōrā in bujen ro iaar ioon er.

Luana ekar 11 iiō dettan ke ikar loļo̧k baam̧le eo an ilo Buenos Aire, Argentina. Kōn juon jorrāān ekauwōtata ke eaar dik, Luana ejjab maron̄ kōnono. Eaar jab kōnono ium̧win elōn̄ iiō ko. Eaar jijet im ikōn̄ ilo am̧ kōnono n̄an doon. Ikar kōjatdikdik wōt kōn juon unoojdikdik jān e. Eaar kalimjōk eō āinwōt n̄e eaar kōnono ar jab pidodo n̄an eō n̄an jeļā en̄jake eo an. Ālkin juon jar, kōm kar jutak n̄an etal im Luana ekar letok n̄an eō juon jin̄a. Eaar pijaik Jisōs Kraist ilo Jikin Kallib Gethsemane. Innām ealikkar Aō kūle kam̧ool eo an. Luana eaar kōm̧m̧ane juon bujen ilo iien peptaij eo an n̄an jutak āinwōt juon rikam̧ool an Anij. ‟Ilo aolep iien ko, im ilo men otemjeļo̧k, im ilo aolep jikin.”⁴ Eaar meļeļe kōn Pinmuur eo an Jisōs Kraist, kam̧oole ilo jin̄a eo an. Eaar jeļā bwe kōn kōkajoorļo̧k im kajoor an Pinmuur, emaron̄ bōk kājmour im bar kōnono? Jān raan eo jilu iiō rem̧ootļo̧k, Luana eaar wōnm̧aanļo̧k ilo an kijejeto n̄an kōnono. E kiiō ej bōk kuņaan ilo Doulul eo an Jiron̄ ro ippān ro m̧ōttan. Tōmak n̄an bujen ko eaar kōm̧m̧ani ilo iien peptaij eo an, ej wōnm̧aanļo̧k n̄an kwaļo̧k kam̧ool eo an kōn Rilo̧mo̧or.

Jo̧dikdik ro peļakūn laļin ewōr aer itoklimo n̄an deļo̧n̄e tampeļ ko. Ilo Lima, Peru, ikar ioon juon baba im jilu iaan leddik ro nejin rej deļo̧n̄e tampeļ. Ikar lo meram eo turin mejāer. Ruo iaan leddik ro raar utam̧we ilo ānbwin im rej jijet ilo wiil jea. Leddik eo kein kajilu, ilo an kōm̧m̧ani aikuj ko an sister ro an, kar kōmeļeļik bwe ewōr bar ruo an sister ilo m̧weo. Er barāinwōt rej bar wiil jea. Raar jab maron̄ ito itak 14 awa ko n̄an tampeļ. Eļap tokjān tampeļ n̄an baba in im leddik ro nejin me emen iaer raar itok n̄an tampeļ raan eo—ruo iaer raar lale an eo maron̄ peptaij n̄an rimej im kōm̧m̧ane kain̄i eo ekwojarjar. Āinwōt Nipai, raar ‟m̧ōņōņō ilo bujen ko an Irooj.”⁵

Juon kōrā emake iaan ijeļā kajjien ej kaorōk kain̄i eo an kwojkwoj aolep wiik im an kalim̧m̧ur ekwojarjar bwe en iien otemjej bōk Jetōb eo An ippān.”⁶Jemdo̧o̧n eo ej juon kalim̧m̧ur me ej kapidodoik n̄an e ilo an en̄jake ajimakeke. Ej leļo̧k n̄ane kajoor n̄an kōjadeik e make n̄an kōļapļo̧k kapeel ko an im juon kōņaan n̄an jerbal n̄an Irooj. Eaar lo eļap lan̄lōn̄ ilo an kwaļo̧k iakwe n̄an aolep ajri ro ilo mour eo an, im n̄e ej kappok aenōm̧m̧an, kwonaaj loe ilo tampeļ.

Āliktata, juon lōļļap enan̄in 90 an iiō eaar lale an ajri ro nejin im jibūn rūttoļo̧k im ro jibūn epepen ko jet itok n̄an lal in. Āinwōt elōn̄ iaad, eaar en̄jake elōn̄ būrom̧ōj, ļōkapokpok, im lan̄lōn̄ ilo mour eo an. Eaar kwaļo̧k bwe ej bar jeik bwebwenato in mour eo an, emaron̄ jab kobaik jet jepta ko me kar jeik m̧okta. Kōn etton̄dikdik, eaar ba, “Eaikuj aitokļo̧k jidik Aō mour im lo jem̧ļokin!” Eaar wōnm̧aanļo̧k wōt n̄an dāpij bujen ko ilo iaļ eo.

Nipai ar katakin:

‟Ālkin ami pād ilo iaļ in erānin im eaidik, Ikōņaan kajjitōk aolep ededeļo̧k ke? Lo, Ij ba n̄an kom̧, Jab . …

‟Kōn menin, kom̧ aikuj bun̄ m̧aan ļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k. Kōn menin, n̄e kom̧ naaj bun̄ m̧aanļo̧k, kwojkwoj ioon naan an Kraist, im niknik n̄an jem̧ļokin, lo āindein Jemān ej ba: Kom̧ naaj bōk mour indeeo.”⁷

Kajjojo iaad epād ilo iaļ in. Jotenin, jekar al kōn etetal ilo iaļ n̄an meram. Āinwōt kajjojo, kōj jekajoor. Ippān doon ippān Anij, jepan bōjrak.

Irooj eaar ba n̄an Emma Smith, bwe ej aikuj kōppeļļo̧k būruōn im lan̄lōn̄, im pen wōt n̄an bujen ko me eaar kōm̧m̧ani.⁸

Jej lan̄lōn̄ bwe kōn kōjparok bujen ko ad jemaron̄ en̄jake iakwe eo an Jemedwōj Ilan̄ im ad Rilo̧mo̧o̧r, Jisōs Kraist. Ij kam̧ool bwe Rej mour. Ilo etan Jisōs Kraist, amen.