Puipuiga mai Ponokalafi—o se Aiga e Taulai atu ia Keriso

Uso e ma tuagane, ua faamanuiaina lava au i le aso, i le i ai o fanau a fanau pito i matutua e toa 13 i le faapotopotoga. O le latou i ai iinei ua mafua ai ona ou fesili atu “O le a se mea ou te manao ia iloa e fanau a au fanau?” O lenei taeao ou te fia talanoa tuusao atu lava i lo’u aiga atoa ai ma o outou [aiga].

I le avea o i tatou ma ni taitai, ua faateleina ai lo tatou popole e uiga i le faatamaiga o loo faia e ponokalafi i olaga o tagata o le Ekalesia ma o latou aiga. Ua osofai mai Satani ma le maemaea tele.

O se tasi o mafuaaga ua tatou i ai iinei i le fogaeleele ina ia aoao e pulea o tatou tuinanauga ma lagona o o tatou tino faaletino. E fesoasoani nei lagona ua tuuina mai e le Atua ia i tatou ia mananao e faaipoipo ma maua fanau. O le sootaga vavalalata faaleulugalii i le va o le tane ma le ava lea e aumaia ai fanau i le olaga faitino e faatatau foi lea i se aafiaga matagofie ma faapelepele lea e noatia faatasi ai loto tuuto e lua, tuufaatasia uma ai le agaga ma le tino, ma aumaia ai le atoaga o le olioli ma le fiafia a o tatou aoao ina ia faamuamua e le tasi le isi. Na aoao mai Peresitene Spencer W. Kimball e uiga i le faaipoipoga, “o le toalua … o le faatumutumuga lea o le olaga o le tane po o le ava, ma … [e leai] se isi lava mea e suitulaga i luma atu o lau soa po o lou toalua.

“O le faaipoipoga e manaomia ai le tuuto atoatoa ma le faamaoni a’ia’i.”¹

I le tele o tausaga ua mavae sa iloagofie ai le popole o se tasi o le ma fanau. Sa ou savali atu i lona potumoe, lea sa ia tatala mai ai lona loto ma faamatala mai ia te au lona i ai i le fale o se uo—ma faafuasei lava ona vaaia ni ata ma ni amioga le lelei na faateia ai i luga o le televise i le va o se alii ma se tamaitai sa lē lavalavā. Sa amata ona ia tagi masusu ma faaalia lona lagona le fiafia i le mea sa ia vaaia ma moomoo maimau pe ana mafai ona aveese mai lona mafaufau. Sa ou matua faafetai i lona tauina mai ia te au, tuu mai ai ia te au se avanoa e faafilemu ai lona taumamaina ma le loto tiga ma fesoasoani ina ia ona iloa le auala e maua ai le fesoasoani e ala i le Togiola a lo tatou Faaola. Ou te manatua ia lagona paia sa ou maua ao ma tootutuli faatasi, o se tina ma se tama teine, ma talosagaina le fesoasoani a lo tatou Tama Faalelagi.

O le toatele o tamaiti, talavou, ma tagata matutua o loo aafia fua i ponokalafi, ae o se fuainumera faatupulaia o alii ma tamaitai o loo filifili e matamata i ai ma toe tosina soo pea i ai seia oo ina avea ma se vaisu. Atonu o nei tagata ua mananao ma o latou loto atoa ina ia o ese mai lenei mailei, ae o le tele o taimi ua le mafai ona faatoilalo ai e i latou lava. Tatou te matua faafetai pe a filifili nei tagata e pele ia i tatou e tauina mai ia i tatou o matua po o se taitai o le Ekalesia. O le a tatou atamamai e le tali atu ma le te’i, ita, po o le tetee, lea e ono mafua ai ona latou le toe talanoa mai.

I le avea ai o i tatou ma matua ma taitai, e manaomia le fefautuaai ma a tatou fanau ma talavou i se tulaga faifaipea, faalogo atu ma le alofa ma le malamalama. E tatau ona latou iloa le matautia o ponokalafi ma le auala na te puleaina ai olaga, lea e mafua ai le aluese o le Agaga, lagona lē mautonu, taufaasese, faatamaiaina ai mafutaga, leai ai se loto pulea, ma le toetiiti faaalu atoa ai le taimi, mafaufau, ma le malosi.

Ua sili atu le mataga, faatiapolo, ma faatosina o ponokalafi i le taimi nei nai lo se isi lava taimi muamua. Ao tatou fefautuaai ma a tatou fanau, o le a mafai ona tatou fatuina faatasi se fuafuaga faaleaiga i tulaga faatonuina ma tuaoi, ia mataala i le puipuia o o tatou aiga i le faafoeina o masini faaeletonika. Matua, o tatou iloaina ea o masini feaveai o loo i ai gafatia tau Initoneti, e le o komepiuta, o le faafitauli silisili lena?²

Autalavou ma tagata matutua, afai ua saisaitia oe i mailei a Satani o ponokalafi, ia manatua le alofa mutimutivale o lo tatou Faaola pele. Pe ua e iloaina le loloto o le alofa ma le pele o oe i le Alii, e oo lava i le taimi nei? Ua i ai i lo tatou Faaola le mana e faamama ma faamalolo ai oe. E mafai ona Ia aveesea le tiga ma le faanoanoa o loo e lagonaina ma toe faamamaina oe e ala i le mana o Lana Togiola.

I le avea ai o i tatou ma taitai, ua matua popole tele e uiga i taitoalua ma aiga o i latou o loo mafatia mai le vaisu o ponokalafi. Na aioi mai Elder Richard G. Scott: “Afai o e saoloto mai se agasala matuia, aua nei e pologa fua i taunuuga o agasala a se isi tagata. … E mafai ona e lagonaina le agaalofa … Ae e le tatau ona e tauaveina i ou lava luga se lagona o le noatiaina mo na amioga.”³ Ia e iloa e le o tuua na o oe. E i ai se fesoasoani. O loo ua i ai fonotaga o le faaleleia mai vaisu, e aofia ai fonotaga e faia i telefoni, lea e faataga ai taitoalua e valaau mai i se fonotaga ma auai mai i o latou lava fale.

Uso e ma tuagane, o faapefea ona tatou puipuia a tatou fanau ma talavou? O faamama o ni meafaigaluega aoga, ae o le faamama silisili i le lalolagi, ma e na o le pau lea o le mea o le a iu ina aoga, o le faamama lea e i totonu o le tagata lava ia lea e oo mai i se molimau loloto ma tumau i le alofa o lo tatou Tama Faalelagi ma le taulaga togiola a lo tatou Faaola mo i tatou taitoatasi.

E faapefea ona tatou taitaiina a tatou fanau i le liua loloto ma ia maua le Togiola a lo tatou Faaola? Ou te fiafia i le folafolaga a le perofeta o Nifae e uiga i mea na faia e lona nuu e faamalosia ai le autalavou i lona vaitaimi. “Ua matou tautalatala e uiga ia Keriso, ua matou olioli ia Keriso, ua matou talai atu Keriso, [ma] ua matou vavalo e uiga ia Keriso … ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.”⁴

E faapefea ona tatou faia lenei mea? i totonu o tatou aiga? O nisi o outou na faalogo o ou faamatalaina le ala na faagaeetia ai i maua ma lo’u toalua o Mel i le avea ai ma matua o se fanau talavou e toafa. A o ma fetaiai ai ma luitau faamatua i le faataunuuina o manaoga o le olaga, sa ma matua manaomia lava se fesoasoani. Sa ma tatalo ma aioi atu ia iloa le mea e fai. Na oo mai se tali manino: “E le afaina pe a palapala le fale ma o loo ofuina pea e tamaiti o latou ofu moe ma e lei faia nisi o feau. E na o le pau le mea e tatau lava ona fai i le aiga o le suesue i tusitusiga paia ma tatalo i aso uma, ma afiafi faaleaiga faalevaiaso.”

Sa ma taumafaia nei mea, ae sa lei avea i taimi uma ma mea e faamuamua, i le totonugalemu o le le mautonu, na le faataunuuina ai i nisi o taimi. Sa suia la ma vaaiga e aua nei popole i mea e itiiiti le taua. O le ma taulaiga o le talanoa, olioli, talai, ma molimau atu ia Keriso e ala i le taumafai e tatalo ma suesue i tusitusiga paia i aso uma ma faia afiafi faaleaiga faalevaiaso.

Sa lapatai mai se uo talu ai nei, “A e talosagaina ia tamaitai e faitau tusitusiga paia ma tatalo soo, e faapopoleina ai i latou. O latou lagona o i ai e pei ua tele naua mea o latou faia.”

Uso e ma tuagane, talu ai ua ou iloa mai ou aafiaga, ma aafiaga a lou toalua, e tatau ona ou molimau atu i faamanuiaga o le suesue i tusitusiga paia i aso uma, ma tatalo, ma afiafi faaleaiga faalevaiaso. O faataitaiga tonu ia o le a fesoasoani i le aveesea o le popole, ma taitaia o tatou olaga, ma faaopoopo atu se puipuiga i o tatou aiga. Afai e osofaia o tatou aiga e ponokalafi po o nisi faafitauli, e mafai ona tatou ole atu i le Alii mo se fesoasoani ma faamoemoe mo se taitaiga sili mai le Agaga, i le iloaina na tatou faia le mea na finagalo mai lo tatou Tama tatou te faia.

Uso e ma tuagane, afai e lei faataitaia nei mea i o tatou aiga, e mafai ona tatou amataina nei loa. Afai e matutua atu a tatou fanau ma e mumusu e faatasi ma i tatou, e mafai ona tatou faia e i tatou lava. A tatou faia, o le a amata ona faatumulia o tatou aiga ma o tatou olaga e le uunaiga a le Agaga ma i le aluga o taimi, e ono tali mai le fanau.

Ia manatua ua folafola mai foi e Aposetolo soifua, a o tatou saili o tuaa ma saunia igoa o o tatou lava aiga mo le malumalu, o le a puipuia i tatou i le taimi nei ma i o tatou olaga atoa a o tatou tausia i tatou lava ia agavaa mo se pepa faataga o le malumalu.⁵ Oka o ni folafolaga!

Talavou, ia galue mo lou lava tulaga manuia faaleagaga. Tape lau telefoni pe a tatau ai, usu se pese Peraimeri, tatalo mo se fesoasoani, mafaufau i se mau, savali i fafo mai se ata tifaga, mafaufau i le Faaola, tago atu ma le agavaa i le faamanatuga, suesue i le Mo le Malosi o le Autalavou, avea ma faataitaiga i au uo, talanoa i se matua, alu e vaai lou epikiopo, fesili mo se fesoasoani, ma saili ni fautuaga faapolofesa, pe a manaomia.

O le a se mea ou te manao ia iloa e fanau a au fanau? Ou te manao ia i latou faapea ma outou ia iloa ou te iloa o loo soifua le Faaola ma e alofa ia i tatou. Ua uma ona Ia totogiina le tau mo a tatou agasala ae e tatau ona tatou tootutuli i luma o lo tatou Tama oi le Lagi, i le matua faamaualalo lava, tautau atu a tatou agasala, ma ole atu ia te Ia mo le faamagaloga. E tatau ona tatou mananao ia suia o tatou loto ma o tatou manaoga ma ia lava le lotomaualalo e saili ai le fesoasoani ma le faamagaloga a i latou atonu na tatou faatiga i ai pe na tuulafoaia.

Ou te iloa na vaai Iosefa Samita i le Atua, lo tatou Tama Faalelagi, ma lo tatou Faaola, o Iesu Keriso. Ou te molimau atu ua i ai so tatou perofeta soifua i luga o le fogaeleele o, Peresitene Thomas S. Monson. Ou te molimau atu foi o le a le taitaiseseina i tatou pe afai tatou te mulimuli i fautuaga a le perofeta a le Atua. Ou te molimau atu i le mana o a tatou feagaiga ma faamanuiaga o le malumalu.

Ou te iloa e moni le Tusi a Mamona! E le mafai ona ou faamatalaina le mana o lenei tusi maoae. E na o lou iloaina o lena mea, faatasi ai ma le tatalo, o le Tusi a Mamona e tauaveina le mana e puipuia ai aiga, faamalosia ai mafutaga, ma aumaia ai le talitonuga patino i luma o le Alii. Ou te molimau atu ai i nei mea uma i le suafa paia o Iesu Keriso, amene.