ដំណើររស់ឡើងវិញរបស់ព្រះយេស៊ូវគ្រីស្ទ
ដោយ អែលឌើរ ឌី ថត គ្រីស្តូហ្វឺសិន
ក្នុងកូរ៉ុមនៃពួកសាវកដប់ពីរនាក់
ព្រះយេស៊ូវនៃណាសារ៉ែត គឺជាព្រះប្រោសលោះដែលបានមានព្រះជន្មរស់ឡើងវិញ ហើយខ្ញុំសូមថ្លែងទីបន្ទាល់ពីអ្វីគ្រប់យ៉ាងដែលជាលទ្ធផលនៃដំណើររស់ឡើងវិញរបស់ទ្រង់។
អារម្មណ៍ខ្ទេចខ្ទាំនៃការបរាជ័យ និង អស់សង្ឃឹមបានហ៊ុមព័ទ្ធពួកសិស្សទ្រង់ កាលទ្រង់បានឈឺចាប់ ហើយសុគតលើឈើឆ្កាង ហើយព្រះសពទ្រង់ ត្រូវបានតម្កល់ដោយអស់វិញ្ញាណនៅក្នុងព្រះផ្នូរ ។ ទោះជាទ្រង់បានរំឭកម្ដងហើយម្ដងទៀតពីការសុគតរបស់ទ្រង់ និង ដំណើររស់ឡើងម្ដងទៀតយ៉ាងណាក្ដី ក៏ពួកគេពុំយល់ដែរ ។ ទោះជាយ៉ាងណាក៏ដោយ ក្រោយពីរសៀលដ៏ខ្មៅងងឹតនៃការឆ្កាងទ្រង់នោះ មានព្រលឹមដ៏ស្រស់បំព្រងនៃដំណើររស់ឡើងវិញ បានលេចឡើង ។ ប៉ុន្តែ សេចក្ដីអំណរនោះកើតឡើងតែពេលពួកសិស្សបានឃើញនឹងភ្នែកពីដំណើររស់ឡើងវិញនោះប៉ុណ្ណោះ ដ្បិត ទោះជាទេវតាប្រកាសថាទ្រង់បានរស់ឡើងវិញហើយយ៉ាងណាក្ដី — ក៏វាជារឿងដែលគិតស្មានមិនដល់ដែរ ។
ម៉ារា ម៉ាក់ដាឡា និង ស្ត្រីស្មោះត្រង់ពីរបីនាក់ បានមកឯព្រះផ្នូរព្រះអង្គសង្គ្រោះនៅព្រលឹមថ្ងៃអាទិត្យ ដោយនាំយកគ្រឿងក្រអូប និង ក្រមួន ដើម្បីបញ្ចប់ពិធីលាបប្រេងតាំង ចាប់តាំងពីព្រះសពព្រះអម្ចាស់ត្រូវបានតម្កល់ក្នុងព្រះផ្នូរ ឲ្យបានរួសរាន់ពីមុនថ្ងៃឈប់សម្រាក ។ នៅព្រលឹមដ៏ស្រស់បំព្រងជាងព្រលឹមណាៗទាំងអស់ ពួកគេបានឃើញព្រះផ្នូរបើកចំហរ ថ្មដែលដាក់បាំងព្រះផ្នូរ ត្រូវគេប្រមៀលចេញ ហើយមានទេវតាពីរអង្គប្រកាសថា ៖
« ហេតុអ្វីបានជាមករកព្រះអង្គដែលមានព្រះជន្មរស់នៅក្នុងទីខ្មោចស្លាប់ដូច្នេះ ?
« ទ្រង់មានព្រះជន្មរស់ឡើងវិញហើយ មិនគង់នៅទីនេះទេ ចូរនឹកចាំព្រះបន្ទូលដែលទ្រង់មានបន្ទូលនឹងអ្នករាល់គ្នាក្នុងកាលដែលនៅស្រុកកាលីឡេនៅឡើយ
« ថាកូនមនុស្សត្រូវគេបញ្ជូនទៅក្នុងកណ្ដាប់ដៃនៃមនុស្សមានបាបឲ្យគេឆ្កាង ហើយបីថ្ងៃក្រោយមកនឹងរស់ឡើងវិញ » ។1
« ចូរមកមើលកន្លែងដែលទ្រង់បានផ្ទំចុះ ។
« រួចទៅឲ្យឆាប់ប្រាប់ដល់ពួកសិស្សទ្រង់ថា ទ្រង់មានព្រះជន្មរស់ពីស្លាប់ឡើងវិញហើយ » ។2
ដូចទេវតាមានបន្ទូលប្រាប់ ម៉ារា ម៉ាក់ដាឡា បានចូលមើលក្នុងព្រះផ្នូរ ប៉ុន្តែ អ្វីដែលនាងបានឃើញនោះគឺថា ព្រះសពព្រះអម្ចាស់បានបាត់ពីទីនោះហើយ ។ នាងក៏រួសរាន់ទៅប្រាប់ពួកសិស្ស ហើយប្រទះនឹងពេត្រុស និង យ៉ូហាន ក៏បានប្រាប់គេថា « គេបានយកព្រះអម្ចាស់ចេញពីផ្នូរហើយ យើងខ្ញុំមិនដឹងជាគេយកទៅទុកឯណាទេ » ។3 ពេត្រុស និង យ៉ូហាន បានរត់ទៅឯព្រះផ្នូរ ដើម្បីមើលឲ្យច្បាស់ថាផ្នូរនៅទទេ នោះក៏បានឃើញថា « សំពត់ស្នប … និង កន្សែងដែលគ្របព្រះសិរទ្រង់ … បត់ដាក់នៅទីកន្លែងដោយខ្លួនវិញ » ។4 យ៉ូហាន គឺជាមនុស្សម្នាក់ដែលយល់ពីសេចក្ដីច្បាស់នៃដំណើររស់ឡើងវិញនេះ ។ លោកបានចែងថា « លោកឃើញដូច្នោះដែរ រួចក៏ជឿ » ចំណែកអ្នកដទៃវិញ « មិនទាន់យល់បទគម្ពីរនៅឡើយ ដែលថា [ ព្រះយេស៊ូវ ] ត្រូវរស់ពីស្លាប់ឡើងវិញ » ។5
ពេត្រុស និង យ៉ូហាន បានត្រឡប់ទៅផ្ទះវិញ ឯម៉ារា នាងនៅតែឈរយំពីខាងក្រៅផ្នូរ ។ គ្រានោះទេវតាបានយាងត្រឡប់មក ហើយបានសួរនាងដោយស្រទន់ថា « នាងអើយ ហេតុអ្វីបានជាយំ ? នាងឆ្លើយថា ពីព្រោះគេបានយកព្រះអម្ចាស់ខ្ញុំទៅបាត់ ហើយខ្ញុំមិនដឹងជាគេទុកទ្រង់នៅឯណាទេ » ។6 ខណៈនោះព្រះសង្គ្រោះ ដែលបានរស់ឡើងវិញ កំពុងប្រថាប់ពីក្រោយនាងបានមានបន្ទូលថា « នាងអើយ ហេតុអ្វីបានជាយំ ? នាងរកអ្នកណា ? ឯនាងក៏ស្មានថា ជាអ្នកថែច្បារ ទើបនិយាយទៅថា លោកនាយអើយ បើលោកបានយកព្រះសពចេញទៅឯណា នោះសូមប្រាប់ខ្ញុំឲ្យដឹងកន្លែងដែលបានទុកផង ខ្ញុំនឹងទៅនាំយកទៅ » ។7
អែលឌើរ ជេម អ៊ី ថាល់មេហ្គ បានចែងថា ៖ « អ្នកដែលនាងជជែកជាមួយនោះគឺជា ព្រះយេស៊ូវ ជាព្រះអម្ចាស់ដែលនាងស្រឡាញ់ ទោះជានាងពុំស្គាល់ក៏ដោយ ។ ព្រះបន្ទូលមួយម៉ាត់ចេញពីព្រះឱស្ឋរស់របស់ទ្រង់ បានប្ដូរទុក្ខព្រួយដ៏ឈឺចាប់របស់នាង ទៅជាសេចក្ដីអំណរដ៏រីករាយ ។ ‹ ព្រះយេស៊ូវមានព្រះបន្ទូលទៅនាងថា ម៉ារាអើយ › ។ ព្រះសូរសៀង សំនៀង សូរដ៏ស្រទន់ដែលនាងធ្លាប់ឮ ហើយស្រឡាញ់កាលពីមុននោះ បានធ្វើឲ្យនាងមានសង្ឃឹមឡើងវិញ ។ នាងបានងាកក្រោយ ហើយឃើញព្រះអម្ចាស់ ។ ដោយសេចក្ដីអំណរ នាងបានឈោងទៅឱបទ្រង់ ដោយបន្លឺពាក្យរំជួលចិត្ត និង ដោយគោរពថា ‹ Rabboni › ប្រែថា ព្រះអម្ចាស់ជាទីស្រឡាញ់របស់ខ្ញុំអើយ » ។8
ដូច្នេះហើយ ស្ត្រីដ៏មានពររូបនេះ ជាមនុស្សខាងសាច់ឈាមទីមួយ ដែលបានឃើញ ហើយបាននិយាយជាមួយព្រះគ្រីស្ទដ៏មានព្រះជន្មរស់ឡើងវិញ ។ ក្រោយមក នៅថ្ងៃដដែលនោះ ទ្រង់បង្ហាញព្រះកាយដល់ពេត្រុសក្នុង ឬ ក្បែរក្រុងយេរ៉ូសាឡិម9 និងដល់ពួកសិស្សពីរនាក់នៅតាមផ្លូវទៅភូមិអេម៉ោស10 ហើយពេលល្ងាចទ្រង់បង្ហាញព្រះកាយក្នុងចំណោមពួកសិស្សទាំង 10 នាក់ និង អ្នកឯទៀត រួចមានព្រះបន្ទូលថា « ចូរមើលមកដៃ និង ជើងខ្ញុំឲ្យបានដឹងថា នេះគឺខ្ញុំពិតមែន ចូរពាល់ខ្ញុំមើល ដ្បិតខ្មោចគ្មានសាច់ និង ឆ្អឹងដូចជាឃើញខ្ញុំនេះទេ » ។11 រួចដើម្បីធ្វើឲ្យគេជឿ « កាលគេមិនទាន់ជឿនៅឡើយ ដោយព្រោះមានសេចក្ដីអំណរ និង សេចក្ដីអស្ចារ្យ »12 នោះទ្រង់សោយត្រីអាំង និង សំណុំឃ្មុំនៅមុខគេ ។13 រួចទ្រង់មានបន្ទូលថា « អ្នកនឹងធ្វើជាទីបន្ទាល់ពីខ្ញុំនៅក្រុងយេរ៉ូសាឡិម ព្រមទាំងស្រុកយូដា និង ស្រុកសាម៉ារីទាំងមូល ហើយរហូតដល់ចុងផែនដីបំផុតផង » ។14
បន្ថែមពីលើអ្នកដែលបានឃើញទ្រង់នៅក្រុងយេរ៉ូសាឡិម មានការបម្រើដ៏អស្ចារ្យរបស់ព្រះអម្ចាស់ដែលមានព្រះជន្មរស់ឡើងវិញដល់ប្រជាជនរស់នៅអឌ្ឈគោលខាងលិច ។ នៅឯដែនដីបរិបូរ ទ្រង់យាងចុះពីស្ថានសួគ៌ ហើយបានឲ្យពួកបណ្ដាជនប្រមាណ 2,500 នាក់ ដើរទៅមុខម្ដងម្នាក់ៗដរាបគ្រប់គ្នា ហើយលូកដៃមកឯចំហៀងព្រះអង្គ ហើយស្ទាបស្នាមដែកគោលនៅត្រង់ព្រះហស្ដ និង ព្រះបាទារបស់ព្រះអង្គ ។15
« ហើយកាលគេទាំងអស់គ្នាបានដើរទៅមុខអស់ហើយ និង បានឃើញច្បាស់ដោយខ្លួនគេផ្ទាល់ នោះពួកគេក៏បន្លឺសំឡេងព្រមគ្នាថា ៖
« ហូសាណា ! សូមឲ្យព្រះនាមនៃព្រះខ្ពស់បំផុតបានប្រកបដោយព្រះពរ ! ហើយពួកគេបានក្រាបចុះនៅទាបព្រះបាទានៃព្រះយេស៊ូវ ហើយបានថ្វាយបង្គំព្រះអង្គ » ។16
ដំណើររស់ឡើងវិញរបស់ព្រះគ្រីស្ទបង្ហាញថា ព្រះជន្មទ្រង់ គឺឯករាជ្យ និង គ្មានទីបំផុត ។ « ពីព្រោះដែលព្រះវរបិតាមានជីវិតក្នុងព្រះអង្គទ្រង់យ៉ាងណា នោះទ្រង់ក៏បានប្រទានឲ្យព្រះរាជបុត្រាមានជីវិតក្នុងព្រះអង្គទ្រង់យ៉ាងនោះដែរ » ។17 ព្រះយេស៊ូវមានព្រះបន្ទូលថា ៖
« ហេតុនោះបានជាព្រះវរបិតាទ្រង់ស្រឡាញ់ខ្ញុំ ពីព្រោះខ្ញុំដាក់ជីវិតខ្ញុំចុះ ដើម្បីឲ្យបានយកមកវិញ ។
« គ្មានអ្នកណាដកយកជីវិតពីខ្ញុំបានទេ គឺខ្ញុំដាក់ជីវិតចុះដោយខ្លួនខ្ញុំ ។ ខ្ញុំអាចនឹងដាក់ជីវិតនេះចុះ ហើយក៏អាចនឹងយកមកវិញបានដែរ » ។18
ព្រះអង្គសង្គ្រោះ ពុំពឹងផ្អែកលើអាហារ ឬ ទឹក ឬ ឧស្ម័នអុកស៊ីសែន ឬ សារធាតុណាផ្សេងទៀត អំណាច ឬ ជនណាម្នាក់ដើម្បីទ្រទ្រង់ព្រះជន្មឡើយ ។ ទ្រង់ជាព្រះដ៏មហិមា ទាំងជាព្រះយេហូវ៉ា និង ព្រះមែស៊ី ជាព្រះដ៏ជាព្រះ ។19 ទ្រង់ពិតជាព្រះ ហើយនឹងនៅជាព្រះជានិរន្តរ៍ ។
តាមរយៈដង្វាយធួន និង ដំណើររស់ឡើងវិញរបស់ទ្រង់ ព្រះយេស៊ូវគ្រីស្ទ បានយកឈ្នះលើគ្រប់ទិដ្ឋភាពនៃការធ្លាក់ ។ សេចក្តីស្លាប់ខាងសាច់ឈាម នឹងជារឿងបណ្ដោះអាសន្ន ប៉ុន្តែ សេចក្ដីស្លាប់ខាងវិញ្ញាណ មានទីបញ្ចប់ មនុស្សគ្រប់គ្នានឹងត្រឡប់ទៅវត្តមាននៃព្រះរយៈពេលខ្លី ដើម្បីបានជំនុំជម្រះ ។ យើងមានការជឿជាក់ និង ទំនុកចិត្តខ្លាំងលើព្រះចេស្ដាទ្រង់ ដើម្បីយកឈ្នះលើរឿងផ្សេងទៀត ហើយផ្ដល់ឲ្យនូវជីវិតអស់កល្ប ។
« ដ្បិតដែលបានសេចក្ដីស្លាប់មកដោយសារមនុស្ស នោះសេចក្ដីដែលមនុស្សស្លាប់បានរស់ឡើងវិញក៏មកដោយសារមនុស្សដែរ ។
« ព្រោះដូចជាគ្រប់មនុស្សទាំងអស់បានត្រូវស្លាប់ក្នុងលោកអ័ដាមជាយ៉ាងណា នោះគ្រប់គ្នាក៏នឹងបានប្រោសឲ្យរស់ក្នុងព្រះគ្រីស្ទយ៉ាងនោះដែរ » ។20
ប្រសាសន៍របស់ អែលឌើរ នែល អេ ម៉ាក់ស្វែល ថ្លែងថា ៖ « ជ័យជំនះរបស់ព្រះគ្រីស្ទលើសេចក្ដីស្លាប់បានបញ្ចប់ស្ថានភាពលំបាករបស់មនុស្សលោក ។ ឥឡូវមានតែស្ថានភាពលំបាកផ្ទាល់ខ្លួនប៉ុណ្ណោះទេ ហើយពីស្ថានភាពលំបាកទាំងពីរនេះ យើងអាចបានសង្គ្រោះ តាមរយៈការធ្វើតាមការបង្រៀនរបស់ទ្រង់ដែលបានសង្គ្រោះយើងពីការវិនាសទូទៅ ។21
ដោយបានសមតាមបំណងនៃតម្រូវការខាងសេចក្ដីយុត្តិធម៌ ពេលនេះព្រះគ្រីស្ទទ្រង់គង់នៅទីដែលយុត្តិធម៌ ឬ យើងអាចនិយាយបានថា ទ្រង់ជាសេចក្ដីយុត្តិធម៌ គឺដូចទ្រង់នេះហើយជាក្ដីស្រឡាញ់ ។22 មិនតែប៉ុណ្ណោះ ទ្រង់មិនត្រឹមតែជាព្រះដ៏គ្រប់លក្ខណ៍នោះទេ ទ្រង់ក៏ជាព្រះពោរពេញទៅដោយសេចក្ដីករុណាដែរ ។23 ដូច្នេះ ព្រះធ្វើឲ្យគ្រប់យ៉ាងត្រឹមត្រូវ ។ គ្មានភាពអយុត្តិធម៌ក្នុងជីវិតរមែងស្លាប់ ដែលនៅគង់វង្ស សូម្បីតែសេចក្ដីស្លាប់ក៏មិនគង់វង្សដែរ ដ្បិតទ្រង់ប្រោសជីវិតឲ្យរស់ឡើងវិញ ។ គ្មានការខូចខាត អសមត្ថភាព ភាពក្បត់ ឬ ការរំលោភបំពានណាដែលកើតមានដោយគ្មានការទូទាត់នៅទីបំផុតឡើយ គឺព្រោះតែសេចក្ដីយុត្តិធម៌ និង សេចក្ដីករុណាទ្រង់ ។
ស្រដៀងគ្នានឹងនេះដែរ យើងមានទំនួលខុសត្រូវដល់ទ្រង់ចំពោះជីវិត ជម្រើស និង ទង្វើ ហើយសូម្បីតែគំនិតរបស់យើងដែរ ។ ដោយហេតុតែទ្រង់បានប្រោសលោះយើងពីការធ្លាក់ នោះជីវិតយើងគឺនៅក្នុងទ្រង់ ។ ទ្រង់មានព្រះបន្ទូលថា ៖
« មើលចុះ យើងបានប្រទានដល់អ្នករាល់គ្នានូវដំណឹងល្អរបស់យើង ហើយនេះគឺជាដំណឹងល្អដែលយើងបានប្រទានដល់អ្នករាល់គ្នា — គឺយើងបានមកឯលោកិយនេះ ដើម្បីធ្វើតាមព្រះហឫទ័យនៃព្រះវរបិតារបស់យើង ពីព្រោះព្រះវរបិតារបស់យើងទ្រង់បានចាត់ឲ្យយើងមក ។
« ហើយព្រះវរបិតាយើងទ្រង់បានចាត់ឲ្យយើងមកដើម្បីឲ្យយើងអាចត្រូវបានលើកឡើងលើឈើឆ្កាង ហើយបន្ទាប់ពីយើងត្រូវបានលើកឡើងលើឈើឆ្កាង គឺប្រយោជន៍ឲ្យយើងអាចទាញនាំគ្រប់មនុស្សទាំងអស់ឲ្យមករកយើង ហើយដូចជាយើងត្រូវបានលើកឡើងលើឈើឆ្កាងដោយមនុស្សលោកយ៉ាងណា នោះមនុស្សលោកក៏នឹងត្រូវបានលើកឡើងដោយព្រះវរបិតាយ៉ាងនោះដែរ ដើម្បីឲ្យឈរចំពោះយើងដើម្បីទទួលការជំនុំជម្រះស្របតាមកិច្ចការទាំងឡាយរបស់ខ្លួន » ។24
សូមគិតបន្តិចពីអត្តន័យពិតនៃដំណើររស់ឡើងវិញ ក្នុងការដោះស្រាយនៅទីបញ្ចប់ពីអត្តសញ្ញាណពិតរបស់ព្រះយេស៊ូវនៃណាសារ៉ែត និង ការប្រឆាំងខាងចិត្តវិទ្យា និង សំណួរនៃជីវិត ។ បើ ព្រះយេស៊ូវ ពិតជាមានព្រះជន្មរស់ឡើងវិញមែន វាចាំបាច់ត្រូវជឿថា ទ្រង់ជាសភាវៈអាទិទេព ។ គ្មានមតភាពល្អណាទៀត មានអំណាចលើទ្រង់ផ្ទាល់ឲ្យបានមានព្រះជន្មម្ដងទៀត ក្រោយពីអស់ព្រះជន្មនោះឡើយ ។ ដោយសារទ្រង់មានព្រះជន្មរស់ឡើងវិញ ព្រះយេស៊ូវ ពុំមែនគ្រាន់តែជាជាងឈើ គ្រូបង្រៀន អ្នកច្បាប់ ឬ ព្យាការីឡើយ ។ ដោយសារទ្រង់មានព្រះជន្មរស់ឡើងវិញ ព្រះយេស៊ូវ គឺជាព្រះ ជាព្រះរាជបុត្រាបង្កើតតែមួយរបស់ព្រះវរបិតា ។
ហេតុដូច្នេះហើយ អ្វីដែលទ្រង់បង្រៀនគឺពិត ព្រះពុំកុហកឡើយ ។25
ហេតុដូច្នេះហើយ ទ្រង់ជាព្រះបង្កបង្កើតផែនដី ដូចទ្រង់មានបន្ទូលហើយ ។26
ហេតុដូច្នេះហើយ ស្ថានសួគ៌ និង ស្ថាននរកមានពិតមែន ដូចទ្រង់ត្រាស់បង្រៀនហើយ ។27
ហេតុដូច្នេះហើយ មានពិភពវិញ្ញាណដែលទ្រង់បានយាងទៅបន្ទាប់ពីការសុគត ។28
ហេតុដូច្នេះហើយ ទ្រង់នឹងយាងមកម្ដងទៀតដូចដែលទេវតាបានមានបន្ទូល29 ហើយ « សោយរាជ្យនៅលើផែនដីផ្ទាល់ » ។30
ហេតុដូច្នេះហើយ មានដំណើររស់ឡើងវិញ និង ការជំនុំជម្រះចុងក្រោយដល់មនុស្សទាំងពួង ។31
ព្រោះតែភាពពិតនៃដំណើររស់ឡើងវិញរបស់ព្រះគ្រីស្ទ នោះការសង្ស័យពីមហិទ្ធិឫទ្ធិ ការត្រាស់ដឹង និង ព្រះទ័យមេត្តារបស់ព្រះ ជាព្រះវរបិតា — ដែលបានប្រទានបុត្រាបង្កើតតែមួយឲ្យមកប្រោសលោះពិភពលោកនោះ — គឺមិនអាចកើតមានឡើយ ។ មន្ទិលអំពីអត្ថន័យ និង គោលបំណងនៃជីវិត ត្រូវបានបើកសម្តែង ។ ព្រះយេស៊ូវគ្រីស្ទ ពិតជាព្រះនាម ឬ មាគ៌ាតែមួយគត់ ដែលមនុស្សលោកអាចបានសង្គ្រោះ ។ សេចក្ដីមេត្តារបស់ព្រះគ្រីស្ទ មានពិតមែន ទាំងការអភ័យទោស និង ការសម្អាតដល់អ្នកមានបាប ដែលប្រែចិត្ត ។ សេចក្ដីជំនឿពិតជាមានន័យជ្រៅជាងការស្រម៉ៃ ឬ ការបង្កើតរបស់ចិត្តវិទ្យាទៅទៀត ។ មានសេចក្ដីពិតដ៏មិនចេះចប់ និង ជាសាកល ហើយមានបទដ្ឋានសីលធម៌ដែលមិនលំអៀង ហើយមិនផ្លាស់ប្ដូរដូចទ្រង់បានបង្រៀន ។
ដោយសារតែមានដំណើររស់ឡើងវិញរបស់ព្រះគ្រីស្ទ នោះការប្រែចិត្តពីការល្មើសច្បាប់ និង បញ្ញត្តិទ្រង់ គឺជារឿងដែលត្រូវតែមាន ហើយត្រូវធ្វើជាបន្ទាន់ ។ អព្ភូតហេតុព្រះអង្គសង្គ្រោះ មានពិតមែន គឺដូចទ្រង់បានសន្យាដល់ពួកសិស្សថា គេអាចនឹងធ្វើការដែលទ្រង់ធ្វើ ក៏នឹងធ្វើការធំជាងការទាំងនោះទៅទៀត ។32 បព្វជិតភាពទ្រង់ ចាំបាច់ជាអំណាចពិតដែល « ចាត់ចែងដំណឹងល្អ ហើយកាន់កូនសោនៃសេចក្ដីអាថ៌កំបាំងទាំងឡាយនៃនគរ គឺជាកូនសោនៃវិជ្ជាពីព្រះ ។ ហេតុដូច្នេះហើយ នៅក្នុងពិធីបរិសុទ្ធទាំងឡាយនៃបព្វជិតភាពដ៏ធំជាងនេះ នោះអំណាចនៃព្រះ ត្រូវបានសម្ដែងឲ្យឃើញ » ។33 ព្រោះតែភាពពិតនៃដំណើររស់ឡើងវិញរបស់ព្រះគ្រីស្ទ សេចក្ដីស្លាប់ពុំមែនជាទីបញ្ចប់យើងឡើយ ហើយទោះ « សំបកកាយនេះ រលាយទៅ គឺក្រៅពី [ រាងកាយ ] នោះ [ យើង ] នឹងបានឃើញព្រះ » ។34
ប្រធាន ថូម៉ាស អេស ម៉នសុន តំណាលពីបុរសម្នាក់ឈ្មោះ រ៉ូប៊ើត ប្លាចហ្វដ បានរស់នៅកាលពី 100 ឆ្នាំមុនថា « នៅក្នុងសៀវភៅគាត់ God and My Neighborបានសរសេរវាយប្រហារពេញទំហឹងលើជំនឿពួកគ្រីស្ទាន មានដូចជា ព្រះ ព្រះគ្រីស្ទ ការអធិស្ឋាន និង អមតៈភាព ។ គាត់ប្រកាសដោយម៉ឺងម៉ាត់ថា ‹ ខ្ញុំសូមប្រកាសបង្ហាញអ្វីគ្រប់យ៉ាង ដែលខ្ញុំចង់បញ្ជាក់ជាដាច់ខាតថា យ៉ាងណាក៏ដោយ គ្មានពួកគ្រីស្ទានណា មានភាពឆ្លាតវៃ ហើយអាចជំទាស់នឹងសេចក្ដីសំអាងរបស់ខ្ញុំ ឬ បន្តុះបង្អាប់គោលគំនិតខ្ញុំបានឡើយ › ។ គាត់ពុំទទួលយកមតិរបស់មនុស្សដទៃឡើយ ។ ក្រោយមករឿងដ៏ភ្ញាក់ផ្អើលមួយបានកើតឡើង ។ គាត់ចាប់ផ្ដើមស្ដាប់មតិមនុស្សដទៃ … គាត់ចាប់ផ្ដើមគិតបន្តិចម្ដងៗអំពីជំនឿ ដែលគាត់ធ្លាប់ប្រមាថ ហើយចំអក ។ តើអ្វីបណ្ដាលឲ្យទស្សនៈគាត់ផ្លាស់ប្ដូរដូច្នោះ ? ភរិយាគាត់ [ បាន ] ចែកឋានទៅ ។ គាត់បានចូលទៅក្នុងបន្ទប់តម្កល់សាកសពទាំងខូចចិត្ត ។ គាត់សម្លឹងមើលមុខភរិយាជាទីស្រឡាញ់របស់គាត់ម្ដងទៀត ។ ពេលចេញមកវិញ គាត់បានពោលទៅកាន់មិត្តម្នាក់ថា ៖ ‹ នោះ គឺជានាង ហើយឥឡូវ នោះមិនមែនជានាងទៀតឡើយ ។ អ្វីគ្រប់យ៉ាង បានផ្លាស់ប្ដូរហើយ ។ អ្វីដែលធ្លាប់មានពីមុន ត្រូវបានយកទៅបាត់ហើយ ។ នាងមិនដូចពីមុនទេ ។ តើអាចស្លាប់ដូចម្ដេចបាន បើវាមិនមែនជាព្រលឹងនោះ › » ?35
តើព្រះអម្ចាស់ពិតជាសុគត ហើយមានព្រះជន្មរស់ឡើងវិញមែនឬ ? មែនហើយ ។ « គោលការណ៍គ្រឹះនៃសាសនារបស់យើង គឺជាទីបន្ទាល់របស់ពួកសាវក និង ព្យាការីអំពី ព្រះយេស៊ូវគ្រីស្ទ ដែលទ្រង់បានសុគត បញ្ចុះ ហើយមានព្រះជន្មរស់ឡើងវិញនៅថ្ងៃទីបី ហើយបានយាងទៅឯស្ថានសួគ៌ ហើយអ្វីផ្សេងៗទៀតមានក្នុងសាសនាយើងនោះ គឺគ្រាន់តែជាសេចក្តីបន្ថែមប៉ុណ្ណោះ » ។36
ពេលព្រះរាជកំណើតព្រះយេស៊ូវ ដែលបានព្យាករទុកជិតមកដល់ មានមនុស្សក្នុងបណ្ដាសាសន៍នីហ្វៃ និង សាសន៍លេមិនបានជឿ ទោះជាមានការមន្ទិលច្រើនយ៉ាងណាក្ដី ។ កាលវេលាបានមកដល់ ទីសម្គាល់នៃព្រះរាជកំណើតរបស់ទ្រង់បានលេចឡើង — គឺមួយថ្ងៃ និង មួយយប់ និង មួយថ្ងៃពុំងងឹតឡើយ — ហើយមនុស្សគ្រប់គ្នាបានដឹង ។37 ស្ថានភាពសព្វថ្ងៃ គឺមានលក្ខណៈស្រដៀងគ្នា មនុស្សខ្លះជឿលើដំណើររស់ឡើងវិញរបស់ព្រះគ្រីស្ទ ហើយមនុស្សច្រើនសង្ស័យ ឬ មិនជឿ ។ ប៉ុន្តែ មនុស្សខ្លះដឹង ។ កាលវេលាមកដល់ មនុស្សគ្រប់គ្នានឹងដឹងជាប្រាកដថា « គ្រប់ជង្គង់នឹងលុតចុះ ហើយគ្រប់អណ្ដាតនឹងទទួលថ្លែងប្រាប់នៅចំពោះទ្រង់ » ។38
ដល់ពេលនោះ ខ្ញុំជឿថាសាក្សីជាច្រើន ដែលបានឃើញដំណើររស់ឡើងវិញរបស់ព្រះអង្គសង្គ្រោះ ដែលបានមានបទពិសោធន៍ និង ទីបន្ទាល់នៅក្នុងគម្ពីរសញ្ញាថ្មី — ដូចជាពេត្រុស និង ដៃគូសាវកទាំងឡាយ និង ម៉ារា ម៉ាក់ដាឡាដ៏បរិសុទ្ធជាទីស្រឡាញ់ ត្រូវបានរកឃើញក្នុងចំណោមមនុស្ស ។ ខ្ញុំជឿលើទីបន្ទាល់នានា ដែលមានចែងក្នុងព្រះគម្ពីរមរមន — ពីនីហ្វៃដែលជាសាវក នៅជាមួយហ្វូងមនុស្សដែលពុំស្គាល់ក្នុងដែនដីបរិបូរ ក្នុងចំណោមមនុស្សជាច្រើន ។ ហើយខ្ញុំជឿថាទីបន្ទាល់របស់ យ៉ូសែប ស្ម៊ីធ និង ស៊ីឌនី រិកដុន ដែលបានប្រកាសពីសាក្សីអស្ចារ្យ បន្ទាប់ពីសាក្សីជាច្រើនទៀតនៅជំនាន់ចុងក្រោយនេះ « ថាទ្រង់មានព្រះជន្មរស់ ! ដ្បិតយើងបានឃើញទ្រង់ » ។39 នៅក្រោមព្រះនេត្រដ៏មុតរបស់ទ្រង់ ខ្ញុំសូមឈរជាសាក្សីដោយខ្លួនខ្ញុំថា ព្រះយេស៊ូវនៃណាសារ៉ែត គឺជាព្រះប្រោសលោះដែលបានមានព្រះជន្មរស់ឡើងវិញ ហើយខ្ញុំសូមថ្លែងទីបន្ទាល់ពីអ្វីគ្រប់យ៉ាងដែលជាលទ្ធផលនៃដំណើររស់ឡើងវិញរបស់ទ្រង់ ។ សូមឲ្យអ្នកមានជំនឿស៊ប់ និង ការលួងលោមចិត្តពីសាក្សីទាំងនោះ ខ្ញុំសូមអធិស្ឋានក្នុងព្រះនាមនៃ ព្រះយេស៊ូវគ្រីស្ទ អាម៉ែន ។