2010–2019
Cov Yuam Sij thiab txoj Cai ntawm lub Pov Thawj Hwj
April 2014

Cov Yuam Sij thiab txoj Cai ntawm lub Pov Thawj Hwj

Los ntawm Txwj Laug Dallin H. Oaks

Ntawm Pawg Kaum Ob tug Thwj Tim

Daim Duab

Cov yuam sij pov thawj hwj coj poj niam txoj hau kev ib yam li coj cov txiv neej, thiab cov kab ke pov thawj hwj thiab txoj cai pov thawj hwj muaj nqi rau poj niam ib yam li txiv neej.

I.

Nyob hauv lub rooj sab laj no peb twb tso ib txhia cov kwv tij mus, thiab peb tau txhawb nqa pom zoo rau lwm tus. Raws li tus txheej txheem no nyob hauv lub Koom Txoos uas peb txhua tus paub, tsis yog peb ua ib txoj hauj lwm qis thaum uas tso peb mus, thiab tsis yog peb ua ib txoj hauj lwm siab thaum Vajtswv hu peb. Tsis muaj txoj hauj lwm siab los yog txoj hauj lwm qis thaum yus ua tus Tswv txoj hauj lwm. Tsuas muaj qhov mus tom ntej los yog mus tom qab thiab qhov ntawd nyob ntawm seb peb ua li cas thaum lawv tso peb tawm. Muaj ib zaug thaum kuv tso ib ceg txheem ntseeg tus thawj tswj hwm hluas uas tau ua hauj lwm tau cuaj xyoos lawm thiab tom qab ntawd nws zoo siab ua txoj hauj lwm tshiab nrog nws tus poj niam. Nkawd yuav zov cov me nyuam yaus nyob hawv nkawd pawg ntseeg. Tsuas yog nyob hauv lub Koom Txoos no xwb peb thiaj saib ob qho hauj lwm ntawd muaj nqi ib yam!

II.

Thaum nws hais lus hauv cov poj niam rooj sab laj, Koom Haum Niam Tsev tus thawj tswj hwm Linda K. Burton hais tias, “Peb cia siab hais tias peb qhia tau kom txhua tus yuav xav to taub lub pov thawj hwj zoo dua ntais.”1 Qhov no nruab rau peb txhua tus, thiab kuv yuav pab peb ua li ntawd thaum kuv hais txog cov yuam sij thiab txoj cai ntawm lub pov thawj hwj. Vim tej yam no muaj nqis rau cov txiv neej thiab cov poj niam huv tib si, kuv zoo siab uas peb tshaj tawm tej no thiab muab luam tawm rau tag nrho cov mej zeej ntawm lub Koom Txoos. Lub hwj chim pov thawj hwj foom koob hmoov rau peb txhua tus. Cov yuam sij pov thawj hwj coj poj niam txoj hau kev ib yam li coj cov txiv neej, thiab cov kab ke pov thawj hwj thiab txoj cai pov thawj hwj muaj nqi rau poj niam ib yam li txiv neej.

III.

Thawj Tswj Hwm Joseph F. Smith piav hais tias lub pov thawj hwj yog “Vajtswv lub hwj chim uas tau muab rau txiv neej kom txiv neej thiaj muaj cai ua tej yam hauv lub ntiaj teb kom tib neeg txais kev cawm seej.”2 Lwm tus thawj coj tau qhia peb hais tias lub pov thawj hwj yog “lub hwj chim loj tshaj plaws hauv lub ntiaj teb no. Lub pov thawj hwj yog lub hwj chim uas tau siv kom tsim lub ntiaj teb.”3 Cov vaj lug kub qhia hais tias lub pov thawj hwj no uas muaj thaum chiv keeb, kuj yuav muaj thaum lub ntiaj teb kawg thiab” (Mauxes 6:7). Yog li ntawd, lub pov thawj hwj yog lub hwj chim uas yuav tsa peb sawv rov los kom muaj txoj sia nyob mus ib txhis.

Qhov uas peb xav to taub pib ntawm txoj kev to taub txog cov yuam sij ntawm lub pov thawj hwj. “Cov yuam sij pov thawj hwj yog txoj cai uas Vajtswv tau muab rau cov uas tuav lub pov thawj hwj kom coj, tswj hwm thiab kav txoj kev siv Nws lub pov thawj hwj nyob hauv lub ntiaj teb.”4 Txhua qhov los sis txhua txoj kab ke uas peb ua nyob hauv lub Koom Txoos no yog ua raws li tus uas tuav cov yuam sij tso cai ua li ntawd. Raws li Txwj Laug M. Russell Ballard tau piav hais tias, “Cov uas tuav cov yuam sij pov thawj hwj … lawv ua rau tag nrho cov uas rau siab ntseeg thiab mloog lawv tej lus qhia kom muaj cai siv txoj cai pov thawj hwj thiab txais tau lub hwj chim pov thawj hwj.”5

Los ntawm qhov uas cov yuam sij pov thawj hwj tswj hwm kev siv txoj cai pov thawj hwj, ces cov yuam sij pov thawj hwj ua rau neeg muaj cai thiab tsis muaj cai. Cov yuam sij ua rau txhua tus muaj cai vim cov yuam sij ua rau txhua tus ntawm Vajtswv cov me nyuam muaj cib fim txais tau txoj cai thiab cov koob hmoov ntawm lub pov thawj hwj. Cov yuam sij ua rau neeg tsis muaj cai vim tsuas pub ib txhia muaj txoj cai pov thawj hwj uas yuav tuav hauj lwm ua, thiab tswj hwm txoj kev muab txoj cai thiab lub hwj chim rau lwm tus. Piv txwv hais tias, ib tug neeg uas tuav lub pov thawj hwj tsis muaj cai muab nws txoj hauj lwm los yog txoj cai rau lwm tus, tsuas yog tus uas tuav yuam sij tso cai xwb. Yog tsis muaj kev tso cai, ces kev tsa tus ntawd yuav tsis muaj nqi. Qhov no piav yog vim li cas ib tug uas tuav lub pov thawj hwj—tsis hais nws tuav hauj lwm dab tsi los yog— tsa tsis tau ib tug neeg hauv nws tsev neeg los sis muab lub cim nco txog rau nws tsev neeg yog tias tus uas tuav cov yuam sij tsis tau tso cai rau nws.

Cov uas muaj lub pov thawj hwj yog tib cov neeg uas muaj cai ua txoj kab ke pov thawj hwj xwb, tsuas yog cov muam hauv lub tuam tsev uas ua hauj lwm raws li lub tuam tsev tus thawj tswj hwm cov yuam sij thiaj li ua tau hauj lwm hauv lub tuam tsev, uas kuv yuav piav txog tom qab no. Thiab peb muab tag nrho cov kab ke pov thawj hwj uas tau tso cai rau ceev cia rau cov ntaub ntawv ntawm lub Koom Txoos.

Tus Tswv Yexus Khetos tuav txhua tus yuam sij pov thawj hwj, vim yog nws lub pov thawj hwj. Nws yog tus uas txiav txim seb yuav muab cov yuam sij rau tib neeg thiab yuav siv cov yuam sij ntawd li cas. Peb pheej xav tias tau muab tag nrho cov yuam sij pov thawj hwj rau Yauxej Xamiv nyob hauv lub Tuam Tsev Kirtland, tiam sis cov vaj lug kub qhia hais tias tau muab cov yuam sij ntawm lub caij nyoog no xwb (saib Q&K 110:16). Nyob hauv lub tuam rooj sab laj ntau xyoo tas los, Thawj Tswj Hwm Spencer W. Kimball qhia kom peb nco qab hais tias muaj cov yuam sij pov thawj hwj uas tsis tau muab rau tib neeg nyob hauv lub ntiaj teb, tsis hais cov yuam sij ntawm kev tsim thiab kev sawv rov los.6

Qhov uas Vajtswv tsis pub cai ua txhua yam thaum siv cov yuam sij pov thawj hwj piav txog ib qho tseem ceeb hais txog lub Koom Txoos cov thawj coj tej kev txiav txim thiab kev tswj hwm lub pov thawj hwj. Thawj Pawg Thawj Tswj Hwm thiab Pawg Sab Laj ntawm Thawj Pawg Thawj Tswj Hwm thiab Pawg Kaum Ob tug Thwj Tim, cov uas tswj hwm lub Koom Txoos, lawv muaj hwj chim txiav txim siab txog lub Koom Txoos tej kev cai thiab tej txheej txheem—tej yam xws li yuav ua tej tsev Koom Toos qhov twg thiab yuav pub cov tub txib mus thaum muaj pes tsawg xyoo. Txawm cov thawj coj uas tswj hwm tuav thiab siv tag nrho cov yuam sij uas tau muab rau tib neeg hauv lub caij nyoog no, lawv tsis muaj cai hloov qhov uas Vajtswv tsuas pom zoo rau txiv neej tuav tej hauj lwm ntawm lub pov thawj hwj xwb.

IV.

Nim no kuv yuav hais txog txoj cai pov thawj hwj. Kuv pib nrog peb lub ntsiab cai uas tau nyuam qhuav hais txog: (1) lub pov thawj hwj yog Vajtswv lub hwj chim uas Vajtswv muab rau neeg ua tej yam kom cawm tib neeg dim, (2) cov uas tuav lub pov thawj hwj uas tuav cov yuam sij pov thawj hwj tswj hwm txoj cai pov thawj hwj, thiab (3) vim cov vaj lug kub qhia hais tias, tag nrho lwm cov thawj coj los yog tej hauj lwm nyob hauv lub koom txoos puav leej yog txuas rau lub pov thawj hwj no (saib Q&K 107:5), ces txhua yam uas los ntawm cov yuam sij pov thawj hwj yog ua nrog txoj cai pov thawj hwj.

Qhov no nruab li cas rau cov poj niam? Nyob hauv ib zaj lus uas nws hais rau Koom Haum Niam Tsev, Thawj Tswj Hwm Joseph Fielding Smith, thaum ntawd nws yog tus Thawj Tswj Hwm ntawm Pawg Kaum Ob tug Thwj Tim, hais li no tias: “Txawm tsis tau muab lub Pov Thawj Hwj rau cov muam, tsis tau muab pom zoo rau lawv, qhov no tsis txhais hais tias tus Tswv tsis tau muab txoj cai rau lawv. … Ib tug neeg txais tau txoj cai, los yog ib tug muam txais tau, kom ua tej yam hauv lub Koom Txoos uas muaj nqi thiab yuav tsum ua kom peb txais txoj kev cawm seej, zoo li tej hauj lwm uas peb cov muam ua nyob hauv tus Tswv lub Tsev. Tau muab txoj cai rau lawv ua tej yam tseem ceeb thiab zoo kawg nkaus, tej yam tus Tswv saib dawb ceev, thiab muaj nqi ib yam li cov koob hmoov uas cov txiv neej uas tuav lub Pov Thawj Hwj muab.”7

Nyob hauv zaj lus hais ntawd, Thawj Tswj Hwm Smith rov qab hais ntau zaus hais tias twb muab txoj cai rau cov poj niam. Rau cov poj niam nws hais tias, “Nej hais tau nrog txoj cai, vim tus Tswv tau muab txoj cai rau nej.” Nws kuj hais tias “tau muab lub hwj chim thiab txoj cai rau [lub Koom Haum Niam Tsev] kom ua ntau yam. Txoj hauj lwm uas lawv ua yog txoj hauj lwm uas ua ntawm Vajtswv txoj cai.” Thiab tsis tas li ntawd, tej hauj lwm hauv lub Koom Txoos, tsis hais cov poj niam los txiv neej ua, tsis hais nyob hauv lub tuam tsev los sis nyob hauv pawg ntseeg los sis ceg ntseeg, yog ua raws li cov uas tuav cov yuam sij pov thawj hwj coj. Yog li ntawd, hais txog Koom Haum Niam Tsev, Thawj Tswj Hwm Smith piav hais tias, “[Tus Tswv] tau muab lub koom haum zoo no rau lawv kom lawv muaj txoj cai ua hauj lwm raws li cov npisov ntawm lawv pawg ntseeg coj …, saib xyuas tib neeg raws li lawv xav tau ntawm sab ntsuj plig thiab sab cev nqaij daim tawv.”8

Yog li ntawd, qhov tseeb hais tias Koom Haum Niam Tsev tsis yog ib hoob kawm xwb tiam sis yog ib lub koom haum rau cov poj niam—uas Vajtswv pom zoo txuas rau lub pov thawj hwj.9

Peb tsis swm hais tias cov poj niam muaj txoj cai pov thawj hwj thaum lawv ua hauj lwm hauv lub Koom Txoos, tiam sis tsis muaj lwm txoj cai. Thaum lawv muab ib tug poj niam—tsis hais tus hluas los yog tus laus— muab nws tsa kom ua ntxhais txib mus tshaj tawm txoj moo zoo, ces lawv muab txoj cai pov thawj hwj rau nws ua hauj lwm raws li lub pov thawj hwj. Kuj zoo ib yam thaum muab ib tug poj niam tsa ua hauj lwm ua ib tug thawj coj los yog xib hwb nyob hauv lub Koom Txoos raws li tus uas tuav cov yuam sij txoj kev coj. Tus uas txais hauj lwm los ntawm ib tug uas tuav cov yuam sij pov thawj hwj, tus ntawd siv txoj cai pov thawj hwj ua nws tej lub luag hauj lwm.

Tus uas siv txoj cai pov thawj hwj, tsim nyog kom tus ntawd tsis xav txog nws tej kev muaj cai thiab cia li xav txog nws tej kev lav ris. Peb lub sawm fem yuav tsum ua raws li lub ntsiab cai no. Tus kws sau los ntawm Russia Aleksandr Solzhenitsyn tau hais tias, “Yog lub sij hawm … kom tiv thaiv tib neeg tej kev lav ris tsis tas tiv thaiv lawv tej kev muaj cai.” 10 Haiv Neeg Ntseeg yeej paub yog tias yus xav ua neeg tsim nyog txais kev tsa nto ces tsis nyob ntawm kev siv txoj cai tiam sis yuav tsum ua raws li tej kev lav ris.

V.

Tus Tswv tau hais tias yuav muab txiv neej tsa rau tej lub luag hauj lwm ntawm lub pov thawj hwj xwb. Tiam sis, raws li cov thawj coj hauv lub Koom Txoos tau qhia, cov txiv neej tsis yog “lub pov thawj hwj.”11 Txiv neej tuav lub pov thawj hwj, nrog ib lub luag hauj lwm dawb ceev kom siv lub pov thawj hwj foom koob hmoov rau tag nrho Vajtswv cov me nyuam.

Vajtswv lub hwj chim zoo tshaj plaws uas tau muab rau Nws cov tub los siv tsis tau yog tias tsis muaj Nws ib tug ntxhais los ua khub, vim rau Nws cov ntxhais xwb Vajtswv twb muab lub hwj chim “tsim lub cev …, kom yuav muaj raws li Vajtswv txoj hau kev.”12 Nov yog Thawj Tswj Hwm J. Reuben Clark tej lus.

Nws hais ntxiv hais tias: “Nov yog peb cov poj niam thiab peb niam qhov chaw hauv Txoj Hau Kev Mus Ib Txhis. Lawv tsis tuav lub Pov Thawj Hwj; tsis tau txib lawv ua lub luag hauj lwm thiab kab ke ntawm lub Pov Thawj Hwj; tsis tau muab rau lawv lav ris; lawv tsa thiab tsim tej yam raws li lub Pov Thawj Hwj lub hwj chim, thiab txais cov koob hmoov ntawd, lawv muaj hwj chim ib yam li lub Pov Thawj Hwj thiab ua ib txoj hauj lwm uas Vajtswv tau hu lawv ua, uas tseem ceeb mus ib txhis li ib yam li lub Pov Thawj Hwj.”13

Los ntawm cov lus zoo ntawd, Thawj Tswj Hwm Clark hais txog tsev neeg. Raws li tau hais nyob hauv zaj lus tshaj tawm txog tsev neeg, tus txiv tsev tswj hwm tsev neeg, thiab tus txiv tsev thiab tus niam tsev nyias muaj nyias kev lav ris, tiam sis nkawd “yuav tsum sib pab xws li nkawd nyob sib txig.”14 Ntau xyoo ua ntej tau sau zaj lus tshaj tawm txog tsev neeg, Thawj Tswj Hwm Spencer W. Kimball tau hais zaj lus no: “Thaum peb hais txog qhov uas kev sib yuav yog ib qho kev sib koom ua ke, xav kom peb hais tias yog ib qho kev sib koom ua ke tag nrho. Peb tsis xav kom peb cov poj niam nyob ntsiag to los sis xav tias lawv tsis muaj cai thaum lawv ua raws li lo lus txib mus ib txhis! Thov ua ib tug khub uas koom siab tag nrho.”15

Raws li Vajtswv pom, txawm nyob hauv lub Koom Txoos los yog hauv tsev neeg los yog, cov poj niam thiab cov txiv neej yeej nyob sib txig tiam sis muaj tej kev lav ris sib txawv.

Kuv xaus lus nrog cov lus tseeb txog cov koob hmoov ntawm lub pov thawj hwj. Tsis zoo li cov yuam sij thiab cov kab ke pov thawj hwj, cov poj niam thiab cov txiv neej txais tau cov koob hmoov ntawm lub pov thawj hwj zoo ib yam. Lub txiaj ntsim Vaj Ntsuj Plig Dawb Huv thiab cov koob hmoov ntawm lub tuam tsev yog ob qho piv txwv txog qhov tseeb no.

Nyob hauv ib zaj lus uas tau hais nyob hauv BYU lub Lim Tiam Kawm Ntawv thaum lub caij sov tas los, Txwj Laug M. Russell Ballard qhia li no:

“Peb cov lub qhuab qhia hauv lub Koom Txoos no qhia tias cov poj niam muaj nqi ib yam tiam sis lawv txawv ntawm txiv neej.” Vajtswv tsis suav hais tias poj niam los yog txiv neej zoo dua. …

“Thaum cov txiv neej thiab cov poj niam mus rau lub tuam tsev, lawv puav leej txais vaj txiaj ntsim ntawm lub hwj chim, uas yog lub hwj chim pov thawj hwj. … Tag nrho Vajtswv cov me nyuam txais tau lub hwj chim thiab cov koob hmoov ntawm lub pov thawj hwj.”16

Kuv ua tim khawv txog lub hwj chim thiab cov koob hmoov ntawm Vajtswv lub pov thawj hwj, uas muaj rau tag nrho Nws cov tub thiab ntxhais huv tib si. Kuv ua tim khawv txog txoj cai pov thawj hwj, uas muaj nyob hauv txhua txoj hauj lwm thiab tej yam uas cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua. Kuv ua tim khawv txog qhov uas Vajtswv coj txoj hauj lwm ntawm lub pov thawj hwj cov yuam sij, uas peb tus yaj saub thiab tus thawj tswj hwm, Thomas S. Monson tuav thiab siv. Qhov tseem ceeb tshaj, kuv ua tim khawv txog peb tus Tswv thiab tus Cawm Seej, Yexus Khetos; nov yog Nws lub pov thawj hwj thiab peb yog Nws cov tub qhe, los ntawm Yexus Khetos lub npe.

Lus Cim

  1. Linda K. Burton, “Priesthood: ‘A Sacred Trust to Be Used for the Benefit of Men, Women, and Children’” (zaj lus uas hais nyob hauv Brigham Young University Women’s Conference, Tsib Hlis Ntuj 3, 2013), 1; ce.byu.edu/cw/womensconference/transcripts.php.

  2. Joseph F. Smith, Gospel Doctrine, 5th ed. (1939), 139.

  3. Boyd K. Packer, “Priesthood Power in the Home” (txoj kev cob qhia cov thawj coj thoob plaws lub ntiaj teb, Ob Hlis Ntuj 2012); lds.org/broadcasts; kuj saib Yakaunpaus E. Faust, “Power of the Priesthood,” Ensign, Tsib Hlis Ntuj 1997, 41–43.

  4. Handbook 2: Administering the Church (2010), 2.1.1.

  5. M. Russell Ballard, “Men and Women in the Work of the Lord,” New Era, Plaub Hlis Ntuj 2014, 4;Liahona, Plaub Hlis Ntuj 2014, 48; kuj saib Daughters in My Kingdom: The History and Work of Relief Society (2011), 138.

  6. Saib Spencer W. Kimball, “Our Great Potential,” Ensign, Tsib Hlis Ntuj 1977, 49.

  7. Joseph Fielding Smith, “Relief Society—an Aid to the Priesthood,” Relief Society Magazine, Ib Hlis Ntuj 1959, 4.

  8. Joseph Fielding Smith, “Relief Society—an Aid to the Priesthood,” 4, 5; kuj saib Teachings of Presidents of the Church: Joseph Fielding Smith (2013), 302.

  9. Saib Boyd K. Packer, “The Relief Society,” Ensign, Tsib Hlis Ntuj 1998, 72; kuj saib Daughters in My Kingdom, 138.

  10. Aleksandr Solzhenitsyn, “A World Split Apart” (zaj lus hais ntawm kab ke kawm ntawv tiav nyob ntawm Harvard University, Rau Hli Ntuj 8, 1978); kuj saib Patricia T. Holland, “A Woman’s Perspective on the Priesthood,” Ensign, Xya Hli Ntuj 1980, 25; Tambuli, Rau Hli Ntuj 1982, 23; Dallin H. Oaks, “Rights and Responsibilities,” Mercer Law Review, vol. 36, no. 2 (winter 1985), 427–42.

  11. Saib Yakaunpaus E. Faust, “You Are All Heaven Sent,” Ensign los sis Liahona, Kaum Ib Hlis Ntuj 2002, 113; M. Russell Ballard, “This Is My Work and Glory,” Ensign los sis Liahona, Tsib Hlis Ntuj 2013, 19; Dallin H. Oaks, “Priesthood Authority in the Family and the Church,” Ensign los sis Liahona, Kaum Ib Hlis Ntuj 2005, 26. Tej lub sij hawm peb hais tias lub Koom Haum Niam Tsev yog “tus khub ntawm lub pov thawj hwj.” Qhov hais raug dua yog kev hais tias thaum lawv ua tus Tswv txoj hauj lwm ces Koom Haum Niam Tsev thiab cov poj niam ntawm lub Koom Txoos yog “cov khub ntawm cov uas tuav lub pov thawj hwj.”

  12. J. Reuben Clark Jr., “Our Wives and Our Mothers in the Eternal Plan,” Relief Society Magazine, Kaum Ob Hlis Ntuj 1946, 800.

  13. J. Reuben Clark Jr., “Our Wives and Our Mothers,” 801.

  14. “Tsev Neeg: Ib zaj Lus Tim Khawv rau lub Ntiaj Teb,” Ensign los sis Liahona, Kaum Ib Hlis Ntuj 2010, 129.

  15. Spencer W. Kimball, “Privileges and Responsibilities of Sisters,” Ensign, Kaum Ib Hlis Ntuj 1978, 106.

  16. M. Russell Ballard, New Era, Plaub Hlis Ntuj 2014, 4;Liahona, Plaub Hlis Ntuj 2014, 48; kuj saib Sheri L. Dew, Women and the Priesthood (2013), qhov tseem ceeb yog thooj 6, kom nyeem tej lus uas muaj nqi txog tej lus qhuab qhia uas hais no.