ລຸ້ນທີ່ຖືກເລືອກ
ໂດຍ ແຣນໂດ ແອວ ຣິດ
ທີ່ປຶກສາທີສອງໃນຝ່າຍອົງການຊາຍໜຸ່ມສາມັນ
ພວກເຈົ້າໄດ້ຖືກເລືອກໄວ້ເພື່ອຈະມີພາກສ່ວນໃນວຽກງານຂອງພຣະອົງໃນເວລານີ້ ເພາະວ່າພຣະອົງໄວ້ວາງພຣະໄທວ່າພວກເຈົ້າຈະເລືອກທາງດີ.
ຊາຍໜຸ່ມທັງຫລາຍ, ພວກເຈົ້າອາດໄດ້ຍິນມາແລ້ວວ່າພວກເຈົ້າເປັນລຸ້ນທີ່ຖືກເລືອກໄວ້ ທີ່ໝາຍຄວາມວ່າພຣະເຈົ້າໄດ້ເລືອກ ແລະ ໄດ້ຕຽມພວກເຈົ້າໃຫ້ລົງມາສູ່ໂລກໃນເວລານີ້ເພື່ອຈຸດປະສົງທີ່ສຳຄັນ. ຂ້າພະເຈົ້າຮູ້ວ່າສິ່ງນີ້ຈິງ. ແຕ່ຄ່ຳຄືນນີ້ຂ້າພະເຈົ້າຢາກກ່າວຕໍ່ພວກເຈົ້າ ຕາມທີ່ເປັນຄົນລຸ້ນທີ່ຖືກເລືອກ, ເພາະວ່າບໍ່ມີຄົນໃດໃນປະຫວັດສາດໄດ້ຮັບພອນດ້ວຍທາງເລືອກຢ່າງຫລວງຫລາຍ. ມີທາງເລືອກຫລາຍກໍໝາຍຄວາມວ່າມີໂອກາດຫລາຍ; ມີໂອກາດຫລາຍກໍໝາຍຄວາມວ່າມີຄວາມສາມາດຫລາຍທີ່ຈະເຮັດສິ່ງດີໆ, ແຕ່ໜ້າເສຍດາຍ ທີ່ກໍມີຄວາມຊົ່ວຮ້າຍຫລາຍດ້ວຍ. ຂ້າພະເຈົ້າເຊື່ອວ່າພຣະເຈົ້າໄດ້ສົ່ງພວກເຈົ້າມາທີ່ນີ້ໃນເວລານີ້ ເພາະວ່າພຣະອົງໄວ້ວາງໃຈພວກເຈົ້າທີ່ຈະຫລິງເຫັນໄດ້ຢ່າງດີລະຫວ່າງການເລືອກຢ່າງຫລວງຫລາຍທີ່ມີໄວ້ໃຫ້ພວກເຈົ້າເລືອກ.
ໃນປີ 1974, ປະທານສະເປັນເຊີ ດັບເບິນຢູ ຄິມໂບ ໄດ້ກ່າວວ່າ, “ຂ້າພະເຈົ້າເຊື່ອວ່າພຣະຜູ້ເປັນເຈົ້າກໍຕື່ນເຕັ້ນທີ່ຈະຈັດໃຫ້ເຮົາມີເຄື່ອງມືທາງດ້ານເທັກໂນໂລຈີ ທີ່ເຮົາຜູ້ທີ່ບໍ່ແມ່ນມືອາຊີບຈະບໍ່ສາມາດເຂົ້າໃຈໄດ້” (“When the World Will Be Converted,” Ensign, Oct. 1974, 10).
ແລະ ພຣະອົງກໍໄດ້ເຮັດດັ່ງນັ້ນແລ້ວ! ພວກເຈົ້າກຳລັງເຕີບໂຕຂຶ້ນພ້ອມດ້ວຍເຄື່ອງມືເພື່ອຄວາມດີທີ່ສຸດໃນປະຫວັດສາດຂອງມະນຸດ: ນັ້ນຄື ອິນເຕີແນັດ. ພ້ອມນີ້ກໍມີທາງເລືອກຢ່າງມາກມາຍ. ແຕ່ເຖິງຢ່າງໃດກໍຕາມ, ຄວາມຫລວງຫລາຍທາງການເລືອກນີ້, ກໍມີມາດ້ວຍຄວາມຮັບຜິດຊອບ. ມັນອຳນວຍໃຫ້ພວກເຈົ້າເຂົ້າເຖິງທັງສິ່ງທີ່ດີທີ່ສຸດ ແລະ ສິ່ງທີ່ຊົ່ວຮ້າຍທີ່ສຸດທີ່ໂລກມີໃຫ້ເຮົາເລືອກ. ພ້ອມນີ້ ພວກເຈົ້າສາມາດສຳເລັດຫລາຍສິ່ງຫລາຍຢ່າງທີ່ດີໃນຊ່ວງເວລາສັ້ນໆ, ຫລື ພວກເຈົ້າຈະຫລົງໄຫລເສຍເວລາຢູ່ກັບສິ່ງທີ່ໄຮ້ປະໂຫຍດ ແລະ ສູນເສຍໂອກາດໄປລ້າໆ. ໂດຍການຄະລິກປຸ່ມໜຶ່ງ, ພວກເຈົ້າກໍສາມາດເຂົ້າເຖິງສິ່ງທີ່ພວກເຈົ້າຢາກເຮັດ. ນັ້ນຄືຈຸດສຳຄັນ—ສິ່ງທີ່ພວກເຈົ້າຢາກເຮັດທີ່ສຸດ. ພວກເຈົ້າຕິດໃຈຢາກເຮັດຫຍັງ? ຄວາມປາດຖະໜາຂອງພວກເຈົ້າຈະນຳພາພວກເຈົ້າໄປເຖິງໃສ?
ຂໍໃຫ້ຈຳໄວ້ວ່າພຣະເຈົ້າ “ປະທານໃຫ້ມະນຸດຕາມຄວາມປາດຖະໜາຂອງເຂົາ” (ແອວມາ 29:4) ແລະ ວ່າພຣະອົງ “ຈະພິພາກສາຄົນທັງປວງຕາມວຽກງານຂອງເຂົາ, ຕາມຄວາມປາດຖະໜາຂອງໃຈເຂົາ” (ເບິ່ງ D&C 137:9; ເບິ່ງ ແອວມາ 41:3) ນຳອີກ.
ແອວເດີ ບຣູສ ອາ ມິກຄອງກີ ໄດ້ກ່າວວ່າ: “ໃນສະພາບທີ່ແທ້ຈິງໃນການປຽບທຽບ, ປຶ້ມແຫ່ງຊີວິດ ຄືບັນທຶກຂອງການກະທຳຂອງມະນຸດດັ່ງບັນທຶກທີ່ຖືກຂຽນໄວ້ໃນຮ່າງກາຍຂອງເຂົາເຈົ້າເອງ. … ນັ້ນຄື, ຄວາມຄິດ, ຄຳວາຈາ, ແລະ ການກະທຳທຸກຢ່າງ ກໍຈະ [ມີອິດທິພົນ] ຕໍ່ຮ່າງກາຍຂອງມະນຸດ; ທັງໝົດນີ້ຈະປະຮອຍຂອງມັນໄວ້, ຮອຍທີ່ສາມາດອ່ານໄດ້ໂດຍພຣະອົງ ຜູ້ທີ່ເປັນນິລັນດອນ ຢ່າງງ່າຍດາຍດັ່ງທີ່ຖ້ອຍຄຳຢູ່ໃນປຶ້ມກໍສາມາດອ່ານໄດ້” (Mormon Doctrine, 2nd ed. [1966], 97).
ອິນເຕີແນັດກໍບັນທຶກຄວາມປາດຖະໜາຂອງພວກເຈົ້າຄືກັນ, ທີ່ຖືກສະແດງອອກໃນຮູບແບບທາງການຄົ້ນຫາ ແລະ ຄະລິກ. ມີແຫລ່ງຢ່າງຫລວງຫລາຍທີ່ລໍຖ້າຈະສະໜອງຄວາມປາດຖະໜາເຫລົ່ານັ້ນ. ເມື່ອພວກເຈົ້າເຂົ້າໄປໃນອິນເຕີແນັດ, ພວກເຈົ້າກໍປະຮ່ອງຮອຍໄວ້—ສິ່ງທີ່ພວກເຈົ້າສື່ສານ, ບ່ອນທີ່ພວກເຈົ້າໄດ້ເຂົ້າຊົມ, ວ່າໄດ້ເຂົ້າໄປຊົມບ່ອນນັ້ນນານເທົ່າໃດ, ແລະ ວ່າພວກເຈົ້າສົນໃຈສິ່ງແບບໃດ. ໃນວິທີທາງນີ້, ສານອິນເຕີແນັດຈຶ່ງສ້າງແຟມທາງອິນເຕີແນັດໃຫ້ພວກເຈົ້າໄວ້—ທີ່ເປັນດັ່ງ, “ປຶ້ມທາງອິນເຕີແນັດຂອງພວກເຈົ້າ.” ດັ່ງໃນຊີວິດຈິງ, ອິນເຕີແນັດຈະໃຫ້ພວກເຈົ້າຫລາຍຂຶ້ນເລື້ອຍໆຕາມສິ່ງທີ່ພວກເຈົ້າສະແຫວງຫາ. ຖ້າຫາກວ່າຄວາມປາດຖະໜາຂອງພວກເຈົ້າບໍລິສຸດ, ອິນເຕີແນັດຈະຂະຫຍາຍມັນ, ເຮັດໃຫ້ມັນງ່າຍຂຶ້ນທີ່ຈະມີສ່ວນຮ່ວມຢູ່ກັບສິ່ງທີ່ມີຄຸນຄ່າດີ. ແຕ່ທາງກົງກັນຂ້າມກໍຈິງເໝືອນກັນ.
ແອວເດີ ນຽວ ເອ ແມ໊ກສະແວວ ໄດ້ອະທິບາຍມັນດັ່ງນີ້ວ່າ:
“ສິ່ງທີ່ເຮົາປາດຖະໜາຢ່າງບໍ່ຢຸດຢັ້ງ, ເປັນເວລາດົນນານ, ໃນທີ່ສຸດຈະເປັນສິ່ງທີ່ເຮົາຈະກາຍເປັນ ແລະ ສິ່ງທີ່ເຮົາຈະໄດ້ຮັບໃນຊົ່ວນິລັນດອນ. …
“… ພຽງແຕ່ໂດຍການສຶກສາ ແລະ ການຝຶກຝົນຄວາມປາດຖະໜາຂອງເຮົາເທົ່ານັ້ນ ທີ່ຈະເຮັດໃຫ້ມັນກາຍເປັນມິດຂອງເຮົາແທນທີ່ຈະເປັນສັດຕູຂອງເຮົາ!” (“According to the Desire of [Our] Hearts,” Ensign, Nov. 1996, 21, 22).
ເພື່ອນໜຸ່ມທັງຫລາຍ, ຖ້າຫາກພວກເຈົ້າບໍ່ພາກພຽນໃນການພັດທະນາຄວາມປາດຖະໜາຂອງພວກເຈົ້າ, ທາງໂລກຈະເຮັດໃຫ້ພວກເຈົ້າ. ທຸກໆມື້, ທາງໂລກສະແຫວງຫາທີ່ຈະມີອິດທິພົນຕໍ່ຄວາມປາດຖະໜາຂອງພວກເຈົ້າ, ຍຸຍົງພວກເຈົ້າໃຫ້ເຊື່ອສິ່ງໃດສິ່ງໜຶ່ງ, ໃຫ້ຄະລິກອັນໃດອັນໜຶ່ງ, ຫລິ້ນເກມບາງຢ່າງ, ອ່ານ ຫລື ເບິ່ງສິ່ງໃດສິ່ງໜຶ່ງ. ໃນທີ່ສຸດ, ທາງເລືອກນັ້ນເປັນຂອງພວກເຈົ້າ. ພວກເຈົ້າມີອຳເພີໃຈ. ມັນເປັນອຳນາດບໍ່ພຽງແຕ່ຈະກະທຳຕາມຄວາມປາດຖະໜາຂອງພວກເຈົ້າ ແຕ່ມັນຍັງເປັນສິ່ງທີ່ຊຳລະໃຫ້ສະອາດ, ແລະ ເຮັດໃຫ້ຄວາມປາດຖະໜາຂອງພວກເຈົ້າດີຂຶ້ນ. ອຳເພີໃຈຄືອຳນາດທີ່ພວກເຈົ້າຈະກາຍເປັນຄົນທີ່ພວກເຈົ້າເລືອກຈະເປັນ. ທາງເລືອກແຕ່ລະຢ່າງຈະນຳພວກເຈົ້າເຂົ້າໃກ້ ຫລື ໄປໄກຈາກການເປັນຄົນທີ່ພວກເຈົ້າຄາດຈະກາຍເປັນ; ການຄະລິກແຕ່ລະເທື່ອນັ້ນສຳຄັນຫລາຍ. ຂໍໃຫ້ຖາມຕົນເອງສະເໝີວ່າ, ການເລືອກເທື່ອນີ້ຈະນຳເຮົາໄປເຖິງໃສ? ໃຫ້ພັດທະນາຄວາມສາມາດທີ່ຈະເຫັນຜົນສະທ້ອນຂອງການເລືອກຂອງພວກເຈົ້າ.
ຊາຕານຢາກຄວບຄຸມທາງເລືອກຂອງພວກເຈົ້າ ເພື່ອວ່າມັນຈະສາມາດຄວບຄຸມສິ່ງທີ່ພວກເຈົ້າຈະກາຍເປັນ. ມັນຮູ້ວ່າທາງທີ່ດີທີ່ສຸດທີ່ຈະເຮັດສິ່ງນີ້ໄດ້ ແມ່ນໂດຍການຈັບໃຫ້ພວກເຈົ້າຕົກຢູ່ໃນກັບດັກຂອງພຶດຕິກຳທີ່ຕິດແສດ. ທາງເລືອກຂອງພວກເຈົ້າຈະກຳນົດວ່າເທັກໂນໂລຈີຈະເສີມພະລັງໃຫ້ພວກເຈົ້າ ຫລື ເຮັດໃຫ້ພວກເຈົ້າເປັນຂ້າທາດ.
ຂ້າພະເຈົ້າຂໍສະເໜີຫລັກທຳສີ່ຢ່າງເພື່ອຈະຊ່ອຍພວກເຈົ້າ, ລຸ້ນທີ່ຖືກເລືອກ, ເພື່ອພັດທະນາຄວາມປາດຖະໜາຂອງພວກເຈົ້າ ແລະ ຊີ້ນຳພວກເຈົ້າໃນການເລືອກໃຊ້ເທັກໂນໂລຈີຂອງພວກເຈົ້າ.
ທີໜຶ່ງ: ຄວາມຮູ້ທີ່ວ່າ ພວກເຈົ້າເປັນໃຜແທ້ໆ ຈະເຮັດໃຫ້ການເລືອກນັ້ນງ່າຍຂຶ້ນ
ຂ້າພະເຈົ້າມີເພື່ອນຄົນໜຶ່ງທີ່ໄດ້ຮຽນຮູ້ເຖິງຄວາມຈິງດ້ວຍຕົວລາວເອງ. ລູກຊາຍຂອງລາວໄດ້ຖືກລ້ຽງດູມາໃນພຣະກິດຕິຄຸນ, ແຕ່ເບິ່ງຄືວ່າລາວກຳລັງຫ່າງເຫີນອອກໄປຈາກພຣະກິດຕິຄຸນ. ລາວມັກຈະປະຕິເສດໂອກາດທີ່ຈະນຳໃຊ້ຖານະປະໂລຫິດ. ພໍ່ແມ່ຂອງລາວຜິດຫວັງເມື່ອລາວໄດ້ປະກາດວ່າລາວໄດ້ຕັດສິນໃຈຈະບໍ່ໄປສອນສາດສະໜາ. ເພື່ອນຂອງຂ້າພະເຈົ້າໄດ້ອະທິຖານຢ່າງຕັ້ງໃຈເພື່ອລູກຊາຍຄົນນັ້ນ, ຫວັງໃຫ້ລາວປ່ຽນໃຈ. ຄວາມຫວັງເຫລົ່ານັ້ນກໍຖືກແຕກສະຫລາຍ ເມື່ອລູກຊາຍຂອງລາວໄດ້ປະກາດວ່າລາວຈະແຕ່ງງານກັບແຟນຂອງລາວ. ຜູ້ເປັນພໍ່ໄດ້ອ້ອນວອນກັບລູກຊາຍໃຫ້ໄປຮັບເອົາປິຕຸພອນຂອງລາວ. ໃນທີ່ສຸດລູກຊາຍກໍໄດ້ຕົກລົງ ແຕ່ຢືນຢັນວ່າລາວຕ້ອງໄປພົບກັບປິຕຸກ່ອນຕາມລຳພັງ.
ເມື່ອລາວໄດ້ກັບມາຫລັງຈາກໄດ້ຮັບປິຕຸພອນແລ້ວ, ລາວໜ້າຊີດ ແລະ ອຸກອັ່ງໃຈຫລາຍ. ລາວໄດ້ພານາງອອກໄປຂ້າງນອກບ່ອນທີ່ລາວຈະເວົ້າລົມກັນເປັນສ່ວນຕົວ. ຜູ້ເປັນພໍ່ໄດ້ຈອບເບິ່ງຈາກປ່ອງຢ້ຽມ ແລະ ໄດ້ເຫັນຄູ່ໜຸ່ມສາວນັ້ນເຊັດນ້ຳຕາໃຫ້ກັນ.
ຕໍ່ມາຜູ້ເປັນລູກໄດ້ບອກພໍ່ວ່າແມ່ນຫຍັງໄດ້ເກີດຂຶ້ນ. ດ້ວຍຄວາມຮູ້ສຶກ, ລາວໄດ້ອະທິບາຍວ່າໃນລະຫວ່າງການຮັບພອນນັ້ນ, ລາວໄດ້ຫລິງເຫັນວ່າລາວເປັນໃຜໃນໂລກກ່ອນເກີດ. ລາວໄດ້ເຫັນວ່າລາວໄດ້ເປັນຄົນທີ່ກ້າຫານ ແລະ ມີອິດທິພົນຫລາຍໃນການຊັກຊວນຄົນອື່ນໃຫ້ມາຕິດຕາມພຣະຄຣິດ. ໃນເມື່ອລາວຮູ້ວ່າລາວເປັນໃຜແທ້ໆ, ແລ້ວລາວຈະບໍ່ໄປຮັບໃຊ້ໃນການເຜີຍແຜ່ບໍ່ໄດ້?
ຊາຍໜຸ່ມທັງຫລາຍ, ຂໍໃຫ້ຈຳໄວ້ວ່າພວກເຈົ້າເປັນໃຜແທ້ໆ. ຂໍໃຫ້ຈຳໄວ້ວ່າພວກເຈົ້າດຳລົງຖານະປະໂລຫິດທີ່ສັກສິດ. ສິ່ງນີ້ຈະດົນໃຈພວກເຈົ້າໃຫ້ເລືອກທາງທີ່ຖືກຕ້ອງເມື່ອພວກເຈົ້າໃຊ້ອິນເຕີແນັດ ແລະ ຕະຫລອດຊີວິດຂອງພວກເຈົ້າ.
ທີສອງ: ປັກສຽບໃສ່ແຫລ່ງທີ່ໃຫ້ພະລັງ
ຢູ່ໃນມືຂອງພວກເຈົ້າ, ພວກເຈົ້າມີສະຕິປັນຍາຂອງທຸກຍຸກທຸກສະໄໝ--ສຳຄັນກວ່ານັ້ນ, ຖ້ອຍຄຳຂອງສາດສະດາ, ຈາກພຣະສັນຍາເດີມ ຈົນເຖິງ ປະທານທອມມັສ ແອັສ ມອນສັນ. ຖ້າພວກເຈົ້າບໍ່ສາກຫີນຂອງມືຖື, ແລ້ວມັນກໍໃຊ້ການບໍ່ໄດ້, ແລ້ວພວກເຈົ້າຈະຮູ້ສຶກວ່າບໍ່ຮູ້ຈັກຫຍັງຫລາຍ ແລະ ຢູ່ຫ່າງໄກຈາກໝູ່. ຖ້າເປັນເຊັ່ນນັ້ນ ແລ້ວພວກເຈົ້າຈະບໍ່ມີຈັກມື້ເລີຍ ທີ່ລືມສາກຫີນ.
ການອອກຈາກເຮືອນທຸກວັນດ້ວຍມືຖືທີ່ສາກເຕັມແລ້ວແມ່ນສຳຄັນ, ແຕ່ສຳຄັນກວ່ານັ້ນພວກເຈົ້າຕ້ອງໃຫ້ຝ່າຍວິນຍານຂອງພວກເຈົ້າສາກຈົນເຕັມ. ທຸກເທື່ອທີ່ພວກເຈົ້າສາກມືຖື, ໃຫ້ໃຊ້ມັນເປັນສິ່ງເຕືອນພວກເຈົ້າ ໃຫ້ຖາມຕົນເອງວ່າ ພວກເຈົ້າໄດ້ສາກຝ່າຍວິນຍານຂອງພວກເຈົ້າແລ້ວບໍ—ເຊັ່ນການອະທິຖານ ແລະ ການສຶກສາພຣະຄຳພີ, ຊຶ່ງຈະປ່ຽນແປງພວກເຈົ້າດ້ວຍການດົນໃຈຜ່ານພຣະວິນຍານບໍລິສຸດ (ເບິ່ງ D&C 11:12–14). ມັນຈະຊ່ອຍພວກເຈົ້າໃຫ້ຮູ້ໃຈ ແລະ ພຣະປະສົງຂອງພຣະຜູ້ເປັນເຈົ້າ ທີ່ຈະເຮັດການເລືອກອັນເລັກນ້ອຍແຕ່ສຳຄັນ ຊຶ່ງກຳນົດເສັ້ນທາງເດີນຂອງພວກເຈົ້າ. ຫລາຍຄົນໃນພວກເຮົາໄດ້ຢຸດເຮັດສິ່ງທີ່ເຮົາພວມເຮັດຢູ່ ເພື່ອອ່ານຂໍ້ຄວາມໃນມືຖື—ສະນັ້ນ ເຮົາຄວນເອົາໃຈໃສ່ຕໍ່ຂໍ້ຄວາມຈາກພຣະຜູ້ເປັນເຈົ້າຫລາຍກວ່ານັ້ນອີກເທົ່າໃດ? ການເມີນເສີຍຈາກການຕິດຕໍ່ກັບອຳນາດນີ້ ຈະເປັນສິ່ງທີ່ຄິດບໍ່ເຖິງ (ເບິ່ງ 2 ນີໄຟ 32:3).
ທີສາມ: ການທີ່ມີມືຖືທີ່ສະຫລາດບໍ່ໄດ້ເຮັດໃຫ້ພວກເຈົ້າສະຫລາດ, ແຕ່ວິທີທີ່ພວກເຈົ້ານຳໃຊ້ມັນນັ້ນ ຈະເຮັດໃຫ້ພວກເຈົ້າສະຫລາດ
ຊາຍໜຸ່ມທັງຫລາຍ, ຢ່າເຮັດສິ່ງທີ່ໂງ່ຈ້າກັບໂທລະສັບມືຖືຂອງພວກເຈົ້າເດີ. ພວກເຈົ້າທຸກຄົນກໍຮູ້ວ່າຂ້າພະເຈົ້າໝາຍເຖິງຫຍັງ (ເບິ່ງ ໂມໄຊຢາ 4:29). ມີຫລາຍໆວິທີທາງທີ່ເທັກໂນໂລຈີສາມາດດຶງເອົາພວກເຈົ້າໄປຈາກສິ່ງທີ່ສຳຄັນທີ່ສຸດ. ໃຫ້ເຮັດຕາມຄຳສຸພາສິດທີ່ວ່າ: “ໃຫ້ຢູ່ໃນບ່ອນທີ່ທ່ານຢູ່ ຕອນທີ່ທ່ານຢູ່ໃນບ່ອນນັ້ນ.” ເມື່ອພວກເຈົ້າຂັບລົດ, ໃຫ້ຕັ້ງໃຈຂັບລົດ, ເມື່ອພວກເຈົ້າຢູ່ໃນຫ້ອງຮຽນ, ຂໍໃຫ້ເອົາໃຈໃສ່ບົດຮຽນ. ເມື່ອພວກເຈົ້າຢູ່ກັບໝູ່ເພື່ອນ, ກໍໃຫ້ມອບຂອງຂວັນແຫ່ງຄວາມສົນໃຈຂອງພວກເຈົ້າໃຫ້ພວກເຂົາ. ສະໝອງຂອງພວກເຈົ້າບໍ່ສາມາດເອົາໃຈໃສ່ສອງສິ່ງໃນເວລາດຽວກັນໄດ້. ການເຮັດຫລາຍສິ່ງຫລາຍຢ່າງຈະດຶງເອົາຄວາມສົນໃຈຂອງພວກເຈົ້າຈາກສິ່ງໜຶ່ງໄປຫາອີກສິ່ງໜຶ່ງຢ່າງວ່ອງໄວ. ຄຳສຸພາສິດເກົ່າແກ່ກ່າວວ່າ, “ຖ້າເຮົາແລ່ນໄລ່ກະຕ່າຍສອງໂຕ, ແລ້ວເຮົາຈະຈັບມັນບໍ່ໄດ້ຈັກໂຕເລີຍ.”
ທີ່ສີ່: ພຣະຜູ້ເປັນເຈົ້າຈັດຫາເທັກໂນໂລຈີໃຫ້ເພື່ອຈະສຳເລັດພຣະປະສົງຂອງພຣະອົງ
ຈຸດປະສົງທາງສະຫວັນຂອງເທັກໂນໂລຈີແມ່ນເພື່ອຈະເລັ່ງວຽກງານແຫ່ງຄວາມລອດ. ໃນຖານະສະມາຊິກຂອງຄົນລຸ້ນທີ່ຖືກເລືອກໄວ້, ພວກເຈົ້າເຂົ້າໃຈເລື່ອງເທັກໂນໂລຈີໄດ້. ຂໍໃຫ້ນຳໃຊ້ມັນເພື່ອຊ່ອຍພວກເຈົ້າໄປສູ່ຄວາມດີພ້ອມ. ເພາະວ່າພວກເຈົ້າໄດ້ຮັບພອນຫລາຍ, ພວກເຈົ້າກໍຕ້ອງມອບໃຫ້ຫລາຍເໝືອນກັນ (ເບິ່ງ “Because I Have Been Given Much,” Hymns, no. 219). ພຣະຜູ້ເປັນເຈົ້າຄາດຫວັງໃຫ້ພວກເຈົ້ານຳໃຊ້ເຄື່ອງມືທີ່ດີເຫລົ່ານີ້ເພື່ອນຳເອົາວຽກງານຂອງພຣະອົງກ້າວໄປໜ້າ, ເພື່ອແບ່ງປັນພຣະກິດຕິຄຸນໃນວິທີທາງທີ່ເກີນກວ່າຄວາມນຶກຄວາມຝັນຂອງຄົນລຸ້ນຂອງຂ້າພະເຈົ້າ. ຄົນໃນລຸ້ນທີ່ຜ່ານມາໄດ້ມີອິດທິພົນຕໍ່ເພື່ອນບ້ານໃກ້ຄຽງ ແລະ ຊຸມຊົນຂອງເຂົາເຈົ້າ, ແຕ່ບັດນີ້ພວກເຈົ້າມີອຳນາດຜ່ານອິນເຕີແນັດ ແລະ ສື່ສານມວນຊົນ ທີ່ຈະສື່ສານກັບຜູ້ຄົນໃນທຸກຫົນທຸກແຫ່ງ ແລະ ມີອິດທິພົນຕໍ່ໂລກທັງປວງ.
ຂ້າພະເຈົ້າເປັນພະຍານວ່ານີ້ແມ່ນສາດສະໜາຈັກຂອງພຣະຜູ້ເປັນເຈົ້າ. ພວກເຈົ້າໄດ້ຖືກເລືອກໄວ້ເພື່ອຈະມີພາກສ່ວນໃນວຽກງານຂອງພຣະອົງໃນເວລານີ້ ເພາະວ່າພຣະອົງໄວ້ວາງພຣະໄທວ່າພວກເຈົ້າຈະເລືອກທາງດີ. ພວກເຈົ້າເປັນຄົນລຸ້ນທີ່ຖືກເລືອກໄວ້. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.