2010–2019
Ia Faaali Atu Lou Faatuatua
Aperila 2014


Ia Faaalia Lo Outou Faatuatua

Ata
Elder Russell M. Nelson

I lea aso ma lea aso, i luga o outou ala e agai atu i o outou taunuuga e faavavau, ia faateleina lo outou faatuatua. Folafola atu lo outou faatuatua! Ia faaalia lo outou faatuatua!

Uso e ma tuafafine pele, matou te faailoa atu o matou lagona loloto o le alofa ma le faafetai mo outou. Matou te faafetai mo a matou tofiga e galulue faatasi ai ma outou.

I se malaga talu ai nei, na faasilasila mai ai e le matou pailate o le a matou fetaiai ma ni savili malolosi i le taimi o le a matou faaifo ai e tulaueleele ma e tatau i pasese uma ona faamau lelei o latou fusipau. E pei ona faamoemoeina, na oo mai le fetaiaiga o savili. Sa matuai fesouaiina lava. I le isi itu o le alasavali ma ni nai atulaina nofoa se lua i ou tua atu, na popole ai se tamaitai i le fefe. I taimi taufaamatau taitasi e pa’ū ma taia faafuasei ai le vaa, sa ia faataiō leotele ai. Sa taumafai lona toalua e faamafanafana o ia ae sa le’i maua sona to’a. O ana faataiō atuatuvale na faaauau pea seia oo ina matou pāsia le sone sousou ma tulaueleele ai ma le saogalemu. I le taimi o lona popolevale, sa ou lagona le alofa mo ia. Aua o le faatuatua o le vaifofo lea o le fefe, sa ou moomoo ma le leleoa, maimau pe ana mafai ona ou faamalosia lona faatuatua.

Mulimuli ane, a o tuua e le pasese le vaalele, na talanoa mai le toalua o lenei tamaitai ia te au. Sa ia fai mai, “Ou te faamalie atu sa matuā fefe lava lou toalua. Na o le pau le auala na mafai ai ona ou faamafanafana ia te ia o le ta’u atu lea i ai o ‘Elder Nelson o loo i ai i lenei malaga, o le mea lea e le tatau ai ona e popole.’”

Ou te le mautinoa pe o lo’u i ai i lena malaga na tatau ai ona ia maua se mafanafana, ae ou te fai atu o se tasi o mea moni o le olaga faaletino e faapea o lo tatou faatuatua o le a tofotofoina ma luitauina. O nisi taimi o na tofotofoga e oo mai a o tatou fetaiai ma mea e foliga mai o ni fetaiaiga o le ola ma le oti. Mo lenei tamaitai fefe, o se vaalele e matautia le luluina e tuuina mai ai se tasi o na taimi o tofotofoga pe a tofotofoina le malosi o lo tatou faatuatua.

Pe a tatou talanoa e uiga i le faatuatua—le faatuatua lea e mafai ona aveesea ai mauga—tatou te le o talanoa i le faatuatua i se tulaga lautele ae o le faatuatua i le Alii o Iesu Keriso. O le faatuatua i le Alii o Iesu Keriso e mafai ona faamalosia pe a tatou aoao e uiga ia te Ia ma ola i o tatou talitonuga faalelotu. O le mataupu faavae a Iesu Keriso na mamanuina e le Alii e fesoasoani ai ia i tatou e faatuputeleina lo tatou faatuatua. Peitai, i le gagana masani ua faaaogaina i aso nei, o le upu talitonuga faalelotu e mafai ona eseese ona uiga i tagata eseese.

O le upu talitonuga faalelotu o lona uiga moni “ia toe fusia” po o le “ia noatia atu” i le Atua.1 O le fesili e tatau ona fesiligia ai i tatou lava o le, o i ai sa tatou talitonuga malosi i le Atua ina ia faaalia ai lo tatou faatuatua, pe ua noatia moni i tatou i se isi mea? Mo se faataitaiga, ua ou faalogo i talanoaga i taeao o Aso Gafua e uiga i ni taaloga afeleti faapolofesa e faia i Aso Sa e muamua ai. Mo nisi o nei tagata tapuai tuuto, sa ou mafaufau pe o o latou “talitonuga faalelotu” o le a na ona “noatia ai i tua i latou” i nisi o ituaiga o taaloga.

Tatou te ono fesili ia i tatou lava taitoatasi, po o fea lo tatou faatuatua? O i ai i se au? O i ai i se ituaiga o [oloa]? O i ai i se tagata lauiloa? E oo lava i au e silisili ona lelei e mafai ona toilalo. E mafai ona mou ese atu tagata lauiloa. Ua na o le Tasi lava [le tagata] e saogalemu ai i taimi uma lou faatuatua, o le Alii o Iesu Keriso. Ma e manaomia ona e faaali atu ou talitonuga!

Sa folafola mai e le Atua i le poloaiga muamua o Ana Poloaiga e Sefulu, “Aua ne’i e fai mo oe ni atua ese i o’u luma.”2 Sa ia fetalai foi, “Vaai mai ia te a’u i mafaufauga uma; aua le masalosalo, aua le fefe.”3 Ae o le toatele o tagata ua na o a latou paleni o faletupe e vaavaai i ai mo le filemu po o uso a tagata mo ni faataitaiga e mulimuli i ai.

O fomai polofesa, polofesa o a’oga, ma le au faaupufai e tele lava ina tofotofoina le faatuatua. I le tulitulimatagauina o a latou sini, pe o le a faaalia ea o latou talitonuga faalelotu pe o le a natia? Pe ua noatia i latou i le Atua po o le tagata?

Sa ou maua sea tofotofoga i le tele o tausaga ua mavae, ina ua aoaiina au e se tasi o au uo faigaluega faafomai mo le le mafai ona tuueseeseina o lo’u malamalama faalematata mai o’u talitonuga maumaututu faalelotu. Sa ia faatonu mai ia aua ne’i o’u tuufaatasia mea e lua. E mafai faapefea ona ou faia lena mea? O le upumoni o le upumoni! E le mavavaeeseina, ma o soo sona vaega e le mafai lava ona faataatia ese.

Pe o le upumoni e alia’e mai se falesuesue faasaienitisi pe e auala mai i faaaliga, o upumoni uma lava e pogai mai le Atua. O upumoni uma o se vaega o le talalelei a Iesu Keriso.4 Ae, na faatonuina au e natia o’u talitonuga. Ou te le i usitaia le talosaga a lo’u uso faigaluega. Sa ou faaali atu o’u talitonuga!

I taumafaiga uma faalematata, e manaomia ai le malosi o tulaga faatonuina sa’o a’ia’i. E faataua e tagata atamamai o latou saolotoga o le faaalia o manatu. Ae o le saolotoga atoatoa e le mafai ona tupu pe afai o se vaega o le malamalama o se tasi ua pulea e tulafono a tagata “ina ia le taliaina”.

E le mafai ona le amanaiaina le upumoni faaleagaga—aemaise lava poloaiga paia. O le tausia o poloaiga paia e aumaia ai faamanuiaga,5 i taimi uma! O le solia o poloaiga paia e le aumaia ai faamanuiaga, i taimi uma!

Ua tele faafitauli i lenei lalolagi ona ua tumu i tagata lē atoatoa. O o latou faamoemoega ma manaoga ua uunaia malosi e lo latou faatuatua pe o le leai foi [o le faatuatua]. E toatele tagata ua faamuamuaina isi mea i lo le Atua. O nisi ua latou fesiligiaina le taua o talitonuga faalelotu i le olaga o aso nei. E pei ona i ai i vaitaimi uma o le lalolagi, ua faapena foi i aso nei o loo i ai i latou o e faifai ma faitio i le faatinoga saoloto o talitonuga faalelotu. Ua oo lava i nisi ua tuuaia talitonuga faalelotu mo le tele o faafitauli i le lalolagi. O le mea moni, sa i ai taimi sa faatino ai le amioleaga e faaaoga ai talitonuga faalelotu e fai ma mafuaaga. Ae o le ola ai i le amio atua o le Alii, o lona uiga o le taumafai ia avea o se soo moni o Iesu Keriso, o le auala lea e ola ai ma se tautinoga i aso uma o le a tuuina mai le taitaiga faalelagi. A e faatinoina ou talitonuga faalelotu, ua e faaaogaina lou faatuatua. Ua e faaalia ou talitonuga.

Sa silafia e le Alii o le a manaomia e Ana fanau ona aoao i le auala e saili ai o Ia. “Aua e vaapiapi le faitotoa,” Na ia fetalai ai, “ma lauitiiti le ala e tau i le faaeaga … , ma e toaitiiti ē e i ai e mauaina.”6

O tusitusiga paia e maua ai se tasi o ala sili e saili ai lo tatou auala ma tumau ai. O le malamalamaaga i tusitusiga paia e maua ai foi le puipuiga taua. Mo se faataitaiga, i le talafaasolopito atoa, o siama e pei o “fiva i le taimi e fanau ai” na mafua ai ona maliliu le toatele o tina ma pepe ta’umamaina. Peitai, sa i ai i le Feagaiga Tuai le mataupu faavae sa’o mo le taulimaina o tagata mamai, sa tusia i le silia ma le 3,000 tausaga talu ai!7 Sa toatele tagata na faaumatiaina ona o le sailiga a le tagata mo le atamai na le mafai ai ona faalogo i le afioga a le Alii!

O’u uso e ma tuafafine pele, o le a le mea o loo tatou misia i o tatou olaga pe afai o loo tatou “aoaoina e le aunoa, [ae] e le āu mafai ona oo ina iloa lelei o le upumoni”?8 E mafai ona tatou mauaina le atamai silisili mai i tusitusiga paia ma maua musumusuga e ala i tatalo o le faatuatua.

O le faia o lena mea o le a fesoasoani ai ia i tatou a o tatou faia faaiuga i aso taitasi. Aemaise lava pe a fatuina ma faamalosia tulafono a tagata, e tatau lava ona avea tulafono a le Atua ma a tatou tulaga faatonuina i taimi uma. Pe a feagai ai ma mataupu feteenai, e tatau ona tatou saili muamua i le taitaiga a le Atua.

E tatau ona tatou “faatatauina tusitusiga paia uma ia te i [tatou], … ma o [tatou] manuia ma aoaoga.”9 E latalata mai tulaga lamatia pe a tatou taumafai e vaelua i tatou lava i faaupuga e pei o le “o lo’u olaga patino” po o “o la’u amio e sili ona lelei.” Afai e taumafai se tasi e vaevae lona olaga i ni vaega eseese, o le a le tulai ae se tasi i le tino atoa o le amiosao patino o le tagata lava ia—o le a le avea lava ma mea uma e mafai ona avea moni ai o ia lava.

O le faaosoosoga ia lauiloa e mafai ona faamuamua ai manatu lautele i lo le afioga a le Atua. O faatosinaga faaupufai ma fuafuaga faalauiloa ua tele ina faaaoga ai palota o manatu o tagata lautele e atiina ae ai a latou fuafuaga. O taunuuga o na palota e anoa. Ae e tau le mafai ona faaaogaina e fai ma mafuaaga e faamaonia ai le le usiusitai i poloaiga a le Atua! E tusa lava pe o “faia e tagata uma,” o le sese e le mafai lava ona sa’o. O mea leaga, mea sese, ma le pogisa o le a lē avea lava ma upumoni, e tusa lava pe lauiloa. Ua folafola mai e se lapataiga faatusitusiga paia: “Oi talofa ia te i latou o e fai mai, ua lelei le mea leaga, a e leaga le mea lelei; o e fai ma malamalama le pouliuli, a e fai foi ma pouliuli le malamalama.”10

Ina ua mavae le Taua Muamua o le Lalolagi, sa lauiloa ai se pese e le lelei. I le faalauiloa ai o le ola le mama, na tautino atu ai e le mafai ona sese ia tagata e 50 miliona. Ae o le mea moni, e mafai ona sese le 50 miliona o tagata—e matuai sese lava. O le ola le mama o le ola le mama lava lea e tusa ai ma le silafaga a le Atua, o lē o le a i ai se aso o le a faamasinoina uma ai a tatou galuega ma manaoga.11

Faatusatusa le fefe ma le leai o se faatuatua ia ua taatele i le lalolagi i le taimi nei ma le faatuatua ma le lototele o lo’u afafine pele o Emily, o lē o loo aumau nei i le isi itu o le veli. A o tuua ai e le ola faaletino lona tino sa faatumulia i le kanesa, sa tau le mafai ona tautala. Ae faatasi ai ma se ataata i ona fofoga, sa ia faapea mai ia te au, “Tama, aua e te popole mai ia te au. Ou te iloa o le a lelei mea uma!” Sa faaalia le faatuatua o Emily—sa faaalia ma le malosi—i lena taimi faamomoiloto, i le taimi tonu sa matou matuā manaomia ai.

O lenei tina talavou lalelei e toalima le fanau sa tumu lona faatuatua i lona Tama Faalelagi, i Lana fuafuaga, ma i le manuia e faavavau o lona aiga. Sa fusia o ia ma le saogalemu i le Atua. Sa matua’i faamaoni atoa i feagaiga sa osia ma le Alii ma lona toalua. Sa ia alofa i lana fanau, ae sa filemu, e ui o le a vave ona ia aluese mai ia i latou. Sa ia te ia le faatuatua i lona lumanai, ma lo latou foi [lumanai], ona sa ia te ia le faatuatua i lo tatou Tama Faalelagi ma Lona Alo.

I le 1986, sa saunoa ai Peresitene Thomas S. Monson: “E moni o le a tatou fetaiai ma le mata’u, lagona le tauemuina ma fetaiai ma mea e faasagatau mai. Ia tatou maua le lototele e tetee atu ai i mea ua talitonu i ai le toatele, le lototele e tutu ai mo mataupu faavae. O le lototele, ae le o le palaai, e maua ai le faamaoniga fiafia a le Atua ia i tatou. … Ia manatua e tofu tagata uma ma mea e fefe i ai, ae mo i latou e faafetaiaia mea latou te fefefe i ai i le [faatuatua] ua ia i latou foi le lototele.”12

O fautuaga a Peresitene Monson e moni lava! O lea ou te aioi atu ai ia te outou, ou uso ma tuafafine pele: I lea aso ma lea aso, i luga o outou ala e agai atu i o outou taunuuga e faavavau, ia faateleina lo outou faatuatua. Folafola atu lo outou faatuatua! Ia faaalia lo outou faatuatua!13

Ou te tatalo ia outou fusia ma le saogalemu i le Atua, o Ana upumoni e faavavau o le a tamau i o outou loto e faavavau. Ma ou te tatalo, i o outou olaga atoa, o le a outou faaalia lo outou faatuatua! I le suafa o Iesu Keriso, amene.

Faamatalaga

  1. A fanau mai se pepe, e sautualua le tā’aiga o le uso ma e le fepiitai i le va o na uso e lua. O le uso o se nonoa—o se nonoa mau. O le upu religion e sau mai i a’a upu Latina, o le re o lona uiga o le “toe fai” po o le “toe foi i tua” ma e faapena foi le upu ligare, o lona uiga o le “ia noatia” po o e “ia nonoa.” O le mea lea, tatou te malamalama ai o le religion po o talitonuga faalelotu e “noatia atu ai ē talitonu i le Atua.”

  2. Esoto 20:3. Ma le isi, na fetalai mai le Alii, “Liliu mai ia, ina liliu ese i a outou tupua; ia liliu ese … i a outou mea inosia uma” (Esekielu 14:6).

  3. Mataupu Faavae ma Feagaiga 6:36.

  4. Tagai Spencer W. Kimball, The Teachings of Spencer W. Kimball, ed. Edward L. Kimball (1982), 391.

  5. Tagai Mosaea 2:41; Mataupu Faavae ma Feagaiga 58:30–33; 82:10. E moni lenei mataupu faavae mo tagata uma, aua “E le faailogaina tagata e le Atua” (Galuega 10:34; tagai foi Moronae 8:12).

  6. Mataupu Faavae ma Feagaiga 132:22.

  7. Tagai Levitiko 15:13.

  8. 2 Timoteo 3:7.

  9. 1 Nifae 19:23.

  10. Isaia 5:20.

  11. O loo aoao mai Tusitusiga Paia: “O mai ia i le Alii, le Paia e Toatasi. Ia outou manatua ua amiotonu ona ala. Faauta, o le ala mo le tagata e vaapiapi, ae ua taatia tonu i se ala sa’o i ona luma, ma o le leoleo o le faitotoa o le Paia e Toatasi o Isaraelu; ma na te le faaaogaina se auauna iina; ma ua leai se isi lava auala vagana ai i le faitotoa; ona e le mafai ona faaseseina o ia, ona o le Alii le Atua o lona suafa lea” (2 Nifae 9:41).

  12. Thomas S. Monson, “Courage Counts,” Ensign, Nov. 1986, 41. I se isi taimi, na tuu mai ai e Peresitene Monson lenei apoapoaiga musuia: “Ina ia ola sili atu, e tatau ona tatou atiaeina le gafatia e faafetaiaia ai faafitauli i le lototele, le le fiafia i le fiafia, ma le manumalo i le lotomaualalo. … O i tatou o atalii ma afafine o se Atua soifua, o le ana le faatusa ua foafoa ai i tatou. … E le mafai ona tatou taofia ma le faamaoni lenei talitonuga maumaututu e aunoa ma le lagonaina o se lagona loloto fou o le malosi ma le mana, e oo lava i le malosi e ola ai i poloaiga a le Atua, le mana e tetee atu ai i faaosoosoga a Satani” (“Yellow Canaries with Gray on Their Wings,” Ensign, July 1973, 43).

  13. “Faafiti outou lava mai mea uma e le faaleatua” (Moronae 10:32). Aua nei sili atu ona fefe i tagata nai lo le Atua (tagai Mataupu Faavae ma Feagaiga 3:7; 59:5).