Kiis me a Ngerachel er a Priesthood

Chelechal ongdibel e kede milsterir a ngbetir a rebebil er a kmal blak a rengrir el odam, e mla kongei a deruchellir er a rebebil. Tiaikid el teletael—el kmal dodengelii a rechedal a Ikelesia eng diak el belkul a kmo ng mo—“ngariou a deruchelled” sel de mengubet, me a diak el bo er “bab a deruchelled” sel dengai okedong. Ng diak a “ngariou malechub el ngarbab” er a chelsel omesiou el mo er aRubak. Ng di ngarngii a mo “ruchei malechub a mo ruriul,” e tial klekakerous a ultuil er a kengei er kid me a omerelled sel de mengubet er a okedong el de ngarngii. Ng mle tal kisa ngbetel a ngeasek el merreder er a stake el ngii a mla blak a rengul mesiou el etiu el rak e chelechang dmeu a rengul el mocha merek e kuk soiseb er a beches el okedong el ngii me a bechil a dirk ngilai. Te mlokedong el mo oungerachel er a nursery er a ward er tir. Ng di chelsel tiaikid el Ikelesia a desa tiang el uaia le tabesul chetengakl!

Chelsel sel cheldechedechal el mora redil, e a merreder er a cherrengelel a Relief Society el Linda K. Burton a millekoi, “Kede oureng el modolmii er a chelsel a rengrir a re dersta er kid sel klemeriar reng el mo mui el medengelii a priesthood.”¹ Tia tekoi el me er kid el rokui, e ngak a mo oltirakl er ngii el mo mesaod el kirel a kiis me a ngerachel er a priesthood. Aika el tekoi a di diul melutk el mo er a sechal me a redil, eng dmeu a renguk el kmo aika moues e mechuiu el mo er a rokui el chedal a Ikelesia. A klisichel a priesthood a omekngeltengat er kid el rokui. A kiis er a priesthood omekrael er a redil me a dirrek el sechal, e a chedaol urerel a priesthood me a ngerachel el ngara chelsel a melutk el kirir a redil me a dirrek el sechal.

A President Joseph F. Smith a milsaod er a priesthood er tiakid el teletael “ng klisiich er a Dios el mo er a chad el sebechel meruul a ngerchelel er a beluulechad el kirel osebelir a rokui el chad.”² A kuk rebebil er a roungerachel a mla olisechakl er kid el kmo a priesthood a “kot el ngarbab el klisiich el ngara beluulechad. Tiaikid a klisiich el uchul e a beluulechad a ulebeob.”³ A chedaol llechukl olisechakl el kmo tiaikid losisiu el Priesthood, el di mla ngara uchelel, a dirrek el melemolem el mora ulebengelel a beluulechad (mesa Moses 6:7). A leuaisei, eng klisichel a priesthood a uchul e kede mo mekiis er a kodall e ngoriakl el mo nguu a diak a ulebengelel klengar.

A klemedengei el kid osiik omuchel lokiu a ungil klemedengei el kirel a kiis er a priesthood. “A kiis er a priesthood a ngerachel el Dios a mesterir tirkel [urrekodel] e rngii el mo omekrael, omtebechel, e orrurt er a priesthood er a Ngii er a beluulechad.”⁴ A bek el omeruul me a chedaol ruoll el mekedmokl er a chelsel a Ikelesia a ultuil er a kengei er ngike el chad el urrekodel er tial kiis. El uaia tekingel a Elder M. Russel Ballard el dilu el kmo, “Tirkel loba kiis er a priesthood … a kmal sebechir rulterir tirkel rokui el ngara blakelreng lomesiou el ngara cheungir el mo ousbech er a priesthood e dirrek el mo sebechir loba klisichel a priesthood.”⁵

Sel doltirakl a ngerachel er a priesthood, e a urerel a kiis er a priesthood a sebechel mo klou e ngarngii a telkelel. Ng mo klou el mo sebechel a urerel a priesthood el mo er a rokui el ngelekel a Dios. E ngarngii a telkelel lultuil er a kmo ng techa mo oba ngerachel er a priesthood, e techa mo er aikel obis er a priesthood, e mekera mutebechel a lemeltel me a klisichel. Okesiul tiang, a chad loba priesthood a diak el sebechel msa ta er a rechad sel obis malechub a ngerachel, a lak el kengei ngike el ngii oba tial kiis. A lak tial kengei, e sel omengedaol a diak loureor. Tia smodii a uchul e a chad loba priesthood—el diak el iior er a obis le ngarngii—a diak longedaol er a chedal a telungalek er ngii malechub e longedmokl e r asakrament er a chelsel a blil alskeum eng diak a kengei er ngike el chad loba sel kiis.

Meng diak luldimukl er ngii aikel chedaol ureor el rodos a meruul er a chelsel a templo lokiu a kiis loba merreder er a templo, el ngii a bo ksodii ruriul, eng di ngike el chad el ngara obis er a priesthood a mengedmokl a chedaol ruoll er a priesthood. E a rokui el mla mengai a kengei er ngii el ruoll er a priesthood a llechukl er a chelsel a record er a Ikelesia.

Sel kot el ngarbab, a rokui el kiis er a priesthood a lolab a Rubak el Jesus Kristo, le tia priesthood er ngii. Ngii a chimo el chad el kongei el kmo ngera el kiis a mo er a rechad e mekera usbechellel aika el kiis. Kede mla mo smau lomdasu el kmo a rokui el kiis er a priesthood a mlo er a Joseph Smith er a chelsel a Kirkland Temple, eng di chedaol llechukl a meketeklii el mo aikel mlengai er seikid el taem a kiis el kirel chelechal taem ” (D&C 110:16). Se er a klou el ongdibel er a betok el rak er a memong, e a President Spencer W. Kimball a ulemeklatk er kid el kmo ngarngii a lmuut el bebil er a kiis er a priesthood el ngii a dirkak le bo er a chad er a beluulechad, luldimukl er a kiis er a omeob me a okiis er a kodall.⁶

Sel chedaol teletelel a telkelel a urerel a kiis er a priesthood a smodii a klou a belkul el klekakerous er a uldasu el kirel a orretel a Ikelesia me a uldasu el kirel tial priesthood. A First Presidency me a Council er a First Presidency me a Chelechad er a Teruich me a terung, el tir a bdelul a Ikelesia, a oba klisiich el kirel a betok el uldasu el kirel a llechul me a orretel a Ikelesia—el uaia rua basio er a omekedecheraol er a Ikelesia me a rekrir a remisionari el mo er a omesiou. Meng uaisei el tirkal ngarbab el merreder a urrekodel e olab a rokui el kiis er a priesthood el mo er a rechad er chelechal taem, eng di tir a diak el mimokl el melodech er sel teletael el kmo te di rsechal a mo urrekodel obis er a priesthood.

Chelecha e ak mo mesaod el kirel a ngerachel er a priesthood. Ak mo omuchel er a ikel kldei osisechakl el mla medung: (1) a priesthood a klisiich er a Dios el mo er a chad el kirel osebelir a rokui el chad, (2) a ngerachel er a priesthood a lomtebechel er ngii tirkel urrekodel er a priesthood el tir olab a kiis er a priesthood, e a (3) a chedaol llechukl a kmo a rokui el ngerachel er a me a obis er a ikelesia a tebedechel tial Priesthood er a Melchizedek (Mesa D&C 107:5), e a rokui el mekedmokl a ngara cheungel a dereder er a ikal kiis er a priesthood lokiu a ngerachel er a priesthood.

Tia ng mekera kuk loureor er a redil? Chelsel a cheldechedechal el mo er a Relief Society, e a President Joseph Fielding Smith, el mle Merreder er a Chelechad er a Teruich me a terung el Apostol, a millekoi: “Ng uaisei el rodos a diak loba Priesthood, leng dirkak el bol sebechel mo er tir, eng di diak el belkul a kmo a Rubak a dirkak el besterir a ngerachel. …A chad a sebechel nguu a ngerachel, me a dirrek el odos, el mo meruul a kmo ngerang er a chelsel a Ikelesia el ngii omak e kmal meklou a belkul kirel osebeled, el uaia ureor el rodos er kid a meruul er a chelsel a Blil a Rubak. Ngarngii a ngerachel el bla lenguu el meruul a meklou a ultutelel tekoi, el ngii chedaol el mora Rubak, el omak el di uaia klengeltengat el mengai er a rsechal el tir oba Priesthood.”⁷

Chelsel tial chetengakl el cheldechedechal, e a President Smith a ulemelekl el kmo a redil a mla nguu a ngerachel. Ng millekoi er a redil el kmo, “Ng sebechiu el mengedecheduch loba ngerachel, le Rubak a mla meskemiu a ngerachel.” Ng millemolem el melekoi el kmo a Relief Society “[a] mla nguu a klisiich me a ngerachel el meruul a betok el meklou el tekoi. A ureor loruul er ngii a mekedmokl lokiu chedaol ngerachel.” E uaisei, a ureor er a Ikelesia el mekedmokl er a redil me a rsechal, a le ngara chelsel a templo malechub a ward malechub a branch, a mekedmokl lokiu a dereder er tirkel urrekodel er a kiis er a priesthood. A leuaisei, e sel dongedecheduch er a Relief Society, e a President Smith a silodii, “[A Rubak] a mla mesterir tial klou el cheldebechel el tir oba ngerachel el mesiou el ngara cheungel a dereder er a rebisop er a ward… , lomes er a rechad er a ikel lousbech a bedengir me a dirrek el reng er tir.”⁸

Meng, klemera el tekoi el mo er a Relief Society a diak el di le klas ng bai basio el tir a kirir el ngarngii—el ngii a chedaol el mle kldmokl el tebedechel a priesthood.⁹

Ng diak desau el melekoi el kirir a redil el kmo te oba ngerachel er a priesthood er a ikel okedong le ngarngii er a Ikelesia, eng di ngera el ngodech el ngerachel a sebechel? Se el sekum a redil—kekerei malechub eng klou—a moterekokl el mo olisechakl er a ebangkelio el cherrungel el misionari, e nguu a ngerachel er a priesthood el mo meruul a urerel a priesthood. Osisiu el klemerang a mo er a redil el moterekokl el mo sensei er a chelsel a ngii di el cheldebechel er a Ikelesia el ngara cheungel a dereder er ngike el chad loba kiis er a priesthood. Ngii di el chad el ngara deruchall malechub eng obis a nguu a ngerachel er ngikel loba kiis er a priesthood a meruul a urerel a priesthood sel loruul aikel ngerchelel mla moterekokl el kirel meruul.

Ngii di el chad el meruul a urerel a priesthood a kirel diak lomdasu el kirel a lemeltel e bai kerekikl a ngerchelel. Tia suobel el usbechall er a chelsel a beluu. A merael chisel chad er a omeluches er a Rosia el Aleksandr Solzhenitsyn a millekoi el kmo, “Ng mla mo taem … el diak desal lomecheliu er a lemeltel a chad ng bai ngerchelel a chad.”¹⁰ A Ruriul-klebesei el Santo a medengei el kmo a uchul a mo suobel a diak el iior er a lemelted ng bai iior er a kldmokl el ngercheled.

A Rubak a mla melekoi el kmo ng diak el di el sechal a mo mechedaol el mo er a obis er a priesthood. Eng di, uaia ikel tekingir a rebetok el mengeteklel a Ikelesia el kmo, a rsechal a diak “el priesthood.”¹¹ A rsechal a urrekodel er a priesthood, loba chedaol ngerachel el kmo te ousbech er ngii lomekngeltengat er a rokui el ngelekel a Dios.

Se el kot el ngarbab el klisiich el Dios a mesterir a Rengelekel sechal a diak el sebechel mo oureor a lak luldimukl a Rengelekel redil er ngii, le Dios a di mla mesterir a Rengelekel redil a klisiich “lomeob er a rechad … me luchul e a urerel me sel Klou el Moktek bo lobdois.”¹² Aikaikid a tekingel a President J. Reuben Clark.

Ng millemolem: “Tiaikid a ngerchelir a rebechid me a redelad er a chelsel sel Diak a Ulebengelel Moktek. Tir a diak loba Priesthood; ng diak el ngerchelir el meruul a urerel me a ngerchelel a Priesthood; malechub e bo loberaod er a ngerchelel; tir a meleketek e mengederoder el ngara cheungel a klisichel, e melai a klengeltengat er ngii, lultuil er a ngesou er a klisichel a Priesthood e meruul a ngerchelir er a chelsel aikel okedongir, el dirrek el kmal klou a ultutelel el di uaia Priesthood.”¹³

Chelsel aikal lomekellomes el tekingel, e a President Clark a millekoi el kirel a telungalek. El uaia ikel llechukl er a chelsel sel tekoi el mo er a telungalek el kmo, a chedam a bdelul a telungalek e ngii me a chedil a kakerous a ngerchelir, eng di tir a “kirir el kaingeseu e kaukledm.”¹⁴ Sesei el rak ruchei er tial tekoi el kirel a telungalek, e a President Spencer W. Kimball a dillii tiakid el tekoi: “Sel dosaod el kirel a chebechiil me a klaingeseu, e mei e dosaod er a chebechiil el tabesul ngerachel. Ng diak el soad a re LDS el redil el di lmuk malechub el klebech a lolekoi er a chelsel tial diak a ulebengelel ngerachel! Kulengit me bomui el olngeseu e mui el ngara omeruul.”¹⁵

Sel denguu er a Dios, a le chelsel a Ikelesia malechub a telungalek, e a redil me a rsechal a diosisiu eng di kakerous a ngerchelir.

Ak mo mengesimer el mo kmu sesei el klemerang el kirel a klengeltengat er a priesthood. Me ngodech er a kiis me a omengedaol el mora priesthood, e a klengeltengat er a priesthood a ngarngii el mora redil me a rsechal el di tabesul. A sengk er a Chedaol Reng me a klengeltengat er a templo a okesiul tial klemerang.

Chelsel sel dmolech el cheldechedechal er a BYU Education Week er tial mlo merek el summer, e a Elder M. Russell Ballard a dilu ikakid el osisechakl:

“A osischeklel a Ikelesia er kid a omes er a redil el osisiu eng di dirrek el ngodech er a rsechal. A Dios a diak lomes er a ta er tir el ungil malechub el klou a belkul er a tang. …

“A rsechal me a redil sel bo er a templo, e te ngmai osisiu a klengeltengat er a osisiu el klisiich, el ngii a klisiich er a priesthood. … A ngeiul a klisiich me a klengeltengat er a priesthood a ngarngii el mo er a rokui el ngelekel a Dios.”¹⁶

A kuchais el kirel a klisiich me a klengeltengat er a priesthood er a Dios, el diosisiu el kirir a Rengelekel sechal me a redil. A kuchais el kirel a ngerachel er a priesthood, el ngii oureor er a chelsel aikel rokui el obis me a omeruul er a chelsel a Ikelesia er a Jesus Kirsto er a Uriul-klebesei el Santo. A kuuchais el kirel a chedaol urerel a kiis er a priesthood, el ngii a lolab el rokui a profet/merreder, el Thomas S. Monson. A ulebongel e klou a ultutelel, a kuuchais el kirel a Rubak er kid me a Osobel, el Jesus Kristo, el tiang a priesthood er ngii e kid a mesiungel, el ngara ngklel a Jesus Kristo, amen.