Na iTabatamata Digitaki

Mai vei Randall L. Ridd

Karua ni Daunivakasala ena Mataveiliutaki Raraba ni Cauravou

iVakatakilakila

Ko ni a digitaki mo ni vakaitavi ena Nona cakacaka ena gauna oqo baleta ni nuitaki kemuni o Koya mo ni cakava na digidigi dodonu.

Kemuni na cauravou, ko ni sa rairai rogoca oti ni ko ni sa dua na “itabatamata digitaki,” ka kena ibalebale ni Kalou a digitaki ka vakarautaki kemuni mo ni lako mai ki vuravura ena gauna oqo me baleta e dua na inaki levu. Au kila oqo me ka dina. Ia, ena bogi nikua au na via vosa vei kemuni vaka na “itabatamata digitaki” baleta ni se sega mada ni dua na gauna eliu mera a vakalougatataki kina na tamata yadua ena vuqa na digidigi. Na levu ni digidigi na levu ni madigi, na levu ni madigi na levu ni rawati ni caka vinaka, ka vakakina me ka ni rarawa, na caka cala. Au vakabauta ni a talai kemuni mai eke na Kalou ena gauna oqo baleta ni sa nuitaki kemuni o Koya mo ni rai vakamatata sara ki na veimataqali digidigi duatani eso sa tu oqo.

A kaya o Peresitedi Spencer W. Kimball, ena 1974, “Au vakabauta ni sa nuiqawaqawa na Kalou me biuta ki na ligada na veiyaya vakatekinoloji eda se bera ni a se bau raica” (“When the World Will Be Converted,” Ensign, Oct. 1974, 10).

Ia e a vakayacora! Ko ni sa tubu cake tiko kei na dua na iyaya ni cakacaka yaga vakalevu sara ena itabagauna ni tamata: na Initaneti. Ka kauta vata mai kei koya e vuqa sara na veimataqali digidigi. Na vuqa ni digidigi ka vakavuna vakakina na vuqa ni vakatulewa. E vakaiyaragitaki iko ena nomu rawa ni yacova mo rawata ruarua e dua vei rau, na vinaka duadua vakakina na ca duadua ka solia tu o vuravura. Ena vakayagataki ni initaneti sa rawa ni o rawata na veika lelevu ena dua na gauna lekaleka se rawa ni vesuki iko ena veiicori ni veika tawayaga ka vakaotiva walega nomu gauna ka vakalolovirataka na nomu sasaga. Ena kiliki walega ni dua na itabataba, sa rawa ni o rawata na gagadre ni yalomu. Oya na kena iusutu—na cava na gagadre ni yalomu? Na cava o dau vakanamata kina? Evei ena muataki iko kina na nomu gagadre?

Nanuma na Kalou “sa solia na galala vei ira na tamata kecega” Alama 29:4 ia o Koya “ena lewai ira na tamata kecega ena nodra ivalavala, io me vaka na gagadre ni yalodra” (V&V 137:9; raica talega na Alama 41:3).

A tukuna o Elder Bruce R. McConkie: “Ena dua na vakasama matata ka dina, na ivola ni bula e sa ivolatukutuku ni cakacaka ni tamata me vaka e sa toqai vakakina ki na yagodra. … Oya, na vakanananu kece, vosa, kei na ivalavala e tiko na kena [revurevu] ena yago ni tamata; na ka kece oqo e tiko na mawedra, na mawe ka rawa ni wilika vakarawarawa o Koya ka sa Tawamudu me vaka na veivosa ena dua na ivola ka rawa ni wiliki” (Mormon Doctrine 2nd ed. [1966], 97).

Na Initaneti e volaitukutukutaka talega na nomu gagadre eso, ka vakatakilai ena iwalewale ni vakasaqaqara kei na kiliki. Sa wawa tu na ivurevure eso me tawana na veigagadre oya. Ni ko vakayagataki tukutuku voli ena Initaneti, ena toka na ivakadinadina—na ka o vosataka, na vanua ko a tiko kina, na balavu ni gauna o tiko kina ekea, kei na veimataqali ka o maleleta. Ena sala oqo e sa bulia na Initaneti e dua na kemu ivakaraitaki ena misini—ena dua na vakasama, na nomu “ivola ni bula vakamisini.” Me vaka na bula, ena solia lesu vei iko na Initaneti na veika o vakasaqara. Kevaka e savasava na nomu gagadre, ena rawa ni vakalevutaki ira na Initaneti, ka vakavuna me na rawarawa sara na vakaitavi ena veisasaga yaga. Ia, na kena veibasai e sa dina talega.

A vakaraitaka vakaoqo o Elder Neal A. Maxwell:

“Na veigagadre eda cikevaka, ena vuqa na gauna, oya na cava eda na vakataka mai muri kei na cava eda na rawata ena bula tawamudu. …

“… Na sala duadua ga ni vakatavulici kei na tuberi ni noda gagadre sa na rawa ni ra yaco kina mera noda ito ka sega ni noda meca!” (“According to the Desire of [Our] Hearts,” Ensign, Nov. 1996, 21, 22).

Kemuni na taciqu gone, kevaka o ni sega ni gumatuataka na kena vakatavulici na nomuni gagadre, ena cakava kivei iko o vuravura. Ena veisiga sa saga tu na vuravura me vakauqeta na nomu gagadre, bacani iko mo volia e dua na ka, raica e dua na ka ena kompiuta, vakatagitaka e dua na ka, wilika se sarava e dua na ka. Me kena ilutua, na digidigi e nomu. E tiko vei iko na digidigi. Sa ikoya na kaukauwa me kakua walega ni cakacakataki kina na nomu gagadre ia me vakayagovinakataki talega, vakasavasavataki, ka laveta na nomu gagadre. Na digidigi sa nomu kaukauwa mo na veiucui kaya. Na digidigi yadua e kauti iko vakavoleka kina se yawa mai na ka o a nakiti mo vakataka; e vakaibalebale na kiliki yadua. Dau tarogi iko voli, “Evei ena muataki kina na digidigi oqo?” Taracake na sasaga mo kila deivaki na cava ena vatukana ni veika o cakava.

E vinakata o Setani me lewa na nomu digidigi me rawa vua ni lewa na cava mo vakataka. E kila okoya ni dua na sala vinaka me caka kina oqo oya ena nomu tudaitaki ena itovo veivatotogani. Na nomu digidigi e vakatautaka ke na vaqaqacotaki iko na tekinoloji se vakabobulataki iko.

Me’u solia mada e va na ivakavuvuli me vukei kemuni, na itabatamata digitaki, na vakatavulica na nomuni gagadre ka tubera na nomuni vakayagataki tekinolaji.

Matai: Na Nomu Kilai Iko Vakaidina E Vakarawarawataka na Digidigi

E tiko e dua na noqu itokani ka a vulica vakataki koya ga na dina oqo. Atuberi na luvena tagane ena kosipeli, ia e vaka me dau yawaki koya mai vakayalo. E sega ni dau vakadonuya vakawasoma okoya me vakayagataka na matabete. Rau a rarawa na nona itubutubu ni a vakaraitaka na nona nanuma ni na sega ni kaulotu. A masuki luvena tagane vagumatua o noqu itokani, ena vakanuinui ni na yacovi koya e dua na veisau ni yalo. A vakacacana na vakanuinui oya ena nona tukuna o luvena tagane ni sa veimusuki tiko me vakamau. A vakamasuti luvena tagane o tamana me taura rawa na nona veivakalougatataki vakapeteriaki. A mani vakadonuya o luvena ia a vakadreta me na raici peteriaki duadua ga.

Ena nona lesu mai ni oti na veivakalougatataki, a lomabibi dina. A taura okoya na ligai nona itokani yalewa ka kauti koya ki tautuba, me rawa ni vosa taudua vua. A vakatairoiro mai na katubaleka o tamana ka raici rau na veitau gone ni rau qusia tiko na wai ni matadrau.

E muri a qai wasea vata kei tamana o koya na ka a yaco. Ena yalobibi levu, a vakamacalataka o koya ni donuya na veivakalougatataki, a raici koya vakalailai me vaka ena vuravura taumada. A raica okoya na doudou kei na yaloveivauqeti e tiko vua ena nodra vakayarayarataki eso tale mera muri Karisito. Mai na nona mai kilai koya vinaka yani oqo, me na qai sega vakacava ni veiqaravi vakaulotu?

Kemuni na cauravou, ni nanuma o cei dina o kemuni. Nanuma ni o taura tiko na matabete tabu. Oqo ena vakauqeti iko mo cakava na digidigi dodonu eso ni ko vakayagataka na Initaneti ena nomu bula taucoko.

Karua: Curu Yani ki na iVurevure ni Kaukauwa

Sa tiko ena lomadonu ni ligamu na yalomatua ni veiyabaki—ka bibi cake sara, na nodra vosa na parofita, mai na gauna ni Veiyalayalati Makawa me yacovi Peresitedi Thomas S. Monson mai. Ia kevaka mo na sega ni jajitaki vakawasoma na nomu talevoni veikauyaki, e sa na tawayaga, ka na vakilai ni o yali ka sega ni tarai rawa. O na sega vakadua ni via lako yani ena dua na siga ka sega ni jajitaka tu na nomu bateri.

Me vaka na kena bibi na nomu biubiu mai vale ena veisiga vata kei na nomu talevoni tuberi ka sa vakavurekaukauwa taucoko tu, e sa ka bibi cake meda jajitaki vakaoti sara vakayalo. Na veigauna kece o cobara kina na nomu wa ni talevoni, vakayagataka me ivakananumi mo tarogi iko kina kevaka o sa curu ki na ivurevure bibi duadua ni kaukauwa vakayalo—na masumasu kei na vulici ni ivolanikalou, ka na vakasinaiti iko ena veivakauqeti mai na Yalo Tabu (raica na V&V 11: 12–14). Ena vukei iko mo kila na nanuma kei na loma ni Turaga me cakava na veidigidigi lalai ka bibi ni veisiga ka vakatautaka na vanua o mua kina. E vuqa vei keda e tarova vakasauri na ka eda cakava tiko meda wilika e dua na itukutuku ena talevoni—e sega li ni dodonu meda vakabibitaka cake na veitukutuku mai vua na Turaga? Na vakawaleni ni semati ki na kaukauwa oqo sa dodonu me da kakua sara ni dau guilecava (raica na 2 Nifai 32:3).

Katolu: Na Taukeni ni Talevoni Veikauyaki Ena Sega ni Vakavukui Iko, ia Na Kena Vakayagataki Vakayalomatua Ena Rawa

Kemuni na cauravou, kakua ni cakava eso na ka torosobu ena nomu talevoni veikauyaki. Ko ni sa kila taucoko na kena ibalebale oqo (raica na Mosaia 4:29). Sa tu e vuqa na sala e rawa ni vagolei iko tani kina na tekinolaji mai na ka e bibi cake. Vakamuria na ivosavosa “Tiko vata na yalomu.” Ni ko sa draiva tiko, draiva. Ni ko sa tiko ena kalasi, raica matua na lesoni. Ni ko sa tiko vakaitokani, vakaraitaka nomu veikauwaitaki. Na nomu mona ena sega ni rawa ni vakanamata ena rua na ka ena dua na gauna. Na qaravi ni levu na itavi ena dua vata ga na gauna ena vakavuna na tosoi vakatotolo ni nomu rai mai na dua na ka ki na dua tale. E dua na vosa vakaibalebale makawa e tukuna, “Kevaka o cemuria e rua na ravete, o na sega ni toboka e dua vei rau.”

Kava: Sa Vakarautaka na Turaga na Tekinolaji me Rawati Kina na Nona iNaki

Na inaki tabu ni tekinoloji oya me vakusakusataki na cakacaka ni veivakabulai. Vaka lewe ni itabatamata digitaki, o sa kila deivaki na tekinoloji. Vakayagataka mo vakatotolotaka na nomu rawa-ka ki na bula vinaka sara. Baleta ni sa soli vakalevu vei iko, mo na solia talega (raica “Nai iSolisoli Sa Soli Mai,” Serenilotu, naba 128). E namaki iko na Turaga mo vakayagataka na veiyaya ni cakacaka levu oqo mo kauta kina na Nona cakacaka ki na ivakatagedegede ka tarava, ka wasea na kosipeli ena veisala ka uabaleta na ka era vakasamataka rawa na noqu itabatamata. Na vanua era veivakayarayarataki kina na itabatamata eliu, vei ira na tamata wavoliti ira kei na nodra tauni, sa tiko vei iko na kaukauwa ena Initaneti kei na itukutuku raraba mo yacova yani na veiyalayala ni vanua ka vakayarayarataka na vuravura taucoko.

Au vakadinadinataka ni oqo na Lotu ni Turaga. Ko ni a digitaki mo ni vakaitavi ena Nona cakacaka ena gauna oqo baleta ni nuitaki kemuni o Koya mo ni cakava na digidigi dodonu. Sa i kemuni na itabatamata digitaki. Ena yaca i Jisu Karisito, emeni.