2010–2019
Tus Txiv Neej Pov Thawj Hwj
April 2014


Tus Txiv Neej Pov Thawj Hwj

Nej coj tau yam ntxwv zoo, yam ntxwv dog dig, los yog coj yam ntxwv phem. Tej zaum nej xav tias nej coj yam ntxwv zoo li cas los tsis ua li cas rau nej, tiam sis tus Tswv saib qhov no tseem ceeb.

Peb txhua tus muaj phab ej, feem ntau yog thaum peb tseem hluas. Kuv yug los nyob hauv Princeton, New Jersey, nyob hauv lub Teb Chaws Amelikas. Tej pawg ntaus pob uas muaj npe heev uas nyob ze peb yog cov uas nyob hauv New York City. Thaum ntawd yog lub hauv paus ntawm peb pawg ntaus pob: Brooklyn Dodgers, New York Giants, thiab New York Yankees. Philadelphia nyob ze dua ntawm peb lub tsev thiab yog lub hauv paus ntawm ob pawg ntaus pob Athletics thiab Phillies. Muaj ntau tus uas muaj peev xwm ua kuv tus phab ej nyob hauv tej pawg ntaus pob no.

Joe DiMaggio, uas ntaus pob rau New York Yankees, nws yog kuv tus phab ej. Thaum kuv cov tij laug thiab kuv cov phooj ywg ntaus pob nyob tim tshav kawm ntawv ze peb lub tsev, kuv twb sim ntaus pob zoo ib yam li Joe DiMaggio. Thaum ntawd yog ua ntej lawv muaj TV (yog puag thaum ub), yog li ntawd kuv tsuas muaj daim duab ntawm ntawv xov xwm kom kuv paub ntaus pob zoo li nws.

Thaum kuv loj hlob tuaj, kuv txiv thauj kuv mus rau Yankee Stadium. Yog tib lub sij hawm uas kuv pom Joe DiMaggio ntaus pob. Kuv tseem nco qab pom nws ntaus pob thiab saib lub pob dawb ya mus rau tshav pob qhov nruab nrab.

Kuv yeej tsis txawj ntaus pob zoo li kuv tus phab ej thaum kuv yog ib tug me nyuam. Tiam sis ob peb zaus thaum kuv ntaus pob zoo, kuv twb ua raws li kuv tus phab ej tus txheej txheem ntaus pob.

Thaum peb xaiv cov phab ej, peb pib coj raws li qhov uas peb nyiam txog lawv.

Zoo siab uas kuv niam kuv txiv tau pab kuv ntsib cov phab ej zoo thaum kuv yog ib tug hluas. Kuv txiv tau coj kuv mus rau Yankee Stadium ib zaug xwb kom saib kuv tus phab ej ntaus pob, tiam sis txhua hnub Sunday nws cia kuv saib ib tug txiv neej pov thawj hwj uas tau rais los ua ib tug phab ej. Tus phab ej ntawd pab kuv lub neej. Kuv txiv yog ceg ntseeg tus thawj tswj hwm ntawm ib ceg ntseeg me me uas sib ntsib hauv peb lub tsev. Yog li ntawd, yog yus nqis tuaj rau theem thib ib thaum Hnub Caiv sawv ntxov, yus twb tuaj rau lub tsev koom txoos lawm. Peb ceg ntseeg yeej tsis tau muaj tshaj 30 neeg uas tuaj.

Muaj ib tug tub hluas uas thauj nws niam tuaj rau peb lub tsev kom sib ntsib, tiam sis nws tsis tau tuaj rau hauv lub tsev. Nws tsis yog ib tug mej zeej. Yog kuv txiv uas mus ntsib nws ntawm qhov chaw nws nres tsheb thiab caw nws tuaj rau hauv peb lub tsev. Nws tau ua kev cai raus dej thiab rais los ua kuv tib tug thawj coj ntawm lub Pov Thawj Hwj Aloos. Nws yog kuv tus phab ej pov thawj hwj. Kuv tseem nco qab tus mlom ntoo uas nws muab ua nqi zog rau kuv tom qab wb tau txiav ntoo pab ib tug poj ntsuam. Kuv twb sim ua neeg zoo li nws thaum twg kuv qhuas Vajtswv ib tug tub qhe.

Kuv twb xaiv ib tug phab ej ntxiv nyob hauv ceg ntseeg me me ntawm lub Koom Txoos ntawd. Nws yog ib tug tub rog Marine ntawm lub Teb Chaws Amelikas uas hnav nws ris tsho ntsuab tuaj rau peb tej kev sib ntsib. Yog ib lub caij uas muaj kev tsov rog, qhov ntawd xwb ua rau nws yog tus phab ej. Cov thawj tub rog twb xa nws mus rau Princeton University kom nws kawm ntawv ntxiv. Tiam sis qhov kuv nyiam tshaj nws ris tsho ua tub rog, yog qhov uas kuv saib nws ua si hauv Palmer Stadium thaum nws yog tus thawj ntawm pawg football ntawm Princeton University. Kuv twb saib nws ua si hauv lub tsev kawm ntawv pawg basketball thiab saib nws txais pob nyob hauv lawv pawg ntaus pob.

Tiam sis qhov tseem ceeb, nws tau los rau kuv lub tsev qhia kuv paub txawb basketball nrog kuv sab tes laug thiab kuv sab tes xis. Nws qhia kuv tias kuv yuav tsum paub ua li ntawd vim muaj ib hnub kuv yuav ua basketball nrog tej pawg zoo heev. Thaum ntawd kuv tsis tau paub li no, tiam sis tau ntau xyoo, nws yog ib tug yam ntxwv zoo txog ib tug txiv neej pov thawj hwj.

Nej txhua tus coj yam ntxwv ntawm ib tug txiv neej pov thawj hwj txawm nej xav ua los tsis xav ua. Thaum nej txais lub pov thawj hwj nej tau rais los ua ib lub teeb. Tus Tswv muab nej rau qhov chaw siab kom nej ci rau txhua tus nyob ib puag ncig nej pom kev. Qhov no yeej muaj tseeb rau cov uas nyob hauv nej pawg pov thawj hwj. Nej coj tau yam ntxwv zoo, yam ntxwv dog dig, los yog coj yam ntxwv phem. Tej zaum nej xav tias nej coj yam ntxwv zoo li cas los tsis ua li cas rau nej, tiam sis tus Tswv saib qhov no tseem ceeb. Nws tau hais li no tias:

“Nej yog lub teeb uas ci rau neeg ntiaj teb pom kev. Lub nroog uas nyob saum roob yeej tsis muaj ib yam dab tsi yuav thaiv tau lub nroog ntawd.

“Tsis muaj leej twg taws teeb thiab muab phiab khwb rau; tiam sis tsuas muaj yuav muab txawb rau qhov chaw siab kom txhua tus uas nyob hauv lub tsev pom kev.

“Ib yam li ntawd, nej yuav tsum ci rau sawv daws pom tej hauj lwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceeb tsheej.1

Kuv twb txais koob hmoov los ntawm cov uas tuav lub pov thawj hwj txoj kev coj yam ntxwv nyob rau hauv kuv tej pawg pov thawj hwj. Nej ua tau li lawv ua rau kuv thaum nej coj yam ntxwv rau lwm tus xyaum.

Kuv twb pom peb tug cwj pwm uas kuv cov phab ej uas tuav lub pov thawj hwj coj. Qhov ib yog kev thov Vajtswv, qhov ob yog kev pab lwm tus, thiab qhov peb yog kev txiav txim ua siab ncaj.

Peb txhua tus thov Vajtswv, tiam sis tus uas tuav pov thawj hwj thov Vajtswv ntau thiab thov tiag tiag. Thaum hmo ntuj nej yuav txhos caug thiab ua Vajtswv tsaug rau cov koob hmoov uas nej tau txais. Nej yuav ua Nws tsaug rau nej niam nej txiv, nej cov xib hwb, thiab cov uas coj yam ntxwv zoo rau nej. Thaum nej thov Vajtswv nej yuav piav txog cov uas tau foom koob hmoov rau nej lub neej thaum hnub ntawd. Yuav siv ntev tshaj ob peb feeb ua li ntawd thiab yuav tsum xav ntau ntau. Ua li ntawd yuav ua rau nej xav tsis thoob thiab yuav hloov nej lub siab.

Thaum nej thov Vajtswv zam txim rau nej, nej yuav zam txim rau lwm tus. Thaum nej ua Vajtswv tsaug rau Nws txoj kev ua siab zoo, nej yuav xav txog lwm tus lub npe uas xav tau nej txoj kev ua siab zoo. Qhov uas nej ua li ntawd yuav ua rau nej xav tsis thoob txhua hnub, thiab thaum sij hawm dhau mus, yuav hloov nej lub siab.

Kuv cog lus rau nej tias, ib qho uas yuav hloov nej lub siab thaum nej thov Vajtswv yog qhov uas nej paub tias nej yog Vajtswv ib tug me nyuam. Thaum nej paub tias nej yog Vajtswv ib tug me nyuam, nej kuj yuav paub tias Nws xav kom nej ua ntau yam. Vim nej yog Nws cov me nyuam, Nws xav kom nej ua raws li Nws tej lus qhia thiab Nws Leej Tub, Yexus Khetos tej lus qhia. Nws yuav xav kom nej ua siab zoo siab dawb rau lwm tus. Nws yuav poob siab yog tias nej muab hlob thiab xav txog nej tus kheej. Nws yuav foom koob hmoov rau nej yog nej saib lwm tus tej kev xav tau tseem ceeb nej li.

Nej ib txhia yeej coj yam ntxwv zoo txog kev siv lub pov thawj hwj pab lwm tus. Nyob hauv tej tuam tsev nyob thoob plaws lub ntiaj teb no, cov uas tuav lub pov thawj hwj tuaj ua ntej hnub tuaj. Thiab ib txhia ua hauj lwm ntev tom qab hnub poob. Tsis muaj neeg ntiaj teb qhuas lawv vim lawv muab lub sij hawm thiab lub zog npaum li ntawd txi. Kuv twb nrog cov tub hluas ntxhais hluas mus thaum lawv pab cov uas nyob hauv lub ntuj ntsuj plig, cov uas txais tsis tau cov koob hmoov ntawm lub tuam tsev lawv tus kheej.

Thaum kuv pom cov uas tuaj ntxov thiab nyob lig tej lub ntsej muag, lawv zoo siab thiab lawv tsis nkees, kuv paub tias muaj tej lub nqi zog hauv lub neej no rau cov uas siv pov thawj hwj ua hauj lwm pab lwm tus, tiam sis yog ib qho me ntsis xwb ntawm txoj kev xyiv fab uas lawv yuav muaj nrog cov uas lawv ua hauj lwm pab nyob hauv lub ntuj ntsuj plig.

Kuv twb pom cov uas hais lus rau lwm tus txog cov koob hmoov uas los ntawm qhov uas lawv zwm rau Vajtswv lub nceeg vaj, lawv muaj kev zoo siab hauv lawb lub ntsej muag zoo ib yam. Kuv paub txog ib ceg ntseeg tus thawj tswj hwm uas niaj hnub coj cov neeg rau cov tub txib qhia. Ob peb hlis tas los nws tsis yog ib tug mej zeej ntawm lub Koom Txoos. Tam sim no muaj cov tub txib uas qhia thiab ib ceg ntseeg uas loj tuaj thiab muaj zog tuaj vim muaj nws. Tiam sis tsis tas li ntawd xwb, nws yog ib lub teeb rau lwm tus kom lawv paub qhib lawv lub qhov ncauj thiab khiav tus Tswv txoj keb muab Leej Txiv Saum Ntuj Ceeb Tsheej cov me nyuam sib sau.

Thaum nej thov Vajtswv thiab pab lwm tus, qhov uas nej paub tias nej yog Vajtswv cov me nyuam thiab nej txoj kev hlub Nws yuav loj tuaj. Nej yuav haj yam paub tias Nws tu siab thaum nej ua ib nyuag qho tsis ncaj. Nej yuav txiav txim siab xav ua raws li nej tau cog lus rau Vajtswv thiab rau lwm tus. Nej yuav haj yam nco qab thaum nej nqa ib yam dab tsi uas tsis yog nej li. Nej yuav ua siab ncaj nrog cov uas ntiav nej ua hauj lwm. Nej yuav txiav txim siab tuaj thaum teem sij hawm thiab ua txhua yam uas tus Tswv muab rau nej ua thiab nej lees txais ua.

Cov me nyuam nyob hauv tej tsev neeg uas nej mus xyuas yuav tsis tas xav seb nej puas tuaj tiam sis lawv yuav zoo siab tos txog lub sij hawm nej tuaj. Kuv cov me nyuam twb txais qhov koob hmoov ntawd. Thaum lawv loj hlob tuaj, lawv muaj cov phab ej pov thawj hwj pab lawv xav ua hauj lwm rau tus Tswv ib yam thiab. Qhov kev coj yam ntxwv zoo no twb mus rau tiam neeg thib peb lawm.

Kuv kuj xav hais lus ua nej tsaug.

Kuv ua nej tsaug rau nej tej zaj lus thov Vajtswv. Kuv ua nej tsaug vim nej txhos caug thaum nej paub tias nej tsis muaj lus teb tag nrho. Nej thov Vajtswv saum ntuj ceeb tsheej kom ris Nws txiaj thiab thov Nws foom koob hmoov rau nej lub neej thiab nej tsev neeg. Kuv ua nej tsaug rau nej txoj kev pab lwm tus thiab rau tej lub sij hawm uas nej tsis tas kom lwm tus pom nej txoj kev pab ntawd.

Peb twb txais tus Tswv tej lus ceeb toom hais tias yog peb nrhiav neeg ntiaj teb tej lus qhuas txog peb txoj kev pab, tej zaum peb yuav xiam cov koob hmoov zoo dua ntais. Nej yuav nco qab cov lus no hais tias:

“Nej yuav tsum ceev faj, tsis txhob coj Vajtswv txoj kev cai kom lwm tus qhuas nej xwb. Yog nej ua li ntawd, nej Leej Txiv tus uas nyob saum ntuj ceeb tsheej yuav tsis muab nqi zog rau nej.

“Yog li ntawd, thaum nej pub ib yam dab tsi rau tej neeg txom nyem, nej tsis txhob qhia rau tus ub tus no, ib yam li cov neeg ntsej muag ncaj siab nkhaus ua nyob rau hauv tej tsev sab laj thiab ntawm tej kev tshuam kom luag qhuas lawv. Kuv qhia rau nej hais tias lawv twb tau lawv tej nqi zog lawm.

“Tiam sis thaum nej pab ib tug neeg txom nyem, nej tsis txhob pub nej sab tes laug paub hais tias nej sab tes xis ua dab tsi.

“Thaum nej pab lwm tus, nej cia li pab twj ywm xwb, nej Leej Txiv tus uas nyob saum ntuj pom tej uas nej ua twj ywm ua ntawd nws thiaj yuav muab nqi zog rau nej.”2

Cov uas coj yam ntxwv ua neeg tuav lub pov thawj hwj rau kuv tsis tau paub tias lawv coj tej cwj pwm ntawm ib tug phab ej. Muaj tseeb tiag, zoo li nyuaj rau lawv pom tej yam uas kuv qhuas txog lawv. Kuv twb hais tias kuv txiv yog ib tug thawj tswj hwm ntawm ib ceg ntseeg me me ntawm lub Koom Txoos nyob hauv New Jersey. Tom qab ntawd nws yog ib tug hauv Hnub Caiv Kev Kawm Vaj Lug Kub cov tuam thawj rau lub Koom Txoos. Tiam sis kuv tseem tsis tshua hais ntau txog nws txoj hauj lwm pov thawj hwj, vim nws tsis tau hais txog nws tus kheej.

Qhov no kuj muaj tseeb rau tus tub rog uas yog kuv tus phab ej. Nws tsis tau hais lus rau kuv txog nws txoj hauj lwm pov thawj hwj los yog tej yam nws tau ua. Nws pab lwm tus xwb. Kuv tau kawm txog nws txoj kev rau siab ntseeg los ntawm lwm tus. Kuv tsis paub yog tias nws pom tej yam uas kuv nyiam ntawm nws tus kheej.

Yog li ntawd rau nej cov uas xav foom koob hmoov rau lwm tus nrog nej lub pov thawj hwj kuv ntuas nej kom ua tej yam hauv nej lub neej uas Vajtswv pom xwb.

Cia li thov Nws. Ua Nws tsaug rau txhua yam uas zoo nyob hauv nej lub neej. Thov kom nej paub tias Nws tau xa leej twg rau nej pab. Thov kom Nws yuav pab nej pab tus neeg ntawd. Thov Vajtswv kom nej yuav zam txim tau nej thiaj yuav txais kev zam txim. Ces cia li pab lawv, hlub lawv, thiab zam txim rau lawv.

Qhov tseem ceeb tshaj plaws, cia li nco qab tias kev pab zoo tshaj yog kev pab neeg xaiv ua neeg tsim nyog tau txoj sia nyob mus ib txhis. Vajtswv tau coj peb paub siv peb lub pov thawj hwj. Nws yog tus yam ntxwv zoo tag nrho. Nov yog tus yam ntxwv uas peb pom me ntsis xwb ntawm Nws cov tub qhe zoo tshaj plaws:

Thiab tus Tswv Vajtswv hais lus rau Mauxes hais tias tej ntuj, yeej ntau, thiab neeg tsis muaj peev xwm suav tej ntawd tas; tiam sis tus Tswv yeej suav tej ntawd, vim tej ntawd yog Nws li.

Thiab thaum ib lub ntiaj teb, thiab tej ntuj saud dhau mus ces twb muaj ib lub ntxiv yuav los; thiab tsis muaj qhov kawg rau Nws tej hauj lwm, thiab rau Nws tej lus.

Vim saib seb, qhov no yog Nws txoj hauj lwm thiab Nws lub yeeb koob—ua kom tib neeg tsis txawj tuag thiab tau txoj sia nyob mus ib txhis.3

Peb yuav tsum pab ua txoj hauj lwm no. Peb txhua tus pab tau. Vajtswv tau npaj peb los rau lub caij nyoog kawg ntawm txoj hauj lwm dawb ceev ntawd. Peb txhua tus tau koob hmoov vim peb muaj neeg uas tau coj yam ntxwv rau peb siv lawv lub sij hawm nyob hauv lub ntiaj teb no ua lub hom phiaj ntawd.

Kuv thov kom peb yuav sib pab kom ua raws li qhov cib fim ntawd.

Vajtswv Leej Txiv muaj txoj sia thiab yuav teb nej tej lus thov pab kom nej ua hauj lwm rau Nws zoo. Yexus Khetos yog tug Tswv uas sawv rov los. Nov yog Nws lub Koom Txoos. Lub pov thawj hwj uas nej tuav yog lub hwj chim ua tej yam los ntawm Nws lub npe ua Nws txoj hauj lwm pab Vajtswv cov me nyuam. Thaum nej tso siab plhuav ua txoj hauj lwm no, nws yuav txhawb nqa nej. Kuv cog lus li no los ntawm Yexus Khetos lub npe, peb tus Cawm Seej, amees.