2010–2019
Ris lub Nra Xyiv Fab uas yog Kev Ua Pab Coj
April 2014


Ris lub Nra Xyiv Fab uas yog Kev Ua Pab Coj

Qhov uas peb tsa tes pom zoo rau peb cov thawj coj yog ib lub txiaj ntsim uas ua rau peb muaj txoj hauj lwm pab ris lawv nra thiab ua tus Tswv … cov pab coj.

Thaum lub Tsib Hlis Ntuj hnub tim 20 xyoo tas los muaj khaub zig cua loj heev ua lub zos Oklahoma City puas tsuaj tas. Nws tau ua dav tshaj ib mais thiab ntev tshaj 17 mais puas tsuaj tas. Huab cua phem no, uas yog ntau khaub zig cua phem, hloov lub teb chaws thiab cov neeg ntawd lub neej.

Nyuam qhuav ib lim tiam tom qab muaj khaub zig cua loj, cov thawj coj hu kom kuv mus xyuas qhov chaw uas tej tsev thiab tej khoom tau raug cua nplawm mus ub mus no rau tej zej zog uas muaj tej tsev vau hlo, puas tsuaj tas.

Ua ntej kuv mus, kuv tham nrog peb tus yaj saub uas peb hlub, Thawj Tswj Hwm Thomas S. Monson, ib tug uas nyiam ua tej hauj lwm li no rau tus Tswv heev. Vim kuv hwm nws lub luag hauj lwm thiab nws lub siab zoo, kuv nug tias, “Koj xav kom kuv ua dab tsi? Koj xav kom kuv hais cov lus dab tsi?”

Nws maj mam tuav kuv txhais tes, ib yam li nws yuav ua rau txhua tus uas raug txom nyem thiab txhua tus uas mus pab tom qab muaj kev puas tsuaj yog nws nyob qhov chaw ntawd, thiab nws hais tias:

“Yam thib ib, qhia lawv hais tias kuv hlub lawv.

“Yam thib ob, qhia lawv tias kuv thov Vajtswv pub rau lawv.

“Yam thib peb, thov hais ua tsaug rau tag nrho cov uas tab tom mus pab.”

Rau qhov kuv yog ib tug mej zeej ntawm Pawg Thawj Tswj Hwm ntawm cov Xya Caum, lub nra hnyav ntawm kuv ob sab xub pwg ib yam li nws hnyav rau Mauxes thaum tus Tswv hais rau nws hais tias:

“Hu cov Ixayees xya caum leej txiv neej tuaj cuag kuv, lawv yog cov uas koj yeej paub hais tias yuav ua taus thawj coj coj cov pej xeem, thiab ib txwm tswj hwm lawv; …

“Kuv yuav los nrog koj tham, thiab kuv yuav muab tus ntsuj plig uas kuv muab rau koj [Mauxes] faib rau lawv. Ces lawv thiaj pab tau koj ua hauj lwm rau cov neeg no, thiab tsis txhob cia koj ib leeg ua xwb.”1

Cov lus no yog los thaum ub los, tiam sis tus Tswv yeej tsis hloov nws cov lus.

Tam sim no nyob hauv lub Koom Txoos, tus Tswv tau hu 317 tus Xya Caum, ua hauj lwm nyob hauv 8 pawg, kom pab Kaum Ob tug Thwj Tim ris lub nra hnyav uas Thawj Pawg Thawj Tswj Hwm muaj. Kuv muaj kev xyiv fab hauv kuv nruab siab vim kuv muaj lub luag hauj lwm ntawd, ib yam nkaus li kuv cov Kwv Tij. Tiam sis, tsis yog peb xwb uas pab ua tau txoj hauj lwm zoo no. Vim peb yog mej zeej hauv lub Koom Txoos thoob plaws ntiaj teb, peb tag nrho muaj lub cib fim foom koob hmoov rau luag tej lub neej.

Kuv tau kawm los ntawm peb tus yaj saub tias yam uas cov tib neeg uas raug cua daj cua dub xav tau—yog kom tib neeg hlub lawv, thov Vajtswv rau lawv, thiab siv tes pab lawv.

Thaum tav su peb txhua tus yuav tsa peb txhais tes xis thiab pom zoo txhawb nqa Thawj Pawg Thawj Tswj Hwm thiab Pawg Kaum Ob tug Thwj Tim, tias lawv yog cov yaj saub, cov pom tau, thiab cov neeg txais kev tshwm sim rau Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Qhov no tsis yog ib yam uas peb lam ua tas mus li, thiab tsis yog rau cov uas Vajtswv hu los ua hauj lwm ua cov tuam thawj coj xwb. Qhov uas peb tsa tes pom zoo rau peb cov thawj coj yog ib lub txiaj ntsim uas ua rau peb muaj txoj hauj lwm pab ris lawv nra thiab ua tus Tswv Yexus Khetos cov pab coj.

Thawj Tswj Hwm Monson tau hais tias:

“Yeej muaj cov neeg uas xav tau peb txoj kev pab ib ncig peb uas xav tau peb txoj kev pab, peb txoj kev txhawb nqa, peb txoj kev nplij siab thiab peb txoj kev ua siab zoo, txawm yog lawv yog peb tsev neeg, cov phooj ywg, cov neeg uas peb paub los sis cov neeg qhua los xij. Peb yog tus Tswv txhais tes hauv ntiaj teb no, uas twb raug txib kom mus pab thiab txhawb nqa Nws cov me nyuam. Nws yeej vam peb sawv daws heev. …

“‘… Thaum uas nej tau pab … , ib tug, txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag’ [Mathais 25:40].”2

Thaum muaj ib lub caij uas peb mus xyuas tau ib tug neeg los sis hu xov tooj rau nws, sau ntawv rau nws, los sis siv ib hnub mus pab nws, peb puas yuav zoo siab ua? Los yog peb puas yuav zoo li tus tub hluas uas hais tias nws yeej ua raws li tag nrho Vajtswv cov lus txib lawm:

“Tej ko, kuv twb coj txhua nqe huv tib si lawm. Tseem tshuav yam twg uas kuv tsis tau ua thiab?

“Yexus hais rau nws hais tias, Yog koj xav ua tus uas zoo kawg nkaus, koj cia li mus muab koj tej qhov txhia chaw muag huv tib si, thiab muab cov nyiaj ntawd faib rau cov neeg pluag, koj thiaj yuav yog tus uas nplua nuj nyob saum ntuj ceeb tsheej: tom qab ntawd, koj cia li tuaj nrog kuv mus.”3

Yexus hu tus tub hluas los ua ib txoj hauj lwm pab tseem ceeb tshaj nyob ntawm tus Tswv ib sab thiab ua Vajtswv lub nceeg vaj txoj hauj lwm hauv ntiaj teb, tiam sis nws tsis kam, “rau qhov nws nplua nuj heev.”4

Es peb tej khoom ntiaj teb ne? Peb pom tias tau ob peb feeb xwb ces ib lub khaub zig cua muaj peev xwm ua rau tej ntawd puas tsuaj tas. Tseem ceeb heev uas peb txhua tus mob siab khaws tej nyiaj txiag cia rau peb tus kheej rau saum ntuj ceeb tsheej—siv peb lub sij hawm, tej txuj ci, thiab kev ywj siab ua hauj lwm pab Vajtswv.

Yexus Khetos tseem caw kom peb “Los thiab nrog kuv mus.”5 Nws taug kev nrog cov uas ntseeg Nws hauv Nws lub teb chaws, tsis xav tau dab tsis rau Nws tus kheej. Nws tseem taug kev nrog peb, sawv nrog peb, thiab coj peb. Thaum peb ua raws li Nws tus yam ntxwv uas zoo tshaj peb paub tias Nws yog tus Cawm Seej thiab peb hwm Nws, tus uas tau ris tag nrho peb tej nra hnyav dhau los ntawm Nws txoj Kev Theej Txhoj dawb ceev, uas yog txoj hauj lwm pab neeg zoo tshaj plaws. Qhov uas Nws thov peb txhua tus ua yog kom peb kam thiab txaus siab ris lub “nra” xyiv fab uas yog kev ua pab coj.

Thaum kuv nyob hauv Oklahoma kuv muaj lub cib fim ntsib ob peb tsev neeg txom nyem uas nyob ntawd thaum muaj cov khaub zig cua loj. Thaum kuv ntsib tsev neeg Sorrels, lawv tus ntxhais, Tori, tshoov kuv lub siab. Thaum ntawd nws nyob qib tsib tom lub tsev kawm ntawv theem pib hu ua Plaza Towers. Nws thiab nws niam tuaj koom peb hnub no.

Thaum lub khaub zig cua los txog lub tsev kawm ntawv, Tori thiab nws ib co phooj ywg nkaum ua ib pawg hauv ib lub chav dej. Cia li mloog thaum kuv nyeem Tori cov lus uas nws tau sau txog hnub ntawd:

“Kuv hnov dab tsi raug lub ruv tsev. Kuv xav tias lawg los no. Lub suab nrov zog nrov zog. Kuv thov Leej Txiv Saum Ntuj Ceeb Tsheej kom pab tiv thaiv peb sawv daws thiab pov hwm peb. Ces txawm muaj ib lub suab nrov heev zoo li ib lub tshuab nqus tsev, ces lub ruv tsev nyob saum peb taub hau cia li pawv kiag. Muaj cua loj heev thiab ntau yam khoom ya ib puag ncig thiab raug kuv lub cev txhua qhov chaw. Sab nraum zoov tsaus ntuj zog thiab lub ntuj zoo li xim dub, tiam sis nws tsis yog-twb yog kuv nyob hauv plawv ntawm lub khaub zig cua. Kuv tsuas qi kuv ob lub qhov muag, thov thiab cia siab tias yuav tas sai sai.

“Ces txhua yam txawm ntsiag to.

“Thaum kuv qhib kuv ob lub qhov muag, kuv pom ib daim paib nres pem hauv ntej kuv ob lub qhov muag! Nws yuav luag kov kuv lub qhov ntsws.”6

Tori, nws niam, nws peb tug nus muag, thiab coob tus phooj ywg uas kuj nyob hauv lub tsev kawm ntawv nrog nws, tsis tau tuag thaum muaj lub khaub zig cua ntawd; tiam sis xya tus phooj ywg uas lawv kawm ntawv nrog tau tuag lawm.

Thaum hnub Saturday thiab Sunday ntawd cov kwv tij pov thawj hwj foom koob hmoov ntau rau cov mej zeej uas tau raug txom nyem thaum muaj lub khaub zig cua. Kuv txo hwj chim thaum kuv foom koob hmoov rau Tori. Thaum kuv muab kuv ob txhais tes rau saum nws taub hau, kuv nco txog ib nqe vaj lug kub uas kuv nyiam tshaj uas yog thaum tus Tswv qhia peb tias Nws yuav tshwm sim rau peb tej ntsej muag, tias Nws yuav nyob ntawm peb sab tes xis thiab ntawm peb sab laus, thiab Nws tus Ntsuj Plig yuav nyob hauv peb nruab siab, thiab Nws cov tim tswv yuav nyob ib ncig peb, kom txhawb nqa peb.7

Kuv hais lus ntuas rau Tori kom nws nco qab hnub uas tus Tswv ib tug tub qhe muab nws ob txhais tes rau saum nws taub hau thiab qhia nws tias cov tim tswv tau pov hwm nws thaum muaj lub khaub zeeg cua.

Qhov uas peb ib leeg pab cawm ib leeg, txawm muaj dab tsis tshwm sim, yog txoj kev hlub uas nyob ntev dhawv ib txhis. Qhov no yog txoj kev ua hauj lwm pab uas kuv pom thaum kuv nyob hauv Oklahoma lub lis piam ntawd.

Ntau zaus, peb muaj lub cib fim pab luag tej thaum lawv xav tau kev pab. Rau qhov peb yog mej zeej ntawm lub Koom Txoos, peb txhua tus ib leeg muaj txoj hauj lwm dawb ceev “ris ib leeg tej nra, xwv kom lawv thiaj li yuav sib,”8 “nyuaj siab nrog cov uas nyuaj siab,”9 thiab kom tsa tej tes uas nkees, thiab ua kom tej hauv caug uas qaub zog muaj zog.10

Cov kwv tij thiab cov muam, tus Tswv zoo siab heev rau nej txhua tus, rau tej sij hawm nej siv thiab tej hauj lwm nej ua, txawm loj los me, uas nej zoo siab dawb paug ua txhua hnub.

Vaj ntxwv Npeyamis qhia nyob hauv Phau Ntawv Maumoos hais tias, “Thaum nej ua hauj lwm rau nej tej neeg nruab ze ces nej tsuas ua hauj lwm rau nej tus Vajtswv xwb.”11

Qhov uas peb mob siab ua hauj lwm pab peb cov kwv tij thiab cov muam pab peb niaj hnub txiav txim siab txog tej yam tseem ceeb hauv peb lub neej thiab pab peb saib kom muaj nuj nqis tej yam uas tus Tswv hlub thiab hlub lawv thiab. Thaum peb ua li no, peb lub neej ua tim khawv tias peb yog Nws cov pab coj. Thaum peb ua Nws txoj hauj lwm, Nws tus Ntsuj Plig nyob nrog nraim peb. Peb cov lus tim khawv, kev ntseeg, kev cia siab, thiab kev hlub loj hlob tuaj.

Kuv paub tias kuv tus Txhiv Dim muaj sia nyob, uas yog Yexus Khetos, thiab niaj hnub nim no Nws hais lus nrog Nws tus yaj saub, Thawj Tswj Hwm Thomas S. Monson, thiab hais lus rau peb dhau los ntawm nws tus yaj saub.

Cia peb tag nrho nrhiav txoj kev kaj siab uas peb muaj thaum peb ua txoj hauj lwm pab dawb ceev uas yog ib leeg ris ib leeg tej nra, tej uas yog yooj yim thiab me, yog kuv cov lus thov los ntawm Yexus Khetos lub npe, amees.