An̄jiwiwi ko in Jetōb


Jab kōtļo̧k bwe an̄juwiwi kein ren uunlaļļo̧k kom̧. Raan ko ami kein—n̄an jutak kajoor āinwōt rikaļoor ro an Irooj Jisōs Kraist.

Ij iakiakwe kom̧ jibon̄niin—eļaptata jodikdik ro rej jim̧or pād ilo Im̧ōn Kweilo̧k in im ilo aolepen peļaakin laļ in. Am̧i ej juōn epepen in kāālet in jibadbad, im ij ekonono eļaptata n̄an kom̧.

Elōn̄ iiō remootļo̧k ke baamļe eo am ar pād ilo Florida, jun aire ekar wōtlo̧k ejjab ettoļo̧k jān kōm. Juōn kōrā ej jokwe ilo juōn em̧ āinwōt traila, ekar etal n̄an imōn kōpojak eo an n̄an pukōt jokane. Mwiin ekar jino wūdiddid. Jidik iien ar ellā im liin ar ron̄ ainikien armej eo ej jokwe iturin. “N̄a e ije ilo ruum e im̧aan.” Ke ej diwōj jān imōn kōpoojak eo an, e kar kanuij ļap bwilōn̄ eo an, liin ar lo bwe aire eo ar kotak im bōkļok m̧weo im̧ōņ ilo mejatoto, im kajijetm̧anm̧ane ioon m̧weo imōn armej eo ej jokwe iturin.

Kom̧ jodikdik ro jera, laļ in eban juon jikin eaenōm̧m̧an ilo ad epaakeļo̧k im epaakeļo̧k Itok eo Kein Karuo an Rilo̧mo̧o̧r. Jeje ko rekwōjarjar rej kean̄ bwe men otemjeļo̧k renaaj limotak.1 Brigham Young e kar ba, “Em̧ōj kar kwaļo̧ke n̄an n̄a ilo kar jinoin Kabun̄ in, bwe Kabun̄ in enaaj ererak, jeban, eddōk im aetok, im ilo men in jon̄an wōt n̄an ererak eo an Gospel ilubwilijin laļ ko ilo laļ in, āindein enaaj jon̄an ļapļok in kajoor eo an Setan.” 2

Eļapļok inepata kake jān makitkit in laļ ko im tariņe ko 3 kar kanaan kaki rej ān̄jiwiwi ko in jetōb me remaron̄ kōteeb kom̧ jān pedped in jetōb ko ami im doorļo̧k jetōb ko ami ilo jikin ko im kom̧ jan̄in kar ļōmņak kaki, jet iien ilo ami jab kile ke em̧ōj kōm̧akūt kom̧.

An̄juwiwi ko renanatata rej kapo ko an ri jumae eo. Jerawiwi eļak kar baj m̧ōttan laļ in, ak eaar jan̄in pidodo tōpare, an̄ūri, im pidodo bōke e jān tōrre in. Ewōr, aaet, juon kipel ekajoor me enaaj kalur an̄jiwiwi in jerawiwi kein. Ij na etan men in ukweļo̧k.

Ejjab aolep an̄juwiwi ko ilo mour rej kōm̧adm̧ōdi. Jet rej kōnke kāālet ko rebōd an ro jet, im jet rej baj itok kōnke en̄in ej mour wabanban.

Ke eaar juōn ladik edik, Būreejtōn Boyd K. Packer ekar en̄tan jān nan̄inmej eo emaron̄ kōjemļok an etetal, polio. Ke Elder Dallin H. Oaks ekar jiljilimjuōn an iiō, e kar jidimkij an jemān mej. Ke Sister Carol F. McConkie jān Būreejtōnji eo Eutiej an Doulul eo an Jiron̄ ro ekar juōn jodikdik, jemān im jinen rar jeppel. Men ko reppen renaaj itok n̄an kwe, ak ilo ami lōke Anij, renaaj kōkajoorļo̧k tōmak eo ami.

Ilo ijoko inabwōj, wōjke ko rej eddōk ilo peļaak ko rekōtoto re kajoorļo̧k. Ke kōto ko rej uuk peļaakin juōn wōjke edik, aeer ko iloan wōjke in ej kōm̧anm̧ane ruo men. Kein kajuōn, rej karum okar ko bwe en mōkaj aer eddōk im ererakļo̧k. Kein karuo, aeer kein ilo wōjke in rej jino ejaak ekkal ko in kij ko im rej lukkun kōmman bwe kāān eo im ra ko ren mijelļok im ejjeļo̧k apan̄ n̄an aeer ko an kōto eo. Okar im ra kein rekajoorļo̧k rej kōjparok wōjke eo edik jān kōto ko me aaet renaaj bar jepļaaktok.4

Kom̧ ejjeļo̧k jemļo̧kin aorōk eo ami n̄an Anij jān juōn wōjke. Kom̧ij likao im jiron̄ ro Nejin. Eaar kōm̧anm̧an bwe jetōb eo ekajoor im maron̄ an̄juwiwi ko an mour. An̄jiwiwi ko ilo am̧ jodikdik, āinwōt kōto eo ņae juon wōjke edik, emaron̄ kōļapļo̧k kajoorļo̧k ilo jetōb eo am̧, kōpooj kom n̄an iiō ko im̧aan.

Ewi wāween am pojak n̄an an̄jiwiwi ko am̧? “Kememej … ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧j aikuj kalek pedped ko ami; bwe n̄e devil enaaj jilkintok kōto ko rekkajjoor an, … an aire ilo an̄juwiwi ko, … n̄e aolep wōt dekā im lan̄ rekkajoor renaaj bun̄it eok, enaaj ejjeļo̦k aer kajoor…n̄an uuklaļļo̦k kom kōnke ejm̧aan eo kom̧ar ekkal ioon.” 5 En̄in ej kōjparok eo am̧i ilo an̄jiwiwi eo.

Būreejtōn Thomas S. Monson eaar ba: “Ilo juōn iien jon̄ak ko an Kabun̄ im jon̄ak ko an jukjukin pād kar lukkuun jejjet n̄an doon, kiiō ewōr juōn kōta eļap ikōtaad, im ej kilepļo̧k im debakbakļo̧k.”6 Tua in, n̄an jet, ej kalimotak an̄juwiwi ko ilo jetōb rekkajoor. Kōtļo̧k bwe in kwaļo̧k jet wanjon̄ok.

Allōn̄ eo ej ilo̧k Būreejtōnji eo Kein Kajuon im Doulul eo an Jon̄oulruo Rijilōk ro rar kajedede juōn letta n̄an ritōļ ro an Kabun̄ in ilo aolepen laļ in. Jidikin leta in ej konono “Oktak ko ilo kakien ko an kien rej jab, em̧ool reban, ukōt kien m̧wil (moral law) eo Anij ar kajutak e. Anij ej kōtmāne bwe jen rie im kōjparok kien ko An jekdoon ukoktak in lōmnak kein ak ukoktak ko ilo jukjukin pād eo. Kien erreo eo An ealikkar, kōtaan ko an em̧m̧aan im kōrā rekkar wōt ikōtaan juōn em̧m̧an im juōn kōrā me rej iumin kien im kakien rar marre āinwōt ļeo im lio pālele. Kōmij rōjan̄ kom̧ n̄an bar etale katak in epād ilo “Baam̧le Eo: Juōn Kean̄ n̄an Laļ in.’”7

Ilo an laļ jejļo̧k jān kien erreo eo an Irooj, jej jab, Būreejtōn Monson eaar ba: “Rilo̧mo̧o̧r eo an armej otemjej ar kwaļo̧k Kadkadin āinwōt juōn eo ej pād ilo laļ ak ejjab jān laļ. Jemaron̄ barāinwōt pād ilo laļ ak jej jab jān laļ ilo ad jab bōki katak ko rebōd im katak ko rej jab m̧ool im m̧ool wōt n̄an men eo Anij ar jiron̄ kōj.”8

Ilo an lōn̄ kien ko im armej ro rebun̄bun̄ kar bar kōmeļeļeik m̧are, Irooj ejjan̄in. Ilo jinoin, Anij eaar jino m̧are eo ikōtaan juon em̧m̧aan im juon kōrā—Adam im Iv. Eaar ejaake un ko unin mare n̄an aer ellāļok jān bun̄bōro an juon make im e em̧ōņōņō ko an rūtto ro wōt n̄an aer aorōk ļo̧k in, n̄an iuunm̦aanļo̦k peļaak eo em̧m̧antata n̄an an ajiri ro lotaktokie, n̄an lale im karūttoļok ajri ro. Baam̧le ko rej mennin aorōk ko an lan̄.9

Etke ej jab bōjrak ad ekōnono kōn men in? Āinwōt an Rijilōk Paul kar ba, “kōm jab kallimjek men ko jej loi, a men ko je jab loi.” 10 Āinwōt Rijilōk ro an Irooj Jisōs Kraist, eddo eo am ej n̄an katakin kōn karōk eo an Rikōm̧anm̧an eo ad n̄an ro nejin im kakkōle er kōn waļo̧k ko an kajej tokjān kien kein.

Kiiō epaak, iaar kōnono ippān an juōn Laurel eo jān United States. Ij quote jān email eo an:

“Iiō in em̧ootļok jet iaan ro jera ilo Facebook rar jino jei ijoko rej jutak ie ikkijien mare. Elōn̄ rej rie mare an em̧m̧aan ippān em̧m̧aan im kōrā ippān kōrā, im jet jodikdik in Kabun̄ in rar kalikkar ke “rekōņaan” jeje kein. Iaar jab kōm̧m̧an ennaan.

“Iaar kālet n̄an kwaļo̧k tōmak eo aō kōn mare in etto eo (traditional marriage) ilo juōn jekjek eļap kōļmenļo̧kjeņ ie.

“Ippān profile pija eo aō, iaar kobaik naan kein, ‘Ij tōmak ilo mare ikōtaan juōn em̧m̧aan im juōn kōrā.’ Enan̄in iien eo wōt iaar jino bōk message ko. ‘Kwo kūbboņ.’ ‘Kobrak kōn ekajet.’ Juon eaar keidi eō n̄an juōn eo ewōr an rikōm̧ankoko. Im iar bōk ennaan in jān juōn jera eo ej uwaan Kabun̄ in im ekajoor: ‘Kwoj aikuij tōpartok iien kein. Men kein rej ukoktak im aidein kwōj aikuij in oktak.’

“Iaar jab jumae er,” liin eaar ba, “ak iaar jab joļo̧k ennaan eo aō.”

“Liin ej kōjem̧ļo̧ke: Jet iien, āinwōt an Būreejtōn Monson kar ba, ‘Kwoj aikuij jutak make iaam̧.’ Kōjatdikdik bwe āinwōt jodikdik ro, jenaaj jutak ippān doon ilo m̧ool n̄an Anij im n̄an katak ko an rikanaan ro An remour.” 11

Juōn n̄ūrbōktak in ejenolo̧k n̄an kōj ej aikuj ro rej kakkōt kōn ejja kareelel in wōt. Ej juon an̄jiwiwi eļap im iūūm̧. Ikōņaan kwaļo̧k aō iakwe im kile ro rej peran jelm̧ae kapo in kōn tōmak im m̧ool wōt n̄an kien ko an Anij! 12 Ak aolep, rej jenolo̧k kōn jokālet ko aer im tōmak ko, ko rej aikuj ad jouj im kile.13

Rilo̧mo̧o̧r eo eaar katakin kōj n̄an iakwe jab wōt ro m̧ōttad ak barāinwōt ro rej jab errā ippād—im aaet ro rej kapok kōj. Eaar ba: “Bwe eļan̄n̄e kom̧ij iakwe er eo ej iakwe kom̧, ta jineekjej eo am̧i? … Im n̄e kwe rie em̧m̧aan ro am̧ rejitōnbōro wōt, ta eo kom̧ij eo kom̧ij kōm̧m̧ane eļapļo̧k jen ro jet?” 14

Rikanaan Joseph Smith ar kakkōle kōj n̄an “ekkōļ kōn kōwānōk kōj make” im n̄an kōļapļo̦k buruōd n̄an aolep em̧m̧aan im kōrā ro m̧ae iien jej en̄jake “jekōņaan bōk er ioon aerad. 15Ilo gospel eo an Jisōs Kraist ejjeļo̧k jikin n̄an kajirere kake, kiele, ak kaljekļo̧k.

Elan̄n̄e ewōr am̧i kajjitōk kōn kapilōk eo jān ritōl ro an Kabun̄ in, jouj im ekonono kake n̄irbōktak ko am ilo ejjeļo̦k idadiki ippān ro jememi im jinemi im ritōļ ro ami. Kom̧ij aikuiji kajoor eo ej itok jān lōke rikanaan ro an Irooj. Būreejtōn Harold B. Lee eaar ba, “Jokane eo wōt ewōr ippād āinwōt ro uwaan kabun̄ in n̄an … jeļā wāween eo̧ron̄ naan ko im kien ko im Irooj enaaj litok kōn rikanaan ro An … Enaaj wōr jet men ko renaaj bōk kōm̧aanwa im tōmak. Kom̧ maron̄ ban kōņaan ta ej itok … E maron̄ āinjuōn jān wāween am lale makitkit ko an kien … wāween am̧ lale social issue ko … oktak jān … ak mour in iiaio eo am̧i. Ak elan̄n̄e kwōj ron̄jaki men kein, āinwōt n̄e rekar jān lo̧n̄iin Irooj makmake, oror ko an hell rejjamin naaj anjo̧ ioom̧, im Irooj Anij enaaj kōmakunļo̧k kajoor ko an marok jān im̧aam̧ …’ (D&C 21:6).”16

Bar juon kōjparok eo ekajoor n̄an an an̄jiwiwi ko an mour ej Bok in Mormon.

Ke Būreejtōn Henry B. Eyring eaar juōn jodikdik, baam̧ļe eo an ar emakitļo̧k n̄an juōn jikin kweilo̧k ekāāl. Jinoin eaar lo bwe emakit in ekar jab em̧m̧an im ekar jet wōt m̧ōttan. E en̄jake ekar jab em̧m̧an jokkin an kobaļok ippān rijikuul ro ilo high school eo an. An̄jiwiwi kein rekar jepooļe. Ta eo eaar kōm̧m̧ane? Ekar kōmaatļok an n̄an Bok in Mormon, riiti im kōjem̧ļo̧ke elōn̄ alen.17 Iiō ko tokālik, Būreejtōn Eyring eaar kam̧ool: “I [m̧ōņōņō in] ro̧o̧lļo̧k n̄an Bok in Mormon im kanuij idaak ikutkut jān e.”18 “[Ej] naan in kam̧ool eo ekajoortata kar je im ewōr ippād ke Jisōs Ri Kraist eo.”19

Irooj eaar letok n̄an kom̧ bar juōn wāween n̄an jutak pen, juon menin letok an jetōb ekajoorļo̧k jen an̄jiwiwi ko an rikapo eo! Eaar ba bwe jej aikuj jutak ilo jikin ko rekwojarjar, im jab em̧m̧akūt.20

Ke ikar juōn jodikdik, ekar wōr 13 wōt tempel ilo Kabun̄ in. Kiiō ewōr 142. Ralitokn̄oul-ļalem percent in membōr ro an Kabun̄ in rej jokwe 200 mail jān juōn tempel. Irooj eaar lewaj n̄an epepen in ami eļapļo̧k n̄an deļo̧n̄e tampeļ ko An rekwojarjar jen jabdewōt bar epepen ilo bwebwenato in laļ in.

Kom̧ nan̄in ke kar jutak ilo tempel eo, nuknuk mouj, im kōttar n̄an kōm̧m̧ani peptaij ko? Ewi wāween en̄jake ko ami? Ewōr juōn en̄jake ekanemarmej im ekwōjarjar ilo tempel en. Aenōm̧m̧an eo an Rilo̧mo̧o̧r ej irooj ioon an̄jiwiwi ko an laļ in.

Wāween en̄jake eo ami ilo tampeļ en ej jon̄ok eo n̄an wāween eo kom̧ kōņaan en̄jake ilo mour eo amii.21

Pukōt ro jim̧m̧ami im jibūmi im ro rilikūmi me rekar etal im̧ami. Bōkļo̧k etaer n̄an tampeļ ippāmiļo̧k.22 Ilo ami jeļā kōn ro jibūmi im jim̧m̧ami kom̧ naaj lo jon̄ok ko an mour, an mare, an ajri jon̄ok in weeppān; im jān iien n̄an iien jon̄ok ko kwonaaj kōņaan jejļo̧k jāne.23

Tok ālik ilo tampeļ eo kom̧ naaj jeļā eļapļo̧k kōn Kōm̧anm̧an eo an laļ in, kōn jon̄ok ko ilo mour ko an Adam im Iv, im , eo eaorōk tata, kōn Rilo̧mo̧o̧r, Jisōs Kraist.

Ro jeiū im jatū rem̧m̧an ded, ekōjkan am iakwe kom̧, kautiej kom̧, im jar kōn kom̧. Jab kōtļo̧k bwe an̄juwiwi kein ren uunlaļļo̧k kom̧. Raan ko ami kein—n̄an jutak kajoor āinwōt rikaļoor ro an Irooj Jisōs Kraist.24

Ekkal bwe en penļo̧k pedped eo am̧i ioon ejm̧aan an Ripinmuur eo am̧.

Kōļapļok ami kaorōk mour im katak ko An je ban keidi.

Ļoor ilo eļapļo̧k laļn̄ijn̄ij, waanjon̄ok eo An im kien ko An.

En m̧wilaļļo̧k am̧ atbakwōje iakwe eo An, tūriam̧o im jouj eo An, im menin letok ko jān Pinmuur eo An rekajoor.

Ilo am̧i kōm̦m̦aqne, ij kallim̧uri kom̧ bwe kom̧ naaj mejeki an̄juwiwi kein ilo lukkuun jekjekier—idajon̄jon̄ ko, kapo ko, kōmad ko, im men ko reppen im renaaj jipan̄ kom̧ eddōk. Im ilo ami mour jim̧we iiō ālkin iiō, ij kam̧oole n̄an kom̧ bwe imenene kein ami renaaj kapenļo̧k kom̧alen im bar alen ke Jisōs ej RiKraist eo. Ejm̧aan eo ium̧win neemi enaaj n̄ūn̄ļo̧k im tōt. Kom̧naaj m̧ōņōņō bwe Anij eaar likūt kom̧ ijin bwe kom̧in juon m̧ōttan m̧aanjabpopo ko āliktata n̄an ro̧o̧ltok eo eaiboojoj an Kraist.

Rilo̧mo̧o̧r eaar ba, “I jamin likit kom̧ atajinemjen: I naaj iwōj n̄an kom̧.”25 En̄in ej kallim̧ur eo An n̄an kom̧. Ijeļā bwe kallim̧ur in em̧ool. Ijeļā bwe E emour, ilo etan Jisōs Kraist, amen.

Kwaļo̧k Kein Jipan̄ ko

  1.  

    1. Doctrine and Covenants 88:91.

  2.  

    2. Discourses of Brigham Young, sel. John A. Widtsoe (1954), 72.

  3.  

    3. Lale Dallin H. Oaks, “Preparation for the Second Coming,” Ensign orLiahona, May 2004, 7–10.

  4.  

    4. Lale A. Stokes, A. H. Fitter, and M. P. Coutts, “Responses of Young Trees to Wind and Shading: Effects on Root Architecture,” Journal of Experimental Botany, vol. 46, no. 290 (Sept. 1995), 1139–46.

  5.  

    5. Hilamōn 5:12.

  6.  

    6. Thomas S. Monson, “Kajoor an Priesthood,” Ensign akLiaona, Eprōļ 2011,40.

  7.  

    7. First Presidency letter, Mar. 6, 2014; lale barāinwōt David A. Bednar, “We Believe in Being Chaste,” Ensign akLiahona, May 2013, 41–44; Dallin H. Oaks, “No Other Gods,” Ensign akLiahona, Nov. 2013, 72–75; For the Strength of Youth (booklet, 2011), 35–37.

  8.  

    8. Thomas S. Monson,Ensign akLiahona, May 2011, 67.

  9.  

    9. Elder Russell M. Nelson eaar ba: “Marriage is the foundry for social order. … That union is not merely between husband and wife; it embraces a partnership with God” (“Nurturing Marriage,” Ensign orLiahona, May 2006, 36). Barāinwōt lale Matu 19:5–6.

  10.  

    10. 2 Korint 4:18.

  11.  

    11. Personal correspondence and conversation, Mar. 17, 2014; barāinwōt lale Thomas S. Monson, “Dare to Stand Alone,” Ensign akLiahona, Nov. 2011, 60–67.

  12.  

    12. Lale Jeffrey R. Holland, “Helping Those Who Struggle with Same-Gender Attraction,” Ensign, Oct. 2007, 42–45;Liahona, Oct. 2007, 40–43.

  13.  

    13. Aaet n̄e Korihor eaar pukōt n̄an kakkure tōmake an armej ro, kakien ko an Anij raar bōbrae e bar kakkure: “Ejjeļo̧k kien ņae tōmak an juon armej; bwe eaar kanooj in jejjet ilo jum̧ae naan in jiron̄ ko an Anij bwe en wōr juon kien eo ej bōktok armej n̄an oņaake eo āinjuon. … Eļan̄n̄e juon armej eaar kōņaan jerbal n̄an Anij, eaar an uteej; … a eļan̄n̄e eaar jab tōmak ilo E, eaar ejjeļo̧k kien n̄an kaje e” (Alma 30:7, 9). Laajrak in Tōmak jon̄oul juon jej riit, “Kimij kwalok bwe ewōr am jimwe in kabun̄ n̄ōn Anij Ekajurpōtata ekkar n̄ōn karok im konan ko am make, im bareinwōt aolep armij ewōr air jimwe in kabun̄ ilo jabdewōt wewein, jikin, ak jabdrewōt ta eo remaron̄ kabun̄ n̄ōn e.”

  14.  

    14. Matu 5:46–47.

  15.  

    15. Teachings of Presidents of the Church: Joseph Smith (2007), 427, 429.

  16.  

    16. Teachings of Presidents of the Church: Harold B. Lee (2000), 84–85;barāinwōt lale Robert D. Hales, “General Conference: Strengthening Faith and Testimony,” Ensign akLiahona, Nov. 2013, 6–8.

  17.  

    17. Lale Robert I. Eaton and Henry J. Eyring, I Will Lead You Along: The Life of Henry B. Eyring (2013), 40.

  18.  

    18. Henry B. Eyring, Choose Higher Ground (2013), 38.

  19.  

    19. Henry B. Eyring, To Draw Closer to God (1997), 118.

  20.  

    20. Doctrine and Covenants 87:8; see also Doctrine and Covenants 45:32.

  21.  

    21. Lale Doctrine and Covenants 52:14.

  22.  

    22. Lale Neil L. Andersen, “Find Our Cousins!” (address given at RootsTech 2014 Family History Conference, Feb. 8, 2014); lds.org/prophets-and-apostles/unto-all-the-world/find-our-cousins.

  23.  

    23. Lale David A. Bednar, “The Hearts of the Children Shall Turn,” Ensign akLiahona, Nov. 2011, 24–27.

  24.  

    24. Lale Hilamōn 7:9.

  25.  

    25. Jon 14:18.