Kev Mloog Lus los ntawm Peb txoj Kev Rau Siab Ntseeg

Tsev neeg hmo ua ke uas kuv thiab Muam Perry muaj txhua txhua hnub Monday twb loj tuaj lawm. Kuv tus kwv, nws tus ntxhais, Barbara tus nus, thiab ib tug ntxhais xeeb ntxwv thiab nws tus txiv tau tsiv los nyob hauv peb koog tsev. Txij thaum kuv uas tub hluas los nov yog tib lub caij hauv kuv lub neej uas kuv muaj hmoov muaj tsev neeg nyob ze kuv. Thaum ntawd, kuv tsev neeg nyob hauv tib txoj kev uas kuv niam coob tus neeg neej tsa nyob thiab. Yawm Txiv Sonne lub tsev nyob ib sab ntawm peb lub tsev nyob rau sab qaum teb, es Tais Hluas Emma lub tsev nyob ntawm ib sab rau tim sab qab teb. Nyob sab kev tom ub ntawm sab qab teb yog Tais Hluas Josephine lub tsev, thiab tim sab hnub tuaj yog Dab Laug Alma lub tsev.

Thaum kuv tseem ua tub hluas peb niaj hnub nrog peb cov kwv tij neej tsa sib raug zoo thiab tau ua hauj lwm, ua si thiab sib xyuas ua ke. Peb niam yeej yuav paub sai sai yog tias peb mus thab plaub li cas. Tas sim no mas peb lub neej yeej txawv lawm deb—feem ntau mas tej yim neeg raug tawg mus nyob qhov txhia qhov chaw. Txawm tias lawv yeej nyob sib ze heev los, feem ntau lawv tsis nyob ntawm yus ib sab li ntawd. Txawm li ntawd los, kuv tseem ntseeg hais tias kuv txoj kev ua tub hluas thiab kuv lub neej tas sim no yeej muaj ntsis zoo li nyob saum ntuj ceeb tsheej, vim kuv tsev neeg uas kuv hlub yeej nyob sib ze. Qhov ntawd ua rau kuv nco qab tias tsev neeg yeej nyob tau ua ke tas mus ib txhis.

Thaum kuv tseem tab tom loj hlob, kuv yeej nrog kuv yawm txiv sib raug zoo heev. Kuv yog tus tub hlob hauv tsev neeg. Kuv thiaj tau mus kauv cov daus thaum lub caij ntug no thiab tau txiav cov nyom thaum lub caij ntug sov rau peb thiab yawm txiv lub tsev tib si, thiab tau ua li ntawd rau kuv ob tug phauj lub tsev thiab. Feem ntau yawm txiv zaum ntawm qab khav saib kuv txiav nws cov nyom. Thaum kuv txiav tas lawm, kuv mam li mus zaum ntawm qab khav thiab nrog nws tham me ntsis. Kuv yeej nco ntsoov tej lub sij hawm zoo ntawd.

Muaj ib hnub kuv txawm nug yawm txiv seb kuv yuav ua li cas thiaj paub tias kuv ua qhov yog, vim hais tias muaj ntau txoj kev xaiv hauv lub neej no. Li kuv yawm txiv ib txwm hais, nws txawm piav ib zaj dab neeg ua teb los teb kuv lo lus nug ntawd.

Nws qhia kuv txog txoj kev cob ib pab nees kom lawv yuav sib koom tes ua hauj lwm. Nws piav tias pab nees ntawd yuav tsum paub tseeb hais tias leej twg ua tus cob qhia. Ib tug yuam sij uas pab tswj kav thiab cob qhia tus nees yog lub xam xauv nees thiab txoj hlua nees. Yog tias ib tug nees ntawm pab nees ntawd ntseeg hais tias nws tsis tas mloog tus tswv tsav nees, ces pab nees ntawd yuav tsis sib koom tes sib zog ua hauj lwm.

Nim no cia peb kawm ntxiv txog kuv yawm txiv zaj lus qhia thaum kuv hais zaj lus piv txwv no. Leej twg ua tus cob qhia pab nees? Kuv yawm txiv ntseeg hais tias nws yeej yog tus Tswv. Nws yog tus uas muaj ib lub hom phiaj thiab ib txoj hau kev. Nws kuj yog tus cob qhia thiab tus uas tswj kav cov nees, thiab ces, txhua tus nees. Tus cob qhia yeej paub zoo tshaj, thiab tib yam uas pab tus nees paub tias nws tab tom ua qhov yog yog kom nws mloog lus thiab ua raws li tus cob qhia hais kom nws ua.

Kuv yawm txiv muab lub xam xauv nees thiab txoj hlua nees piv rau dab tsi? Thaum ntawd kuv ntseeg tias, es tas sim no kuv ntseeg tias, kuv yawm txiv tab tom qhia kom kuv ua raws li tus Vaj Ntsuj Plig Dawb Huv tej kev tshoov siab. Tam li kuv xav mas, lub xam xauv nees thiab txoj hlua nees yeej yog rau ntawm sab ntsuj plig. Ib tug nees uas mloog lus uas yog ib tug ntawm ib pab nees uas ua zoo, tsuas xav tau ib tug neeg maj mam rub txoj hlua nws thiaj ua raws nraim li tus cob qhia xav kom nws ua. Txoj kev maj mam rub li no zoo ib yam nkaus li lub suab me, yaus uas tus Tswv siv thaum Nws hais lus rau peb. Vim saib tau peb txoj kev ywj siab xaiv rau nqi, yeej tsis yog sib zog rub.

Feem ntau cov txiv neej thiab poj niam uas tsis quav ntsej tus Ntsuj Plig tej kev tshoov siab me me yuav kawm, ib yam li tus tub loj leeb, hais tias yuav muaj xwm dab tsi thaum yus tsis mloog lus thiab ua neej tsis tsim txiaj. Twb yog tom qab nws raug tej yam xwm ntawd tus tub loj leeb thiaj li txo hwj chim ces tau ”nco dheev” thiab tau hnov tus Ntsuj Plig tej lus uas hais kom nws rov qab mus rau nws Txiv lub tsev (saib Lukas 15:11–32).

Ces kuv yawm txiv zaj lus qhia twb yog kom kuv yuav tsum npaj tos los txais yuav tus Ntsuj Plig txoj kev cob qhia txhua txhua lub sij hawm. Nws qhia kuv tias kuv yeej yuav txais tej kev tshoov siab yog tias kuv tawm ntawm nws txoj hau kev. Thiab kuv yuav tsis ua tej kev txhaum loj heev yog tias kuv cia tus Ntsuj Plig coj kuv kev thaum twg kuv txiav txim.

Li Yakanpaus 3:3 hais, “Peb xam xauv rau nees, nees thiaj mloog peb lus, peb thiaj tswj tau kom nees mus qhov uas peb xav mus.”

Peb yuav tsum ua tib zoo mloog peb cov xam xauv nees rau peb sab ntsuj plig. Txawm tus Xib Hwb sim rub me me xwb los, peb yuav tsum muaj lub siab kam pauv peb txoj hau kev. Yog xav ua zoo hauv lub neej no, peb yuav tsum qhia peb tus ntsuj plig thiab lub cev kom sib koom tes ua raws li Vajtswv cov lus txib. Yog peb ua raws li tus Vaj Ntsuj Plig Dawb Huv tej kev tshoov siab, ces peb tus ntsuj plig thiab lub cev yuav koom tib lub ntsiab uas yuav coj peb rov qab mus rau peb lub tsev uas nyob mus ib txhis nrog peb Leej Txiv Saum Ntuj Ceeb Tsheej.

Hauv peb nqe kev ntseeg thib peb, peb kawm hais tias txoj kev mloog lus tseem ceeb npaum li cas hais tias: “Peb ntseeg tias dhau los ntawm Khetos txoj Kev Theej Txhoj los, tib neeg sawv daws yuav tau kev cawm dim, thaum lawv ua raws li tej kev cai thiab kab ke ntawm txoj Moo Zoo.”

Txoj kev mloog lus uas kuv yawm txiv hais txog hauv nws zaj lus piv txwv txog ib pab nees kuj qhia txog txoj kev tso siab thiab—uas yog hais tias, txoj kev tso siab plhuav rau tus cob qhia pab nees ntawd. Yog li ntawd, zaj lus qhia uas kuv yawm txiv qhia kuv, kuj piv tau txog thawj txoj ntsiab cai hauv txoj moo zoo uas yog—txoj kev ntseeg Yexus Khetos.

Tus Thwj Tim Pov Lauj qhia tias, “Kev ntseeg yog qhov uas peb paub tseeb hais tias peb yuav tau tej uas peb cia siab rau thiab yog qhov uas peb cia siab ntsoov rau tej uas peb qhov muag tsis pom” (Henplais 11:1). Ces Pov Lauj tau qhia txog Anpees, Enauj, Nau-as, thiab Anplaham uas ua yam ntxwv txog kev ntseeg. Nws tau piav ntau heev txog Anplaham, vim Anplaham yog leej txiv rau cov neeg uas rau siab ntseeg:

”Twb yog vim Anplahas ntseeg, thaum Vajtswv kom Anplahas tawm mus nyob lub teb chaws uas Vajtswv cog lus tseg hais tias Vajtswv yuav muab pub rau nws, nws thiaj mloog Vajtswv lus. Anplahas tawm hauv nws lub teb chaws mus, tiam sis nws tsis paub hais tias xyov nws yuav mus qhov twg.

“Twb yog vim Anplahas ntseeg, Anplahas thiaj tau mus nyob lub teb chaws uas Vajtswv cog lus tseg hais tias Vajtswv yuav muab pub rau nws nyob. …

“Twb yog vim Anplahas ntseeg, Anplahas thiaj muaj tub muaj ki. Txawm yog nws laus heev thiab Xalas ib txwm xeeb tsis taus tub los nws cia siab hais tias Vajtswv yeej yuav ua raws li Vajtswv tej lus cog tseg” (Henplais 11:8–9, 11).

Peb paub hais tias dhau ntawm Anplahas thiab Xalas tus tub, Ixaj, Apnplahas thiaj tau lus cog tseg hais tias—nws yuav muaj xeeb ntxwv “coob npaum li cov hnub qub uas nyob saum nruab ntug thiab npaum li cov suab zeb nram ntug hiav txwv uas tsis muaj neeg suav txheeb” (saib nqi 12; kuj saib Chiv Keeb 17:15–16). Ces thiaj tau sim Anplaham txoj kev ntseeg ntau tshaj qhov uas peb txhua tus yuav xav tias peb nyiaj tsis tau.

Kuv twb xav ntau zaus txog zaj dab neeg uas piav txog Anplaham thiab Ixaj, thiab tseem xav tias kuv tsis to taub tag nrho txog Anplaham txoj kev ntseeg thiab kev mloog lus. Tej zaum kuv xav tau txog ib tag kis sawv ntxov thaum nws sawv los ntim khoom, tiam sis nws ua li cas thiaj taug kev nrog nws tus tub Ixaj tau peb hnub mus thiaj txog lub Roob Mauliyas? Nkawd ua li cas thiaj nqa tau taws mus pem roob yuav rauv taws? Nws ua li cas thiaj ua tau lub thaj? Nws ua li cas thiaj khi Ixaj thiab tso nws saum lub thaj? Nws ua li cas thiaj piav rau nws tias nws yuav yog qhov uas muab txi? Thiab nws ua li cas thiaj ua siab loj txaus tsa tau rab riam yuav tua nws tus tub? Anplaham txoj kev ntseeg cia nws ua raws nraim li Vajtswv cob qhia mus txog rau thaum tus tim tswv hu saum ntuj ceeb tsheej los, tshaj tawm hais tias Anplaham twb xeem tau dhau txoj sim siab loj kawg nkaus no. Ces tus Tswv tus tim tswv rov qab cog tej lus ntawm Anplaham txoj kev khi lus tseg.

Kuv yeej paub tias txoj kev ntseeg Yexus Khetos thiab kev mloog lus yuav nyuaj dua rau ib txhia neeg. Kuv twb ua neej nyob ntev txaus kuv thiaj paub tias txhua tus nees nyias muaj nyias tus cwj pwm, yog li ntawd, ib txhia yooj yim cob qhia es ib txhia nyuaj nyuaj thiab tias tib neeg haj yam sib txawv txav. Peb txhua leej txhua tus yog Vajtswv ib tug tub los sis ntxhais, thiab peb nyias muaj nyias zaj dab neeg ua ntej peb yug los thiab hauv ntiaj teb no tib si. Yog li ntawd, tsis tshua muaj ib txoj kev pab uas zoo ib yam nkaus rau txhua tus neeg. Ces kuv thiaj paub tias muaj txoj kev xyaum ua thiab ua yuam kev hauv lub neej no, ces qhov tseem ceeb tshaj plaws, yog qhov uas yuav tsum siv txoj ntsiab cai thib ob hauv txoj moo zoo tsis tu tsis tseg, uas yog txoj kev hloov siab lees txim.

Qhov no muaj tseeb thaum lub sij hawm uas kuv yawm txiv tseem nyob uas yog ib lub caij uas yooj yim me ntsis, qhov no haj yam muaj tseeb thaum hais txog tej kev txiav txim txog qhov zoo thiab qhov phem. Ib txhia neeg txawj ntse thiab paub xav ntseeg hais tias peb lub caij nyoog uas muaj ntau txoj kev xaiv yeej muaj ntau lus teb uas nyuaj kawg, kuv xav tias lawv xav tsis yog lawm. Tam li kuv xav mas, niaj hnub no vim muaj tej teeb meem nyuaj nyuaj ces peb xav tau cov lus teb yooj yim xwb, zoo li kuv yawm txiv teb kuv lo lus nug ntawd uas pab kuv paub tias qhov zoo thiab qhov phem sib txawv li cas. Kuv paub hais tias hnub no kuv muab ib lo lus teb uas yooj yim, tiam sis kuv hais lus tim khawv tias nws pab kuv ntau npaum li cas lawm. Kuv ntuas kom nej ua li no thiab yeej xav twv nej seb nej puas kam sim kuv cov lus, thiab yog nej ua li no, ces kuv cog lus hais tias cov lus no yuav ua rau nej paub meej thaum nej raug ntau txoj kev xaiv thiab yuav tau cov lus teb yooj yim rau cov lus nug uas ua rau cov neeg kawm txawj kawm ntse thiaj tsis paub xav.

Feem ntau peb xav hais tias txoj kev mloog lus yog txoj kev tsis txawj xav es yus thiaj li ua raws li tus thawj coj cov lus qhia xwb. Tiam sis, tiag tiag mas, kev mloog lus twb yog ib lub cim hom rau peb txoj kev ntseeg vim peb tso siab rau tus neeg siab tshaj plaws txoj kev txawj ntse thiab lub hwj chim, tus uas yog Vajtswv ntag. Thaum Anplaham muaj kev ntseeg ruaj khov thiab mloog Vajtswv lus li ntawd, tab txawm nws raug txib kom muab nws tus tub tua txi, Vajtswv tau cawm nws dim. Yog li ntawd, thaum peb qhia peb txoj kev rau siab ntseeg vim peb mloog lus, Vajtswv yeej yuav cawm peb kom dim.

Cov uas tsuas vam lawv tus kheej thiab ua raws lawv siab nyiam thiab ua raws li lawv xav xwb yeej tsis muaj kev txawj ntau npaum li cov uas ua raws li Vajtswv qhia thiab txais yuav Nws lub tswv yim, lub hwj chim thiab tej txiaj ntsim. Luag hais tias ib tug neeg uas tsuas vam nws tus kheej xwb thiaj yog ib qho khoom plig me me xwb. Txoj kev rau siab ntso mloog lus tsis yog lam ua raws li lwm tus hais los sis qhia tias yus tsis muaj zog ua yus tus kheej. Qhov ntawd txhais tau hais tias peb tshaj tawm tias peb ntseeg Vajtswv thiab ua rau peb tsim nyog tau lub ntuj ceeb tsheej lub hwj chim. Txoj kev mloog lus yog peb ib txoj kev xaiv. Yog ib txoj kev xaiv seb puas yuav siv peb lub tswv yim thiab hwj chim uas muaj ciaj ciam los yog yuav xaiv Vajtswv txoj kev txawj ntse thiab kev paub uas tsis paub qhov kawg. Raws li kuv yawm txiv zaj lus qhia uas nws hais rau kuv, nws yog ib txoj kev xaiv los mloog lub xam xauv nees uas nyob hauv peb sab ntsuj plig lub qhov ncauj thiab ua raws li tus cob qhia hais.

Thov kom peb yuav txais tej kev khi lus thiab ua Anplaham cov xeeb ntxwv vim peb rau siab ntseeg thiab txais yuav tej kab ke ntawm txoj moo zoo uas raug txum tim rov qab los lawm. Kuv cog lus rau nej tias txhua tus uas rau siab ntseeg thiab mloog lus yeej txais tau txoj sia uas nyob mus ib txhis. Los ntawm Yexus Khetos lub npe, amees.