Tus Yaj Saub Yauxej Xamiv

Ib tug tub hluas nyeem phau Npaiv Npaum, thiab nws xav txog ib nqe vaj lug kub. Yog ib lub sij hawm uas yuav hloov lub ntiaj teb.

Nws xav paub lub koom txoos twg yuav coj nws rau qhov tseeb thiab kev cawm seej. Nws twb tau sim txhua yam lawm, thiab nim no nws nyeem phau Npaiv Npaum thiab nyeem tej lus no: “Yog nej leej twg tsis muaj tswv yim, kom nws cia li thov ntawm Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau sawv daws, nws tsis khuv xim li.”¹

Nws pheej xav txog nqe ntawd. Qhov kaj twb pib txeem rau hauv kev tsaus ntuj. Nqe no puas yog txoj kev tawm ntawm kev tsaus ntuj thiab kev tsis paub tseeb? Puas yooj yim npaum li no? Thov Vajtswv thiab Nws yuav teb los? Thaum kawg nws txiav tsim siab tias nws yuav tsum thov Vajtswv los yog nyob hauv kev tsaus ntuj mus ib txhis.

Txawm nws xav mus thov los, nws tsis lam khiav mus rau hauv ib qho chaw ntsiag to thiab thov Vajtswv sai sai. Nws muaj 14 xyoos xwb, tiam sis txawm nws xav paub tam sim no, nws tsis nrawm mus thov dog dig xwb. Zaum no tsis yog kev lam thov Vajtswv xwb. Nws txiav txim siab tias nws yuav mus qhov twg thiab yuav ua thaum twg. Nws npaj siab nrog Vajtswv sib txuas lus.

Ces twb txog hnub ntawd. Yog ib tag kis sawv ntxov zoo nkauj kawg nkaus, tshav ntuj nrig, nyob lub caij nplooj ntoo hlav thaum ntxov hauv xyoo 1820.² Nws mus nws ib leeg mus rau hauv hav zoov ntsiag to uas nyob ze saib cov ntoo siab siab. Nws mus txog qhov chaw uas nws twb teem tseg lawm. Nws txhos caug thiab pib thov qhia tej yam uas nws lub siab xav.

Nws piav hais tias muaj li cas tom qab ntawd, hais tias:

“Kuv txawm pom ib qho kaj nyob kiag saum kuv taub hau, ci ntsa iab tshaj lub hnub, qhov kaj nqi zuj zus txog thaum nws nyob ntawm kuv.

“… Thaum qhov kaj txog ntawm kuv, kuv tau pom ob tug Neeg, uas ci ntsa iab thiab muaj yeeb koob uas kuv tsis paub piav txog, nkawd nyob saum ib nta ntuj. Ib tug hais lus rau kuv, tuav kuv lub npe thiab taw tes rau tus ntawd, ces tau hais tias—[Yauxej,] Nov yog Kuv tus Tub uas Kuv Hlub. Cia li mloog Nws lus!”³

24 xyoos tom qab ntawd, Yauxej Xamiv thiab nws tus tij laug Hyrum raug tua tuag vim qhov no tau tshwm sim.

Yauxej hais tias thaum nws muaj 17 xyoo, ib tug tim tswv qhia nws tias neeg yuav muab nws lub npe mus rau qhov zoo thiab qhov phem nyob hauv txhua haiv neeg.⁴ Niaj hnub no tseem muaj raws li tau qhia yuav muaj los thaum Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tau ri niab mus thoob plaws lub ntiaj teb.

Kev fab ntxeev, kev thuam, thiab kev tawm tsam yeej nyob nrog nraim qhov tseeb. Thaum twg Vajtswv muab qhov tseeb txog tib neeg lub hom phiaj thiab lub neej tom ntej tshwm sim, yeej muaj cov uas tawm tsam qhov tseeb ntawd. Txij thaum Adas thiab Evas nyob hauv lub Vaj Edees, mus txog thaum Yexus Khetos ua hauj lwm qhuab qhia, thiab los txog peb lub caij nyoog, yeej yuav muaj neeg uas sib zog ntxias, tab kaum, thiab tawm tsam Vajtswv txoj hau kev.

Cia li nrhiav cov cua uas muaj hmoov av loj tshaj plaws nyob saum cov av uas tib neeg ncaws rau tus uas lawv tawm tsam, xyeej, ntaus, tso tseg, thiab muab ntsia saum ntoo khaub lig, tus uas tau nqi mus tshaj txhua yam, thiab nyob ntawd nej yuav nrhiav tau qhov tseeb, Vajtswv Leej Tub, tus Cawm Seej ntawm tib neeg tag nrho. Vim li cas lawv tsis cia Nws nyob Nws?

Vim li cas? Vim Nws yog qhov tseeb, thiab yeej yuav muaj cov uas tawm tsam qhov tseeb.

Ces cia li nrhiav tus uas tau muab ib zaj lus tim khawv ntxiv txog Yexus Khetos thiab lwm cov vaj lug kub los, nrhiav tau tus uas yog ib lub cuab yeej uas Vajtswv siv kom muab txoj moo zoo thiab Yexus Khetos lub Koom Txoos txum tim rov qab los rau hauv lub ntiaj teb, nrhiav tau tus ntawd thiab npaj pom cov hmoov av ya mus. Vim li cas lawv tsis cia Nws nyob Nws?

Vim li cas? Vim Nws yog qhov tseeb, thiab yeej yuav muaj cov uas tawm tsam qhov tseeb.

Tej kev tshwm sim uas tau muab rau Yauxej Xamiv ua tim khawv hais tias nws yog Vajtswv ib tug yaj saub. Cia peb saib ib txhia ntawm qhov kaj thiab qhov tseeb uas tau muab tshwm sim dhau los ntawm nws, tej uas ci ntsa iab kom pom txawv ntawm tej kev ntseeg hauv nws lub caij nyoog thiab peb lub caij nyoog:

• Vajtswv yog ib tug neeg tsa nto, ib Leej Txiv uas Nyob Mus Ib Txhis. Nws yog peb Leej Txiv.

• Vajtswv Leej Txiv, Yexus Khetos, thiab tus Vaj Ntsuj Plig Dawb Huv yog peb leeg uas nyias muaj nyias tus.⁵

• Nej tsis yog neeg xwb. Nej yog me nyuam ntawm Vajtswv Leej Txiv Nyob Mus Ib Txhis thiab muaj peev xwm rais los ua neeg zoo li Nws⁶ yog tias nej yuav ntseeg Nws Leej Tub, hloov siab lees txim, txais cov kab ke, txais tus Vaj Ntsuj Plig Dawb Huv, thiab nyiaj kom mus txog thaum kawg.⁷

• Yexus Khetos lub Koom Txoos niaj hnub no yeej zoo ib yam li lub Koom Txoos uas Nws muab txhim tsa thaum Nws ua hauj lwm qhuab qhia nyob hauv lub ntiaj teb, nrog cov yaj saub thiab cov thwj tim, lub Pov Thawj Hwj Mekixedes thiab Levis, txwj laug, cov pov thawj hlob, dikas, xib hwb, npisov, thiab cov xya caum.

• Vajtswv tsis tau pub kom muaj txoj cai pov thawj hwj hauv lub ntiaj teb tom qab tus Cawm Seej thiab Nws cov Thwj Tim tuag thiab tau muab txum tim rov qab los hauv peb lub caij nyoog.

• Kev tshwm sim tsis tau tas, thiab lub ntuj ceeb tsheej tsis tau kaw. Vajtswv hais lus rau cov yaj saub niaj hnub no, thiab Nws yuav hais lus rau peb ib yam li ntawd thiab.⁸

• Muaj ntxiv tom qab lub neej no tsis yog muaj ntuj ceeb tsheej thiab ntuj txiag teb tsaus xwb. Muaj tej theem yeeb koob, thiab tej yam peb ua hauv lub neej no muaj nqi heev.⁹

• Tsis tsim nyog uas peb lam ntseeg Khetos xwb es peb yuav tsum saib ntsoov Nws nrog txhua txoj kev xav,¹⁰ ua txhua yam uas peb ua los ntawm Leej Tub lub npe,¹¹ nco ntsoov nws thiab ua raws li nws cov lus txib … kom peb yuav muaj nws tus Ntsuj Plig nrog peb nyob.¹²

• Cov neeg coob uas ua neej nyob thiab tuag ua ntej lawm kawm txog txoj moo zoo thiab txais cov kab ke uas yuav tsum txais kom tau txoj kev cawm seej lawv tsis tau poob. Dhau los ntawm Yexus Khetos txoj Kev Theej Txhoj, tag nrho cov noob neej yuav “dim, thaum lawv ua raws li tej kev cai thiab kab ke ntawm Txoj Moo Zoo,”¹³ uas ua rau cov ciaj thiab cov tuag.¹⁴

• Txhua yam tsis tau pib thaum nej yug los. Nej twb ua neej nyob nrog Vajtswv ua Nws cov tub thiab cov ntxhais thiab tau npaj kom los ua neej hauv lub ntiaj teb no.¹⁵

• Kev sib yuav thiab kev muaj tsev neeg tsis yog tej yam uas tib neeg ua mus txog thaum tuag xwb. Tej no yuav nyob mus ib txhis thaum peb khi lus nrog Vajtswv. Tsev neeg yog qhov uas txhim tsa saum ntuj ceeb tsheej.¹⁶

Thiab tej no yog ib feem ntawm tej kev tshwm sim uas twb nthuav tawm rau Yauxej Xamiv. Tej no tau los ntawm qhov twg los, tej kev tshwm sim uas cia ntsa iab rau kev tsaus ntuj, qhia meej rau cov uas ua xyam xyav, thiab tau tshoov tib neeg coob lub siab, foom koob hmoov rau lawv, thiab ua kom lawv ua neeg zoo dua? Qhov twg yog qhov tseeb, nws lam tau lam tsim tag nrho tej no los sis Vajtswv tau pab nws? Cov vaj lug kub uas nws muab rau peb puas zoo li tib neeg tej lus los yog Vajtswv tej lus?

Tsis muaj leej twg uas tsis paub txog tej uas Yauxej Xamiv ua, tiam sis ib txhia tsis paub nws tau ua tej ntawd li cas thiab vim li cas. Thiab muaj ob peb yam xwb uas qhia vim li cas. Nws yog ib tug uas ua txuj ua tej ntawd los yog nws yog ib tug yaj saub. Nws tau ua nws tus kheej xwb, los yog Vajtswv tau pab nws. Saib cov puav pheej, tiam sis tag nrho cov puav pheej, tag nrho nws lub neej, tsis yog ib qho xwb. Qhov tseem ceeb, ua li Yauxej tau ua thaum nws hluas thiab “thov … Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau [nej], nws tsis khuv xim li.”¹⁷ Txoj kev no tsis yog yuav pab nej kawm txog qhov tseeb ntawm Phau Ntawv Maumoos thiab Yauxej Xamiv, tiam sis yog txoj kev kom paub qhov tseeb ntawm txhua yam.¹⁸

Yauxej Xamiv yog Vajtswv ib tug yaj saub, zoo ib yam li Thomas S. Monson yog ib tug yaj saub niaj hnub no. Dhau los ntawm Yauxej Xamiv, cov yuam sij ntawm Vajtswv lub nceeg vaj rov qab muab rau tib neeg nyob hauv lub ntiaj teb, thiab txoj moo zoo yuav dov mus ib yam li lub pob zeb uas raug muab txam tawm saum lub roob los uas tsis yog neeg txam … , es yuav dov mus, kom txog thaum lub pob zeb no puv tag nrho lub ntiaj teb.¹⁹

Vajtswv yog peb Leej Txiv Saum Ntuj Ceeb Tsheej, thiab Yexus yog tus Khetos. Peb teev tiam Nkawd. Tsis muaj ib yam dab tsi uas piv rau tej yam uas Nkawd tau tsim, txoj kev cawm seej thiab kev txi theej txhoj ntawm Vajtswv tus Me Nyuam Yaj. Nyob hauv lub caij nyoog no, peb ua raws li Leej Txiv txoj Hau Kev thiab txais yuav txoj Kev Theej Txhoj tsuas yog peb ua raws li cov kev cai thiab cov kab ke ntawm txoj Moo Zoo, uas tau muab txum tim rov qab los dhau los ntawm Yauxej Xamiv. Kuv ua tim khawv txog Nkawd—Vajtswv Leej Txiv Saum Ntuj Ceeb Tsheej thiab Yexus Khetos, tus Cawm Seej ntawm lub ntiaj teb. Kuv ua tim khawv li no los ntawm Yexus Khetos lub npe, amees.