Sister ro: O, Jelukkuun Aikuji Doon

Ilo pija in jej lo ralitōk laļko im kar ron̄ kajin ko ratimjuon reoktak. Baj ļōmņak ewōr jet kajin ko kar likūti ilo pija in. Ekabwilōn̄lōn̄ n̄an jeļā bwe āinwōt juon doulul in kōrā ro ipeļaakin laļ in jej maron̄ kwaļo̧k ainikied make ilo naan in kam̧ool eo kōn m̧ool eo indeeo bwe jej jiron̄ ro nejin juon Jemedwōj Ilan̄ eo eiakwe.

Ej juon jeram̧m̧an eļap n̄an pād ijin iien in ilo bwebwenato im kōnono n̄an aolep kōrā ro an Kabun̄ jen iiō ko ralitōk im rūttoļo̧k. Ewōr kajoor eļap ilo ad ippān doon jotenin. Ilo aō lo adwōj aolep kuktok ippān doon ilo Conference Center in im ļōmņak kōn taujin ro jet rej alooji kadiwōjļo̧k in imejatoto jān jikin ipeļaakin laļ in, kobain kajoor eo an naan in kam̧ool ko ad im tōmak ilo Jisōs Kraist em̧ool kile ej juon iaan tōmak eobrak im kobatok ko rekajoor an kōrā ro ilo bwebwenato an Kabun̄ in, n̄e ejjab laļ in.

Joten in jej lan̄lōn̄ ilo elōn̄ eddo ko ad roktak āinwōt kōrā ro ilo Kabun̄ in. Ilo elōn̄ wāween ko jej oktak im āinjuon, jej barāinwōt kile bwe jej aolep leddik ro nejin ejja Jemedwōj Ilan̄ in wōt eo eaar kōm̧anm̧ane kōj sister ro. Jej ippān doon ilo kalōk aelōn̄ in kiin̄ an Anij im bujen ko jaar kōm̧m̧ani, jekdo̧o̧n ta kain jekjek rot ko ippād. Kuktok tok in ippān doon ej, ilo ejjeļo̧k pere, sister ro rekwojarjar tata imejān laļ in!¹

Jemdoon ej kwaļo̧k bwe ewōr juon iakwe epen ikōtaad. Sister ro rej kōjparok doon, mije doon, kainōm̧m̧an doon, im pād ijeņ n̄an doon ilo iien ko rem̧m̧an im iien ko renana. Irooj eaar ba Ij ba n̄an kom̧, kwom̧in juon wōt; im n̄e kom̧ij jab juon wōt kom̧ij jab aō.²

Rikapo eo ekōņaan bwe jen nana ak ekajete doon. Ekōņaan bwe jen leļo̧k wōt ad ilo oktak ko ad im keidi kōj make n̄an bar juon. Ewōr iakwe ippām̧ n̄an kōjerbale ium̧win juon awa kajjojo raan kōnke ej kaenōm̧m̧an eok, ilo tōre in wōt ij kile menin āinwōt juon ikkure eļap eo n̄e ij etetal lōn̄ļo̧k ilo jikinwe im jab bōk erbeta eo. Jemaron̄ m̧ōttā wōt, jemaron̄ ke?

Kōj āinwōt kōrā ro maron̄ pen n̄an kōj make. N̄e jej keidi kōj make n̄an bar juon jenaaj en̄jake jekkar ak illu ippān ro jet. Sister Patricia T. Holland kar ba, “Meļeļe eo in, jej jab maron̄ ņaetad Rikūrijin im wōnm̧aanļo̧k im ekajete bar juon—ak kōj make—jab jouj.”³ Eaar etal wōt im ba bwe ejjeļo̧k men eaorōk ilo ad luuji tiriam̧o eo ad im ioon sister ro. Jej aikuj in meļak im lan̄lōn̄ ilo oktak ko ad rekwojarjar. Jej aikuj in kile bwe kōj aolep rej aikuj in jerbal ilo aelōn̄ in kiin̄ eo kōjerbal tōļan ko ad rejenolo̧k im menin letok ko ilo wāween ko ad make. Innām jemaron̄ in en̄jake ad sister, ad iiaio, im jino jerbal.

M̧ool eo ilo menin ej, jej lukkuun im m̧ool aikuji doon. Kōrā ro rej pukōt jem̧jerā, jipan̄, m̧ōttā. Eļap ijo n̄an katak jān bar juon, im emakijkij ad kōtļo̧k kōmōjņo̧ ko jaar ejaaki ippād ren bōbrae kōj jān ad lan̄lōn̄ ilo kuktok ko remaron̄ kar erom ilubwilijid kōjeram̧m̧an ko reļļap tata ilo mour ko ad. N̄an waanjon̄ak, kōj kōrā ro rerūtto jidik aikuji ta eo leddik ro ilo Būraimere rej kajjieon̄ letok. Jemaron̄ katak eļap jān kom kōn jerbal in jipan̄ im iakwe eo an Kraist.

Iaar ron̄ juon bwebwenato em̧m̧an kōn juon leddik edik etan Sarah, eo jinen ar wōr an iien n̄an jipan̄ bar juon kōrā ilo ward eo an etan Brenda, eo ewōr ruo an nan̄inmej. Sarah em̧m̧an etal n̄an tampeļ ippān jinen n̄an jipan̄ Brenda. Ej kijon̄ kapit pein Brenda im kekeņe adiin pein kōnke jet iien rej metak. Eaar katak n̄an erļo̧ke pein Brenda ioon bōran n̄an kōmourur m̧ajeļ ko an. Sarah ekijon̄ kūūm̧i bōran Brenda im loļo̧k e ilo an jinen kōjparok menin aikuj an jet. Sarah eaar katak aorōk im lan̄lōn̄ in jerbal n̄an bar juon armej im kar meļeļe bwe men̄e juon nin̄nin̄ emaron̄ kōm̧m̧ane juon oktak eļap ilo mour an juon armej.

Em̧m̧an ippa waanjon̄ak eo ippād ilo juon jepta in Luk eo ej kōmeļeļeik jem̧jerā eo em̧m̧an ikōtaan Meri, jinen Jisōs, im eo rilikin Elisabeth. Meri eaar juon jiron̄ ke eaar ron̄ kōn mijen eo an ekabwilōn̄lōn̄ kōn Nejin Anij. Jinoin, eaar āinwōt juon eddo eddo n̄an make kotake. Eaar Irooj Make eo eaar leļo̧k n̄an Meri juon armej n̄an ineeke ippān eddo eo. Jen ennaan eo an enjeļ Gabriel, Meri eaar bōk āt eo juon kōrā leke im emōņōņō eo emaron̄ etal ippān n̄an jipan̄—eo rilikin Elisabeth.

Leddik in edik im in rilikin eo eaar “nan̄inmej ium̧win iiō ko,”⁴ kar kwaļo̧k juon iakwe ilo aer bōro̧ro, im imaron̄ wōt ļōmņak jon̄an aorōk eo ium̧win jilu allōn̄ ippān doon erro jim̧or ilo aerro maron̄ kōnono, kwaļo̧k jipan̄, im jipan̄ doon ilo kūr ko aerro rejenolo̧k. Juon jon̄ak em̧m̧an rej kōrā ro roktak jen epepen ko rej kōkaajririik doon.

Kōj ro rekekemo̧o̧j jidik maron̄ wōr ippāer juon kareel eļap n̄an epepen ko reddik. Ke jinō eaar juon leddik edik, ejjeļo̧k juon iaan ro jinen im jemān raar niknik ilo Kabun̄ in. Men̄e eaar ļalem iiō dettan, eaar etetal laļ ippān make n̄an m̧ōnjar eo im pād ilo kweilo̧k ko an—Būraimere, Jabōt Jikuuļ, im kweilo̧k in kwojkwoj eo—aolep ilo iien ko roktak.

Iaar kajjitōk ippān jinō etke eaar kōm̧m̧ane men eo wiik im bar wiik ke eaar ejjeļo̧k jipan̄ ak rōjan̄ ilo m̧weo. Eaar uwaak, “Eaar wōr aō rūkaki in Būraimere eo eaar iakwe eō:” Rūkaki ro raar kea kake im katakin e ko̧jpeļ eo. Raar katakin e, bwe ewōr juon Jemān ilo Lan̄ eo eakwe e im eaar aer inepata kōn e bwe en itok wiik im wiik. Jinō eaar ba n̄an n̄a, “Ij kōjatdikdik bwe imaron̄ kam̧oolol Sister ro juon raan! Ejjeļo̧k kam̧ōjņo̧ ilo iiō n̄e ej itok n̄an jerbal in jipan̄ an Kraist.

Jet wiik rem̧ootļo̧k iaar ioon juon būreejtōn an Doulul an Jiron̄ ilo stake ilo California eo eaar jiron̄ eō bwe jinen eo 81 iiō rūttoon kar kūr n̄an erom juon rikapilōk an Mia Maid. Iaar itok limo, kōn menin iaar ko̧o̧l e jinen. Ke bisop eo an Sister Val Baker eaar kajjitōk n̄an ioon e, eaar reim̧aanļo̧k n̄an kūr erom̧ āinwōt juon riļaibrāre ak ribwebwenato an ward. Ke eaar kajjitōk ippān n̄an jerbal āinwōt juon rikapilōk n̄an Mia Mate n̄an Doulul an jiron̄, an uwaak eaar, “Kwoj m̧ool ke?”

Bisop eo an eaar uwaak, “Sister Baker, ejjeļo̧k bōd; kūr in ej jān Irooj.”

Eaar ba ejjeļo̧k an bar uwaak n̄an bōke, “Aaet.”

Em̧m̧an ippa im̧we in bisop in eaar en̄jake bwe emān Mia Maid ro ilo ward eo an aikuj katak eļap jān sister eo ekekemo̧o̧j, māletlet, imminene, im waanjon̄ak. Im ļōmņak mōk wōn eo Sister Baker enaaj etal ippān n̄e ej aikuj jipan̄ kōm̧m̧ane peij in Facebook eo an?

Ij ļōmņak kōn jipan̄ in eļap me sister ro ilo Doulul eo an Kōrā maron̄ pād ie ilo karuwaineneik sister ro reddik ro rej kab pād ilo Doulul an Jiron̄ ro. Sister ro reddik emakijkij aer en̄jake n̄e ejjeļo̧k ippāer juon jikin ak jabdewōt jeļā ippān ro ilo Doulul eo an Kōrā ro. M̧okta jen aer 18, rej aikuji ritōl ro an Doulul eo an Jiron̄ ro im m̧am̧a ro renaaj lan̄lōn̄ kam̧ool kōn kōjeram̧m̧an eo eļap an Doulul eo an Kōrā ro. Rej aikuj en̄jake lem̧ōņōņō kōn erom m̧ōttan juon doulul ekwojarjar. Ke jiron̄ ro rej jino pād ilo Doulul eo an Kōrā ro, ta eo eļap aer aikuji ej juon m̧ōttā n̄an jijet iturin, juon pā ioon aeran, im juon iien em̧m̧an n̄an katakin im jerbal. Jen pukōt ļo̧k n̄an jipan̄ doon jen jānij im iien ko rem̧m̧an an mour ko ad.

Kom̧ool kom̧ kōrā ro ilo Kabun̄ in ro pukōt ļo̧k mekarta oktak ko ilo iiō im m̧anit n̄an kōjeram̧m̧an im jipan̄ ro jet. Jiron̄ ro rej jerbal ippān ajri ro ilo Būraimere im rūtto ro. Sister ro ejjeļo̧k pāleer ilo aolep iiō ko rej joļo̧k awa ko ejejuwaer lali aikuj ko an ro ipeļaakier. Jej kile taujin jiron̄ ro rej joļo̧k 18 allōn̄ ko ilo mour ko aer n̄an kwaļo̧k ko̧jpeļ eo ilo laļ in. Aolep men kein rej kam̧ool bwe, āinwōt al in ejitōn bōro kwaļo̧k, “Ijjitōn̄ an enjeļ ej leļo̧k n̄an kōrā ro.”⁵

Eļan̄n̄e ewōr kam̧ōjņo̧ ko, ej kōnke kōj make jej kōm̧m̧ani. Jej aikuj bōjrak ļōmņak wōt kōn oktak ko im reilo̧k kōn ta eo jej juon wōt kake; innām jemaron̄ jino kile jeram̧m̧an eo ad eļaptata im bōk men eo em̧m̧an ilo laļ in. Sister Marjorie P. Hinckley eaar ba, “O jej aikuji doon. Kōj ro rerūtto rej aikuji ro reddik. Im kōjatdikdik, kom̧ ro reddik rej aikuji kōm̧ ro rerūtto. Ej juon men em̧ool bwe kōrā ro raikuji kōrā ro. Jaikuji jubōro eo em̧wilaļ im jem̧jerā ko rejouj ippān doon.”⁶ Sister Hinckley eaar jim̧we; o, jej aikuj doon!

Sister ro, ejjeļo̧k bar kūrub in kōrā ro ilo laļ in ro ewōr aer mālim in deļo̧n̄e kōjeram̧m̧an ko reļļap jen kōj āinwōt kōrā ro Rekwojarjar ilo Raan-ko Āliktata. Jej membōr in Kabun̄ eo an Irooj, im mekarta jekjek ko an kajjojo, jemaron̄ lan̄lōn̄ kōn kōjeram̧m̧an ko relikio an kajoor an priesthood eo jen kōjparok bujen ko jaar kōm̧m̧ani ilo peptaij im ilo tampeļ. Ewōr ad rikanaan ro remour n̄an tōl im katakin kōj, im jej lan̄lōn̄ kōn menin letok eo eļap an Jetōb Kwojarjar, eo ej jerbal āinwōt juon rikaenōm̧m̧an im ej tōl ilo mour ko ad. Jej jeram̧m̧an n̄an jerbal jibwe pein doon ippān būratōr ro rewāppen āinwōt jej kōkajoorļo̧k m̧ōko im baam̧le ko. Ewōr ippād iaļen deļo̧n̄e n̄an kōkajoorļo̧k im kajoor an kain̄i ko an tampeļ im elōn̄.

Ilo kakkobaba n̄an aolep kōjeram̧m̧an kein rem̧m̧an, ewōr ippād ro jet—sister ro ilo ko̧jpeļ in an Jisōs Kraist. Jaar jeram̧m̧an kōn jouj im iakwe em̧ool eo ekōm̧aron̄ ad kōjerbal iakwe an Kraist im jerbal in jipan̄ n̄an ro ipeļaadik. Ilo ad reilo̧k ioon oktak ko ilo iiō, m̧anit, im jekjek n̄an kōkkaajririik im jerbal n̄an doon, jenaaj obrak kōn iakwe erreo an Kraist im im̧we eo ej tōl kōj n̄an jeļā n̄āāt im wōn n̄an jerbal.

Ij lewaj n̄an kom̧ juon karuwainene eo eaar kōm̧m̧an m̧okta, jen juon būreejtōn eutiej an Doulul eo an Kōrā ro eo eaar ba, “Ij karuwaineneik kom̧ n̄an jab wōt iakwe doon ak en em̧m̧anļo̧k ami iakwe doon. ”⁷ Jen kile ewi jon̄an ad iakuji doon, im jen aolep iakwe doon em̧m̧an ļo̧k, ej aō jar, ilo etan Jisōs Kraist, amen.