Ma Toasr Engankihnyuck luhn Mwet Tuhma Lutlut

Ke Mei 20 ke yac tari ah eng foruh luhlahp se kuhnahoslah acn Oklahoma City, ke infulwen acn America, kuhnahoslah sie puhluhn acn yohk liki mael se (1.6 km) sralacpiyac ah ac mael 17 lusaciyac ah. Pahkah luhlahp se inge, puhslac na pwacye eng foruh, ekuhllah atacn acn uh ac moul luhn mwet ma muhta ke in pohloh acn sac.

Wik se na tukun pahkah luhlahp sac sikyak ah, srihsrsrihsri nga in muhtwacta nuh ke acn sac ma lohm ac ma nuh kwewa luhn mwet oaclihk inkucl tuhpahsrpahsruh ac muhkahlkahluh sac.

Met liki nga som ah, nga sramsram nuh sin mwet pahluh sacohk lasr, Prestuhn Thomas S. Monson, suc engan yohk ke kain kuhlwacnsap se inge nuh sin Leum. Ke suhnak nuh ke ohfuhs lal ah ac oacyacpac ke woiyacl, nga siyuck, “Meac kom ke nga in oruh? Meac kom ke nga in fahk?”

El kahkahsrihk sruokyac pouk, oacna ke elac oruh nuh sin kais sie mwet sun ongaiyac ac kais sie selos suc kahsruh ke kuhnausyucklac sac el fin oasr we, ac fahk:

“Ma se met, fahk nuh selos muh nga luhngse elos.

“Ahkluo, fahk nuh selos muh nga pruhe kaclos.

“Ahktolu, nuhnak muhnahs fahk kuloh nuh selos nuh kwewa suc kahsruh.”

Oacna mempucr se ke Prestuhnsi luhn Mwet Itngucul, nga kuh in puhlakihn yohk srihpaciyacn kunohkohn se inge ke kahs ma Leum El tuh fahk nuh sel Moses:

“Eisani nuh yuruk itngoul mwet mahtuh luhn Israel, suc kowos etuh tuh mahtuh yurin mwet uh, ac mwet kol inmahsrlolos; …

“Nga fah oatume ac kaskas nu sum we, ac nga fah eis kutu ngun su nga filiya fom [Moses] ac filiya faclos. Na elos ac fah ku in kasrekom lippise kutu fosrnga lom ke mwet inge, ac kom fah tia mukena in polong.”¹

Pa inge kahs ke pacl mahtuh omeet ah, tuhsruhk ohiyac luhn Leum tiac eklac.

Ingena ke Alu uh, Leum El pahngonwack Mwet Itngucul 317,in kuhlwacnsap ke u 8, in kahsruh Mwet Sap Singucul Luo in akacsruhi ke kunohkohn toasr ma fihliyucki facn Prestuhnsi Se Met. Nga engan in puhlakihn kunohkohn sacn ke insiyuck, oacna Mwet Lili luhk. Tuhsruhk, tiac kuht muhkwena pa kahsruh oruh orekma wolacna se inge. Oacna mempucr ke Alu uh fin facluh nohfohn, kuht nuh kwewa eis pacl wowo in ahkinsewowoye moul luhn mwet sahyac.

Nga lotwelah sin mwet pahluh sacohk lasr lah meac mwet sun ongaiyac ke pahkah uh enenuh—luhngse, pruhe, ac tarilacna ke kahsruh luhn mwet.

Ke tahfuhn lwen tok se inge kais sie sesr ac fah kohlwack po lacyot lasr ac ahkkweye Prestuhnsi Se Met ac U luhn Mwet Sap Singucul Luo oacna mwet pahluh, mwet liyactwen, ac mwet fwackyuck ke Alu luhn Jisus Kraist luhn Mwet Luhlahlfongi ke Lwen-sahflah. Ma se inge tiac akwuck fihsrwacsr se, tiac pac ituckyang nuh selos suc pahngyak nuh ke kuhlwacnsap srihsrihk. Ma na wowo se in ahkkweye mwet kol lasr uh; ma se inge tuhkweni tuhkuh ke kunohkohn luhn kais sie mwet in akacsruhi ke ma toasr lalos ac in mwet tuhma lutlut luhn Leum Jisus Kraist.

Prestuhn Monson el fahk:

“Kuht rauniyucklac selos suc enenuh kuht in lohacng nuh se, ahkkweye lasr, kahsruh lasr, ahkwoye lasr, kuhlwacng lasr—finne elos mwet ke sucu, kawuck, mwet aetuhi, kuh mwet ma kuht nihnkihn. Kuht pa poun Leum inge fin facluh, suc sapkihnyuck in kuhlwacnsapuh ac in sruhkwack tuhlihk Nahtuhl. El muhngnguhi kais sie sesr. …

“ ‘... Ke kowos oru ma inge nu sin sie su srik liki nukewa … , kowos oru nu sik.’ [Matthew 25:40].”²

Yac kuht ac topuk ke luhngse ke pacl wowo uh sun kuht in som muhtwacta kuh pahng ke tacluhfon, suhmuhslah sie mwe kahsruh, kuh sang sie lwen an in orwaclah enenuh luhn sie mwet sahyac? Kuh yac kuht ac oacna sie mukul fuhsr suc tuh ahkkahlwemye muh elac ukwe nohfohn masap luhn God:

“Nga liyaung ma sap inge nukewa. Mea pac nga enenuh in oru uh?

Na Jesus el fahk nu sel, “Kom fin ke kom in suwosna, kom som kukakunla ma lom nukewa ac sang molo an nu sin mwet sukasrup, na ac fah oasr mwe kasrup lom inkusrao; na kom fahsru fahsr tukuk.”³

Mukul fuhsr sac tuh pahngyak nuh ke sie kunohkohn na yohk in tu sisken Leum in oruh orekma luhn tohkohsrahi luhn God fin facluh, tuhsruhk el forlah liki, “mweyen el sie mwet na kahsruhp.”⁴

Meac ke ma lasr fin facluh uh? Kuht kuh in liye lah meac eng foruh uh kuh in oruh nuh ke ma lasr ke lusacn mihnit. Arulacna yohk srihpac nuh sesr kais sie in srihke in elohswack mwe kahsruhp lasr inkuhsrao—orekmakihn pacl, talan, ac sukohsohk in sulaclah lasr uh in kuhlwacnsapuh God.

Jisus Kraist El fahfahlac na in tahfwelah pahng fahk “Fahsru fahsr tukuk.”⁵ El forfor rauneack acn Sel wi mwet fahsr tohkohl ah ke sie ohiyac ma tiac nuhnkuh kac sifacna. El tahfwelah in wi kuht fahsr, tu siskacsr, ac kol kuht. In ukwe mwe srihkasrak suwohs Lal pa in akihlen ac ahkfuhlwactye Mwet Lahngo, suc eis nuh facl ma toasr nuh kwewa lasr ke Iwaclah muhtahl ac molwelah Lal, mukwikwi in kuhlwacnsap yohk se emet uh. Ma El siyuck sin kais sie sesr pa in kuh ac kena in eis nuh facsr ma “toasr” engankihnyuck luhn mwet tuhma lutlut.

Ke nga oasr Oklahoma ah, nga eis pacl wowo in ohsun nuh sin kuhtuh sucu ma ahkkolukyeyucklac moul la ke eng foruh na upac sac. Ke nga muhtwacta yurun sucu Sorrels, nga arulacna mokleyuckyak ke ma sikyak nuh sin acn se nahtuhlos ah, Tori, ke pacl sac el kuhlahs lihmekohsr ke Plaza Towers Elementary School. El ac ninac kiyacl ah wi kuht inge mihsenge.

Tori ac kawuck ekahsr lal lokweni ke lohm fahsr se in wihklac ke eng foruh sac kuhnahoslah lutlut ah. Lohng ke ngwac riti, ke kahs lal Tori sifacna, ke ma sikyak ke lwen sac:

“Nga lohng ke ma se srihfacllah na fin lohm sac. Nga pahngon na muh aes raun kwekwe ma puhtat tuhkuh yen engyeng uh. Puhsra sac yohkwelihk liki met ah. Nga pruhelac tuh Pahpah Lucng Elan karihngihn kuht nohfohn ac liyekuhtyang in wo. In kihtin pacl ah na kuht lohngwack sie puhsra luhlahp ma oacna puhsrwen vacuum uh, ac fin lohm ah sohklah wacngihnlac lucng fin sifacsr. Arulacna upac eng ac ma sohksohk raunikuhtlac ac srihngihl acn nuh kwewa ke monuk. Lohsrlah lihkihnihm ah ac oacna in muh yen engyeng uh sralsrallah, tuhsruhk tiacna—pa ingacn lun eng foruh uh. Nga kaliyac na muhtuhk, finsrak ac pruhe tuh in sahflah ke kihtin pacl na.

“Ke kihtin pacl ah na muh mihsi.

“Ke nga ikucslah muhtuhk ah, nga liye stop sign soko oan na ye muhtuhk! Apkuhran na in puhsrallah infwek.”⁶

Tori, ninac kiyacl ah, tuhlihk tolu wiyacl, ac kawuck puhs suc oacyacpac tuh weluhl ke lutlut ah usnguck in painmoullac ke eng foruh sac; itkohsr sin kuhlahsmet lalos ah koluk ohiyac.

Kapihn wik sac mwet lili ke pristut elos sang mwe ahkinsewowo pucspucs nuh sin mempucr suc tuh kweoklacna ke eng foruh sac. Nga ahkpuhsisacyeyuck in sang mwe ahkinsewowo nuh sel Tori. Ke nga fihliyac pouk fin sifacl ah, nga nuhnkweack sie ma suhmuhslah luhngkihnyuck emet ma Leum El fahk nuh sesr lah Elac som nuh ye muhtahsr, lah Elac oasr ke lacpo lacyot lasr ac ke lacpo lacsac lasr, ac Nguhnal ac fah oasr insiacsr, ac lipufacn Lal ac raunikuhtlac, in sruhkkuhtyak.”⁷

Nga fahk nuh sel Tori elan esam lwen se ma sie mwet kuhlwacnsap luhn Leum el fihliyac pahol fin sifacl ac fahkwack lah el tuh karihngihnyuckyang sin lipufacn ke pahkah sac.

Saplaklac in molwelah sie sin sie, ke oacna sie ohiyac, pa sie mwe srihkasrak ma pahtpaht luhn luhngse. Kain kuhlwacnsap se inge nga witnisi fin acn Oklahoma ke wik sacn.

Inkaiyen pacl uh utuckuh nuh sesr pacl wowo in kahsruh mwet sahyac ke pacl in enenuh lalos. Ke kunohkohn luhn mempucr ke Alu uh, oasr kunohkohn muhtahl lasr kais sie in akacsruhi ke ma toasr lasr tuh in muhlahlahi,”⁸ in ahsor weluhlos suc ahsor,”⁹ ac in sralwack paho ma atahtlah nuh ten, ac in ahkfokokoyelah intwe muhnahs.”¹⁰

Tamuhlwel ac tahmtahel, Leum El arulacna tarilacna nuh sin kais sie suwos nuh kwewa, ke ao pucspucs ac orekma in kuhlwacnsap pucspucs, finne yohk kuh srihk, kowos arulacna sang ke inse pwacye ac luhng kuhlwacng ke kais sie lwen.

Tohkohsrah Benjamin el luti ke Puk luhn Mormon lah ke kowos kuhlwacnsapuh mwet wiyowos kowos kuhlwacsapuh God lowos.”¹¹

Lohacng in kuhlwacnsapuh tamuhlwel ac tahmtahel wiyacsr uh kuh in kol kuht in orwaclah sulaclah muhtahl ke moul lasr ke lwen nuh kwewa ac ahkoekuhtlac in seko ac luhngse ma suc Leum El luhngse. Ke kuht oruh ohinge, kuht witnisi ke moul lasr uh lah kuht mwet tuhma lutlut. Ke kuht oruh orekma Lal, kuht puhla Nguhn Lal wi kuht. Kuht kapwack ke fahkwack luhlahlfongi, luhlahlfongi kuh, luhlahlfongi, ac luhngse.

Nga etuh lah Mwet in Molwelah luhk El moul, finne Jisus Kraist, ac lah El sramsram nuh sin ac kacn mwet pahluh Lal, Prestuhn Thomas S. Monson, inge, ke pacl lasr uh.

Nga finsrak kuht nuh kwewa in sokwack engan ma tuhkuh ke kuhlwacnsap muhtahl ke akacsruhi ke ma toasr lasr, finne ma toasr ma fihsrwacsr ac srihk, pa pruhe luhk ke inen Jisus Kraist, amen.