O Le Tau—ma Faamanuiaga—o le Avea ma Soo

Peresitene Monson, matou te alolofa ia te oe. Ua e tuuina atu lou loto ma lou malosi i valaauga uma ua tuuina atu e le Alii ia te oe, aemaise lava i le tofi paia o loo e umiaina nei. E faafetai atu lenei Ekalesia atoa ia te oe mo lau auaunaga mausali ma mo lau faataitaiga maumaututu o le tuuto atu i tiute.

Faatasi ai ma se faamemelo ma le faamalosiauga mo tagata uma o e o le a manaomia ona tutu mausali i nei aso e gata ai, ou te fai atu i tagata uma aemaise lava i le autalavou o le Ekalesia pe afai tou te lei faia, o le a e oo lava i se tulaga o le a manaomia ai ona e puipuia lou faatuatua pe atonu foi o le onosaia o nisi o sauaga faaletagata ona o oe o se tasi o Le Ekalesia a Iesu Keriso o le Au Paia o Aso e Gata Ai. O ia taimi faapea o le a manaomia uma ai le lototele ma le amio solia mai ia te outou.

Mo se faataitaiga, sa tusi mai ia te au talu ai nei se tamaitai faifeautalai: “Sa ma vaaia ma lau soa se alii o saofai i luga o se nofoa umi i totonu o le taulaga ma tausami lana ‘aiga o le aoauli. A o ma latalata atu, sa ia tilotilo mai i luga ma iloa mai ma pine faifeautalai. Faatasi ai ma se foliga pāū, sa ia oso i luga ma sii lona lima e po au. Sa fetaui lelei lava ma lau ‘alo, o lea sa ia luai mai ai ana meaai ma leaga uma ai ofu ma amata ona palauvale i upu sili ona mataga. Sa ma savavali ese e aunoa ma se upu. Sa ou taumafai e soloese meaai mai ou mata, ae lagona ai le tau o le potoi pateta i tua o lou ulu. O nisi taimi e faigata le avea ma se faifeautalai aua sa ou manao e toe foi i ai i lena taimi, uu lena alii, ma fai i ai, ‘O LE A LAU TALA!’ Ae ou te lei faia.”

Ou te fai atu i lenei faifeautalai tuuto, lau pele, na e faia i lau lava ala faamaulalo ua laasia ai se li’o o tamaitai ma alii tulagaese o e, e pei ona fai mai le perofeta o Iakopo o le Tusi a Mamona, na “manatunatu i le maliu [o Keriso], ma mafatia i lona satauro ma [tauave] tauemuga a le lalolagi.”¹

Ioe o Iesu Lava Ia, na tusia ai e Iakopo le uso o Nifae: “Ma o le lalolagi, ona o lo latou amioletonu, o le a faamasino ia te ia o se meanoa; o le mea lea latou te sasa ai ia te ia, ae tuu atu e ia i ai; ma latou taia o ia, ae tuu atu e ia i ai. Ioe, latou te tuufeanu ia te ia, ae tuu atu e ia i ai, ona o lona agalelei alofa ma lona tali-tiga i le fanauga a tagata.”²

I le ogatasi ai ma le aafiaga a le Faaola lava ia, sa i ai se talafaasolopito umi o le teenaina ma le tau maualuga na totogiina ma le tiga e perofeta ma aposetolo, faifeautalai ma tagata i augatupulaga uma—o i latou uma o e na taumafai e faamamaluina le valaauga a le Atua ia siitia le aiga o tagata i “se ala e silisili ona lelei.”³

“Se a foi la’u e toe fai atu [ia i latou]?” na fesili ai le tusitala o le tusi a Eperu.

“O [i latou] na … pupuni ai gutu o leona,

“Na tinei ai le malosi o le afi, na sao i ai i le mata o le pelu, … na avea ai ma fitafita i taua, na tutuli … au …

“Na [vaai] o latou tagata oti ina ua toe tu mai … [a o] faataugaina nisi, …

“Na tofotofoina … i tauemuga, ma sasaina, … ma noanoataga ma tuuina i le fale puipui:

“Na fetogia i latou i maa, … na vaevaeesea i ili, na tofotofoina, na oti i latou na fasia i le pelu: … feoai solo ma oofu i pau mamoe ma pau oti; o mativa i latou, ma puapuagatia, [ma] faasaunoaina;

“([O i latou] e le aoga le lalolagi ona i ai o i latou:) … feoai solo i latou i vao, ma mauga, ma ana, ma lua i le eleele.”⁴

E moni sa tutulu agelu o le lagi a o latou faamaumauina lenei tau o le avea ma soo i se lalolagi e matele ina tetee i poloaiga a le Atua. O le Faaola Lava Ia na maligi Ona lava loifofoga mo i latou o e ua fia selau tausaga na teena ma fasiotia i Lana galuega. Ma na teena foi o Ia ma fasiotia.

“Ierusalema e, Ierusalema e,” na aioi atu ai Iesu, “o lē fasiotia perofeta, ma fetogi i maa i e ua aauina atu ia te oe, ua tele lava ou manao e faapotopoto i lau fanau, e pei o le moa ona ofaofatai i lana toloai i lalo i ona apaau a e lei mafafai outou!

“Faauta, ua tuua lo outou fale, e faatafunaina.”⁵

Ma o loo taoto ai iina se savali mo alii ma tamaitai talavou uma i lenei Ekalesia. Atonu tou te mafaufau pe e talafeagai lou tu atu e puipui ma le lototoa au amioga mama i le aoga maualuga po o le alu i se misiona ae na o le ulagia ai o ou talitonuga sili ona pele po o le tetee atu i le tele o mea i le olaga lea o nisi taimi e ulagia ai se olaga tuuto faalelotu. Ioe, e tauia, aua o le sui o lena mea o le “faatamaia” lea o o tatou “fale”—faatamaia tagata taitoatasi, faatamaia aiga, faatamaia alalafaga, ma faatamaia ia malo.

Ua faaalia i lenei mea avega a i latou ua valaauina e tauave le savali faalemesia. E le gata i le aoao atu, uunaia, ma faamalosiauina ia tagata (o le vaega manaia lena o le avea ma soo), ma i lea taimi ma lea taimi ua valaauina ai nei avefeau ina ia tausia, lapatai atu, ma o nisi taimi e na o le fetagisi lava (o le vaega tiga lena o le avea ma soo). Ua latou silafia lelei le auala e oo atu ai i le nuu o le folafolaga o loo “tafe ai le suasusu ma le meli”⁶ ma mea e manaomia e ui atu ai i le ala o le Mauga o Sinai lea o loo tafe ai “ia e” ma “aua e te.”⁷

O le mea e faanoanoa ai, o avefeau ia ua tuuina mai o poloaiga faatonuina paia a le Atua ina ia faamanuia ma puipuia i tatou ua matele ina le iloa tele i lenei vaitaimi e pei foi o le vaitaimi anamua, lea e mafai ona faamaonia mai nei e tamaitai faifeautalai e toalua na tuufeanu i ai ma tauai i pateta. O le inoino o se upu mataga, ae e i ai nisi i lenei vaitaimi e pei o Aapo lē amiotonu o fai mai, “Ou te inoino [i le perofeta o Mekaio]; aua na te le vavalo mai ia te au i mea lelei, a o mea leaga [e vavalo mai ai] e le aunoa.”⁸ O lena ituaiga inoino ona o le faamaoni o se perofeta na aveesea ai le ola o Apinati. A o ia fai atu i le Tupu o Noa: “Ona ua ou tau atu ia te outou le upumoni,ua outou feitai mai ia te au. … Ona ua ou tautala atu le afioga a le Atua ua outou faamasino mai ia te au fai mai ua ou fasa”⁹ pe mafai foi ona tatou faaopoopo i ai, ua pasiā, pulepuletutu, saua, faailogalanu, agaleaga, papa’u le tofa, le toe taulia, ma matua.

E pei o le auega a le Alii Lava Ia i le perofeta o Isaia:

“O [nei] fanau e le mafafai ona faalogo i le tulafono a Ieova:

“[Ua latou] fai atu i tagata vaai, Aua tou te vaai; latou te fai atu foi i perofeta, Aua tou te faaali mai ia te i matou mea tonu, ina fai mai ia ia te i matou upu malie, ina faaali mai ia mea pepelo:

“Alo ese ia outou i le ala, ina o ese ia i le ala, ina faateaeseina ia le Paia o Isaraelu i o matou luma.”¹⁰

O le mea e faanoanoa ai, au uo talavou e, o se amioga a lo tatou vaitaimi lea afai e mananao tagata i soo se atua, latou te mananao i ni atua e le tele ni mea e manao ai, o atua filemu, e le gata latou te le lueina le vaa ae latou te le aloina foi, o atua ia e milimiliina o tatou ulu, faaata i tatou, ona fai mai lea tatou te tamomoe e piki fugalaau lanu samasama.¹¹

O le mea tonu lava lena e tau o le foafoaina e le tagata o le Atua i lona lava faatusa! O nisi taimi—ma o le mea sili lea ona malie—e faaaoga ai e nei tagata le suafa o Iesu o se tasi e faapei o lenei ituaiga o Atua “eva”. E moi? O Le na fetalai mai e le gata ina le tatau ona tatou solia poloaiga ae e le tatau foi ona tatou mafaufau e soli. Ma afai tatou te mafaufau e soli poloaiga, ua uma ona tatou solia i totonu o o tatou loto. Pe e foliga ea o se aoaoga faavae “eva” lena mea, e manaia i le faalogo ma iloga pe a potopoto tagata ina ia maua so latou lava lagona lelei?

Ma ae faafefea i latou o e e na o le mananao lava e tilotilo i le agasala pe pa’i i ai mai se tulaga mamao? Na fetalai mai Iesu i se taimi vave, afai e te tausuai i lou mata, ia sali ese. Afai e te tausuai i lou lima, tipiese.¹² “Ou te lei sau e [aumai] le filemu, a o le pelu,”¹³ Sa Ia lapataia i latou o e manatu na Ia fetalai atu na o upu faamafanafana. Leitioa foi, ina ua mavae lena lauga, na “aioi atu” ia tagata o le nuu “ina ia maliu ese atu ia i lo latou nuu.”¹⁴ Leitioa foi, ina ua uma ona faia vavega, na faailoa atu e lei faia Lona mana mo le Atua ae mo le tiapolo.¹⁵ E manino lava, o le fesili i luga o le pepa faapipii i le taliuamea o le taavale “O le a se mea e faia e Iesu?” o le a le aumaia ai i taimi uma se tali lelei.

I le faatumutumuga o Lana galuega faaletino, na fetalai ai Iesu, “Ia outou fealofani, pei ona ou alofa atu ia te outou.”¹⁶ O le faamautinoaina ua latou malamalama moni lava i lena ituaiga alofa, na Ia fetalai mai ai, “Afai tou te alofa mai ia te au, ia outou tausia mai i au poloaiga”¹⁷ ma “o se … tatalaina se poloaiga e tasi e aupito itiiti, ma faapea ona aoao i tagata, e, aupito itiiti [o ia] i le malo o le lagi.”¹⁸ O le alofa faaKeriso o se manaoga sili lea o loo tatou mauaina i se vaega i lenei paneta aua e tatau lava ona o faatasi ma le amiotonu. Afai la o le alofa o la tatou anavatau lea, e pei ona tatau ai, ia ala atu la i le upu o ia te Ia lea o loo faatino ai le alofa ona tatau ai ona tatou lafoai ese le agasala ma soo se faaiteite o le lagolagoina e isi. Na malamalama manino lava Iesu i le mea e foliga mai o loo galo i le toatele o la tatou aganuu faanei onapo: e i ai se eseesega taua i le va o le poloaiga ia faamagalo le agasala (lea sa Ia maua le mana le faatapulaa e faia ai) ma lapataiga e tetee ai i le le amanaiaina (lea Na te lei faia lava i se taimi e tasi).

Uo, aemaise lava au uo talavou, ia maua le alofa. O le alofa mama faaKeriso e tafe mai le amiotonu moni e mafai ai ona suia le lalolagi. Ou te molimau atu ua i ai i le lalolagi le talalelei moni ma le ola a Iesu Keriso ma o outou o tagata o Lana Ekalesia moni ma le ola, o loo taumafai e faasoaina atu. Ou te molimau atu i lena talalelei ma i lena Ekalesia, ma se molimau faapitoa o le toefuataiina mai o ki o le perisitua lea ua tatalaina ai le mana ma le taua o sauniga faaola. Ou te matua mautinoa ua toefuatai mai na ki ma ua toe avanoa na sauniga e ala atu i Le Ekalesia a Iesu Keriso o le Au Paia o Aso e Gata Ai ma ou te mautinoa a o ou tu atu i o outou luma i lenei pulelaa ma a o outou alala mai i ou luma i lenei konafesi.

Ia faamalosi. Ola ma le faamaoni i le talalelei e tusa lava pe e le o ola ai isi o siomiaina outou. Puipui o outou talitonuga ma le amio solia ma le agaalofa, ae ia puipuia i latou. O se talafaasolopito umi o leo musuia, e aofia ai i latou o le a outou faafofoga i ai i lenei konafesi ma le siufofoga lea na faatoa uma ona outou faafofoga i ai i le tagata o Peresitene Thomas S. Monson, o le a faasinoa outou e agai atu i le ala o le avea ai ma soo Kerisiano. O se ala sao ma o se ala itiiti e aunoa ma se avanoa lautele i nisi o itu, ae e mafai ona malaga fiafia ma lelei ai, “o le … tumau ia Keriso, … o se susulu atoatoa o le faamoemoe, ma le alofa i le Atua ma tagata uma.”¹⁹ O le savalia ma le lototoa o sea ituaiga ala, o le a e maua ai le faatuatua le maluelue, ma o le a maua le saogalemu e tetee atu i matagi o le amioleaga, e oo lava i ave o asiosio, ma o le a e maua le malosi e pei o le papa o lo tatou Togiola lea afai o le a outou fausia ai le avea o outou ma soo faamaoni, o le a le mafai ona outou pauu.²⁰ I le suafa paia o Iesu Keriso, amene.