Li profeet José Smith

Jun li saaj winq kiril xsa’ li Santil Hu ut xsa’ li ru kikana sa’ jun xcchaq’al ru li raqal sa’ li Loq’laj Hu; li hoonal a’an kixjal li ruuchich’och’.

Jwal naraj xnawb’al b’arwan li iglees taak’amo’q re sa’ li yaal ut sa’ li kolb’a’ib’. Ak ki aatinak rik’ineb’ chixjunil, ut anajwan xsik’ sa’ li Satil Hu ut kiril li aatin a’in: “Wi’ wan junaq eere yo chi majelo’k xna’leb’, chixtz’aamaq re li Dios, ut taak’ehe’q re, xb’aan naq li Dios nak’ehok chi anchal xch’ool ut chi chaab’il reheb’ chixjunileb’”¹.

Kixtz’il rix naab’aal sut, ut lixb’een li saqen ki’k’utum chaq sa’ li q’ojyin. Ma’a’an lixsumenkil? Ma’a’an li li relik sa’ li sachk ut li q’ojyin? Manaru naq kama’an, ka’jwi’ xpatz’b’al re li Dios ut a’an tixsume? Tojo’ naq kixye naq tix patz’ re li Dios malaj taakanaaq sa’ li q’ojyin ut li sachk.

Ab’anan, wantanaq jwal kiraj ru, moko xko’ota sa’ junaq li laatz’ ut kitijok sa’ junpaat. Ka’jwi’ kaalaju chihab’ wanre, ab’an sa’ li rajb’al xnawb’al, moko kixseeb’ata rib’. Li tij a’an moko yalaq tij ta chijo’kan; Kixk’o’xla b’ar taaxik ut joq’e tix b’aanu ut kixkawres rib’ re aatinak rik’in li Dios.

Jok’an ut kihulak li kutan, q’ela sa’ jun li kutan xchaq’al ru ut yamyo, sa’ xtiklajik xjalajik li kutan re 1820². Kib’eek xjunes sa’ xyanq li k’iche’ rub’eleb’ li che’ li wankeb’ sa’ xb’een. Kihulak sa’ li na’jej kixsik’ ru, kiwiq’la ut kixye li rajom li raam chiru li Dios.

Re xseeraq’inkil li kik’ul’liik chirix, a’an naxye:

“…kiwil jun xaqal li saqen, tz’aqal chixb’een injolom, li naxq’ax xlemtz’unkil ru li saq’e, li kikub’e chi timil timil toj reetal naq kikana sa’ inb’een.

“…Naq kihilan sa’ inb’een li saqen, kiwil wiib’ chi Winq, li ink’a’ naru chi yeemank chanru xlemtz’unkileb’ ru ut xloq’aleb’, xaqxookeb’ chi kutankil sa’ inb’een. Jun reheb’ kinraatina, kixpatz’ ink’ab’a’, ut kixye, rik’in xk’utb’al chi ruq’ li jun chik: [José], A’in li Walal Raaro Inb’aan. Chawab’i a’an!³.

Yal obb’ xkaak’aal chihab’ chik chirix a’an, laj José Smith ut li riitz’in laj Hyrum ke’kam xb’aan li k’aru xtikla sa’ li hoonal a’an.

Laj José kixye naq wan chaq wuqlaju chihab’ re, jun li angel kixye re naq “sa’ chixjunil li ruuchich’och’… taa oksimanq lix k’ab’a’ chi us ut chi ink’a’ us… sa’ chixjunil li tenamit”⁴. Li profeetil aatin a’an yoo chi il’liik anajwan naq yoo chi k’iik Lix Iglees li Jesukristo Reheb’ laj Santil Paab’anel sa’ Roso’jikeb’ li Kutan sa’ chixjunil li ruuchich’och’.

Li ka’pak’alil, li wech’ok ut yalyehink narochb’eeni li yaal. Junelik naq taa k’utb’esimanq li yaal chirix lixk’anjel ut b’ar taaxik li winq, taawanq jun li metz’ew li taa ka’pak’alinq ru. Natikla chaq rik’in laj Adan ut xEva sa’ li Jardin re Eden, chirix a’an lix k’anjel li Kristo sa’ ruuchich’och’, ut toj anajwan, junelik te’xk’e xch’ool chirix li tik’ti’, juk’ink, ka’pak’alink ut xpo’b’al li k’uub’anb’il na’leb re li yu’am.

Sik’omaq li kristian li ani kix’kul li taaqeek chi maak’a’ rajb’al: Li ani ki ob’e’, ki tz’eqtaanaak, ki sak’e’, kanab’anb’il xjunes ut ki kamsiik chiru li kruz; Li ani kixkub’si rib’ rub’el chixjunil ut aran ke’ xtaw li yaal, li Ralal li Dios, laj Kolol re li winqilal. K’aawut naq ink’a’ xe’ xkanab’ sa’ xyaalal?

K’aawut? Xb’aan naq a’an li yaal ut junelik taawank li ka’pak’alil chiru li yaal.

Chirix a’an, sik’omaq junaq li ki’ isin re chi kutankil junchik ch’olob’anb’il esi chirix li Jesukristo ut wan chik li Loq’laj Hu; sik’omaq junaq li ani kik’anjelak re xk’ojob’ankil wi’chik li xtz’aqalil li Evangelio ut lix Iglees li Jesukristo sa’ xb’een li ruuchi’ch’och’; sik’omaq ut teetaaw li wech’ink. K’aawut naq ink’a’ te’ xkanab’ sa’ xyaalal?

K’aawut? Xb’aan naq a’an kixk’ut li yaal ut junelik taawank li ka’pak’alil chiru li yaal.

Li k’utb’esinb’il na’leb’ kik’e’ re laj José Smith naxch’olob’ naq a’an jun xprofeet li Dios. Qilaq junjunqaq reheb’ a’an, qilaq li saqen ut li yaal kik’utb’esiik chiru a’an li na lemtz’um sa’ xchaq’alil ru chiru li paab’aal sa’eb’ lix kutankil jo’ajwi’ anajwan.

• Li Dios jun ajwi’ ut taqsinb’il xloq’al, jun Junelik Yuwa’b’ej; A’an li qa Yuwa’.

• Dios Yuwa’b’ej, Jesukristo ut li Santil Musiq’ej jalanq jalanqeb’⁵.

• Laa’ex ninqeeru, laa’ex ralal li Dios, li Junelik Yuwa’b’ej, ut naru nekex hulak jo’ a’an⁶ wi’ wan le paab’aal chirix li Ralal, neke jal eek’a’uxl, nekek’ul li k’ojob’anb’il k’anjel, neke k’ul li Santil Musiq’ej ut kuyuk toj sa’ xraqik⁷.

• Lix Iglees li Jesukristo sa’ li kutan anajwan chanchan ajwi’ li Iglees kixk’uub’ ru a’an sa’ lix k’anjel sa’ ruuchich’och’, rik’in profeet ut apóstoles, li tijonelil re Melquisedek ut levitico, xb’eenileb’, xch’uuteb’ li taqenaqil aj tij, aj tenq’anel, aj tzolonel, obiisp ut setentas; jo’ chanru naxye sa’ li Santil Hu.

• Li wankilal re li tijonelil ki’isiik sa’ li ruuchich’och’ chirix lix kamik li Kolonel uteb’ lix apóstoles ut kik’ojob’aak wi’chik sa’ li qa kutankil.

• Li k’utb’esinb’il na’leb’ ink’a’ na’oso’ ut li chixa toj teeto; li Dios na’aatinak rik’ineb’ li profeet anajwan ut tex raatina laa’ex ut laa’in ajwi’⁸.

• Wan k’aru nachal chirix li yu’am a’in moko ka’jwi’ ta li choxa ut lixb’alb’a; wan xtasalil li loq’alil, ut li k’aru taaqa b’aanu sa’ li yu’am a’in aajel ru⁹.

• Chirix naq naqapaab’ li Kristo, tento aj raj wi’ naq taaqa “[taqsi] rik’in [A’an] chixjunil li qa k’a’uxleb’aal” ¹⁰ “[xb’aanunkilj] chixjunil li [taaqab’aanu] sa’ xk’ab’a’ li Alalb’ej”¹¹, “xjultikankil junelik, ut… xpaab’ankil lix taqlahom… re naq junelik [taaruhanq] chiwank lix musiq’ [qik’in]”¹².

• Li naab’al mil millón li neke’ wan ut neke’ kam chirix li Evangelio ut chirix li k’ojob’anb’il k’anjel aajel ru re li kolb’a’ib’ moko akxe’ sachta. Rik’in lixtojb’al rix li maaj kixb’aanu li Kristo, “[naru] neke’ kole’, rik’in ab’ink chiru li chaq’rab’ ut k’ojob’anb’il k’anjel re li Evangelio”¹³ b’eeresinb’il choq’ reheb’ li yo’yo jo’ ajwi’ reheb’ li kamenaq¹⁴.

• Moko xtikaljik ta li yo’laak; laa’ex ak xex wan chaq rik’in li Dios jo’ xteelom ut rixqa’l ut xekawres chaq eerib’ choq’ re li yu’am a’in¹⁵.

• Li sumlaak ut li junkab’al moko xyoob’ahom ta li winq re naq li kamk taajacho’q qe. Ki k’ojob’aak re naq taawan chi junelik rik’in li sumwank nab’aanuman rik’in li Dios. Li junkab’al a’an xtusulal ru li choxa¹⁶.

A’an xkomon li naab’al chi k’utb’esinb’il na’leb’ kik’e’ re laj José Smith. B’ar kichal chaq li k’utb’esinb’il na’leb’ a’in li naxk’am chaq saqen sa’ li q’ojyin, saqen sa’ li wiib’ank ch’oolej, ut li ak ki tenq’an reheb’ naab’al millón chi kristiaan? K’aru naqa k’oxla, ma a’an kiyoob’an re chixjunil xjunes malaj kixk’ul xtenq’ankil sa’ li choxa? Eb’ li Loq’laj Hu kirisi chi kutankil ma chanchan raatin li winq malaj aatin nachal rik’in li Dios?

Maak’a’ xtz’ilb’al rix li k’aru kixb’aanu laj José Smith, ka’jwi’ chanru naq kixb’aanu ut k’aawut. Ut maak’a’ xna’aj k’a’aq chik reeru; Malaj aj tik’ti’ malaj a’an jun profeet; malaj xb’aanu li k’aru xb’aanu xjunes malaj kixk’ul xtenq re li choxa. Ilomak lix kanab’, ab’an ilomak chixjunil lix kanab’, chixjunil lix yu’am, moko b’ab’ay ajtawi’. Jwal aajel ru chi’us, b’aanumaq lix b’aanu li saaj aj José: “[patz’omaq] re li Dios, ut taak’ehe’q re, xb’aan naq li Dios [nak’ehok] chi anchal xch’ool ut chi chaab’il reheb’ chixjunileb’”¹⁷. Moko ka’jwi’ ta chikama’an naru nanawliik li yaal chirix lix Hu Laj Mormon ut laj José Smith; a’an b’an lix tusulal ru re xnawb’al li yaal chirix chixjunil li k’a’aqreeru¹⁸.

Laj José Smith a’an jun xprofeet li Dios, jo’ajwi’ laj Thomas S. Monson anajwan. Xb’aan laj José Smith li laaw re li awa’b’ejihom junsut wi’chik “kiq’axtesiman re li winq sa’ ruuchich’och’, ut aran taa b’eeq li evangelio… jo’ li pek yok’b’il sa’ li pim, moko chi uq’ej ta… tojo’ re naq tixnujab’res li ruuchich’och’”¹⁹.

Li Dios a’an qa Junelik Yuwa’ ut li Jesus a’an li Kristo; A’aneb’ naqa loq’oni. Maak’a xjuntaq’eetinkil lix yoob’tesihomeb’, li K’uub’anb’il na’leb’ re li Kolb’a’ib’ ut lix mayej lix Carneer li Dios. Sa’ li k’ojlajik a’in, nokoo k’anjelak sa’ lix k’uub’an’bil na’leb’ li Yuwa’b’ej ut nokoo tz’aqon sa’ li tojb’a maak kixb’aanu li Jesukristo ka’jwi’ rik’in ab’ink chiru li chaq’rab’ ut k’ojob’anb’il k’anjel re li Evangelio li ki k’ojob’aak wi’chik xb’aan laj José Smith. Ninch’olob’ xyaalal li: Dios li Junelik Yuwa’b’ej ut li Jesukristo, laj Kolonel re li ruuchich’och’; ut ninb’aanu sa’ xk’ab’a’ li Jesukristo. Amen.