Yexus Khetos txoj Kev Sawv Rov Los

Yexus cov thwj tim poob siab heev thaum Yexus raug txom nyem thiab tuag saum tus ntoo khaub lig thiab lawv muab Nws lub cev tso rau hauv lub ntxa. Txawm tus Cawm Seej hais txog Nws txoj kev tuag thiab kev sawv rov los tom qab ntawd, lawv tsis nkag siab hais tias tom qab kev tsaus ntuj ntawm Nws txoj Kev Raug Ntsia Saum Ntoo Khaub Lig, yuav muaj kev tshav ntuj ntawm Nws txoj Kev Sawv Rov Los. Tiam sis muaj kev xyiv fab ntawd tsuas yog thaum cov thwj tim tau pom Nws txoj Kev Sawv Rov Los, vim txawm cov tim tswv tshaj tawm tias Nws tau sawv rov los, lawv tsis nkag siab tag nrho—vim yog ib qho uas tsis tau muaj thaum yav tas los.

Maivliag Madalas thiab ob peb tug poj niam uas rau siab ntseeg tau tuaj ntxov rau tus Cawm Seej lub ntxa thaum Hnub Sunday sawv ntxov; lawv nqa cov tshuaj kom pleev rau tus Tswv lub cev vim lawv muab tus Tswv lub cev tso hauv lub ntxa sai sai ua ntej yuav txog Hnub Caiv. Thaum sawv ntxov tshwj xeeb no, lub ntxa twb qhib lawm, lub pob zeb uas npog lub ntxa twb raug dov mus lawm thiab ob tug tim tswv tshaj tawm tias:

“Vim li cas nej nrhiav tus neeg ciaj ntawm cov neeg tuag no?

“Nws tsis nyob ntawm no; nws twb sawv lawm. Nej nco ntsoov tej lus uas nws hais rau nej, thaum nej tseem nyob pem lub xeev Kalilais,

“Hais tias, yeej yuav muaj neeg ntes Neeg Leej Tub coj mus rau cov neeg txhaum, muab nws ntsia rau saum ntoo khaub lig thiab peb hnub tom qab, nws yuav sawv rov los.”¹

“Neb cia li los saib qhov chaw uas luag tso nws lub cev.

“Neb cia li rov mus qhia rau nws cov thwj tim hais tias, nws twb sawv hauv qhov tuag rov los lawm.”²

Raws li cov tim tswv hais, Maivliag Madalas saib hauv lub ntxa, tiam sis zoo nkaus li nws tsuas xav txog qhov uas tus Tswv lub cev tsis nyob ntawd xwb. Nws khiav mus qhia cov Thwj Tim, thiab thaum nws nrhiav tau Petus thiab Yauhas nws hais rau nkawd hais tias, “Lawv twb muab tus Tswv nqa tawm hauv qhov ntxa lawm, peb tsis paub xyov lawv coj nws mus tso qhov twg lawm.”³ Petus thiab Yauhas khiav mus thiab pom tseeb hais tias lub ntxa twb tsis muaj leej twg nyob hauv, nkawd tsuas pom “daim ntaub mag uas qhwv Yexus … thiab daim ntaub uas qhwv Yexus taub hau.”⁴ Yauhas yog thawj tus uas to taub hais tias Yexus tau sawv rov los lawm. Nws sau hais tias, “nws tau pom tej ntawd thiab ntseeg,” tiam sis mus txog thaum ntawd cov Thwj Tim, “tsis tau to taub vaj lug kub, uas hais tias [Yexus] yuav sawv rov los.”⁵

Petus thiab Yauhas tau mus, tiam sis Maivliag nyob vim nws tseem tu siab. Thaum ntawd ob tug tim tswv twb rov qab los thiab nug nws hais tias, “Me ntxhais, ua li cas koj quaj? Maivliag teb nkawd hais tias, Xyov lawv coj kuv tus Tswv mus tso rau qhov twg lawm, kuv tsis paub li.⁶ Thaum ntawd tus Cawm Seej uas tau sawv rov los lawm sawv ntawm nws ib sab thiab hais tias, “Me ntxhais, ua li cas koj quaj? Koj nrhiav leej twg? Maivliag xav hais tias Yexus yog tus txiv neej uas tu lub vaj ntawd, nws thiaj hais tias, Tus Tswv, yog koj muab nws mus tso rau qhov twg lawm, thov koj qhia rau kuv; kuv yuav mus nqa nws rov qab los.”⁷

Txwj Laug James E. Talmage sau hais tias, “Nws hais lus rau Yexus, nws tus Tswv, txawm Maivliag tsis paub yog Nws. Ib lo lus los ntawm Yexus lub qhov ncauj tau ua rau nws txoj kev tu siab hloov ua kev xyiv fab heev. ‘Yexus hais rau nws tias, Maivliag.’ Nws lub suab hais lus mos mos uas Maivliag tau hnov thaum yav tas los tau txhawb nqa nws kom nws tsis poob siab. Nws tig mus, thiab pom tus Tswv. Nws xyiv fab thiab ncav tes xav khawm Yexus, thiab nws hais ib lo lus teev tiam Yexus hais tias, ‘Lanpaunis’ uas txhais hais tias kuv tus Xib Hwb.”⁸

Yog li ntawd, tus poj niam uas tau koob hmoov yog thawj tus neeg hauv lub ntiaj teb uas tau pom thiab hais lus rau tus Khetos uas sawv rov los. Tom qab ntawd thaum tib hnub ntawd Nws tau tshwm sim rau Petus nyob ze Yeluxalees;⁹ rau ob tug thwj tim thaum nkawd taug kev mus rau Ema-us;¹⁰ thiab thaum hmo ntuj, nws tshwm sim kiag rau 10 tus Thwj Tim thiab lwm tus, hais tias, “Nej cia li saib kuv ob txhais tes thiab kuv ob txhais kotaw, nej thiaj yuav paub hais tias yog kuv tiag. Nej cia li cev tes kov kuv, nej thiaj li yuav paub, rau qhov dab tsis muaj nqaij tsis muaj txha li uas nej pom kuv muaj no.”¹¹ “Lawv zoo siab kawg thiab xav tsis thoob li, tiam sis lawv tseem tsis tau ntseeg tiag”¹², yog li ntawd Nws noj cov ntse thiab zib ntab rau lawv pom xwv kom lawv yuav ntseeg.¹³ Tom qab ntawd Nws qhia lawv hais tias, “Nej yuav ua tim khawv qhia kuv zaj mus thoob plaws hauv lub nroog Yeluxalees, hauv lub xeev Yudas, hauv lub xeev Xamalis thiab mus txog qab ntuj kawg.”¹⁴

Peb tsis muaj tej zaj lus tim khawv los ntawm Yeluxalees xwb, peb kuj muaj tej zaj lus tim khawv txog tus Tswv tej hauj lwm qhuab qhia rau cov neeg nyob thaum ub nyob hauv ntiaj teb Sab Hnub Poob. Nyob hauv thaj av Huaj Vam, Nws tau nqis los saum ntuj los thiab thov cov neeg, yuav luag 2,500 tus neeg, kom los ib tug dhau ib tug mus txog thaum lawv sawv daws tau mus, muab lawv tej tes xuas qhov mob ntawm Nws sab tav thiab xuas tej qhov ntsia hlau hauv Nws tes thiab Nws taw.¹⁵

“Thiab thaum lawv tau mus tag nrho thiab tau ua tim khawv rau lawv tus kheej, lawv tau qw nrov nrov tawm ua ib ke, hais tias:

“Hauxanas! Foom koob hmoov rau Vajtswv tus uas Nyob Siab Tshaj Plaws lub npe! Thiab lawv tau vau rau ntawm Yexus ko taw, thiab tau teev tiam nws.”¹⁶

Qhov uas Khetos Sawv Rov Los qhia hais tias Nws muaj kev ywj pheej nyob mus ib txhis. “Leej Txiv yog lub hauv paus txoj sia li cas, nws tsa Leej Tub ua lub hauv paus txoj sia ib yam li ntawd.”¹⁷ Yexus hais tias:

”Leej Txiv hlub kuv rau qhov kuv txaus siab tso kuv txoj sia tseg; kuv ua li ntawd kuv thiaj tau kuv txoj sia ntawd rov qab los.

“Tsis muaj leej twg yuav txeeb tau kuv txoj sia. Kuv txaus siab tso kuv txoj sia tseg. Kuv muaj cai tso kuv txoj sia tseg, thiab kuv muaj cai muab kuv txoj sia rov qab los.”¹⁸

Tus Cawm Seej tsis ywj rau zaub mov los sis dej los yog pa los yog lwm yam khoom los yog lub hwj chim los sis lwm tus neeg kom Nws thiaj muaj sia nyob. Nws yog Yehauvas thiab tus Mexiyas, Nws yog tus Kuv Yeej Yog, tus Vajtswv uas nyob dhau los ntawm Nws lub hwj chim.¹⁹ Nws yog thiab Nws yeej yog mus ib txhis.

Dhau los ntawm Nws txoj Kev Theej Txhoj thiab Kev Sawv Rov Los, Yexus Khetos tau kov yeej txhua yam ntawm txoj Kev Poob. Kev tuag ntawm sab nqaij daim tawv yuav tsis nyob mus ib txhis, thiab kev tuag ntawm sab ntsuj plig kuj muaj qhov kawg, vim txhua tus yuav rov qab mus cuag Vajtswv, tau ib ntus, kom raug txiav txim. Peb muaj cuab kav cia siab thiab tso siab rau Nws lub hwj chim kom kov yeej txhua yam thiab muab txoj sia kav ib txhis rau peb.

“Vim muaj ib tug uas txhaum, sawv daws thiaj raug kev ploj kev tuag, thiab twb yog vim muaj ib tug sawv rov los, sawv daws thiaj yuav sawv tau ib yam li tus ntawd.

“Txhua tus puav leej raug kev ploj kev tuag, rau qhov sawv daws yog Adas roj ntsha ib yam nkaus li ntawd, txhua tus yuav sawv rov los, rau qhov sawv daws nrog Yexus Khetos koom ib txoj sia.”²⁰

Raws li Txwj Laug Neal A. Maxwell hais tias: “Khetos txoj kev kov yeej kev tuag twb ua rau tib neeg qhov teeb meem ploj mus. Nyias muaj nyias tej teeb meem thiab, thiab peb yuav dim tej no ib yam thaum peb ua raws li tej lus qhia ntawm tus uas cawm peb dim ntawm kev ploj kev tuag lawm.” ²¹

Vim nws tau them tus nqi ntawm kev txim lij, Khetos pauv kev txim lij qhov chaw; los yog peb hais tias, Nws yog kev txim lij, ib yam li Nws yog kev hlub.²² Ib yam li ntawd, Nws yog ib tug Vajtswv uas muaj kev txim lij tag nrho thiab Nws yog ib tug Vajtswv uas muaj kev hlub tshua tag nrho.²³ Yog li ntawd, tus Cawm Seej ua txhua yam raws li qhov zoo. Tej yam tsis ncaj hauv lub neej no yuav tsis nyob tas mus li, tsis hais kev tuag los yog, vim Nws ua kom peb rov muaj txoj sia. Txhua tus uas ua rau lwm tus mob, txhua tus uas ntxeev siab, los yog ua lim hiam yuav raug txim thaum kawg vim Yexus muaj kev txim lij thiab kev hlub tshua tag nrho.

Ib yam li ntawd, peb txhua tus lav ris peb lub neej, tej yam peb xaiv, tej yam peb ua, thiab peb tej kev xav. Vim Nws txhiv peb dim ntawm txoj Kev Poob, peb lub neej yog Nws li tiag tiag. Nws tshaj hais tias:

“Saib seb kuv tau muab rau nej kuv txoj moo zoo, thiab qhov no yog txoj moo zoo uas kuv tau muab rau nej—tias kuv tau los rau hauv lub ntiaj teb los ua li Leej Txiv lub siab nyiam, vim kuv Txiv tau xa kuv los.

“Thiab kuv Txiv tau xa kuv los xwv kom kuv yuav raug dai rau saum tus ntoo khaub lig; thiab tom qab uas kuv tau raug dai rau saum tus ntoo khaub lig lawm, kom kuv yuav rub tau tag nrho tej tib neeg los cuag kuv, ib yam li kuv tau raug muab dai los ntawm tib neeg tib yam li ntawd tib neeg yuav raug tsa los ntawm Leej Txiv, los sawv ntawm kuv xub ntiag, los txiav txim txog lawv tej hauj lwm.”²⁴

Cia li xav txog qhov uas Kev Sawv Rov Los tseem ceeb npaum li cas kom ua rau peb paub tias Yexus ntawm Naxales yog leej twg tiag tiag thiab kom teb tau tej lus nug ntawm lub neej no. Yog tias Yexus tau sawv rov los tiag tiag, ces peb paub tias Nws yog ib tug uas los saum ntuj los. Tsis muaj ib tug neeg uas muaj hwj chim rov qab ciaj tom qab nws tuag lawm. Vim Nws tau sawv rov los, ces Yexus tsis yog ib tug kws ntoo, ib tug xib hwb, los yog ib tug yaj saub xwb. Vim Nws sawv rov los, Yexus yog ib tug Vajtswv, twb yog Vajtswv Tib Leeg Tub.

Yog li ntawd, tej uas Nws qhia muaj tseeb; Vajtswv dag tsis tau.²⁵

Yog li ntawd, Nws yog tus uas Tsim lub ntiaj teb, ib yam li Nws tau hais.²⁶

Yog li ntawd, ntuj ceeb tsheej thiab ntuj txiag teb tsaus los muaj tiag, raws li Nws qhia.²⁷

Yog li ntawd, muaj ib lub ntuj ntsuj plig uas Nws tau mus xyuas tom qab Nws tuag.²⁸

Yog li ntawd, raws li cov tim tswv tau hais,²⁹ Nws yuav rov qab los thiab kav lub ntiaj teb.³⁰

Yog li ntawd, txhua tus yuav sawv rov los thiab raug txiav txim thaum kawg.³¹

Vim Khetos Sawv Ros Los tiag tiag, tej kev xav hais tias Vajtswv Leej Txiv tsis muaj hwj chim tag nrho, tsis paub txhua yam, thiab tsis siab zoo—tus uas muab Nws Tib Leeg Tub rau neeg ntiaj teb kom txhiv lawv dim—tej kev xav li ntawd tsis muaj nqi. Tej kev ua xyem xyav txog qhov uas lub neej no muaj nqi thiab muaj hom phiaj los tsis muaj hauv paus. Yexus Khetos twb yog tib lub npe thiab tib txoj kev uas cawm tau tib neeg. Khetos txoj kev tshav ntuj muaj tseeb, ua rau tus neeg txhaum uas hloov siab lees txim txais tau kev zam txim thiab kev ntxuav. Kev ntseeg yeej tsis yog tib neeg ua txuj los yog tej uas lawv tsim los ntawm lawv lub hlwb. Muaj tej yam tseeb uas kav ib txhis, thiab muaj tej kev cai coj ncaj ncees uas hloov tsis tau raws li Nws tau qhia.

Vim Khetos Sawv Rov Los tiag tiag, peb yuav tsum hloov siab lees txim thaum twg peb ua txhaum Nws txoj kev cai thiab cov lus txib kom sai sai. Tus Cawm Seej tej txuj ci tseem ceeb thiab Nws cov lus cog tseg rau Nws cov thwj tim hais tias lawv ua tau zoo ib yam muaj tseeb.³² Nws lub pov thawj hwj yog ib lub hwj chim uas tswj hwm txoj moo zoo thiab muaj tus yuam sij ntawm lub nceeg vaj tej txuj ci uas neeg paub tsis txog, uas twb yog tus yuam sij ntawm txoj kev paub Vajtswv. Yog li ntawd, nyob rau hauv tej kab ke ntawd, thiaj pom lub hwj chim ntawm Vajtswv tshwm sim.³³ Vim Yexus Khetos tau Sawv Rov Los tiag tiag, kev tuag tsis yog qhov kawg, thiab txawm cov cua nab yuav noj peb lub cev los, peb tseem yuav muaj nqaij daim tawv pom Vajtswv.³⁴

Thawj Tswj Hwm Thomas S. Monson qhia txog Robert Blatchford, tus uas 100 xyoo tas los “nyob hauv nws phau ntawv Vajtswv thiab Kuv tus Neeg Zej Zog, sib zog tawm tsam tej kev ntseeg txog Khetos, xws li kev ntseeg Vajtswv, Yexus Khetos, kev thov Vajtswv, thiab kev tsis txawj tuag. Nws khav hais tias, ‘Kuv twb ua pov thawj txog txhua yam tag nrho kom tsis muaj leej twg uas ntseeg Khetos yuav teb tau kuv tej lus nug los yog xyeej tau kuv, tsis hais nws muaj peev xwm npaum li cas.’ Nws txoj kev tsis ntseeg muaj zog heev. Ces txawm muaj ib qho txawv. Nws txoj kev tsis ntseeg pib ploj mus. … Nws maj mam rov qab ntseeg qhov uas nws tau thuam thiab ntxub. Vim li cas nws thiaj pauv siab li no? Yog vim nws tus poj niam tuag lawm. Nws tu siab nrho thaum nws mus pom nws tus poj niam lub cev. Nws rov qab ntsia lub ntsej muag uas nws hlub heev. Thaum tawm los, nws hais rau ib tug phooj ywg hais tias: ‘Yog nws lub cev, tiam sis tsis yog kuv tus poj niam lawm. Txhua yam twb pauv lawm. Twb tshem ib yam dab tsi uas thaum i nyob hauv nws. Nws tsis zoo li qub. Dab tsi ploj lawm yog tias tsis yog nws tus ntsuj plig?’”³⁵

Tus Tswv tau tuag thiab sawv rov los puas yog tiag? Yog mas. Cov hauv paus ntsiab cai ntawm peb txoj kev ntseeg yog zaj lus tim khawv ntawm cov Thwj Tim thiab cov Yaj Saub, txog Yexus Khetos, hais tias Nws tau tuag, tau raug muab faus, thiab tau sawv rov los hnub thib peb, thiab tau nce mus dua saum ntuj ceeb tsheej lawm; thiab tag nrho lwm yam uas hais txog peb txoj kev ntseeg ces yog kev txuas ntxiv rau qhov no xwb.³⁶

Thaum txog lub sij hawm uas Yexus yuav yug los, muaj ib txhia ntawm cov Neeg Nifais thiab cov Neeg Lamas uas ntseeg, txawm ntau tus tsis ntseeg. Thaum kawg, ib lub cim txog Nws txoj kev yug los twb tshwm sim—ib hnub thiab ib hmos thiab ib hnub ntxiv uas tsis muaj kev tsaus ntuj—thiab txhua tus twb paub.³⁷ Ib yam li ntawd niaj hnub no, ib txhia ntseeg tias Khetos tau Sawv Rov Los tiag tiag, thiab ntau tus ua xyem xyav los yog tsis ntseeg. Tiam sis ib txhia paub tseeb. Thaum kawg, txhua tus yuav pom thiab sawv daws yuav paub; vim txhua lub hauv caug yuav txhos, thiab txhua tus nplaig yuav lees rau nws.³⁸

Txij no mus txog thaum ntawd, kuv ntseeg cov uas tau pom tus Cawm Seej Sawv Rov Los, cov uas lawv tej zaj lus tim khawv nyob hauv Phau Tshiab—Petus thiab nws cov khub los ntawm Pawg Kaum Ob tug Thwj Tim thiab Maivliag los ntawm Mankadas uas dawb huv, thiab ntxiv. Kuv ntseeg tej zaj lus tim khawv nyob hauv Phau Ntawv Maumoos—Nifais tus Thwj Tim nrog cov uas tsis muaj npe ntawm thaj teb Bountiful, thiab ntxiv. Thiab kuv ntseeg Yauxej Xamiv thiab Sidney Rigdon zaj lus tim khawv, tom qab tag nrho ntau zaj lus tim khawv uas tau tshaj tawm hauv lub caij nyoog kawg no hais tias nws muaj txoj sia nyob! Vim nkawd tau pom nws.³⁹ Kuv ua tim khawv rau Nws lub qhov muag uas ntsia txhua yam pom hais tias Yexus ntawm Naxales yog tus Txhiv Dim uas tau sawv rov los, thiab kuv ua tim khawv txog txhua yam uas muaj los ntawm qhov tseeb ntawm Nws txoj Kev sawv rov los. Thov kom nej yuav paub thiab txais kev nplij siab los ntawm qhov tim khawv no ib yam, kuv thov los ntawm Yexus Khetos lub npe, amees.