Khaub Zig Cua ntawm Sab Ntsuj Plig

Kuv hais nyob zoo rau nej tag kis no—qhov tseem ceeb kuv hais rau cov tub hluas ntxhais hluas uas nyob hauv lub Tsev Rau Rooj Sab Laj thiab nyob thoob plaws lub ntiaj teb. Nej yog ib tiam neeg uas Vajtswv tau xaiv tseg, thiab kuv xav hais lus rau nej.

Ntau xyoo tas los thaum peb mus xyuas peb tsev neeg nyob hauv Florida, ib lub khaub zig cua twb raug ib qho chaw nyob tsis deb ntawm peb. Ib tug poj niam uas nyob hauv ib lub tsev uas txav tau, nws nkag mus rau hauv nws hoob nab kom tsis raug xwm txheej. Nws lub tsev pib co co. Ob peb feem tom qab ntawd, nws hnov nws tus neeg zej zog lub suab hais tias: “Kuv nyob ntawm no.” Nws tawm hoob nab mus, thiab ua rau nws xav tsis thoob hlo li, nws pom tias khaub zig cua tau muab nws lub tsev tshoob kom ya mus, thiab muab tsaws nyob saum nws tus neeg zej zog lub tsev uas txav tau.

Kuv cov phooj ywg hluas, lub ntiaj teb yuav tsis nyob twj ywm mus txog thaum tus Cawm Seej Los Zaum Ob. Cov vaj lug kub tshaj tawm hais tias, “txhua yam yuav ntxhov hnyo.”¹ Brigham Young hais tias, “Tus Tswv tau qhia rau kuv hais tias thaum pib muaj lub Koom Txoos no, lub Koom Txoos yuav ri niab, vam meej, loj tuaj thiab ntxiv, thiab txoj Moo Zoo ri mus rau tej haiv neeg ntawm lub ntiaj teb npaum li cas los, Dab Ntxwg Nyoog lub hwj chim yuav loj tuaj ib yam thiab.”²

Qhov uas ua rau peb txhawj tshaj tej av qeeg thiab kev tsov rog³ yog qhov uas yuav muaj tej khaub zig cua ntawm sab ntsuj plig uas yuav muab nej rho tawm ntawm nej lub hauv paus thiab xa nej tej ntsuj plig mus rau tej qhov chaw uas nej tsis tau xav txog, tej lub sij hawm ua rau nej tsis paub tias nej twb txav mus lawm.

Tej khaub zig cua phem tshaj plaws yog tus yeeb ncuab tej kev ntxias. Kev txhaum yeej yog ib feem ntawm lub ntiaj teb, tiam sis kev txhaum ib txwm tsis yooj yim ua thiab phem npaum li niaj hnub no. Muaj ib lub hwj chim uas muaj zog heev uas nres tau tej khaub zig cua ntawm kev txhaum. Lub hwj chim ntawd yog kev hloov siab lees txim.

Tsis yog nej tau ua kom muaj txhua yam khaub zig cua ntawm nej lub neej. Ib txhia los muaj vim lwm tus tau xaiv qhov tsis yog, thiab ib txhia los muaj vim nov yog lub neej uas txawj tuag.

Thaum nws yog ib tug tub hluas, Thawj Tswj Hwm Boyd K. Packer raug mob tuag tes tuag taw. Thaum Txwj Laug Dallin H. Oaks muaj xya xyoo, nws txiv tau tso lub ntiaj teb no tseg. Thaum Muam Carol F. McConkie ntawm Koom Haum Ntxhais Hluas pawg tuam thawj tswj hwm yog ib tug ntxhais hluas, nws niam nws txiv sib nrauj. Nej yuav raug teeb meem, tiam sis thaum nej tso siab rau Vajtswv, tej ntawd yuav ua rau nej txoj kev ntseeg muaj zog.

Nyob hauv lub ntiaj teb no, qhov uas cov ntoo loj hlob tuaj thaum cua hlob ua rau cov ntoo ntawd muaj zog. Thaum cua ntsawj ib tug ntoo me me, tej yam nyob hauv tus ntoo ua ob qho. Qhov ib, ua rau cov cag ncav mus sai thiab ntev zuj zus mus. Qhov ob, tej yam nyob hauv tus ntoo pib tsim tej paus ntsis uas ua rau cev ntoo thiab ceg ntoo tuab thiab txawj ncab tau thaum cua hlob. Tej cag thiab ceg ntoo uas muaj zog pab tiv thaiv tus ntoo ntawm cov cua uas yeej yuav rov qab los.⁴

Vajtswv yeej saib nej muaj nqi tshaj ib tug ntoo. Nej yog Nws cov tub thiab Nws cov ntxhais. Nws tau tsim nej tej ntsuj plig kom muaj zog thiab kom muaj peev xwm tiv tau tej khaub zig cua ntawm lub neej no. Tej khaub zig cua thaum nej hluas, ib yam li cov cua uas tawm tsam ib tug ntoo yau, yuav ua rau nej lub zog ntawm sab ntsuj plig loj tuaj, thiab npaj nej rau yav tom ntej.

Nej yuav ua li cas kom npaj rau nej tej khaub zig cua? “Nco ntsoov tias … twb yog nyob rau saum lub pob zeb peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb qhov chaw cuab zog; xwv kom thaum tus dab yuav xa nws tej cua muaj zog, … nws tej xub nyob hauv tej cua moj lwg kaw, … thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom … neb nqis mus rau tus kwj tob tob … vim yog lub pob zeb uas neb tau cog rau saud.”⁵ Qhov no yog nej txoj kev nyab xeeb thaum muaj khaub zig cua.

Thawj Tswj Hwm Thomas S. Monson hais tias, “Thaum yav tas los lub Koom Txoos txoj kev cai thiab lub sawm fem txoj kev cai yeej sib haum ntau, tiam sis tam sim no nyias nyob nyias deb heev, thiab txhua hnub nyias haj yam nyob deb nyias.”⁶ Qhov no uas rau peb ib txhia raug tej khaub zig cua ntawm sab ntsuj plig loj heev. Cia kuv qhia ib qhov piv txwv rau nej.

Lub hlis tas los Thawj Pawg Thawj Tswj Hwm thiab Pawg Kaum Ob tug Thwj Tim tau luam tawm ib tsab ntawv rau cov thawj coj ntawm lub Koom Txoos nyob thoob plaws lub ntiaj teb. Tsab ntawv no hais tias: “Tej kev hloov ntawm cov pej xeem txoj kev cai yeej yuav tsis hloov txoj kev cai coj ncaj ncees uas Vajtswv tau tsa. Vajtswv xav kom peb txhawb nqa thiab ua raws li Nws cov lus txib txawm lwm tus xav txawv los yog peb lub sawm fem nyiam ua dab tsi. Nws txoj kev coj dawb huv yeej meej: tso cai rau ib tug txiv neej thiab ib tug poj niam pw ua ke tsuas yog nkawd sib yuav raws li kev cai xwb. Peb yaum kom nej rov qab xyuas … cov lus qhuab qhia nyob hauv ‘Tsev Neeg: Ib zaj Lus Tshaj Tawm rau lub Ntiaj Teb.’”⁷

Txawm neeg ntiaj teb tej kev cai hloov zuj zus mus deb ntawm tus Tswv txoj kev cai coj dawb huv los, peb tsis coj li neeg ntiaj teb. Thawj Tswj Hwm Monson hais tias: “Tus Cawm Seej hais tias nws nyob hauv lub ntiaj teb tiam sis nws tsis yog ntiaj teb li. Peb kuj nyob hauv lub ntiaj teb tiam sis peb tsis yog ntiaj teb li thaum peb xyeej tej tswv yim cuav thiab tej lus qhia cuav thiab ua raws nraim li tej yam uas Vajtswv tau txib peb ua.”⁸

Txawm tseem fwv ntau thiab cov neeg coob tau hloov kev sib yuav, tus Tswv tsis tau muab hloov. Txij thaum chiv keeb los, Vajtswv pom zoo rau kev sib yuav ntawm ib tug txiv neej thiab ib tug poj niam—Adas thiab Evas. Nws twb muab tej hom phiaj ntawm kev sib yuav teem tseg kom tsis yog ua raws li cov neeg laus lub siab nyiam xwb, tiam sis, qhov tseem ceeb tshaj plaws, kom kho ib qho chaw zoo yug thiab tu cov me nyuam. Tsev neeg yog qhov uas muaj nqi nyob saum ntuj ceeb tsheej.⁹

Ua li cas peb tseem hais lus txog qhov no? Raws li Povlauj hais tias, “Peb tsis muab siab npuab tej uas peb qhov muag pom, tiam sis peb muab siab npuab tej uas qhov muag tsis pom.”¹⁰ Vim peb yog cov Thwj Tim ntawm tus Tswv Yexus Khetos, peb muaj kev lav ris qhia txog Vajtswv txoj hau kev rau Nws cov me nyuam thiab ceeb toom txog tej uas peb yuav raug yog tias peb tso Nws tej lus txib tseg.

Tsis ntev tas los, kuv sib tham nrog ib tug Laurel uas nyob hauv lub Teb Chaws Amelikas. Kuv hais los ntawm nws tsab email:

“Xyoo tas los no kuv cov phooj ywg ib txhia twb tso rau Facebook qhia hais tias lawv xav li cas txog kev sib yuav. Ntau tus pom zoo rau cov txiv neej yuav txiv neej thiab poj niam yuav poj niam, thiab ob peb tug tub hluas ntxhais hluas LDS tau qhia tias lawv ‘nyiam’ tej uas cov no tau hais. Kuv tsis tau hais dab tsi.

“Kuv txiav txim siab tshaj tawm kuv txoj kev ntseeg txog kev sib yuav li ib txwm muaj.

“Nrog daim duab ntawm kuv tus kheej, kuv tau ntxiv cov lus no ‘Kuv ntseeg txog kev sib yuav ntawm ib tug txiv neej thiab ib tug poj niam.’ Tom qab kiag ntawd kuv pib txais tsab xov. ‘Koj qia dub.’ ‘Koj saib tsis taus lwm tus.’ Ib tug tau muab kuv piv rau ib tus uas muaj qhev. Thiab kuv tau txais zaj no los ntawm ib tug phooj ywg zoo uas yog ib tug mej zeej ntawm lub Koom Txoos: ‘Koj yuav tsum txhob xav zoo li thaum ub. Tej yam pib pauv thiab koj yuav tsum pauv thiab.’”

Nws hais tias “Kuv tsis tau sib cav nrog lawv, tiam sis kuv tsis tau tshem tej uas kuv tau hais.”

Nws xaus lus hais tias, “Tej lub sij hawm, zoo li Thawj Tswj Hwm Monson hais tias, ‘Yus yuav tsum sawv yus ib leeg.’ Kuv cia siab hais tias peb cov tub hluas ntxhais hluas yuav sawv ua ke ua raws li Vajtswv hais thiab ua raws li Nws cov yaj saub tej lus qhia.”¹¹

Qhov tseem ceeb peb yuav tsum muaj siab xav pab cov txiv neej uas nyiam txiv neej thiab poj niam uas nyiam poj niam. Qhov no yog khaub zig cua uas muaj zog heev. Kuv xav qhia kuv txoj kev hlub thiab txoj kev hlub tshua rau cov uas ua siab loj tawm tsam qhov uas sim lawv txoj kev ntseeg li no thiab tseem ua raws li Vajtswv tej lus txib!¹² Tiam sis tsim nyog uas peb ua siab zoo thiab xav txog sawv daws, tsis hais lawv txiav txim siab thiab ntseeg li cas los yog.¹³

Tus Cawm Seej qhia peb kom peb hlub peb cov phooj ywg thiab cov uas tsis pom zoo li peb—tsis hais cov uas thuam peb. Nws hais tias, “Yog nej tsuas hlub cov uas hlub nej xwb, nej xav hais tias Vajtswv tseem yuav muab nqi zog rau nej thiab no los? … Yog nej tsuas hwm nej cov kwv tij nkaus xwb, nej ho ua tau zoo tshaj lwm tus qhov twg?”¹⁴

Tus Yaj Saub Yauxej Xamiv ceeb toom kom peb “ceev faj kev saib tias yus ncaj ncees” thiab muab siab npuab tag nrho cov txiv neej thiab poj niam, mus txog thaum peb yuav xav “ris lawv saum peb xub pwg.”¹⁵ Nyob hauv Yexus Khetos txoj moo zoo, tsis muaj chaw rau kev thuam, kev ua siab phem, los yog kev ntxub.

Yog tias nej muaj lus nug txog tej uas cov thawj coj ntawm lub Koom Txoos tau ntuas, thov cia li sib tham txog nej tej kev xav nrog nej niam nej txiv thiab cov thawj coj. Nej yuav tsum tso siab rau tus Tswv cov yaj saub kom thiaj muaj zog. Thawj Tswj Hwm Harold B. Lee hais tias, “Tib qho kev nyab xeeb uas peb cov mej zeej ntawm lub koom txoos no muaj yog kev mloog cov lus thiab kev ua raws li cov lus txib uas tus Tswv yuav qhia rau peb dhau ntawm Nws tus yaj saub. … Yeej yuav muaj tej yam uas peb yuav tsum muaj siab ntseeg thiab rub siab ntev txog. Tej zaum nej yuav tsis nyiam tej yam nws hais. … Tej zaum qhov uas nws hais ntawd yog qhov fab ntxeev ntawm nej tej kev xav txog kev kav teb chaws … nej tej kev xav txog saib tib neeg yuav tsum coj cwj pwm li cas … tej zaum yuav ua rau lwm tus neeg tsis tshua nyiam nej. Tiam sis yog tias nej ua tib zoo mloog tej no, ib yam li los ntawm tus Tswv lub qhov ncauj los, … lub qhov rooj ntuj txiag teb tsaus yuav kov yeej tsis tau nej; … thiab tus Tswv Vajtswv yuav ntiab tej qhov tsaus ntuj nti tawm ntawm nej mus … (saib Q&K 21:6).”¹⁶

Ib qho ntxiv uas yuav pov hwm nej ntawm tej khaub zig cua ntawm lub neej no yog Phau Ntawv Maumoos.

Thaum Thawj Tswj Hwm Henry B. Eyring yog ib tug tub hluas, nws tsev neeg tau tsiv tsev mus rau ib lub nroog tshiab. Thaum xub thawj nws tsis nyiam thiab tsis muaj phooj ywg tshiab ntau. Nws xav tias nws tsis sib haum nrog cov tub ntxhais kawm ntawv nyob hauv nws lub tsev kawm ntawv. Tej khaub zig cua kiv ncig ua yoj yoog. Nws tau ua dab tsi? Nws siv zog nyeem Phau Ntawv Maumoos, nws twb nyeem ntau zaus.¹⁷ Ntau xyoo tom qab ntawd, Thawj Tswj Hwm Eyring ua tim khawv hais tias: “[Kuv nyiam] rov qab nyeem Phau Ntawv Maumoos thiab muab kuv sab ntsuj plig txhawb nqa ntau.”¹⁸ “Yog zaj lus tim khawv uas muaj hwj chim loj tshaj txog Yexus Khetos.”¹⁹

Tus Tswv tau muab lwm txoj kev rau nej kom pab nej sawv khov kho, ib lub txiaj ntsim ntawm sab ntsuj plig uas muaj hwj chim loj tshaj tej khaub zig cua ntawm tus yeeb ncuab! Nws hais tias, “Sawv … hauv tej qhov chaw dawb huv, thiab yuav tsis txav mus li.”²⁰

Thaum kuv yog ib tug tub hluas, tsuas muaj 13 lub tuam tsev nyob hauv lub Koom Txoos. Tam sim no muaj 142 lub. Yim caum tsib feem pua ntawm lub Koom Txoos cov mej zeej nyob ze li 200 mais (320 km) ntawm ib lub tuam tsev. Tus Tswv tau muab cib fim rau nej tiam neeg mus rau Nws cov tuam tsev dawb huv ntau tshaj Nws muab rau lwm tiam neeg txij thaum ntuj tsim teb raug.

Nej puas tau sawv hauv lub tuam tsev, hnav khaub ncaws dawb, tos ua kev cai raus dej? Ua rau nej xav li cas? Muaj kev dawb huv uas nej hnov tau nyob hauv lub tuam tsev. Tus Cawm Seej txoj kev nyob kaj siab lug ua rau tej khaub zig cua ntawm lub ntiaj teb nyob tus.

Tej yam uas nej xav hauv nej nruab siab thaum nej nyob hauv lub tuam tsev yog qhov uas nej xav muaj hauv nej lub neej.²¹

Cia li nrhiav nej cov poj koob yawm txwv thiab nej cov kwv tij uas tau tso lub ntiaj teb no tseg. Nqa lawv tej npe mus rau lub tuam tsev nrog nej.²² Thaum nej kawm txog nej cov poj koob yawm txwv, nej yuav pom lawv txoj kev ua neej, sib yuav, muaj me nyuam; txoj kev ua ncaj ncees; thiab tej lub sij hawm pom tej yam uas nej tsis xav ua.²³

Tom qab ntawd nyob hauv lub tuam tsev nej yuav kawm ntxiv txog txoj kev Tsim lub ntiaj teb, txog Adas thiab Evas txoj kev ua neej, thiab qhov tseem ceeb tshaj plaws, txog peb tus Cawm Seej, Yexus Khetos.

Kuv cov kwv thiab cov muam, peb hlub nej, qhuas nej, thiab thov Vajtswv pab nej. Tsis txhob cia cov khaub zig cua rub nej kom poob. Nov yog nej lub caij nyoog—kom sawv khov kho ua cov thwj tim ntawm tus Tswv Yexus Khetos.²⁴

Tsa nej lub hauv paus nyob saum lub pob zeb ntawm nej tus Txhiv Dim kom ruaj nrees ntxiv.

Saib Nws lub neej thiab tej lus qhia rau nqi ntxiv.

Rau siab ua raws li Nws tus yam ntxwv thiab Nws tej lus txib ntxiv.

Muab siab npuab tus Cawm Seej txoj kev hlub, Nws txoj kev hlub tshua thiab kev tshav ntuj, thiab tej txiaj ntsim ntawm Nws txoj Kev Theej Txhoj ntxiv.

Thaum nej ua li no, kuv cog lus rau nej tias nej yuav saib tej khaub zig cua yog tej no xwb—tej kev sim siab, tej kev ntxias, tej yam uas tab kaum nej, los yog tej kev cov nyom uas pab nej loj hlob tuaj. Thaum nej ua neej ncaj ncees txhua xyoo, kuv cog lus tias tej uas muaj los rau nej yuav ua rau nej paub tias Yexus yog tus Khetos. Nej yuav sawv khov kho thiab ruaj nrees saum lub pob zeb ntawm sab ntsuj plig. Nej yuav xyiv fab vim Vajtswv tau xa nej los nyob no kom npaj rau Yexus Khetos txoj kev rov los.

Tus Cawm Seej hais tias, “Kuv yuav tsis tso nej ua ntsuag ib zaug li; kuv yuav rov qab los cuag nej.”²⁵ Nov yog lo lus cog tseg uas Nws muab rau nej. Kuv paub tias lo lus cog tseg no muaj tseeb. Kuv paub tias Nws muaj txoj sia nyob, los ntawm Yexus Khetos lub npe, amees.