Karihngihnyuck liki Petsac Koluk—Lohm Ma Porongo nuh sin Kraist

Pain kowos tamuhlwel ac tahmtahel, mihsenge nga ahkinsewowoyeyuck in oasr tuhlihk 13 nuhtin nuhtihk yohrohsr. Ma se inge oruh nga in siyuck “Meac nga ke tuhlihk nuhtin nuhtihk in etuh?” Olutu nga ke sramsram suwohs nuh sin sucu luhk ac lowos an.

Kuht ke mwet kol uh elyah yohk ke kuhnausyucklac ma petsac koluk oruh ke moul luhn mempucr ke Alu uh ac sucu lalos. Mwet Lahngo lasr ac tiac paht fah sifilpac fohlohk nuh facluh, ac Setuhn, mwet lokoalok ke ma wo, acnwuck ke ahngyahng yohk.

Srihpac se kuht oasr fin facluh pa in lotwelah fuhkah in karihngihn puhla ac kena lasr ke mahno facluh uh. Puhla utuckuh sin God uh kahsrwe kuht in kena pahyuck ac isus tuhlihk. Akuhpahsri luhn pahyuck inmahsrlon mukul ac muhtwacn ma use tuhlihk nuh ke moul uh oacyacpac ma na kahto se, mukwikwi ke luhngse ma oracni insiyac oaru luo, oracni kwewana nguhn ac mahno, ac us engan fal ke kuht etwaclah in oruh mwe enenuh luhn mwet sahyac uh met. Prestuhn Spencer W. Kimball el luti ke pahyuck, “siyacnyacn se … pa ma yohk srihpac emet ke moul in pahyuck uh, ac… [wacngihn] kena sahyac [kuh] mwet [kuh] ma kuh in sun ma yohk likina tuhkweni luhn siyacnyacn uh. …

“Kalmacn pahyuck pa mukwikwi suwohswohs sie sin sie ac tiac kosro.”¹

Yac puhspuhs somlah ah kuh in akihlenyuck sie elyah luhn tuhlihk se nahtuhsr. Nga utyak nuh ke infuckihl lal, na ke inse mwesahs el ahkuhtweyac nuh sihk lah el oasr ke lohm sin kawuck lal ac tahfonglac in liye petsac koluk ac mukwikwi ke television infulwacn mukul ac muhtwacn se ke tiac nuknuk. El muhtwacwacack in tuhng ac sramsram ke ohiyac koluk el puhla ke ma el liye ac finsrak el kuh in eslah liki nuhnak lal. Nga tarilacna lah el kuh in sramsram nuh sihk ke ma sacn, in sang pacl wo in kahsrwel ke insiyac toasr ac in kahsrwel in etuh fuhkah in eis ahkkweyeyuck ke Iwaclah luhn Mwet Lahngo lasr. Nga esam puhla muhtahl luhk ke kuht tuhkweni sikuckmuhtuhnteyak, oacna ninac ac tuhlihk muhtwacn, ac siyuck ke kahsruh sin Pahpah tuhmasr Inkuhsrao.

Tuhlihk, mwet fuhsr, ac mwet mahtuh puhspuhs tahfonglac in liye petsac koluk, tuhsruhktuh sie luhpah kapwack ke mukul ac muhtwacn suc sulaclah in liye petsac koluk ac fohlohklac kalweni nuh ke eklac nuh ke pahlah. Sahp mwet inge kena ke insiyaclos in som liki mwe sruhf inge tuhsruhktuh inkaiyacn pacl uh tiacna kuh in sifacna kuhtanglah. Kuht arlac srui ke elos suc kuht luhngse sulaclah in tuhkuh nuh yohrohsr ke pahpah kuh ninac kuh mwet kol ke Alu uh. Kuht enenuh in lahlmwetmwet in tiac mukwikwi ke ohiyac lut, kasrkuhsrak, kuh lahfwekihn, ma kuh in oruh elos in sifilpac mwekihn.

Ke kuht pahpah ac ninac ac mwet kol, enenuh in kai tuhlihk nahtuhsr ac mwet fuhsr lasr kais kuhtuh pacl, lohng ke luhngse ac kahlwem. Kuht enenuh in etuh ma sensen ke petsac koluk ac ohiyac ma kuh in kuhtanglah moul uh, ac oruh Nguhn in wacngihnlac, puhla koluk, kuhtasrihk, akuhpahsri muhsahlah, tiac kuh in sulaclah wo, ac eslah pacl, nuhnak, ac kuh yohk.

Petsac koluk pa fohkfohk, ac koluk likina met ah. Ke kuht asramsrami yurin tuhlihk nahtuhsr uh, kuht kuh in tuhkweni oraclah sie plwacn luhn sucu ke ohiyac wo ac ma in tiac oruh, in kengki in karihngihn lohm sesr ke mwe karihngihn nuh ke electronic devices uh. Pahpah ninac, yac kuht akihlen lah mobile devices ke Internet, tiac computers, pa elyah ma yohk emet?²

Mwet fuhsr ac mahtuh, kowos fin oasr ke mwe sruhf luhn Setuhn ke petsac koluk, esam luhng kuhlwacng luhn Mwet Lahngo lasr. Yac kowos akihlen luhpan luhngse luhn Leum ac seko Lal keiwos, finne ingena? Oasr kuh sin Mwet Lahngo lasr in ahknwacsnwacsye ac ahkkweye kowos. El kuh in eslah kweok ac ahsor kowos puhla ac sifilpac ahknwacsnwacsye kowoslac nuh ke kuh luhn Iwaclah Lal ac Nguhn Muhtahl.

Kuht ke mwet kol oacyacpac nuhnkuh yohk ke siyacnyacn ac sucu suc kweok ke pahlah luhn petsac koluk. Elder Richard G. Scott el siyuck yohk: “Kom fin sukohsohk ke ma koluk yohk lom sifacna, tiac kweok ke wacngihn srihpac ke ma koluk luhn mwet sahyac. … Kom kuh in puhla pahkomuhta. … Tuhsruhktuh kom tiac enenuh in eis nuh fom sifacna sie puhla kunac ke mukwikwi sacn.”³ Etuh lah kom tiac muhkwena. Oasr kahsruh. Miting ke in ahkwoye pahlah nuh sin siyacnyacn uh oasr, weacng miting ke tacluhfon, ma lwelah siyacnyacn an in pahng nuh ke sie miting ac wi ke lohm selos sifacna an.

Tamuhlwel ac tahmtahel, kuht kuh in karihngihn tuhlihk ac mwet fuhsr nahtuhsr uh fuhkah? Mwe karihngihn uh pa kuhfa yohk srihpac uh, tuhsruhk mwe karihngihn yohk emet facluh uh, ma sefanna ma ac orekma, pa mwe karihngihn lasr sifacna ma tuhkuh ke luhlahlfongi loal ac oaru ke luhngse luhn Pahpah tuhmasr Inkuhsrao ac iwaclah luhn Mwet Lahngo lasr nuh sesr kais sie.

Kuht kuh in kol tuhlihk nahtuhsr nuh ke sramsram loal ac lwelah nuh ke Iwaclah luhn Mwet Lahngo lasr fuhkah? Nga luhngse fahkwack lal Nephi ke ma mwet lal oruh in ahkfokokoye mwet fuhsr ke lwen lal: Kuht sramsramkihn Kraist, kuht enganwack ke Kraist, kuht lutikihn Kraist, kuht palye ke Kraist , tuhlihk nahtuhsr in muh kuh in etuh acn se elos kuh in ngwetwacng nuh kac in eis nuhnak muhnahs ke ma koluk lalos.⁴

Kuht kuh in oruh ma inge fuhkah lun lohm sesr uh? Kuhtuh suwos lohng tari ke nga sruhmuhn puhla toasr luhn mukul tuhmuhk, Mel, ac nga puhla ke kuh tuhfahlah tuhlihk fuhsr ahkosr. Ke kuht ohsun nuh ke ma upac luhn pahpah ac ninac ac kuhtanglah mwe enenuh nuh kwewa luhn moul, kuh arulacna enenuh kahsruh. Kuht pruhe ac siyuck in etuh ma kuht enenuh in oruh uh. Top ma tuhkuh uh suwohs: “Wona fin lohm an okahrkahr ac tuhlihk an srackna nukum nuknuk in mutul lalos ac kuhtuh kunohkohn an tiac ahkfalyeyucklac. Ma sefanna kuht arulacna enenuh in ahkfalye ke lohm pa lutlut ke ma suhmuhslah ac pruhe lwen nuh kwewa, ac ekuh in toeni luhn sucu wik nuh kwewa.”

Kuht srihke in oruh ma inge, tuhsruhktuh ma inge tiac ma yohk srihpac emet pacl nuh kwewa ac, infulwacn ma okahrkahr, kuhtuh pacl tiac sikyak. Kuht ekuhllah ma yohk lasr ac srihke in tiac sensen ke ma tiac yohk srihpac. Finsrak lasr uh kahsrwe kuht in sramsram, ahkfuhlwactye, luti, ac fahkwack ke Kraist ke kuh oaru in pruhe ac lutlutkihn ma suhmuhslah lwen nuh kwewa ac oruh ekuh in toeni luhn sucu ke wik nuh kwewa.

Kawuck se tuhfahna ahkacsmakihnyeyuc, “Ke kom siyuck sin tahmtahel uh in riti ma suhmuhslah ac pruhe yohk likina met ac fah ahktoasryaclos. Yohk tari puhla lalos lah elos enenuh in oruh pac.”

Tamuhlwel ac tahmtahel, ke srihpen nga etuh ke puhlakihnyuck luhk sifacna, ac ma luhn mukul tuhmuhk, nga enenuh in fahkwack luhlahlfongi ke mwe insewowo ke riti ma suhmuhslah ac pruhe lwen nuh kwewa ac ekuh in toeni luhn sucu wik nuh kwewa uh. Pa inge mukwikwi na pwacye ma eslah inse toasr uh, sang kolyuck nuh ke moul lasr, ac sang karihngihnyuck nuh ke lohm sesr uh. Na, fin petsac koluk kuh ma upac sahyac uh tuhkuh nuh yurin sucu lasr uh, kuht kuh in siyuck sin Leum ke kahsruh ac kolyuck yohk sin Nguhn, ac etuh kuh oruh ma Pahpah tuhmasr El siyuck sesr in oruh.

Tamuhlwel ac tahmtahel, fin ma inge soenna mukwikwi ke lohm sesr uh, kuht kuh in nohfohn muhtwacwacack ingena. Tuhlihk nahtuhsr fin mahtuh ac sruhnga in wi kuht, kuht kuh in sifacna muhtwacwacack. Ke kuht oruh, mokleyuck luhn Nguhn fah muhtwacwacack in nwacklah lohm sesr ac moul lasr ac tiac paht, sahp tuhlihk an fah wi.

Esam lah Mwet Sap moul uh olwelah pac tari lah ke kuht sokwack mwet mahtuh lasr ac ahkolah inen sucu lasr sifacna nuh ke tempuhl, kuht fah karihngihnyuck ingena ac nuh ke moul lasr ke kuht karihngihn kuht sifacna in nwacsnwacs in sruok pwepuh in lwelah nuh tempuhl.⁵ Olwelah nuh wowo an!

Mwet fuhsr, karihngihn kowos sifacna ke ohiyacn nguhn. Konwelah tacluhfon nuhtuwos fin enenweyuck, onkihn on ke U luhn Tuhlihk Srihsrihk, pruhe ke kahsruh, nuhnkuh ke ma suhmuhslah, fahsrwelihk liki petsac, petsacelah Mwet Lahngo, ipeis kuhfa luhn Leum ke nwacsnwacs, lutlut Nuh ke Kuhiyacn Mwet Fuhsr, in sie srihkasrak nuh sin kawuck lom, eis kahsruh sin pahpah kuh ninac se, som liye pisap lowos, siyuck ke kahsruh, ac suk kahsruh sin mwet lahlmwetmwet, fin enenweyuck.

Meac nga luhngse tuhlihk nuhtin nuhtihk in etuh? Nga ke elos ac kowos in etuh lah nga etuh Mwet Lahngo El moul ac luhngse kuht. El moli ma koluk lasr tari, tuhsruhk kuht enenuh in sikuck muhtuhnteyak ye muhtuhn Pahpah tuhmasr Lucng, ke sie puhsisacl loal, fahkwack ma koluk lasr uh, ac sramsram nuh Sel ke nuhnak muhnahs. Kuht enenuh in kena ekuhllah insiyacsr ac kena lasr ac puhsisacl fal in suk kahsruh ac nuhnak muhnahs nuh sin mwet suc kuht ahkngalye kuh muhlkuhnlah.

Nga etuh Joseph Smith el liye God, Pahpah tuhmasr Inkuhsrao, ac Mwet Lahngo lasr, Jisus Kraist. Nga fahkwack lah oasr sie mwet pahluh moul lasr fin facluh, Prestuhn Thomas S. Monson. Nga oacyacpac fahkwack lah kuht ac fah tiac kolyucklac in tuhlac kuht fin lohng kahs in kahsruh luhn mwet pahluh luhn God. Nga fahkwack ke kuh luhn olwelah lasr ac mwe insewowo ke tempuhl uh.

Nga etuh lah Puk luhn Mormon pwacye! Nga tiac kuh in ahkuhtweyac kuh ke puk wolacna se inge. Nga etuh lah, ke pruhe, Puk luhn Mormon us kuh in karihngihn sucu, ahkfokokoye kuhpahsr, ac sang kuh ye muhtuhn Leum. Nga fahkwack lah kowos tiac kuh in tuhlac kowos fin ukwe mwet pahluh luhn God. Ke inen muhtahl Jisus Kraist, amen.