2010–2019
Usiusitai e ala i lo Tatou Faatuatua
Aperila 2014


Usiusitai e ala i lo Tatou Faatuatua

Ata
Elder L. Tom Perry

O le usiusitai o le faatusa lea o lo tatou faatuatua i le atamai ma le mana o le pule silisiliese, o le Atua lea.

O le ma afiafi faaleaiga ma Sister Perry i po o Aso Gafua taitasi ua faafuasei ona faateleina le toatele. O lo’u uso, o lona afafine, o le tuagane o Barbara, ma le tama teine a lo’u tuafafine ma lona toalua ua masi’i mai i le eria o loo ma nonofo ai. Ua pau lea o le taimi ua faamanuia ai au i le nonofo latalata mai o lo’u aiga ia te au talu mai lo’u laitiiti. I lena taimi, sa nonofo lo’u aiga i le poloka lava e tasi ma le toatele o tagata o le aiga lautele o lo’u tina. O le fale o tamamatua o Sone sa i talaane o le matou fale i le itu i matū, a o le fale o le uso matua o lo’u tina ia Ema sa i talaane o le matou fale i le itu i saute. I le itu i saute o le poloka sa nofo ai le isi uso matua o lo’u tina ia Sosefina, i le itu i sasae o le poloka na nofo ai le tuagane matua o lo’u tina ia Alema.

I le taimi o lou laitiiti, sa matou faifai mea ma tagata o lo matou aiga lautele i aso uma ma fefaasoai ni taimi e galulue ai, taaalo, ma feasiasia’i. Sa lē mafai ona matou faia ni mea faalelelei e aunoa ma se lipoti e vave ona oo atu i o matou tina. Ua eseese o matou olaga i le taimi nei—ua salalau solo le toatele o tagata o aiga. E tusa lava pe o nonofo felataa’i i le tasi ma le isi, ae e le masani ona sosoo ia fale. Peitai, e tatau lava ona ou talitonu o tulaga a o ou laitiiti ma le taimi lenei e tai pei lava o sina vaega o le lagi, i le felataa’i o mea e nonofo ai tagata pele o aiga. Ua avea lea ma se faamanatu faifai pea ia te au e uiga i le natura o le iunite faaleaiga.

A o ou tuputupu ae, sa i ai se ma mafutaga faapitoa ma lou tamamatua. O a’u o le atalii ulumatua i le aiga, sa ou saluina le kiona mai le ala savali i le taumalulu ma tausia le lotoa i le taumafanafana mo lo matou aiga, le fale o tamamatua, ma fale a uso o lo’u tina e toalua. E masani lava ona nofonofo tamamatua i luma o le poletito a o ou moaina lana vao. Pe a uma ona ou [moaina le vao], ona ou saofai lea i luma o le faasitepu ma ma eva ai. O na taimi o ni manatuaga faapelepele mo au.

I se tasi aso sa ou fesili ai i lou tamamatua pe faapefea ona ou iloa o loo ou faia pea le mea sao, ona o le tele o filifiliga ua aumaia e le olaga. E pei o le masani a lou tamamatua, e tali mai lava ia te au ma se aafiaga mai le olaga faifaatoaga.

Sa ia aoao mai ia te au e uiga i le aoaoina o ni solofanua se lua ina ia mafai ona la galulue faatasi. Sa ia faamatala mai e tatau lava ona iloa i taimi uma e solofanua po o ai o loo taitai. O se tasi o ki o vaega manaomia e pulea ai ma taitaia ai se solofanua o le faagutu lea. Afai e talitonu se tasi o le vaega e le manaomia le usitaia o le manaoga o le o loo faatautaia ia solofanua, o le a le tosoina lava e le vaega ma galulue faatasi e faateleina lo latou gafatia.

Sei o tatou iloiloina le lesona na aoaoina ai au e lou tamamatua e faaaoga ai lenei faataitaiga. O ai le tagata o loo faatautaia le vaega o solofanua? Na talitonu lou tamamatua o le Alii. O Ia lea o loo i ai se faamoemoega ma se fuafuaga. O Ia foi o le faiaoga ma le gaosimea o le vaega a solofanua ma, i le isi itu, o solofanua taitasi. E silafia e le o loo faatautaia le vaega o solofanua le mea sili, ma e pau le auala e iloa ai e le solofanua o loo ia faia pea le mea sao o le usiusitai lea ma mulimuli i le taitaiga a le o loo faatautaia vaega o solofanua.

O le a se mea na faatusa i ai e lou tamamatua le faagutu? Na ou talitonu i lena taimi, e pei o lo’u talitonu i le taimi nei, na aoaoina au e lou tamamatua ina ia mulimuli i uunaiga a le Agaga Paia. Ia te ia lava, o le faagutu e faaleagaga. O se solofanua usiusitai, lea e avea o se vaega o solofanua aoaoina lelei, e na o sina uunai itiiti lava e manaomia mai le o loo faatautaia le vaega o solofanua e faia ai le mea tonu lea na te manao e fai. O lea tamai uunai e tutusa ma le leo filemu ma le itiiti lea e fetalai mai ai le Alii ia i tatou. I le faamamaluina ai o lo tatou faitalia, e lei avea lava o se uunaiga fai faamalosi.

O alii ma tamaitai e lē amanaiaina ia uunaiga malu a le Agaga o le a tele ina aoaoina, e pei ona aoaoina e le atalii faamaumau oa, e ala i taunuuga masani o le le usiusitai ma le ola le tapasaina. Pe ana le mavae taunuuga masani na faalotomaualalo ai le atalii faamaumau oa ma “atamai ai lea o ia” ma faalogo i musumusuga a le Agaga o tau atu ia te ia e toe foi i le fale o lona tama (tagai Luka 15:11–32).

O le lesona la na aoao ai au e lou tamamatua o le saunia i taimi uma ia maua le uunaiga lemu a le Agaga. Sa ia aoaoina au o le a ou maua pea sea uunaiga pe a ou aluese mai le ala. Ma o le a le tausalaina au e ni measese sili atu ona tuga pe afai ou te faatagaina le Agaga e taitaia au i au faaiuga.

E pei ona tau mai e le Iakopo 3:3, “Faauta, ua tatou avane faagutu i gutu o solofanua, ia latou usiusitai mai ia te i tatou, ua tatou liliu ai foi o latou tino uma.”

E tatau ona tatou nofouta i a tatou faagutu faaleagaga. E oo lava i sina uunai mai le Matai, e tatau ona tatou naunau ia sui atoa lo tatou ala. Ina ia faamanuiaina i le olaga, e tatau ona tatou aoaoina o tatou agaga ma tino ia galulue faatasi i le usiusitai i poloaiga a le Atua. Afai tatou te usitaia ia uunaiga mālū a le Agaga Paia, o le a mafai ona tuufaatasia ai o tatou agaga ma tino i se faamoemoega o le a toe taitai atu ai i tatou i lo tatou aiga e faavavau e mau ai faatasi ma lo tatou Tama faavavau i le Lagi.

O la tatou mataupu faavae o le faatuatua lona tolu, ua aoao ai i tatou e uiga i le taua o le usiusitai: “Matou te talitonu e ala i le Togiola a Keriso, e mafai ai ona faaolaina tagata uma, e ala i le usiusitai i tulafono ma sauniga o le Talalelei.”

O le ituaiga o usiusitai lea na ta’ua e lou tamamatua i lana faataitaiga e uiga i vaega o solofanua e manaomia ai foi se faatuatuaina faapitoa—o lona uiga, o se faatuatua a’ia’i i le o loo faatautaia le vaega [o solofanua]. O le mea lea, o le lesona na aoaoina ai au e lou tamamatua, e fesootai foi i le mataupu faavae muamua o le talalelei—faatuatua ia Iesu Keriso.

Na aoao mai le Aposetolo o Paulo: “A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia” (Eperu 11:1). Ona faaaoga lea e Paulo o faataitaiga a Apelu, Enoka, Noa, ma Aperaamo e aoao atu ai le uiga o le faatuatua. Sa ia taulai atu i le tala ia Aperaamo, aua o Aperaamo o le tama o le au faatuatua:

“O le faatuatua na anaana ai Aperaamo, ina ua valaauina o ia e alu i le mea o le a maua e fai mona fanua, na ia alu foi e lei iloa po o fea a alu i ai.

“O le faatuatua sa aumau ai o ia i le nuu na folafolaina, ina o fai mo tagata ese. …

“O le faatuatua foi na maua ai e Sara lava le malosi e fanau ai, na fanau foi o ia ina ua mavae tausaga o lona malosi, aua na manatu o ia e faamaoni mai o ia na folafola mai” (Eperu 11:8–9, 11).

Ua tatou iloa e ala mai i le atalii o Aperaamo ma Sarai, o Isaako, na tuu atu ai se folafolaga ia Aperaamo ma Sarai—o se folafolaga o fanau “o le a toatele pei o fetu o le lagi, pei o le oneone foi i le matafaga e le mafaitaulia” (tagai fuaiupu 12; tagai foi Kenese 17:15–16). Ona sosoo lea ma le tofotofoina o le faatuatua o Aperaamo i se auala e manatu le toatele o i tatou e le mafai ona mafaufauina.

Sa ou mafaufau i le tele o taimi i le tala ia Aperaamo ma Isaako, ma ou te le o talitonu lava ua ou malamalama atoatoa i le faatuatua ma le usiusitai o Aperaamo. Masalo e mafai ona ou vaai faalemafaufau ia te ia o tapenaina ma le faatuatua ina ia malaga ese vave i se tasi o taeao, ae faafefea ona ia savali i lena ala atoa i autafa o lona atalii o Isaako, i le malaga e tolu aso i le auvae o le Mauga o Moria? Na faafefea ona latou amoina fafie mo le afi i luga o le mauga? Na faafefea ona ia fausia le fatafaitaulaga? Na faafefea ona ia saisaia Isaako ma faataatia o ia i luga o le fatafaitaulaga? Na faafefea ona ia faamatala atu ia te ia o ia o le a osi ai le taulaga? Ma pe na faafefea ona ia maua le malosi e sii ai i luga le naifi e fasioti ai lona atalii? O le faatuatua o Aperaamo na faamalosia ai o ia ina ia mulimuli ma le atoatoa i le taitaiga a le Atua seia oo i le taimi faavavega ina ua valaau mai le agelu ia te ia mai le lagi, ma faailoa mai ia Aperaamo ua pasi lana suega tiga. Ona toe tau mai lea e le agelu a le Alii le folafolaga i le feagaiga faaAperaamo.

Ua ou iloa o luitau o loo fesootai ma le mauaina o le faatuatua ia Iesu Keriso ma o le usiusitai o le a sili atu ona faigata mo nisi [tagata] nai lo isi. Ua ia te au le tele o tausaga o aafiaga e iloa ai e ui e mafai ona matua eseese ia uiga o solofanua, ma o lea, o nisi o solofanua e mafai ona faigofie atu pe sili foi ona faigata le aoaoina, ma ua sili atu le eseese o tagata. O i tatou uma o se atalii po o se afafine o le Atua, ma ua i ai so tatou tala uigaese o le muai olaga ma le olaga faaletino. Ona o lenei mea, e le o tele ai ni vaifofo o le a aoga mo tagata uma. Ma o lea ua ou iloa atoa ai le natura o tofotofoga ma mea sese o le olaga, ae o le mea e sili ona taua, o le manaomia pea o le mataupu faavae lona lua o le talalelei, o le salamo.

E moni foi o le taimi lea na soifua ai lou tamamatua sa avea o se taimi sili ona faigofie, aemaise lava pe a faatatau lea i filifiliga o le mea sao ma mea sese. E ui e ono talitonu nisi tagata popoto ma malamalama, e manaomia e o tatou taimi sili ona faigata ni vaifofo sili ona faigata, ae ou te matuai le talitonu lava ua sao i latou. Ae, ou te talitonu i lo’u mafaufau o mea faigata o lenei vaitaimi e manaomia ai mea e sili ona faigofie, e pei o le tali na tuu mai e lou tamamatua i lau fesili faamaoni e uiga i le auala e iloa ai le eseesega i le va o le sao ma le sese. Ou te iloa o le mea o loo ou ofoina atu i lenei aso o se metotia faigofie, ae ou te molimau atu na aoga tele mo au. Ou te fautuaina atu lena mea ia te outou ma luiina outou ina ia faataitai i au upu, ma afai tou te faia, ou te folafola atu o le a latou taitaiina [e lou leo] outou i ni filifiliga manino pe a lofituina outou i ni filifiliga, ma o le a taitaiina outou [e au upu] i tali faigofie o fesili lea e faanenefu ai e atamamai ma i latou ua manatu ua popoto.

O le tele lava o taimi tatou te mafaufau ai i le usiusitai o le mulimulitaia lea o ni poloaiga po o ni faatonuga mai se pulega maualuga e aunoa ma le mafaufau i ai. O le mea moni lava, i lona tulaga silisili, o le usiusitai o le faatusa lea o lo tatou faatuatua i le atamai ma le mana o le pule silisiliese, o le Atua lea. Ina ua faatino e Aperaamo lona faatuatua ma le usiusitai le maluelue i le Atua, e oo lava ina ua poloaiina e osi le taulaga i lona atalii, na laveaiina lava; o ia e le Atua. E faapena foi, pe a tatou faaalia le faatuatua e ala i le usiusitai, o le a laveaiina i tatou e le Atua i le taimi mulimuli.

O i latou o e faalagolago atoatoa ia i latou lava ma na o o latou manaoga ma faanaunauga e mulimuli i ai ua matuai faatapulaa lava pe a faatusa lea ia i latou o e mulimuli i le Atua ma maua Lona atamai, mana, ma meaalofa. Na i ai se faaupuga faapea, “o se tasi e gauai atu ia te ia lava o se tagata lea e itiiti lona mafaufau.” O le usiusitai malosi ma le mataalia e faatatau i soo se mea e le vaivai. O le ala lea o loo tatou tautino atu ai lo tatou faatuatua i le Atua ma faaagavaaina i tatou lava ina ia maua mana o le lagi. O le usiusitai o se filifiliga. O se filifiliga i le va o o tatou lava malamalama ma malosi faatapulaa ma le poto ma le silisiliese le faatapulaaina o le Atua. E tusa ai ma le lesona na tuuina mai e lou tamamatua ia te au, o se filifiliga ina ia lagona le faagutu faaleagaga i o tatou gutu ma ia mulimuli i le taitaiga a le o loo faatautai mai.

Ou te faamoemoe o le a tatou avea ma suli o le feagaiga ma fanau a Aperaamo e ala i lo tatou faatuatua ma e ala i le mauaina o sauniga o le talalelei toefuataiina. Ou te folafola atu o loo avanoa faamanuiaga o le ola faavavau mo tagata uma o e faatuatua ma usiusitai. I le suafa o Iesu Keriso, amene.