Tiam Neeg uas Vajtswv Tau Xaiv
Los ntawm Randall L. Ridd
Pab Cuam thib Ob hauv Koom Haum Tub Hluas Pawg Tuam Thawj Tswj Hwm
Nws tau xaiv nej koom tes ua Nws txoj hauj lwm thaum lub sij hawm no vim Nws tso siab tias nej yuav xaiv qhov yog.
Cov tub hluas, tej zaum nej tau hnov hais tias nej yog ib “tiam neeg uas Vajtswv tau xaiv,” uas txhais hais tias Vajtswv tau xaiv nej thiab npaj nej los rau hauv lub ntiaj teb hauv lub caij nyoog no kom muaj raws li Nws lub hom phiaj. Kuv paub qhov no muaj tseeb. Tiam sis hmo no kuv xav hais lus rau nej zoo li nej yog “tiam neeg uas muaj ntau yam uas yuav tsum xaiv” vim tsis tau muaj ib tiam neeg uas muaj ntau yam uas lawv yuav tsum xaiv zoo ib yam li nej. Qhov uas nej muaj ntau yam xaiv txhais hais tias nej muaj cib fim ntau; qhov uas nej muaj cib fim ntau txhais hais tias muaj sij hawm ua zoo, thiab ua phem. Kuv ntseeg tias Vajtswv tau xa nej nyob no hauv lub caij nyoog no vim Nws tso siab hais tias nej yuav paub xaiv qhov zoo ntawm tag nrho tej yam uas yuav tsum xaiv.
Thaum xyoo 1974, Thawj Tswj Hwm Spencer W. Kimball hais tias, “Kuv ntseeg tias tus Tswv xav muab tej cuab yeej tshiab uas peb cov ntseeg twb tsis tau pom dua tso rau hauv peb txhais tes” (“When the World Will Be Converted,” Ensign, Oct. 1974, 10).
Thiab nws twb ua li ntawd tiag! Nej loj hlob tuaj nrog ib lub cuab yeej pab tau tib neeg ua zoo uas zoo dua txhua yam hauv tib neeg zaj keeb kwm: qhov Internet. Muaj ntau ntau yam uas nej xaiv tau. Tiam sis vim muaj ntau yam uas nej xaiv tau, kuj muaj tej yam uas nej lav ris ib yam thiab. Qhov Internet pab kom peb txais tau tej yam zoo tshaj plaws thiab tej yam phem tshaj plaws nyob hauv lub ntiaj teb. Nrog Internet, nej siv tau sij hawm tsis ntev ua tej yam zoo kawg nkaus, los yog nej yuav siv sij hawm tas li ua tej yam uas tsis tseem ceeb thiab nkim sij hawm thiab ua rau nej txoj kev muaj feem ua zoo ploj mus. Thaum nej nias ib qho xwb, nej txais tau txhua yam uas nej lub siab xav tau. Qhov no yog qhov tseem ceeb—nej lub siab xav tau dab tsi? Nej lub siab nyiam yog dab tsi? Nej tej kev xav yuav coj nej mus qhov twg?
Cia li nco ntsoov tias Vajtswv “nws yeej muab pub rau tib neeg raws li lawv siab xav” (Amas 29:4) thiab nws yuav txiav txim rau tib neeg raws li lawv tej hauj lwm, raws li lawv lub siab xav (Q&K 137:9; kuj saib Amas 41:3).
Txwj Laug Bruce R. McConkie hais tias: “Yog qhov tiag tiag thiab qhov piv txwv hais tias, phau ntawv txog lub neej yog cov ntawv uas sau txog tej yam uas cov neeg ua los ntawm lawv lub cev. … Qhov no txhais hais tias, txhua qhov kev xav, txhua lo lus, thiab txhua yam uas tib neeg lub cev tau ua; tag nrho tej yam no yog tej lub cim uas tus uas Nyob Mus Ib Txhis nyeem tau yooj yim npaum li tib neeg nyeem tau tej lus hauv ib phau ntawv” (Mormon Doctrine, 2nd ed. [1966], 97).
Qhov Internet kuj ceev nej tej kev xav, los ntawm nej tej kev nrhiav thiab kev nias. Muaj neeg coob coob uas xav muab raws li nej lub siab xav rau nej. Thaum nej siv Internet, lwm tus saib tau tej yam nej tau ua—nej tau txuas lus li cas, nej nyob qhov twg, nej tau siv sij hawm ntev npaum li cas, thiab tej yam uas nej nyiam. Zoo li Internet tsim ib qho uas qhia tias nej zoo li cas—zoo nkaus li yog nej “phau ntawv txog lub neej hauv Internet.” Ib yam nyob hauv nej lub neej, Internet yuav muab qhov uas nej nrhiav rau nej. Yog tias nej tej kev xav dawb huv, ces Internet yuav pab tej ntawd loj tuaj, ua yooj yim rau nej ua tej yam tsim nyog. Tiam sis qhov fab ntxeev kuj muaj tseeb thiab.
Txwj Laug Neal A. Maxwell hais li no hais tias:
“Qhov uas peb xav tsis tu tsis tseg, thaum lub sij hawm dhau mus, yog qhov uas peb yuav rais los ua thiab peb yuav txais nyob mus ib txhis. …
“… Tsuas yog peb tswj hwm thiab kawm txog peb tej kev xav xwb ces tej ntawd yuav pab peb, thiab tsis ua peb cov yeeb cuab!” (“According to the Desire of [Our] Hearts,” Ensign, Kaum Ib Hlis Ntuj 1996, 21, 22).
Kuv cov kwv, yog tias nej tsis rau siab tswj nej tej kev xav, ces neeg ntiaj teb yuav ua rau nej. Txhua hnub neeg ntiaj teb xav tswj hwm nej tej kev xav, ntxias nej yuav khoom, nias ib qho, ua si, los yog nyeem los sis saib ib yam dab tsi. Thaum kawg, nej yog cov uas xaiv. Nej muaj kev ywj siab xaiv. Yog lub hwj chim ua raws li nej lub siab xav tiam sis kuj yog lub hwj chim kom txhawb nqa nej tej kev xav kom dawb huv. Kev ywj siab xaiv yog nej lub hwj chim rais los ua neeg zoo. Txhua qhov uas nej xaiv yuav ua rau nej nyob deb los yog nyob ze rau ntawm tus neeg uas nej yuav rais los ua. txhua yam uas nej nias muaj nqi. Nug nej tus kheej txhua lub sij hawm, “Qhov uas kuv xaiv no yuav ua dab tsi rau kuv?” Cia li kawm kom txawj saib yav tom ntej.
Dab Ntxwg Nyoog xav tswj hwm nej txoj kev ywj siab xaiv kom nws kav tau nej. Nws paub tias ib qho uas ntxim ua kom muaj li no yog qhov uas nws ua rau nej coj yeeb yam muaj yees. Tej yam uas nej xaiv ua rau nej muaj hwj chim los yog ua rau nej raug kev poob cev qhev.
Kuv xav qhia plaub lub ntsiab cai rau nej kom pab nej, uas yog tiam neeg uas Vajtswv tau xaiv tseg, tswj nej tej kev xav thiab pab nej siv technology.
Qhov Ib: Qhov uas Nej Paub Nej Yog Leej Twg Tiag Tiag Ua Yooj Yim rau Nej Xaiv
Kuv muaj ib tug phooj ywg uas tau kawm qhov tseeb no ntawm nws tus kheej. Nws tus tub twb kawm txog txoj moo zoo thaum nws loj hlob, tiam sis zoo li nws ua loj leeb ntawm sab ntsuj plig. Nws pheej tsis siv sij hawm siv nws lub pov thawj hwj. Nws niam thiab txiv poob siab thaum nws hais tias nws tau txiav txim siab nws yuav tsis mus ua tub txib. Kuv tus phooj ywg tau rau siab thov Vajtswv pab nws tus tub, cia siab hais tias nws yuav hloov siab. Ua rau nws txoj kev cia siab ploj mus thaum nws tus tub tshaj hais tias nws twb qhaib poj niam. Tus txiv tsev no thov nws tus tub txais tau nws yawg koob txoj koob hmoov. Tus tub no hais tias nws mam ua tiam sis xav mus xyuas tus yawg koob nws ib leeg xwb.
Thaum nws rov qab los tom qab nws txais txoj koob hmoov, nws nyuaj siab heev. Nws coj nws tus hluas nkauj mus nraum zoov kom nkawd sib tham tau nkawd tus kheej. Nws txiv twb ntsia ntawm qhov rais pom ob tug hluas ntawd ib leeg so ib leeg cov kua muag.
Tom qab ntawd nws qhia nws txiv tau muaj li cas. Nws piav hais tias thaum nws txais txoj koob hmoov ntawd, ua rau nws pom tias nws yog leej twg nyob hauv lub ntuj ua ntej tau yug los rau hauv lub ntiaj teb. Nws tau pom tias nws muaj hwj huam thiab rau saib npaum li cas thaum nws hais kom lwm tus nrog Yexus Khetos mus. Vim nws paub nws yog leej twg tiag tiag, vim li cas nws yuav tsis xav mus ua tub txib?
Cov tub hluas, cia li nco ntsoov tias nej yog leej twg. Nco ntsoov tias nej tuav lub pov thawj hwj dawb huv. Qhov no yuav tshoov nej lub siab kom nej xaiv qhov yog thaum nej siv Internet thiab tas nej lub neej.
Qhov Ob: Txuas rau lub Hauv Paus ntawm lub Hwj Chim
Nyob ntawm nej tes nej muaj laj lim tswv yim ntawm txhua lub caij nyoog—qhov tseem ceeb tshaj, nej muaj cov yaj saub tej lus, txij Phau Qub mus rau Thomas S. Monson. Yog tias nej tsis rov qab charge nej lub cell phone, ces tsis pab dab tsi, thiab ua rau nej nyuaj siab thiab tsis paub lwm tus ua dab tsi. Nej yeej tsis xav cia dhau ib hnub uas nej tsis charge nej lub cell phone.
Txawm tias qhov uas nej tawm tsev mus txhua hnub nrog nej lub cell phone uas tau charge puv lawm yog ib qho tseem ceeb, qhov tseem ceeb tshaj yog kev charge nej tus kheej ntawm sab ntsuj plig. Txhua zaus nej ntsia nej lub xov tooj, siv qhov ntawd kom nej nco ntsoov nug nej tus kheej seb nej puas tau txuas rau lub hauv paus tseem ceeb tshaj plaws ntawm sab ntsuj plig—kev thov Vajtswv thiab kev kawm vaj lug kub, uas ua rau nej tsim nyog txais kev tshoov siab ntawm tus Vaj Ntsuj Plig Dawb Huv (saib Q&K 11:12–14). Ua li no yuav pab nej paub tus Tswv lub siab nyiam thiab lub siab xav kom nej paub xaiv tej yam tseem ceeb niaj hnub uas qhia tias nej mus qhov twg. Peb feem coob cia li nres thiab xyuas nyeem cov text—puas tsim nyog uas peb saib tus Tswv zaj xov tseem ceeb dua ntais? Tsim nyog uas peb yuav tsis muaj peev xwm xav tias peb tsis tas txuas rau lub hwj chim no (saib 2 Nifais 32:3).
Qhov Peb: Qhov uas Nej Muaj Smartphone Tsis Ua Rau Nej Txawj Ntse, tiam sis Yog Siv Kom Zoo ces Yuav Pab Tau Nej
Cov tub hluas, tsis txhob siv nej cov smartphone ua tej yam ruam. Nej txhua tus paub tias kuv hais dab tsi (saib Mauxiyas 4:29). Muaj ntau yam uas txuj ci technology yuav ua rau nej tsis xav txog qhov uas tseem ceeb tshaj plaws. Cia li ua raws li cov lus no: “Cia li nyob ntawm qhov chaw uas nej nyob, thaum nej nyob ntawd.” Thaum nej tsav tsheb, cia li tsav tsheb. Thaum nej nyob hauv hoob kawm, cia li mloog lawv zaj lus qhia. Thaum nej nrog phooj ywg, cia li tsom ntsoov rau lawv. Nej lub hlwb yeej tsom tsis tau rau ob qho thaum tib lub sij hawm. Qhov uas nej ua ob yam ua rau nej tsom ntsoov rau ib yam mus rau ib yam sai sai. Ib zaj lus piv txwv qub hais tias, “Yog nej caum ob tug luav, ces nej yeej ntes tsis tau ib tug.”
Qhov Plaub: Tus Tswv Muab Txuj Ci Technology rau Peb Kom Ua Tau Nws tej Hom Phiaj
Vajtswv lub hom phiaj yog siv technology kom khiav txoj hauj lwm cawm seej. Vim nej yog tiam neeg uas Vajtswv tau xaiv, nej to taub technology zoo tshaj lwm tus. Cia li siv technology kom pab nej ua neeg zoo tag nrho. Vim tau muab ntau yam rau nej, nej kuj yuav tsum muab rau lwm tus (saib “Because I Have Been Given Much,” Hymns, naj npawb 219). Tus Tswv xav kom nej siv tej cuab yeej zoo no kom txhawb nqa Nws tej hauj lwm, thiab siv tej yam uas kuv tiam neeg tsis tau xav txog qhia txoj moo zoo rau lwm tus. Tej tiam neeg dhau los tau pab lawv cov neeg zej zog thiab lawv lub zos, tiam sis dhau los ntawm Internet thiab social media nej muaj hwj chim hla tej ciam teb thiab pab neeg ntiaj teb tag nrho.
Kuv ua tim khawv hais tias nov yog tus Tswv lub Koom Txoos. Nws tau xaiv nej koom tes ua Nws txoj hauj lwm thaum lub sij hawm no vim Nws tso siab tias nej yuav xaiv qhov yog. Nej yog tiam neeg uas Nws tau xaiv. Los ntawm Yexus Khetos lub npe, amees.