2010–2019
O Asiosio Faaleagaga
Aperila 2014


O Asiosio Faaleagaga

Ata
Elder Neil L. Andersen

Aua nei tuuina atu i asiosio e tosoina outou i lalo. O o outou aso nei—e tutu malolosi ai o ni soo o le Alii o Iesu Keriso.

Ou te faafeiloai atu ia te outou i lenei taeao—aemaise lava le tupulaga talavou o e o i ai iinei i le Maota Autu mo Konafesi ma le lalolagi atoa. O outou o se tupulaga filifilia o se taunuuga faapitoa, ma ou te talanoa faapitoa atu ia te outou.

I le tele o tausaga ua mavae a o matou asiasi atu i lo matou aiga i Florida, sa agi ai se asiosio e le mamao tele mai le nofoaga sa matou i ai. O se tasi o tamaitai sa nofo i se fale feaveai, sa alu i lona faleletaua mo le saogalemu. Sa amata ona luluina le fale feaveai. Na mavae sina taimi. Ona ia faalogoina lea o le leo o lona tuaoi: “O au lea ou te i i le potu i luma.” Ina ua sau i fafo mai le faleletaua, sa faateia o ia i lona iloa ai sa sii e le asiosio lona fale feaveai ma ave i luga i le ea, ma faatu sa’o lelei i luga tonu o le fale feaveai o lona tuaoi.

Au uo talavou, o le a le avea le lalolagi ma se nofoaga toafimalie a o tatou tulalata atu i le Afio Mai Faalua o le Faaola. Ua folafola mai e tusitusiga paia e faapea “o le a vāvāō mea uma.”1 Na saunoa mai Polika Iaga, “Sa faaalia mai ia te au i le amataga o lenei Ekalesia, e faapea o le a salalau atu, uluola, tuputupuae ma faalautele atu le Ekalesia, ma o le faateleina o le salalau atu o le Talalelei i malo o le lalolagi, o le faateleina foi lena o le mana o Satani.”2

Ata
A tornado.

O mea e sili atu ona popole i ai nai lo o mafuie ma taua3 sa valoia, o asiosio faaleagaga e mafai ona seieseina oe mai lou faavae faaleagaga ma tuuina lou agaga i tulaga e te le i mafaufauina e mafai, ma o nisi taimi e te tau lei iloaina ua sii ese oe mai lou faavae faaleagaga.

O asiosio sili ona leaga o faaosoosoga ia a le fili. E avea pea le agasala ma se vaega o le lalolagi, ae e lei matua faigofie lava ona oo i ai, faigofie tele ona faamalieina, ma ua matua taliaina lava. O le mea moni, o loo i ai se malosiaga mamana o le a sao ai mai asiosio o le agasala. Ua ta’ua o le salamo.

E le o asiosio uma o le olaga e mafua mai ona o au amioga. E oo mai nisi [o asiosio] ona o filifiliga sese a isi, ma o nisi e oo mai ona o le olaga faaletino lenei.

A o avea ma se tama talavou, sa mafatia ai Peresitene Boyd K. Packer mai le faamai pipili. Ina ua fitu tausaga o Elder Dallin H. Oaks sa faafuasei ona maliu lona tama. A o talavou Sister Carol F. McConkie o le au peresitene aoao o Tamaitai Talavou, sa tete’a ona matua. E oo mai luitau ia te oe, ae a e faalagolago i le Atua, o le a latou faamalosia lou faatuatua.

Ata
Cutaway showing the roots of a tree growing in windy conditions.

I le natura, o laau e ola a’e i se siosiomaga matagiā e malolosi atu. Pe a agi se matagi i autafa o se laau mu’a, o malosiaga i totonu o le laau na te faia ni mea se lua. Muamua, latou te faatupuina ia a’a ina ia tutupu vave ma sosolo mamao atu. Lona lua, e amata fatu e malosiaga i totonu o le laau ni sela ia e faamafiafiaina le ogalaau ma lala ma atili lavātia ai le malosi o le matagi. O nei aa ma lala malolosi atu e puipuia le laau mai matagi ia e mautinoa lava e toe foi atu.4

E manino lava e sili atu lou taua i le Atua nai lo o se laau. O oe o Lona atalii po o Lona afafine. Na Ia foafoaina lou agaga ia malosi ma mafai ona tetee atu i asiosio o le olaga. O asiosio o lou talavou, e pei o le matagi e taia ai se laau mu’a, e mafai ona faateleina ai lou malosi faaleagaga, e saunia ai oe mo tausaga o i luma atu.

E mafai faapefea ona e saunia mo au asiosio? “Ia manatua, o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, … ana ufanafana i le asiosio, … pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo … ona o le papa lea ua oulua atinae ai i luga.”5 O lou saogalemu lea i le asiosio.

Na saunoa mai Peresitene Thomas S. Monson faapea, “I se tasi taimi na tele lava ina tutusa tulaga faatonuina o le Ekalesia ma tulaga faatonuina o malo, o le taimi nei ua i ai se va tēlē i lo tatou va, ma o loo faatupulaia pea le lautelē o lena va.”6 Mo nisi, o lenei va telē ua tutupu mai ai ni asiosio malolosi faaleagaga. Sei ou faasoa atua se faataitaiga.

O le masina ua tea nei sa faasalalau atu ai e le Au Peresitene Sili ma le Korama a Aposetolo e Toasefululua se tusi i taitai o le Ekalesia i le salafa o le lalolagi. O loo i ai se vaega e faapea: “O suiga i tulafono faalemalo e le suia, ma e le mafai lava ona suia ai tulafono o amioga mama ua faavaeina e le Atua. Ua faamoemoeina i tatou e le Atua ia tatou lagolagoina ma tausi Ana poloaiga e tusa lava po o a manatu eseese po o faiga i totonu o malo. O Lana tulafono o le ola mama ua manino: o sootaga faalefeusuaiga ua na o le va lava o se alii ma se tamaitai ua faaipoipoina faaletulafono o se tane ma se ava. Matou te uunaia outou ia toe iloilo … le aoaoga faavae o loo i ai i totonu ‘O Le Aiga: O Se Folafolaga i le Lalolagi.’”7

Ao pauese atu le lalolagi mai le tulafono o le legavia a le Alii, o tatou e leai. Na saunoa Peresitene Monson: “Na faamatala e le Faaola o tagata, o ia lava sa i ai i le lalolagi ae le o se tasi o le lalolagi. E mafai foi ona tatou i ai i le lalolagi ae le o ni o le lalolagi pe a tatou teenaina manatu faavae sese ma aoaoga sese ma tumau ma le faamaoni i mea ua poloaiina ai i tatou e le Atua.”8

E ui o le toatele o tagata o malo ma tagata amio lelei ua toe faauigaina le faaipoipoga, ao le Alii e leai. I le amataga lava, na amatalia e le Alii le faaipoipoga i le va o se alii ma se tamaitai—Atamu ma Eva. Sa ia mamanuina faamoemoega o le faaipoipoga ia sili atu i lo le faamalieina o le tagata lava ia ma le manuia o le tagata matua, o le mea e sili ona taua, ia faatelea’iina ai le faatulagaga atoatoa mo le fanauina o fanau, tausiaina ma faafaileleina. Ia aua lava nei o tatou faagaloina: o aiga o oa ia o le lagi.9

Aisea e faaauau ai pea ona tatou talanoa e uiga i lenei mea? E pei ona saunoa Paulo, “Matou [te] le manatunatu i mea ua vaaia, a o mea e le vaaia.”10 I le avea ai ma Aposetolo a le Alii o Iesu Keriso, ua ia i tatou le tiutetauave o le aoao atu o le fuafuaga a lo tatou Foafoa mo Lana fanau ma ia lapatai atu e uiga i taunuuga o le le amanaiaina o Ana poloaiga.

Talu ai nei, sa ou talanoa ai i se Lora e nofo i le Iunaite Setete. Ou te sii mai i lana imeli.

“O le tausaga ua mavae atu nei sa amata ai ona tusia e nisi o au uo i luga o le Facebook o latou manatu e uiga i le faaipoipoga. Sa toatele na lagolagoina le faaipoipoga o le itupa e tasi, ma e feoloolo nai talavou o le Ekalesia sa faailoaina lo latou ‘fiafia’ i le tusiga. E leai sa’u faamatalaga na faia.

“Sa ou filifili loa e tau atu lou talitonuga i le faaipoipoga ua masani ai i se ala magafagafa lelei.

Ata
Screenshot of a Facebook message taken on 4-14-14

“I lo’u ata i lou talaaga otooto, sa ou faaopoopo i ai le faamatalaga, ‘Ou te talitonu i le faaipoipoga i le va o se alii ma se tamaitai.’ Sa lei pine ae amata ona ou mauaina ni feau. ‘E te manatu faapito.’ ‘E te tusitusilima.’ Sa faatusaina au e se tasi o se pule o pologa. Ma sa ou mauaina lenei tusiga mai se uo lelei tele o ia o se tagata malosi o le Ekalesia, ‘E ao ona faafou ou manatu. O loo suia lava ia mea ma ua tatau foi ona e sui.’

“Ou te le i toe finau i ai,” o lana tala lea, “ae ou te le i aveesea lau faamatalaga mai luga o la’u itulau.”

Sa ia faaiuina e faapea: “O nisi taimi, e pei ona saunoa mai Peresitene Monson, ‘E tatau ona e tu na o oe.’ E faamoemoe i le avea ai o ni talavou, o le a tatou tutu faatasi i le faamaoni i le Atua ma i aoaoga a Ana perofeta soifua.”11

O se popolega taua ia i tatou o i latou ia o loo tauivi ma le faatosina atu i le itupa e tasi. O se asiosio ua matua saoasaoa tele. Ou te fia faailoa atu lou alofa ma lou talisapaia o i latou o e fetaiai ma le lototoa i lenei tofotofoga o le faatuatua ma tumau faamaoni ai i poloaiga a le Atua!12 Ae e manaomia e tagata uma, o e saoloto i a ana filifiliga ma talitonuga, lo tatou agalelei atu ma le popolega.13

Na aoao mai le Faaola e le gata ina ia tatou alolofa atu ia tatou uo ae ia faapena foi ma i latou o e le tutusa o tatou manatu—ma e o lava ia i latou o e teena i tatou. Sa Ia fetalai mai: “Aua afai tou te alolofa atu i e ua alolofa mai ia te outou, se a ea se taui tou te maua ai? … Pe afai tou te faapito lo outou fealofani i o outou uso, se a se mea sili ua outou faia?”14

Na lapataia i tatou e le Perofeta o Iosefa Samita ina ia “faaeteete i le faafiaamiotonu” ma faatetele o tatou loto agai atu ia i latou o e e ese lo latou vaaiga i le lalolagi nai lo i tatou, e oo lava i le tulaga ua “tatou … mananao e tauaveina i latou i luga o o tatou tauau.”15 I le talalelei a Iesu Keriso, e leai se nofoaga mo le taufaalili, faasaua, po o le faailogalanu.

Afai e i ai sau fesili e faatatau i le fautuaga mai taitai o le Ekalesia, faamolemole ia talanoaina ou popolega moni faatasi ma ou matua ma taitai. E te manaomia le malosi lea e oo mai i le faatuatuaina o perofeta a le Alii. Na saunoa Peresitene Harold B. Lee: “O lenei, na pau lava le saogalemu o loo i ai ia i tatou ma tagata o le ekalesia o le … gauai i upu ma poloaiga o le a tuuina mai e le Alii e ala mai i Ana perofeta. … E i ai mea o le a manaomia ai le onosai ma le faatuatua. Atonu o le a e le fiafia i mea o le a tau mai … E ono feteenai ma ou taofi faapolokiki … ou taofi faale-olaga. … faalavelave i … lou olaga tafao. Ae a e faalogo i nei mea, e pei o loo tuuina mai i le fofoga o le Alii Lava Ia, … ‘o le a le manumalo lava faitotoa o seoli ia te outou; … ma o le a tafiesea e le Atua mana o le pouliuli mai ou luma …’ (MF&F 21:6).”16

O le isi puipuiga malosi mai asiosio o le olaga o le Tusi a Mamona lea.

A o talavou Peresitene Henry B. Eyring sa siitia atu lona aiga i se aai fou. Sa vave ona ia lagonaina le le fiafia o lea masiiese ma sa itiiti ni ana uo fou. Sa ia lagona e lei fetaui lelei ona uiga ma tamaiti i lana aoga maualuga. Sa amata ona ia fetaiai ma le asiosio. O le a le mea sa ia faia? Sa ia faaalu lona malosi i le Tusi a Mamona, e faitauina i le tele o taimi.17 I ni tausaga mulimuli ane, sa molimau ai Peresitene Eyring: “Ou te [fiafia] e saga suesue soo le Tusi a Mamona ma matuai inu soo mai ai.”18 “[O se] molimau tusitusia sili lea ona mamana ua tatou maua e faapea o Iesu o le Keriso.”19

Ua tuuina mai e le Alii ia te outou le isi auala e tutu mausali ai, o se meaalofa faaleagaga silisili ona mamana nai lo asiosio a le fili!. Na Ia fetalai, “Tutu … i nofoaga paia, ma aua le masi’i ese.”20

A o ou talavou, sa na o le 13 malumalu i le Ekalesia. O le taimi nei ua 142. E valu sefululima pasene tagata o le Ekalesia ua aumau nei i totonu o le 200 maila (320 km) o se malumalu. Ua tuuina mai e le Alii i la outou tupulaga ia maua se avanoa tele atu e ulu atu ai i Ona malumalu paia nai lo se isi lava tupulaga i le talafaasolopito o le lalolagi.

Pe ua e tu ea i totonu o le malumalu, ua laei i laei papae, ma faatalitali e faia ni papatisoga? O a ni ou lagona? O loo i ai se lagona mamana o le paia i totonu o le malumalu. E faatoilalo e le filemu o le Faaola ia taaviliga o asiosio o le lalolagi.

O ou lagona i totonu o le malumalu o se mamanu lea mo le auala e te manao ia lagonaina i lou olaga.21

Saili ou tamamatutua ma tinamatutua ma ou tausoga e vavā mamao le sootaga ua maliliu. Ia e alu i le malumalu ma ave o latou igoa.22 A o outou aoao e uiga i o outou tuaa o le a outou vaaia ni mamanu o le olaga, o faaipoipoga, o fanau; o mamanu o le amiotonu; ma i nisi taimi o ni mamanu o le a e manao e aloese mai ai.23

Mulimuli ane i totonu o le malumalu, o le a e aoao atili ai e uiga i le Foafoaga o le lalolagi, e uiga i le mamanu o olaga o Atamu ma Eva, ma le mea e sili ona taua, e uiga i lo tatou Faaola o Iesu Keriso.

Ou uso e ma tuafafine talavou, matou te alolofa ia te outou, faamemelo ia te outou, ma tatalo mo outou. Aua nei tuuina atu i asiosio e tosoina outou i lalo. O o outou aso nei—e tutu malolosi ai o ni soo o le Alii o Iesu Keriso.24

Ia fausia mausali atili o outou faavae i luga o le papa o lo outou Togiola.

Ia faaputu atili ma le atoatoa oa o Lona soifuaga ma aoaoga le mafaatusalia.

Mulimuli ma le filiga atili i Lana faataitaiga ma Ana poloaiga.

Talia atili ma le loloto le alofa o le Faaola, Lona alofa mutimutivale ma le alofa tunoa, ma meaalofa mamana o Lana Togiola.

A e faia lenei mea, ou te folafola atu o le a e vaai i tulaga moni o asiosio—tofotofoga, faaosoosoga, faalavefau, po o luitau e fesoasoani i lou tuputupu ae. Ma a o e ola ai amiotonu i lea tausaga ma lea tausaga, ou te tautino atu ia te oe o le a faamautinoa atu e ou aafiaga ia te oe i lea taimi ma lea taimi o Iesu o le Keriso. O le maa faaleagaga lea i lalo o ou vae o le a mausali ma mautu. O le a e olioli ua tuuina oe e le Atua iinei ina ia avea ma se vaega o le sauniuniga faaiu mo le toe afio mai faamamaluina o Keriso.

Na fetalai mai le Faaola, “Ou te le tuua outou o matuaoti, ou te sau ia te outou.”25 O Lana folafolaga lea ia te oe. Ou te iloa e moni lenei folafolaga. Ou te iloa o loo soifua o Ia, i le suafa o Iesu Keriso, amene.

Faamatalaga

  1. Mataupu Faavae ma Feagaiga 88:91.

  2. Discourses of Brigham Young, sel. John A. Widtsoe (1954), 72.

  3. Tagai Dallin H. Oaks, “Sauniuniga mo le Afio Mai Faalua,” Liahona, Me 2004, 7–10.

  4. Tagai A. Stokes, A. H. Fitter, and M. P. Coutts, “Responses of Young Trees to Wind and Shading: Effects on Root Architecture,” Journal of Experimental Botany, vol. 46, no. 290 (Sept. 1995), 1139–46.

  5. Helamana 5:12.

  6. Thomas S. Monson, “Mana o le Perisitua,” Liahona, Me 2011, 66.

  7. Tusi a le Au Peresitene Sili, 6 Mat, 2014; tagai foi David A. Bednar, “Matou Te Talitonu i le Nofomama,” Liahona, Me 2013, 41–44; Dallin H. Oaks, “Leai Ni Atua Ese,” Liahona, Nov. 2013, 72–75; Mo le Malosi o le Autalavou (tamaitusi, 2011), 35–37.

  8. Thomas S. Monson, Liahona, Me 2011, 67.

  9. Na saunoa Elder Russell M. Nelson: “O le faaipoipoga o le faavae lea o sootaga fegalegaleai. … O lena tuufaatasiga ua le na o le va o le tane ma le ava; o loo aofia ai ma se faigapaaga ma le Atua” (“Faafaileleina o Faaipoipoga,” Liahona, Me 2006, 36). Tagai foi i le Mataio 19:5–6.

  10. 2 Korinito 4:18.

  11. Tusi ma talatalanoaga patino, 17. Mati, 2014; tagai foi Thomas S. Monson, “Ia Lototele e Tu Na o Oe,” Liahona, Nov. 2011, 60–67.

  12. Tagai Jeffrey R. Holland, “Fesoasoani ia i Latou o loo Tauivi ma le Tosina Atu i Itupa Tutusa,” Liahona, Oke. 2007, 40–43.

  13. E ui lava na saili e le anetikeriso o Korioa le faatamaia o le faatuatua o tagata, na puipuia o ia e tulafono a le Atua mai le taui atu: “Sa leai se tulafono e faasaga i talitonuga o se tagata; ona sa matua le tusa ai ma poloaiga a le Atua le i ai o se tulafono o le a aumai ai tagata i ni tulaga le tutusa. … Afai ua manao se tagata e auauna i le Atua, o lana aia lea; … ae afai e le talitonu o ia ia te ia sa leai se tulafono e faasala ai o ia” (Alema 30:7, 9). O le mataupu faavae o le faatuatua lona sefulutasi e faitauina faapea, “Ua ia i matou le aia tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea aia tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai.”

  14. Mataio 5:46–47.

  15. Aoaoga a Peresitene o le Ekalesia: Iosefa Samita (2007), 462.

  16. Aoaoga a Peresitene o le Ekalesia: Harold B. Lee (2000), 92; tagai foi Robert D. Hales, “Konafesi Aoao: Faamalosia o le Faatuatua ma le Molimau,” Liahona, Nov. 2013, 6–8.

  17. Tagai Robert I. Eaton ma Henry J. Eyring, I Will Lead You Along: The Life of Henry B. Eyring (2013), 40.

  18. Henry B. Eyring, Choose Higher Ground (2013), 38.

  19. Henry B. Eyring, To Draw Closer to God (1997), 118.

  20. Mataupu Faavae ma Feagaiga 87:8; tagai foi Mataupu Faavae ma Feagaiga 45:32.

  21. Tagai Mataupu Faavae ma Feagaiga 52:14.

  22. Tagai Neil L. Andersen, “Find Our Cousins!” (address given at RootsTech 2014 Family History Conference, Feb. 8, 2014); lds.org/prophets-and-apostles/unto-all-the-world/find-our-cousins.

  23. Tagai David A. Bednar, “O Le a Liliu Atu Loto o Fanau i o Latou Tama,” Liahona, Nov. 2011, 24–27.

  24. Tagai Helamana 7:9.

  25. Ioane 14:18.