Eddo eo Ekam̧ōņōņō an Rikaļooran


N̄an rejtake ritōl ro ad ej juon jeram̧m̧an; ej itok ilo ruo m̧wen̄an kōn juon eddo n̄an kwaļo̧k eddo eo aer im n̄an erom rijilōk an Irooj.

Ilo Māe 20 in iiō eo ļo̧k, juon aire eaar kakkure jikin ko ilo Oklahoma City, ilo m̧ōttan ko io̧lap in Amedka, kakkure juon jikin eļap ļo̧k jen juon m̧ail (1.6 km) depakpak 17 m̧ail (27 km) aetokan. Aire in, ej juon iaan aire ko reļļap, eaar ukōt jekjekin ion bwidej im mour an armej ro ijoko eaar iļo̧k ie lok.

Juon wiik ālkin an waļo̧k lan̄ in, kar jitōn̄ eō bwe in loļo̧k jikin in ijo m̧oko im men ko m̧weier raar aolep ejeplōklōk im kakkure melan.

M̧okta jen aō em̧akūt, iaar kōnono ippān rikanaan eo ad ejitenbōro, Būreejtōn Thomas S. Monson, eo eitok lim̧oin ilo kain jerbal rot in n̄an Irooj. Ilo kautiej opiij eo an im barāinwōt em̧m̧an eo an, Iaar kajjitōk, “Ta eo kwoj kōņaan bwe in kōm̧m̧ane? Ta eo kwoj kōņaan bwe in ba?”

Eaar m̧ōkaj an bōk peiū, āinwōt ilo an naaj kōm̧m̧ane ippān kajjojo ro raar jorrāān im kajjojo ro raar jipan̄ kōn jorrāān eo eaar waļo̧k ijen, im ba:

“Juon, jiron̄ er ke ij iakwe er.

“Ruo, jiron̄ er ke ij jar kōn er.

“Jilu, jouj im kam̧m̧oolol aolep ro rej jipan̄.”

Āinwōt juon uwaan Būreejtōnji eo an Jiljilimjuonn̄oul eo, iaar eñjake eddo in ioon aera in ilo naan ko an Irooj n̄an Moses:

“Bōk tok jiljilimjuonn̄oul em̧m̧aan in Israel ro n̄an eō, ro kwojeļā bwe ren elder ro n̄an armej rein, im ritōl ioer; …

“Im Inaaj wanlaļwōj im kōnono ippam̧: im Inaaj bōk jetōb eo eo ej pād ippam̧ [Moses}, im inaaj likūt ioer; im renaaj ineek eddo eo an armej rein ippam̧, bwe kwojab make ineeki.”1

En̄in ej naan ko jān etto, aaet iaļ ko an Irooj rejjab oktak.

Kiiō ilo Kabun̄ in, Irooj eaar kūr 317 Jiljilimjuonn̄oul ro, rej jerbal ilo 8 doulul ko, n̄an jipan̄ Jon̄oulruo Rijilōk ro n̄an ineek eddo eo kar likūt ioon Būreejtōnji eo Kein Kajuon. Ij lañlōñ ilo aō eñjake eddo in jen ijo emwilal ilo buruō, barāinwōt Em̧m̧aan ro karejera. Ijoke, ejjab kōm̧ wōt ro rej jipan̄ ilo jerbal in eaiboojoj. Āinwōt membōr ro ilo Kabun̄ in ipeļaakin laļ in, ewōr ad aolep iien em̧m̧an n̄an kōjeram̧m̧an mour ko an ro jet.

Iaar ekkatak jān rikanaan in ad ta eo armej ro rej aikuj me kar jelet jān lan̄ eo―iakwe, jar, im kam̧m̧ool kōn pein jipan̄ ko.

Ālkin rālep in rainin kajjojo iaad naaj kajutak tuanbwij maron̄ ilo jukweea im rejtake Būreejtōnji eo Kein Kajuon im Doulul eo an Jon̄oulruo Rijilōk ro āinwōt rikanaan ro, rilolo ro, im rikwaļo̧k revelesōn ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ejjab juon iminene, ak ej juon kōkaļļe n̄an ro rej kūr n̄an jerbal āinwōt opiija ro an Kabun̄ in. N̄an rejetake ritōl ro ad ej juon iien em̧m̧an; ej itok ippān doon kōn eddo eo an juon make n̄an kwaļo̧k eddo eo aer im n̄an erom̧ rikaļoor ro an Irooj Jisōs Kraist.

Būreejtōn Monson eaar ba:

“Jej jepooļ kōn ro rej aikuji jipan̄ ko ad, kōketak ko ad, rejtak ko ad, kaenōm̧m̧an ko ad im jouj ko ad―men̄e ro uwaan baam̧le ko ad, ro m̧ōtta, ro jejeļā kajjier ak ruwamejet. Jej pā ko pein Irooj ilo laļin, kōn ijjitōn̄ eo n̄an jerbal im n̄an kotak ajri ro Nejin. E ej kōjatdikdik ioodwōj kajjojo. …

“‘… Ilo ami kōm̧m̧an jabdewōt n̄an juon iaan rein reddik tata … kom̧ ar kōm̧anm̧ane n̄an Eō.’’'2

Jen ke uwaak kōn iakwe n̄e iien ej itok n̄an kōj n̄an kōm̧m̧ane juon loļo̧k, ilo taļboon, je juon kakeememej, ak jolo̧k juon raan n̄an būk aikuj ko an ro jet? Ak enaaj ke āinwōt likao eo me eaar kōņaan lo̧o̧r aolep kien ko an Anij:

“Naan kein otemjej I ar pokake: ewi men eo I jan̄in tōpare?

“Jisōs e ba n̄an e, Eļan̄n̄e kwō kōņaan bwe kwōn weeppān, kwōn ilo̧k im wiakaki men ko am̧ im leļo̧k n̄an ro rej jeram̧ōl, im enaaj wor m̧weiōm̧ I lan̄; im kwōn itok im ļoor Eō.”3

Likao in eaar kūr n̄an juon jerbal in jipan̄ eļap Irooj n̄an kōmm̧ane jerbale aelōn̄ in kiin̄ eo an Anij ioon laļin, aaet eaar oktak ļo̧k, “bwe eļap an m̧weiie.”4

Ta m̧weiie ko ad ilo lalin? Jemaron̄ lale ta eo juon aire emaron̄ kōm̧m̧ane n̄an m̧weiie ko ad ilowan wōt juon minit. Elukkuun aorōk n̄an kajjojo iaad n̄an kajieon̄ in likūt n̄an kom̧ men in aorōk ko ilo lan̄―kōjerbal ad iien, taļen ko, im anemkwoj in kālet eo ilo jerbal in jipan̄ eo n̄an Anij.

Jisōs Kraist ej wōnm̧aanļo̧k wōt im letok kūr “Itok im ļoor Eō.”5 Eaar etetal ipeļakin kapijuknen eo An ippān rikaļoor ro An ilo juon wāween ettā. Ej etetal wōt ippād, jutak ippād, im tōl kōj. N̄an ļoor waanjon̄ak eo An em̧m̧an ej n̄an kile im nōbar Rilo̧mo̧o̧r, eo eaar en̄taan kōn aolep eddo ko ad kōn Pinmuur eo An ekwojarjar n̄an lo̧mo̧o̧ren, jerbal in jipan̄ eo eļap. Ta eo kajjitōk ippād kajjojo ej n̄an maron̄ in kōņaan ineek “eddo” eo ekamōnōnō an ro rej rikaloran.

Ke iaar pād ilo Oklahoma eaar wōr aō iien em̧m̧an n̄an ioon jet iaan baam̧le ko me raar jorrāān jen lan̄ eo ekajoor. Ke iaar loļo̧k baam̧le eo an Sorrels, Iaar lukkuun in m̧weier kōn en̄jake eo an leddik eo nejier, Tori, eo ej kūlaj laļem ilo Plaza Towers Elementary school. E im jinen repād ippād ijin rainin.

Tori im ro m̧ōttan raar aen doon ilo juon im̧ōn kōbojak n̄an kone ke aire eo eaar kakkure jikuul eo. Ron̄jake ilo aō riiti naan ko an Tori make ilo iien eo:

“Iaar ron̄ an juon men bun̄it bōroj eo. Iaar ļōmņak kōto bajjōk. Aenikien eo eaar lap ļo̧k im lap ļo̧k. Iaar jar bwe Jemedwōj Ilan̄ en kōjparok kōm̧ aolep im lo̧mo̧o̧ren kōm̧. Tokālik kōm̧ ainikien eļap, im kar bouk ļo̧k bōroj eo ilōn̄im̧. Eaar kanooj ekōtoto im kobej raar keto-ketak im dibwōj kajjojo m̧ōttan ko ilo ānbwiinū. Eaar lukkuun marok nam̧ōj im āinwōt n̄e mejatoto ekilmeej, ak eaar jab―eaar itulowaan aire eo. Iaar kiil māj ko meja im jar bwe en jako.

“Eaar m̧ōkaj an kar lur.

“Ke ij kōpeļļo̧k meja, Iaar lo juon jain in bōjrak im̧aan wōt meja! Eaar nan̄in wōt añūr bo̧tū.”6

Tori, jinen, ajri ro jilu jein im jatin, im ro m̧ōttan ro raar barāinwōt pād ilo jikuul eo ippān, raar mour jen aire eo, jiljilimjuon iaan rijikuul ro m̧ōttaer raar jab.

Jem̧ļo̧kin wiik eo em̧m̧aan ro ilo priesthood raar leļo̧k elōn̄ kōjeram̧m̧an ko n̄an membōr ro ro raar jorrāān ilo lan̄ eo. Iaar maron̄ in leļo̧k n̄an Tori juon kōjeram̧m̧an. Ke ij likūt pā ko peiū ioon bōraņ, Eaar ieeñaktok aō kake juon eoon em̧m̧an me Irooj ej jiron̄ kōj Enaaj ilo̧k im̧aad, bwe Enaaj pād ituanbwij maron̄id im ituamiin̄id, im An Jetōb enaaj pād ilo būruwōd, im enjeļ ro An renaaj jepo̧o̧l kōj, n̄an kom̧ kom̧.7

Iaar kapilōk Tori n̄an kememej raan eo me juon rikarejeran Irooj eaar likūt pā ko pein ioon bōraņ im leļo̧k kōjeram̧m̧an eo n̄an kar lo̧mo̧o̧ren e jen enjeļ ro jān lan̄ eo.

Etal im lo̧mo̧o̧ren doon, ilo jabdewōt jekjek, ej juon jon̄ak in iakwe eo indeeo. En̄in ej jerbal in jipan̄ eo ewōr tokjen.

Ekkā, ad leļo̧k iien em̧m̧an n̄an jipan̄ ro jet ilo tōre in aikuj ko aer. Āinwōt membōr ro ilo Kabun̄ in, ewōr ad kajjojo eddo ekwojarjar “n̄an ineek eddo ko an ro jet, bwe ren maron̄ mera,”8 “n̄an jan̄ ippān ro rej jan̄,”9 n̄an kotak pā ko raar alitoto, im kōkajoor ļo̧k nee ko rem̧ōjņo̧.10

Ro jeiū im jatū, ewi jon̄an an Irooj m̧ōņōņō kōn kajjojo im elōn̄ iami, kōn awa ko im jerbal in jipan̄ eo, men̄e eļap ak edik, kom̧ kanooj in jouj im em̧m̧an eo kom̧ij leļo̧k kajjojo raan.

Kiin̄ Benjamin eaar kwaļo̧k ilo Bok in Mornon, “Bwe eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij.”11

Wūjlepļo̧k n̄an jerbal eo n̄an ro jeid im jatid emaron̄ tōl ļo̧k kōj n̄an kōm̧m̧ani kālet ko rekwojarjar ilo raan in mour ko ad im kōpooj kōj n̄an ta eo eaorōk im iakwe ta eo Irooj ej iakwe. N̄e jenaaj kōm̧m̧ane menin, jej lukkuun kam̧ool ilo mour ko ad bwe jej ritōmak. N̄e jej bōk kūņaed ilo jerbal in, jenaaj en̄jake Jetōb eo An ilo kōj. Jenaaj eddōkļo̧k ilo naan in kam̧ool, tōmak, leke, im iakwe.

Ijeļā bwe aō Rilo̧mo̧o̧r ej mour, eo ej Jisōs Kraist; bwe Eaar kōnono n̄an im kōn rikanaan eo An, Būreejtōn Thomas S. Monson, eo ejitenbōro, ilo tōre, in ad.

Ij kōjatdikdik bwe jenaaj lo lan̄lōn̄ eo me ej itok jān jerbal in jipan̄ eo ekwojarjar n̄an ineek eddo ko an ro jet, men̄e repidodo im reddik, ej aō jar ilo etan Jisōs Kraist, amen.

Kwaļo̧k Kein Jipan̄ ko

  1.  

    1. Bōnbōn 11:16–17.

  2.  

    2. Thomas S. Monson, “What Have I Done for Someone Today?” Ensign akLiahona, Nov. 2009, 86, 87.

  3.  

    3. Matu 19:20–21.

  4.  

    4. Matu 19:22.

  5.  

    5. Matu 19:21.

  6.  

    6. Experience of Victoria (Tori) Sorrels, recounted Jan. 16, 2014.

  7.  

    7. Doctrine and Covenants 84:88.

  8.  

    8. Mosaia 18:8.

  9.  

    9. Mosaia 18:9.

  10.  

    10. Doctrine and Covenants 81:5.

  11.  

    11. Mosaia 2:17.