Ua Neej Raws Li Kev Ntseeg

Kuv nyiam lub Koom Txoos no zaj keeb kwm kawg li. Tej zaum nyaj nej ua ib yam li kuv ua thiab, es kuv txoj kev ntseeg khov tuaj thaum kuv kawm txog txoj kev mob siab ntawm kuv cov poj koob yawm txwv uas lees txais txoj moo zoo thiab ua lawv lub neej raws li kev ntseeg.

Ib hlis dhau los, 12,000 tus tub ntxhais hluas zoo uas nyob hauv lub nroog Gilbert, Arizona lub Tuam Tsev Koog Chaw tuaj ua kev zoo siab txog txoj kev ua lub tuam tsev tshiab tiav thiab ua yeeb yam uas tshoov peb tej siab, uas qhia hais tias lawv txiav txim siab yuav ua lawv lub neej ncaj ncees. Lawv muab lawv txoj kev ua koob tsheej no hu ua “Ua lub Neej Raws Li Kev Ntseeg.”

Txhua tus Neeg Ntseeg hauv Hnub Nyoog Kawg yuav tsum txiav txim siab ib yam li cov tub ntxhais hluas nyob hauv Arizona kom “ua lub neej raws li kev ntseeg.”

Cov lus ntawm ib zaj nkauj hais tias, “Coj raws li kev ntseeg uas peb niam peb txiv tau hlub tshua” (“True to the Faith,” Hymns, 254).

Peb sau tau ntxiv hais tias, “Coj raws li kev ntseeg uas peb poj koob yawm txwv tau hlub tshua.”

Kuv xav hais tias xyov cov tub ntxhais hluas uas nyob hauv Arizona ntawd puas paub lawv tsev neeg keeb kwm hauv lub Koom Txoos zoo li cas—puas paub zaj keeb kwm hais tias lawv tsev neeg los zwm rau lub Koom Txoos yog li cas. Nws yuav yog ib qho zoo yog hais tias txhua tus Neeg Ntseeg hauv Hnub Nyoog Kawg paub lawv poj koob yawm txwv zaj uas lawv ua li cas los zwm rau lub Koom Txoos.

Txawm tias nej yog xeeb ntxwv ntawm ib tug pioneer los sis tsis yog, cov pioneer Maumoos zaj keeb kwm muaj kev ntseeg thiab kev txi yog nej zaj thiab. Nws yog zaj keeb kwm muaj koob meej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

$Ib lub sij hawm hauv lub Koom Txoos zaj keeb kwm uas zoo heev yog thaum Wilford Woodruff, tus Tswv ib tug Thwj Tim, qhia Yexus Khetos txoj moo zoo nyob thoob plaws Akiv teb chaws thaum xyoo 1840—yuav luag 10 xyoo tom qab txhim tsa lub Koom Txoos xwb.

Wilford Woodruff thiab lwm cov Thwj Tim ua hauj lwm ntau hauv tej zos Liverpool thiab Preston hauv Akiv teb, thiab ua tau hauj lwm zoo heev. Txwj Laug Woodruff, tus uas tom qab ntawd los ua tus Thawj Tswj Hwm ntawm lub Koom Txoos, tau thov tsis tu ncua rau Vajtswv kom coj nws kev ua txoj hauj lwm tseem ceeb heev no. Vim los ntawm nws txoj kev thov nws txais kev tshoov siab mus lwm qhov chaw thiab qhia txoj moo zoo.

Thawj Tswj Hwm Monson tau qhia peb tias thaum Vajtswv tshoov peb siab mus ua dab tsi, peb cia li ua tam sim ntawd—peb tsis laug sij hawm. Wilford Woodruff tau ua li ntawd. Vim tus Ntsuj Plig qhia meej meej kom nws “mus … sab nram hav,” Txwj Laug Woodruff ncaim mus tam sim ntawd thiab taug kev mus txog sab teb chaws Akiv hu ua Herefordshire—sab teb chaws ua teb nyob Akiv sab qab teb rau sab hnub poob. Nyob ntawd nws ntsib ib tug txiv neej uas ua teb zoo heev hu ua John Benbow, uas “zoo siab thiab ris txiaj” tos txais nws (Wilford Woodruff, nyob hauv Matthias F. Cowley, Wilford Woodruff: History of His Life and Labors as Recorded in His Daily Journals [1909], 117).

Ib co neeg uas muaj 600 tawm leej, uas muab lawv tus kheej hu ua United Brethren, tau “thov kom yuav txais kev tshoov siab thiab kev tseeb” (Wilford Woodruff, nyob hauv Teachings of Presidents of the Church: Wilford Woodruff [2004], 91). Tus Tswv xa Wilford Woodruff teb lawv cov lus thov.

Txoj kev Txwj Laug Woodruff mus qhia coj tau koob hmoov los sai sai, thiab coob tug tau ua kev cai raus dej. Brigham Young thiab Willard Richards mus nyob nrog nws nram Herefordshire, thiab lawv peb tug Thwj Tim ua hauj lwm tau koob hmoov zoo.

Ob peb lub hli tom qab ntawd xwb, lawv txawm tsa tau 33 ceg ntseeg rau 541 tug mej zeej uas tau los zwm rau lub Koom Txoos. Lawv tseem ua hauj lwm ntxiv, thiab thaum kawg yuav luag txhua tus mej zeej ntawm pab United Brethren ua kev cai raus dej rau hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Kuv poj koob tus pog hu ua Hannah Maria Eagles Harris yog ib tug ntawm thawj cov neeg uas mloog Wilford Woodruff. Nws qhia rau nws tus txiv, Robert Harris Jr., hais tias nws tau hnov Vajtswv txoj lus thiab nws npaj yuav ua kev cai raus dej. Robert tsis zoo siab thaum nws hnov nws tus poj niam hais li no. Nws hais rau nws tus poj niam hais tias nws yuav nrog nws tus poj niam mus thaum lwm zaus tus tub txib Maumoos qhia, thiab nws yuav qhia qhov tseeb rau tus tub txib ntawd.

Nws zaum tom hauv ntej ntawm cov neeg tuaj mloog, xav ntsoov tias nws yuav tsis ntseeg, thiab tej zaum xav hais lus thuam tus xib hwb uas tuaj qhia me ntsis, ces tus Ntsuj Plig cia li tshoov Robert lub siab, ib yam li tau ua rau nws tus poj niam. Nws paub hais tias zaj xov ntawm txoj kev Txum Tim txoj moo zoo muaj tseeb, thiab nws thiab nws tus poj niam tau ua kev cai raus dej.

Txhiab txhiab tug kuj muaj tej zaj txog txoj kev ntseeg zoo li nkawd zaj thiab: thaum lawv hnov txoj moo zoo zaj xov xwm, lawv paub tias nws muaj tseeb!

Ib yam li tus Tswv hais tias, “Kuv pab yaj paub kuv lub suab, thiab kuv paub kuv pab yaj thiab pab yaj raws kuv qab” (Yauhas 10:27).

Vim lawv hnov tus Tswv Yug Yaj lub suab, lawv txiav txim siab kiag ua neej raws li txoj moo zoo thiab ua raws li tus Tswv tus yaj saub txoj kev cob qhia. Lawv ncaim lawv lub tsev hauv Akiv teb raws li luag hais kom sib sau rau ntawm Xi-oos, thiab hla lub pas dej hiav txwv Atlantic, thiab sib sau nrog lwm cov Neeg Ntseeg hauv Nauvoo, Illinois.

Lawv ntseeg txoj moo zoo kawg siab kawg ntsws. Thaum lawv tseem pib lawv lub neej hauv teb chaws tshiab, lawv kuj pab ua lub tuam tsev Nauvoo pub lawv lub dag lub zog ib feem kaum—ib hnub ntawm kaum hnub lawv ua hauj lwm pab ua lub tuam tsev.

Lawv tu siab heev thaum lawv hnov xov hais tias tus yaj saub uas lawv hlub, Yauxej Xamiv, thiab nws tus tij laug Hyrum tau tuag. Tiam sis lawv tseem nyiaj mus tom ntej! Lawv ua raws li kev ntseeg.

Thaum cov Ntseeg raug muab tsim txom thiab khiav ntawm Nauvoo, Robert thiab Maria xav hais tias nkawd muaj hmoov vim nkawd tau txais lub vaj txiaj ntsim hauv lub tuam tsev, tsis ntev ua ntej lawv hla tus dej Mississippi mus sab hnub poob. Txawm yog hais tias lawv tsis paub xyov tom ntej yuav zoo li cas, lawv tso siab tau rau lawv txoj kev ntseeg thiab zaj lus tim khawv.

Nkawd coj nkawd rau tus me nyuam taug kev tsuj av nkos hla Iowa mus rau sab hnub poob. Lawv ua tau ib lub tsev pheeb suab ze tus dej Missouri nyob ntawm qhov chaw uas tom qab ntawd hu ua Winter Quarters.

Cov pioneer siab loj no tos ntsoov cov thwj tim qhia seb lawv yuav mus li cas ntxiv thiab yuav mus thaum twg. Tiam sis tej yam uas lawv npaj yuav ua txawm hloov thaum Brigham Young, tus Thawj Tswj Hwm ntawm Pawg Kaum Ob tug, tau xa xov thov kom ib co txiv neej los ua hauj lwm pub rau teb chaws Amelikas pab tub rog, pab uas tom qab lawv muab hu ua Mormon Battalion.

Robert Harris Jr. yog ib tug ntawm 500 tus txiv neej pioneer Maumoos uas ua raws li Brigham Young tau thov. Txawm tias nws yuav tsum ncaim nws tus poj niam uas xeeb me nyuam thiab nkawd rau tus me nyuam yaus los, nws rau npe ua tub rog.

Vim li cas nws thiab lwm cov txiv neej thiaj kam ua li ntawd?

Kuv yawg koob tus yawg cov lus teb tau qhov no. Thaum pab tub rog tab tom taug mus rau lub zos Santa Fe, nws sau hauv ib tsab ntawv rau nws tus poj niam hais tias, “Kuv txoj kev ntseeg yeej tseem ruaj heev li qub [thiab thaum kuv xav txog tej yam Brigham Young qhia peb], kuv ntseeg nws ib yam li yog hais tias yog Vajtswv uas Muaj Hwj Chim kiag, uas qhia kuv.”

Nws paub meej meej hais tias nws mloog Vajtswv ib tug yaj saub, ib yam li lwm cov txiv neej paub thiab. Vim li ntawd lawv thiaj kam ua qhov ntawd! Lawv paub hais tias Vajtswv ib tug yaj saub coj lawv kev.

Hauv tsab ntawv ntawd, nws kuj qhia txog nws txoj kev hlub rau nws tus poj niam thiab cov me nyuam thiab qhia tias nws thov Vajtswv tsis tu ncua kom nws tus poj niam thiab cov me nyuam yuav tau koob hmoov.

Tom qab ntawd, nws tau sau cov lus tseem ceeb no ntxiv hauv tsab ntawv hais tias: “Wb yuav tsum tsis txhob hnov qab tej yam uas koj thiab kuv tau hnov thiab [tau muaj tshwm sim] hauv tus Tswv lub Tuam Tsev.”

Cov lus no nrog rau nws zaj lus pov thawj uas nws hais ua ntej hais tias “Vajtswv ib tug Yaj Saub coj peb kev,” yog ob nqe lus qhuab qhia uas dawb ceev zoo li vaj lug kub rau kuv.

Kaum yim lub hli tom qab nws ncaim mus nrog pab tub rog, Robert Harris rov qab los txog vaj txog tsev zoo nyob nrog Maria uas nws hlub. Nkawd muaj kev ntseeg ua raws li txoj moo zoo mus tas nkawd lub neej. Nkawd muaj 15 tug me nyuam, 13 tug uas ciaj dhau hluas. Kuv pog Fannye Walker, uas nyob hauv Raymond, Alberta, Canada, yog ib tug ntawm lawv 136 tug me nyuam xeeb ntxwv.

Kuv pog Walker zoo siab txog qhov uas nws yawg tau ua tub rog nrog pab Mormon Battalion, thiab nws xav kom tag nrho nws cov me nyuam xeeb ntxwv paub li ntawd. Tam sim no vim kuv yog ib tug yawg lawm, kuv to taub vim li cas qhov ntawd tseem ceeb rau nws. Nws xav kom cov me nyuam tej siab tig los rau tej txiv. Nws xav kom nws cov me nyuam xeeb ntxwv paub lawv zaj keeb kwm ncaj ncees—vim nws paub hais tias qhov ntawd yuav foom koob hmoov rau lawv lub neej.

Thaum peb lub siab yim npuab peb tej poj koob yawm txwv uas ncaj ncees, peb yim yuav xaiv ua tej yam uas muaj qab hau thiab ncaj ncees.

Yeej zoo li no tiag. Peb txhua tus yuav tau koob hmoov yog peb paub tej zaj dab neeg txog kev ntseeg thiab kev txi uas coj peb poj koob yawm txwv los zwm rau tus Tswv lub Koom Txoos.

Txij thaum thawj zaug Robert thiab Maria hnov Wilford Woodruff qhia thiab ua tim khawv txog txoj kev Txum Tim txoj moo zoo rov qab los, nkawd paub hais tias txoj moo zoo muaj tseeb.

Nkawd kuj paub hais tias txawm nkawd muaj teeb meem los sis kev nyuaj siab dab tsi los, nkawd yuav tau koob hmoov vim nkawd tau ua raws li txoj kev ntseeg. Zoo li nkawd tau hnov cov lus uas peb tus yaj saub niaj hnub no tau hais, hais tias, “Tsis muaj kev txi uas loj dhau … xwv kom yuav tau [tej] koob hmoov ntawm [lub tuam tsev]” (Thomas S. Monson, “The Holy Temple—a Beacon to the World,” Ensign los sis Liahona, Tsib Hlis Ntuj 2011, 92).

Ib lub nyiaj npib Akiv uas muaj nqi ob pound muaj lus sau rau nws ib sab hais tias “Sawv ntawm tej Neeg Loj Siab tej Xub Pwg.” Thaum kuv xav txog peb tej poj koob yawm txwv pioneer uas zoo, kuv xav hais tias peb txhua tus sawv ntawm tej neeg loj siab tej xub pwg.”

Txawm tias cov lus qhuab qhia yog los ntawm Robert Harris, kuv xav hais tias ntau tus poj koob yawm txwv yuav hais tib co lus xa rau lawv cov me nyuam thiab me nyuam xeeb ntxwv thiab hais tias: Qhov thib ib, peb yuav tsum tsis txhob hnov qab tej yam uas peb hnov thiab pom hauv lub tuam tsev, thiab peb yuav tsum tsis txhob hnov qab tej lus cog tseg thiab tej koob hmoov uas peb txhua tus muaj vim los ntawm lub tuam tsev. Qhov thib ob, peb yuav tsum tsis txhob hnov qab tias Vajtswv ib tug yaj saub coj peb kev.

Kuv ua tim khawv tias Vajtswv ib tug yaj saub yeej coj peb kev. Tus Tswv tau muab Nws lub Koom Txoos txum tim rov qab los thaum hnub nyoog kawg los ntawm tus Yaj Saub Yauxej Xamiv, thiab peb yuav tsum tsis txhob hnov qab tias Vajtswv ib tug yaj saub yeej ib txwm coj peb kev, txij thaum Yauxej mus rau Brigham thiab mus rau ib tug Thawj Coj ntawm peb lub Koom Txoos dhau ib tug los txog rau peb tug yaj saub niaj hnub nim no-Thomas S. Monson. Kuv paub nws, kuv qhuas nws, kuv hlub nws. Kuv ua tim khawv tias nws yog tus Tswv tus yaj saub nyob hauv ntiaj teb tam sim no.

Kuv lub siab xav kom kuv cov me nyuam thiab me nyuam xeeb ntxwv, thiab peb sawv daws yuav hwm peb tej poj koob yawm txwv uas ncaj ncees zaj keeb kwm—cov pioneer Maumoos uas muaj kev ntseeg uas txaus siab tso txhua yam saum lub thaj txi thiab tiv thaiv lawv tus Vajtswv thiab lawv txoj kev ntseeg. Kuv thov kom peb txhua tus yuav ua peb lub neej raws li kev ntseeg uas peb niam peb txiv tau hlub tshua. Los ntawm Yexus Khetos lub npe uas dawb huv thiab dawb ceev, amees.