O Le Tupulaga o Filifiliga
Sa filifilia outou ia auai i Lana galuega i lenei taimi ona ua Ia faatuatuaina outou e faia ia filifiliga sa’o.
Alii talavou e, masalo ua outou faafofoga muamua o outou o se “tupulaga filifilia,” o lona uiga, sa filifilia outou e le Atua ma saunia e o mai i le lalolagi i lenei taimi mo se faamoemoega sili. Ou te iloa e moni lenei mea. Ae o lenei afiafi ou te fia talanoa atu ia te outou o le “tupulaga o filifiliga,” ona e le i i ai muamua lava i le talafaasolopito ni tagata ua sili ona faamanuiaina i le tele o filifiliga. O le tele o filifiliga o le tele foi na o avanoa, o le tele o avanoa o le tele foi lena o le gafatia e faia ai le lelei ma le leaga. Ou te talitonu na auina mai outou e le Atua iinei i lenei taimi ona ua Ia faatuatuaina outou ia iloatino lelei le anoanoai o filifiliga ofoofogia ua outou maua.
I le 1974, sa saunoa ai Peresitene Spencer W. Kimball said, “e faapea, “Ou te talitonu o loo naunau le Alii e tuu mai i o tatou lima ni meafaigaluega faaonapo nei tatou te le i mafaufauina o ni tagata faatauvaa” (“When the World Will Be Converted,” Ensign, Oct. 1974, 10).
Ma ua Ia faia lena mea! O loo outou tuputupu ae faatasi ma se tasi o meafaigaluega silisili mo mea lelei i le talafaasolopito o tagata: le Initoneti. Faatasi ai ma lena meafaigaluega ua o mai faatasi ai ma le anoanoai o filifiliga. Peitai, ua o mai faatasi ia mau filifiliga ma se vaega tutusa o le tali atu o le tagata lava ia. Ua faafaigofieina ai lo outou mauaina o mea uma e silisili ona lelei ma mea foi e silisili ona leaga o loo ofoina mai e le lalolagi. O le Initoneti e mafai ai ona e ausia mea tetele i se taimi puupuu lava, po o le saisaitia ai o oe i le tele o mea le aoga e maimau ai lou taimi ma faaitiitia ai lou gafatia. E ala i le kiliki o se ki, e mafai ona e oo atu ai i soo mea e naunau i ai lou loto. O le ki lena—o le a le mea o loo naunau i ai lou loto? O le a se mea o e tosina i ai? O fea e taitai atu i ai ou manaoga?
Manatua “e tuu mai e [le Atua] i tagata e tusa ma o latou manao” (Alema 29:4) ma o Ia “o le a faamasinoina tagata uma e tusa ma a latou galuega, e tusa ma le manaoga o o latou loto” (MF&F 137:9; tagai foi Alema 41:3).
Sa saunoa mai Elder Bruce R. McConkie faapea: “I se lagona moni e ui e faafaatusa, o le tusi o le ola o se faamaumauga o galuega a tagata ona o ia lava faamaumauga o loo tusia i o latou lava tino. … O lona uiga, o mafaufauga uma, upu, ma galuega e i ai se [aafiaga] i le tino o le tagata; o nei mea latou te tuua ni o latou faailoga, o faailoga e faigofie lava ona faitauina e Ia o Le e Faavavau e pei o le faitauina o ni upu i totonu o se tusi” (Mormon Doctrine, 2nd ed. [1966], 97).
E faamaumau foi e le Initoneti ou manaoga, ua faailoaina i ituaiga o sailiga ma kiliki. O loo i ai punaoa o loo faatalitali mai e faatumuina na manaoga. A e fesuena’ia le Initoneti, e te tuua ni faamaoniga o mea na e sailia—o mea na e fesootai i ai, o le umi na e i ai iina, ma ituaiga o mea e te fiafia i ai. I lea auala, e fatu ai e le Initoneti se talaaga otooto o lou tagata—i se lagona, o lou “tusi o le ola i luga o le initoneti.” E pei ona i ai i le olaga, o le a tuu atu e le Initoneti ia te oe le anoanoai o mea e te sailia. Afai e mama a’ia’i ou manaoga, e mafai foi e le Initoneti ona faalauteleina lo latou mama, ma faigofie atili ai ona e punouai i sailiga agavaa. Ae e moni foi lona faafeagai.
Sa faamatalaina e Elder Neal A. Maxwell i le ala lenei:
“O le mea tatou te mananao pea lava pea i ai i le gasologa o taimi, o le mea lava lena o le a avea ai i tatou, ma tatou maua i le faavavau. …
“… Ua na o le atiaeina ma le faaeteete o o tatou manaoga e mafai ai e na manaoga ona tautuaina pea i tatou i lo le faatiga ia i tatou!” (“E Tusa Ma O [Matou] Manao,” Liahona, Ian. 1997, 23).
Ou uso talavou, afai e te le o mataala i le atiaeina o ou manaoga, o le a faia e le lalolagi lena mea mo oe. O aso uma, e saili ai le lalolagi e faatosina ou manaoga, faaosooso oe e faatau se mea, kiliki i se mea, ta se mea, faitau pe matamata i se mea. Ae o le filifiliga e ā oe. Ua ia te oe le faitalia. O le mana lea e le gata e faatino ai ou manaoga ae e faamama, faapaia ma faaleleia ai foi ou manaoga. O le faitalia o lou mana lea e filifili ai le ituaiga tagata e avea ai oe. O filifiliga taitaisi e te latalata atili ai pe mamao atili ai foi mai le tagata e tatau ona avea ai oe; e tofu lava le kiliki ma lona uiga. Ia e fesili ia te oe lava ia, “O fea o le a taitai atu i ai lenei filifiliga?” Ia atiae le tomai e te vaai mamao ai.
E manao Satani ia puleaina lou faitalia ina ia mafai ona ia puleaina le ituaiga tagata e avea ai oe. Ua ia iloaina o se tasi o auala e faia ai lenei mea o le maileia lea o oe i ni amioga faavaisu. O au filifiliga e fuafua ai pe o tekinolosi o le a faamalosia ai oe pe faapologaina ai foi oe.
Sei ou tuuina atu ni mataupu faavae se fa e fesoasoani ai ia te oe, le tupulaga o filifiliga, ia atiae ou manaoga ma taialaina lou faaaogaina o tekinolosi.
Muamua: O Le Iloaina Po o Ai Moni Oe e Faigofie ai Ona Faia Faaiuga
E i ai sa’u uo na aoaoina lenei upumoni i se ala patino lava. Sa ola ae lona atalii i le talalelei, ae sa foliga mai na se ese faaleagaga. Sa tele taimi na ia teena ai avanoa e faaaoga ai le perisitua. Sa le fiafia ona matua ina ua ia tautino atu ua tonu ia te ia e le alu i se misiona. Sa tatalo ma le faatauanau la’u uo mo lona atalii, ma le faamoemoe o le a suia lona loto. O na faamoemoega na faatamaiaina ina ua faasilasila atu e lona atalii ua faamau o ia mo se faaipoipoga. Na augani atu le tama i lona atalii ina ia faia sona faamanuiaga faapeteriaka. Na iu ina malie i ai le atalii ae sa manao e alu na o ia e vaai le peteriaka.
Ina ua foi mai o ia i le maea ai o le faamanuiaga, sa ootia tele o ia. Sa ia avatu lana uo teine i fafo i le mea sa mafai ona la talanoa ai na o laua. Sa autilotilo atu le tama i le faamalama ma iloa atu le ulugalii talavou faaolioli o loo solo e le tasi loimata o le isi.
Mulimuli ane sa faasoa atu e le atalii i lona tama le mea na tupu. I le ootia tele, sa ia faamatala atu ai e faapea i le taimi o le faamanuiaga, sa faatepa o ia i le tagata sa i ai o ia i le muai olaga. Sa ia vaaia lona lototele ma le malosi i le faatauanauina o isi ia mulimuli ia Keriso. I le iloaina ai la po o ai moni o ia, e mafai faapefea la ona le alu i se misiona?
Alii talavou, ia manatua po o ai moni lava outou. Ia manatua o loo outou umiaina le perisitua paia. O le a musuia outou e lenei mea e faia ni filifiliga sa’o pe a outou faaaogaina le Initoneti ma i o outou olaga atoa.
Lua: Sulu i le Palaka o le Puna o le Mana
Ua i ai tonu lava i lou alofilima le atamai o le vaitausaga—o le mea e sili atu ona taua, o upu a perofeta, mai aso o le Feagaiga Tuai e oo mai ia Peresitene Thomas S. Monson. Ae afai e te le fafagaina soo lau telefoni, e leai se aoga, ma e te lagonaina le leiloa o se mea ma le leai o se fesootaiga. E te le mafaufauina lou alu ese atu i se aso e aunoa ma le fafagaina o lau maa.
E pei lava o le taua o lou alu ese atu ma le fale i aso uma ua tumu atoa le maa o lau telefoni, e matua sili atu lava ona taua le fafagaina ia tumu o lau maa faaleagaga. O taimi uma e te palakaina ai lau telefoni, ia faia o se faamanatu ia te oe lava ia pe o e palakaina i le puna e sili ona taua o le mana faaleagaga—o le tatalo ma le suesueina o tusitusiga paia lea o le a fafagaina ai oe i musumusuga e ala mai i le Agaga Paia (tagai MF&F 11:12–14). O le a fesoasoani ia te oe e iloa ai le mafaufau ma le finagalo o le Alii ia faia filifiliga itiiti ae taua i aso uma ia e iloa ai le itu e te agai i ai. O le toatele o i tatou e vave tuu lava soo se mea tatou te faia ina ia faitau se feau tusitusia—pe le tatau ea ona tatou faatauaina atili ia savali mai le Alii? E le tatau lava ona tatou mafaufau e teena le fesootai atu i lenei mana (tagai 2 Nifae 32:3).
Tolu: O Le Umiaina o se Telefonipoto E Te Le Poto Ai; ae O Le Faaaogaina ma le Poto e Mafai ai
Alii talavou, aua nei faia ni mea faavalevalea i a outou telefoni poto (smartphone). Ua outou iloa uma le uiga o la’u tala (tagai Mosaea 4:29). E le mafaitaulia auala e mafai ai e tekinolosi ona aveese lou mafaufau mai mea e sili ona taua. Mulimuli i le fautuaga a le au matutua “Ia i ai i le nofoaga e te i ai pe a e i ai iina.” Pe a e aveina se taavale, ia ave. A e i ai i totonu o se vasega, taulai atu i le lesona. A e faatasitasi ma au uo, tuu atu ia i latou le meaalofa o le gauai. E le mafai ona gauai atu lou mafaufau i ni mea se lua i le taimi e tasi. O le tele o mea e fai e vave fesiitai solo ai lou taulaiga mai le tasi mea i le isi. Fai mai se muagagana ua leva, “Afai e te tuliina ni lapiti se lua, o le a e le mauaina se tasi.”
Fa: Ua Saunia e le Alii Tekinolosi e Ausia ai Ona Faamoemoega
O le faamoemoega paia o tekinolosi o le faanatinatiina o le galuega o le faaolataga. I le avea ai ma tagata o le tupulaga o filifiliga, ua sili atu lo outou malamalama i tekinolosi. Faaaoga e faatele’a’i ai lou alualu i luma e agai atu i le atoatoa. Ona ua tele mea ua e maua, e tatau foi ona e foai atu (tagai “Ona Ua Maua Tele,” Viiga, nu. 124). Ua faamoemoeina oe e le Alii e faaaoga nei meafaigaluega sili e siitia ai Lana galuega i se isi tulaga maualuga atu, e faasoa atu ai le talalelei i ni auala e sili atu ma le mea o mafaufau i ai le tupulaga. I tupulaga ua tuanai a latou faatosinaga o latou tuaoi ma o latou taulaga, ae ua ia te outou le mana e ala mai i le Initoneti ma ala o faasalalauga faaleagafesootai e aapa atu ai i tala atu o o outou tuaoi, ma faatosina le lalolagi atoa.
Ou te molimau atu o le Ekalesia lenei a le Alii. Sa filifilia outou ia auai i Lana galuega i lenei taimi ona ua Ia faatuatuaina outou e faia ia filifiliga sa’o. O outou o le tupulaga o filifiliga. I le suafa o Iesu Keriso, amene.