Kōjparok jān Alooj Pija Ettoon—Juon Em̧ Pedped Ioon Kraist

Ro jeiū im jatū jitenbōro, rainin Ilukkuun jeram̧m̧an n̄an wōr 13 ro jibū rerūttotatat ilo jarlepju in. Menin ekōm̧m̧an bwe in kajjitōk “Ta eo ikōņaan bwe ro jibū ren jeļā?” Jibbon̄in ikōņaan kōnono n̄an baam̧le eo aō im n̄an baam̧le ko ilo Kabun̄ in.

Kōj, āinwōt ritōl ro, eļapļo̧k ad inepata kōn kakkure eo me alooj pija ettoon ej jelōte ilo mour ko an membōr ro ilo Kabun̄ in im baam̧le ko aer. Satan ej apad kalōkļōk ko rekāāl.

Juon unin ad pād ioon laļin ej n̄an ekkatak n̄an dāpij kōņaan an kanniōk im en̄jake ko an ānbwinid. Men kein litok jān Anij n̄an kōm̧m̧an bwe jen kōņaan m̧are im neji. M̧are ikōtaan em̧m̧aan im kōrā me ebōktok ajri ro n̄an mour wapanpan ej barāinwōt juon en̄jake eaiboojoj me ej kobaik ruo bōro in wujlepļok, kobaik jim̧or ilo jetōb im ānbwin, im bōktok juon obrak in lan̄lōn̄ im m̧ōņōņō ilo ad ekkatak n̄an ļōmņak kōn aikuj ko an ro pāleed. Būreejtōn Spencer W. Kimball ar katakin bwe ilo mour in pālele, “ripālele eo … ej kiiō aorōk ilo mour an ļeo ak lio pālele, im … [jab] itoklimo an ro jet [ak] men eo enaaj bōk maron̄ eo jān eo pālele. …

‟M̧are eromeļo̧k jon̄an wujlepļo̧k im jon̄an kalim̧m̧ur ko.”¹

Elōn̄ iiō ko remo̧otļo̧k juon iaan ajri ro nejūm̧ kar kūle an inepata. Ikar deļo̧n̄ ilo ruum̧ eo an, ijo eaar kwaļo̧k en̄jake ko an im kar kōmeļeļeik eō bwe ekar pād im̧ōn juon m̧ōttan kar jiriļo̧k im lo pija im m̧akūtkūt ko renana ilo kein alooj eo ikōtaan juon em̧m̧aan im juon kōrā ejjeļo̧k nuknuk. Ekar jino jan̄ im kwaļo̧k jon̄an nana eo ar en̄jake kōn ta eo ekar loe im ļōmņak bwe emaron̄ joļo̧k jān kōlmenļo̧kjeņ eo an. Ikar lukkuun m̧ōņōņō bwe eaar maron̄ leke eō, letok aō iien n̄an kaenōm̧m̧an bōro eo emetak im jipan̄ e n̄an jeļā kilen bōk kaenōm̧m̧an kōn Pinmuur an Rilo̧m̧oor eo. Ij keememej en̄jake ko rekwojarjar Ikar būki ilo am̧ bukelōlō ippān doon, āinwōt jinen im leddik eo nejin, im kajjitōk jipan̄ an Jemedwōj Ilan̄.

Elōn̄ ajri, jo̧dikdik, rūm̧m̧an ded rej jajeļo̧kjeņ im loe pija eo ettoon, ak ewōr juon oran nōm̧ba eo eļap an em̧m̧aan im kōrā ro rej kālet n̄an alooje im bar kōm̧m̧ane m̧ae iien ej erom juon an̄ūrlep. Rein kajjojo remaron̄ kōņaan kōn aolepen buruweer n̄an diwōj ļo̧k jān aujid in ak emmakijkij jab maron̄ eļļā jāni kōn ermake. Jelukkuun jeram̧m̧an n̄e jitōnbōro rein rej leke kōj ak juon ritōl an Kabun̄ in. Jen mālōtlōt n̄an jab kōmtalik kōn bwilōn̄, illu, ak kōjekdo̧o̧n, me emaron̄ kōm̧m̧an aer ikōn̄ alen kein karuo.

Kōj āinwōt ro jinen ak jemān im ritōl ro en emmakijkij ad ko̧o̧njel ippān ajri ro nejid im jo̧dikdik, kijenmej n̄an ron̄jake kōn iakwe im meļeļe. Rej aikuj jeļā kōn kauwōtata ko an alooj pija ettoon im kilen an kakkure mour an juon armej, kōm̧m̧an bwe en jako Jetōb, wōr en̄jake ko rejjab em̧m̧an, m̧ōn, kakkure jemjerā ko, jab jeļā dāpij kōjmake, im kakkure iien, kōlmenļo̧kjeņ im kajoor.

Alooj pija ettoon ekauwōtata, ekajjōjō jān kar m̧okta. Ilo ad ko̧o̧njel ippān ro nejid n̄an ejaake juon karōk an baam̧le kōn jon̄ak im tōrere ko emmourour n̄an kōjparok m̧oko m̧ōd kōn kein karreeo ko im kein jerbal ko. Ro jinen im jemān, jej ke uwōta bwe mobile devices ko rej ekkeijel ippān Intōrnet, jab kamputōr ko, rej unin jorrāān ko reļļap tata?²

Jo̧dikdik im rūm̧m̧an ded ro, eļan̄n̄e kom̧ij po ilo aujid an Satan n̄an alooj pija ettoon, keememej jon̄an tūriam̧o eo an ad Rilo̧mo̧or. Kom̧ kūle ke jon̄an an Irooj iakwe im kaorōk kom̧, men̄e kiiō? Ad Rilo̧mo̧o̧r ewōr kajoor ippān n̄an karreoik im kemour kom̧. Emaron̄ joļo̧k metak im inepata eo kom̧ij en̄jake im kōm̧m̧an bwe kom̧in bar erreo alen kein karuo kōn kajoor in Pinmuur eo An.

Kōj, āinwōt ritōl ro, jej ineptata kōn ripālele ro im ro uwaan baam̧le kōn ro rej en̄taan kōn an̄ūrlep an pija ettoon: Elder Richard G. Scott ar akweļap “Eļan̄n̄e kom̧ ar rōļo̧k jen jerawiwi ekauwōtata ippāmi make, jab bar laanwōtwōt kōn jerawiwi an ro jet. … Kom̧ maron̄ en̄jake tūriam̧o. … Kōm̧ij jab aikuj bōk ioomi juon en̄jake in bōk eddo n̄an jerbal ko.”³ Jeļā bwe kōmij jab make iaami. Ewōr jipan̄. Kweilo̧k ko an mour jān An̄ūrlep n̄an ripālele ro reppeļļok, ekoba kweilo̧k ko kōm̧m̧ani ilo talpoon, ko rekōm̧man bwe ripālele ro ren maron̄ ko̧o̧ļ e kweilo̧k eo im bōk kūņaer jān m̧oko m̧weer.

Ro jeiū im jatū, ekōjkan ad kōjparok ro nejid im jo̧dikdik ro? Kein karreeo ko eļap tokjāer bōtaab, ej kein karreeo eo ad makmake itulowaa me ej itok jān juon naan in kam̧ool em̧wilaļ kōn iakwe an Jemedwōj Ilan̄ im pinmuur eo an ad Rilo̧mo̧or n̄an kōj kajjojo.

Ekōjkan ad tōl ro nejid n̄an oktak im n̄an deļo̧n̄e Pinmuur eo an ad Rilo̧mo̧or? Em̧m̧an Ippa kwaļo̧k eo an Nipai kōn ta eo armej ro an raar kōm̧m̧ane n̄an bōbrāe jo̧dikdik ro ilo raan eo an: “Jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, im jej kanaan kōn Kraist … im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄ān jeorļo̧k jerawiwi ko aer.”⁴

Ekōjkan ad kōm̧m̧ane menin ilo m̧oko? Jet iaami raar karon̄ kōn ennaan eo aō kōn jon̄an lan̄lōn̄ eo leo pāleeō, Mel im N̄a kar en̄jake āinwōt ro jinen im jemān emān ajri ro reddik. Ilo ad jelm̧ae apan̄ ko an ro jinen im jemān im kōtōprak aikuj ko an mour in, jelukkuun aikuj jipan̄. Jej jar im akweļap n̄an jeļā ta n̄an kōm̧m̧an. Uwaak eo ar itok elukkuun alikkar: “Em̧m̧an n̄e m̧weo epoktak im ajri ro rejjan̄in jānji nuknuk in kiki ko aer im jet eddo rejjab dedeļo̧k. Men ko raikuj dedeļo̧k ilo m̧oko rej ekkatak jeje ko rekwojarjar im jar, im nokon in jota an baam̧le aolep wiik.”

Jej kajjion̄ kōm̧m̧ani men kein, bōtaab rejjab aolep iien kōttōpar ko ilōn̄tata im, ioļāppen jorrāān ko, jet iien kōjekdo̧o̧ni. Jej ukōt pedped ko ad im kajion̄ im n̄an jab ineptata kōn men ko ejej tokjāer. Ad pedped erom n̄an kōnono, lem̧ōņōņō, katakin, im kam̧ool kōn Kraist kōn kajion̄ jar iien otemjej im ekkatak jeje ko rekwojarjar im kōm̧m̧ani nokon in jota an baam̧le aolep wiik.

Juon m̧ōtta jem̧aan ar ilbōk, “N̄e kwoj kajjitōk ippān kōrā ro n̄an riiti jeje ko rekwojarjar im kōļapļo̧k aer jar, enej kainepataik er. Elōn̄ kadede men ko me rej en̄jake rellōn̄ n̄an kōm̧m̧ani.”

Ro jeiū im jatū, kōnke Ijeļā jān en̄jake eo aōmake.Iaikuj kam̧ool kōn kōjeram̧m̧an ko kōn riiti jeje ko rekwojarjar aolep raan, jar im nokon in jota an baam̧ļe. Men kein rej kaminene ko me rejipan̄ bōkļo̧k inepata, letok tōl n̄an mour ko ad, im kobaik kōjparok n̄an m̧ōko m̧ōd. Innām eļān̄n̄e alooj pija ettoon ak apan̄ ko jet rej kapok baam̧le ko ad, jemaron̄ kajjitōk ippān Irooj n̄an jipan̄ im kōtmāņe kōn eļap tōl jān Jetōb, jeļā bwe jekar kōm̧m̧ane ta eo Jemed ar kajjitōk ippād n̄an kōm̧m̧ane.

Ro jeiū im jatū, eļan̄n̄e jab kōm̧m̧ani kaminene kein ilo m̧oko m̧ōd, jemaron̄ aolep jino kiiō. Eļan̄n̄e ro nejid rerūttoļo̧k im makoko in kobatok ippād, jemaron̄ jino ippādmake. Ilo ad kōm̧m̧ane, kareel eo an Jetōb enaaj jino kobrak m̧oko m̧ōd im mour ko ad im, elōn̄ iien,ajri ro remaron̄ uwaak.

Keememej bwe rijilōk ro remour kar barāinwōt kalim̧m̧ur bwe ilo ad pukōt ro jibūd im jim̧m̧ad im kōpooj etan baam̧le ko ad make n̄an tampeļ, naaj kōjparok kōj kiiō im aolepen mour ko ad ilo ad dāpij wānōk ko admake n̄an kabwijer juon peba in mālim an tampeļ.⁵ Ta kalim̧m̧ur ko!

Jodikdik, ami eddo n̄an kōjparok mour in jetōb ko am̧i. Kune taļboon ko ami n̄e ekkar, al juon al an Būraimere, jar kōn jipan̄, ļōmņak kōn juon eoon, diwōj ļo̧k jen jikin alooj pija ettoon, pija in Rilo̧mo̧o̧r, wānōk n̄an bōk kwojkwoj eo, erom waanjon̄ak n̄an ro m̧ōttam, ekkatak Non Kokajur Jodrikdrik Ro, erom waanjon̄ak n̄an ro m̧ōttam̧, lūke ilo kōnono ippān ro jinen im jemān, loļo̧k bisop eo am̧, kajjitōk n̄an jipan̄.

Ta eo ikōņaan bwe ro jibū ren jeļā? Ikōņaan bwe er im kom̧ ren jeļā bwe Rilo̧mo̧or ej mour im ej iakwe kōj. Eaar kōļļā wōņaan jerawiwi ko ad, bōtaab jej aikuj bukelōlō im̧aan mejen Jemed Ilan̄, ilo ettā, kwaļo̧k jerawiwi ko ad, im akweļap Ippān n̄an jeorļo̧k bōd. Jaikuj kōņaan ukōt buruōd im kōņaan ko ad im ettā n̄an pukōt jipan̄ im jeorļo̧k bōd an ro jekar maron̄ kōmetak ak meļo̧kļo̧k er.

Ijeļā bwe Joseph Smith ekar lo Anij, Jemedwōj Ilan̄, im ad Rilo̧mo̧or, Jisōs Kraist. Ij kam̧ool bwe ewōr ad rikanaan emour rainin ioon laļin, Būreejtōn Thomas S. Monson. Ij barāinwōt kam̧ool bwe kwojjamin jebwābwe eļan̄n̄e kwonaj eo̧ron̄ kakpilōklōk eo an rikanaan an Anij. Ij kam̧ool kōn kajoor in bujen ko ad im kōjeram̧m̧an ko an tampeļ.

Ijjeļā bwe Bok in Mormon ej m̧ool. Ijjab maron̄ kwaļo̧k ilo naan jon̄an kajoor eo ilo bok in. Ijeļā wōt bwe, ippān doon kōn jar, Bok in Mormon ej bōkto bōktak kajoor eo n̄an kōjparok baam̧le ko, kōkajoorļo̧k jemjerā ko, im kwaļo̧k leke eo admake im̧aan Irooj. Ij kam̧ool kōn men kein ilo etan Jisōs Kraist, amen.