Rikam̧ool eo

Tōre ko ilo pata ak iien lakapokpok ewōr juon wāween n̄an kapen ļo̧k mije eo ad kōn men ko me relukkuun aorōk.

Pata eo an laļ in kein karuo ear juon iien enana ñan mour in jetōb eo aō. Iaar likūt kapijuknen eo aō ilo Brigham City, Utah, eaar kanuuj dik naan in kam̧ool eo aō im kar aikuji men eo eļap ļo̧k. Ke iaar pād ilo ānen Ie Shima, tūrear in Okinawa, Japan, iaar ioon pere im lakapokpok. Iaar kōņaan bōk juon naan in kam̧ool an juon make kōn ko̧jpeļ in. Iaar kōņaan jeļā!

Ilo juon bon̄ōn iaar jab maroñ kiki, iaar etal jen im̧ōn kōppād eo aō im kar deļo̧n̄e ļo̧k juon bunker eo im eaar kōm̧m̧an in 50 kaan in kōļan in tūram̧ ko kar kanni kōn bo̧k im kar likūt ioon doon n̄an ejaake juon jikin kōppād. Eaar ejjeļo̧k bōro̧jin, im iaar etabōļbōļ ļo̧k ilowan, reilōn̄ ļo̧k n̄an iju ko rellōn̄ imejatoto, im kar būkwelōlō im jar.

Lukweļpen jar eo eaar bōk jikin. Ijjab maron̄ kōmeļeļeiki n̄an kom̧ ta eo eaar waļo̧k eļan̄n̄e in kar kōņaan jiron̄ kom̧ kōn ta eo eaar waļo̧k. Eaar kōn aolep aō maron̄ n̄an kwaļo̧k, ak āinwōt ealikar rainin āinwōt kar bōn̄en eo 65 iiō ko rem̧ootļok. Iaar jeļā kōn juon men, bwe naan in kam̧ool an juon make eaar waļo̧k ilo n̄a. Ālkin jet iien, iaar etabōļbōļ jān bunker eo im etetaļ ļo̧k, im kar jepļaak n̄an peet eo aō kōn en̄jake ko relem̧ōņōņō. Aolepen bon̄on eo iaar en̄jake m̧ōņōn̄ō im laudin̄din̄.

Ijjellokin aō lōmņak bwe ij āinjuonļo̧k, iaar lōmnak bwe eļan̄n̄e juon men emaroñ itok ñan iō ebarāinwōt maroñ itok ñan jabdewōt. Iaar tōmak wōt. Ilo iiō ko me raar ellā, Iaar maron̄ in meļeļe bwe kain en̄jake in ewaļo̧k ej āinwōt juon meram n̄an lo̧o̧re im juon eddo n̄an ineeke.

Ikōņaan kōnono n̄an kom̧ kōn m̧ool kein me raorōk tata ñan ad jeļā kaki, men ko me Iaar ekkatak im kar en̄jaki enan̄in 90 iiō ko in mour im elōn̄ ļo̧k jen 50 iiō ko āinwōt juon Ritōl Utiej an Kabun̄ in. Men eo Iaar kōņaan jeļā eaar m̧ōttan wōt men ko me rejjab maron̄ waļo̧k ak maron̄ in jeļā kaki.

Bar āinwōt men ko rellap aorōkier, jeļāļo̧kjeņ eo ewōr aorōkin ñan indeeo me ej itok kōn jar an juon make im ilo kejo̧kļo̧kjeņ. Men kein ekoba jitlo̧k im ekkatak jeje ko rekwojarjar, naaj karuwaineneik tok im̧we ko im unojdikdik ko an Jetōb Kwojarjar. Men kein rej letok n̄an kōj ekkatak jān lan̄ ilo ad katak m̧wil im bar m̧wil.

Revelesōn ko rej kallim̧ur bwe jabdwōt pedped in jeļāļo̧kjeņ jej būki ilo mour in naaj pād ippād ilo jerkakpeje eo im bwe jeļāļo̧kjeņ im māļetļet kar būki kōn tiljek im pokake (lale D&C 130:18–19).

Juon iaan m̧ool eo indeeo me iaar maron̄ in jeļā ej bwe Anij ej mour. Ej Jemed. Jej ajri ro Nejin. “Jej tōmak ilo Anij, eo Jemed Indeeo, im ilo Nejin, Jisōs Kraist, im ilo Jetōb Kwojarjar” (Laajrak in Tōmak ko 1:1).

Iaan aolep taitōļ ko jet me Emaron̄ kar kōjerbale, Eaar kālet n̄an kūr “Jemed.” Rilo̧mo̧o̧r eaar ba, “Innām en wāween dein ami jar: Jememwōj i lan̄” (3 Nipai 13:9; lale barāinwōt Matu 6:9). Ej kōjerbal etan “Jemen” ej juon ekkatak n̄an kōj aolep ilo ad jino meļeļe ta eo eaorōk tata ilo mour in.

Ro jinen im jemen ej juon jerbal eo ekwojarjar, im ej pedped wōt ioon tiljek, emaron̄ in juon kōjeram̧m̧an indeeo. Jem̧ļo̧k eo ejjeļo̧k jem̧ļo̧kin indeeo an aolep m̧akūtkūt ilo Kabun̄ in ej bwe juon em̧m̧aan im kōrā eo ippān im ajri ro nejier maron̄ in m̧ōņōņō ilo kapijuknen.

Ro rejjan̄in m̧are ak ro me rejjab maron̄ neji rejjab jako jān kōjeram̧m̧an ko indeeo me rej pukoti ak, ñan kiiō, me repād im̧aan kōttōbar ko aer. Jejjab maron̄ aolep iien jeļā kōn ak n̄e kōjeram̧m̧an ko naaj walok tok, ak kallim̧ur ko an indeeo rej lapļo̧k naaj jab ijirwewe ilo jabdewōt tōmak an juon make ro me rej kōm̧m̧ani im kōjparok bujen ko.

Kōnan ko am rōttino im kajitōk ko am relap renaj uñūr jimor buruōn Jemen im Nejin. Kwonaaj maron̄ in bōk juon jeļā an juon make jān Er bwe mour eo am naaj obrak im bwe ejjeļo̧k kōjeram̧m̧an eaorōk naaj jako jān eok.

Āinwōt juon rikarejeran Irooj, jerbal ilo opiij eo kar kapit eō, Ij lewaj n̄an kom̧ ro rejjan̄in m̧are im ejjeļo̧k nejier ilo juon kallim̧ur bwe ejjeļo̧k men eaorōk ļo̧k n̄an lo̧mo̧o̧r eo am im mour indeeo me tōre en eban bōk jikin n̄e lewaj n̄an eok. Pā ko me raar ejjeļo̧k kobbwāer naaj obrak, im bōro ko remetak jān ettōn̄ak ko rankeke im metak naaj mour.

M̧ool eo juon iaar maron̄ in jeļā ej bwe Jetōb Kwojarjar ej lukkuun m̧ool. E ej m̧ōttan eo kein kajilu bōran Anij. Jerbal eo an ej n̄an kam̧ool kōn m̧ool eo im jim̧we. E ej kwaļo̧k E Make ilo elōn̄ wāween ko, ekoba ilo en̄jake ko an aenōm̧m̧an im kile. E emaron̄ barāinwōt bōktok aenōm̧m̧an, tōl, im jim̧we n̄e emenin aikuj. Jem̧jerā eo an Jetōb Kwojarjar ej waļo̧k ilo mour ko ad kōn mour jim̧we.

Menin letok eo an Jetōb Kwojarjar ej letok kōn juon kain̄i ilo ko̧jpeļ in. Kōn mālim eo an likūt pā ko ioon bōran juon membōr eo ekāāl an Kabun̄ in im ba naan ko āinwōt kein: “Bōk Jetōb Kwojarjar.”

Kain̄i in make ejjab ukōt ļo̧k kōj ilo juon wāween, ak eļan̄n̄e jenaaj ron̄jake im lo̧o̧r im̧we ko, jenaaj bōk kōjeram̧m̧an eo an Jetōb Kwojarjar. Kajjojo ļaddik im jiron̄ ro nejin Jemedwōj Ilan̄ remaron̄ itok n̄an jeļā kōn kallim̧ur eo em̧ool an Moronai: “Bwe jān kajoor eo an Jetōb Kwojarjar kom̧ maron̄ jeļā m̧ool eo an men otemjeļo̧k” (Moronai 10:5; kakobaba in katak).

Juon m̧ool eo ekwojarjar iaar bōke ilo mour eo aō ej kam̧ool eo aō kōn Irooj Jisōs Kraist.

Men eo eļap tata ej rie aolep men ij kōm̧m̧ane, pedped ioon revelesōn ko, ej ilo etan Irooj, eo ej mālim eo me jej Kōjerbali ilo Kabun̄ in. Kajjojo jar rej ilo̧k, men̄e jen ajri ro reddik, ej jem̧ļo̧k ilo etan Jisōs Kraist. Kajjojo kōjeram̧m̧an, kajjojo kain̄i, kajjojo ekkapit, kajjojo jerbal ej kōm̧m̧an ilo etan Jisōs Kraist. Ej Kabun̄ eo An in, im ej kōn Etan―Kabun̄ eo an Jisōs Kraist im Armej ro Rekwojarjar ilo Raan-ko Āliktata (lale D&C 115:4).

Ewōr juon men eo eļap eaar waļo̧k ilo Bok Mormon me RiNipai ro “raar jar n̄an Jemen ilo etan [Irooj].” Irooj eaar waļo̧k im kar kajjitōk:

“Ta kom̧ kōņan bwe In lewōj n̄an kom̧?

“Im raar ba n̄an E: Irooj, kōm̧ kōņaan bwe Kwōj ba n̄an kōm ta āt eo kōm naaj kūr Kabun̄ in; bwe ewōr iakwāālel ko ilubwiljin armej rein kōn menin.

“Im Irooj eaar ba n̄an er: Em̧ool, em̧ool, Ij ba n̄an kom̧, etke armej rej aikuj alin̄ūrn̄ūr im akwāāl kōn menin?

“Raar jab kōnono ke jān jeje ko rekwojarjar, ko rej ba kom̧ij aikuj bōk ioomi etan Kraist, eo ej Eta? Bwe jān āt in naaj kūr kom̧ ilo raan eo āliktata;

“Im jabdewōt eo ej bōk ioon Eta, im niknik n̄an jem̧ļo̧kin, ejja in wōt naaj mour. …

“Kōn menin, jabdewōt men kom̧ naaj kōm̧m̧an, kom̧ naaj kōm̧m̧an ilo Eta; kōn menin kom̧ naaj ņa etan kabun̄ eo ilo Eta; im kom̧ naaj kajjitōk ippān Jemed ilo Eta bwe E en naaj kōjeram̧m̧an kabun̄ eo kōn Eō” (3 Nipai 27:2–7).

Bwe kōn etan, Jisōs Kraist, “bwe ejjeļo̧k bar juon āt ium̧win lan̄, im letok n̄an armej bwe jen mour” (Jerbal 4:12).

Ilo Kabun̄ in jejeļā wōn eo E: Jisōs Kraist, eo Nejin Anij. E ej Make Wōt Nejin Jemen. E eo Eaar mej im E eo Ej bar mour. Ej ad Rijojomar ippān Jemen. “Kememej bwe ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami” (Hilamōn 5:12). E ej an̄kō eo ej dāpij kōj im kōjparok kōj im baam̧le ko ad jen lan̄ ko an mour in.

Kajjojo Jabōt ipeļaakin laļ in ijo jarlepju ko rej koba ippān doon ilo jabdewōt laļ ak kajin, kwojkwoj eo ej kōjeram̧m̧an kōn ejja naan ko. Jej bōk iood etan Kraist im keememej E aolep iien. Juon men eo jej bōk iood.

Rikanaan Nipai eaar kwaļo̧k, “Jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, jej kanaan kōn Kraist, im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jerawiwi ko aer” 2 ( Nipai 25:26).

Kajjojo iaad eaikuj bōk naan in kam̧ool eo an juon make ilo Irooj Jisōs Kraist. Innām jen kwaļo̧k naan in kam̧ool eo ippān baam̧le eo ad im ro jet.

Jen jab melo̧klo̧k, jen keememej bwe ewōr juon rikapo eo ej make pukot n̄an kakkure jerbal in an Irooj. Jej aikuj in kālet wōn eo jej lo̧o̧re. Kōjparok eo ad en pidodo ilo an juon make kālet n̄an lo̧o̧r Rilo̧mo̧o̧r eo, kōm̧m̧an bwe jen dāpdāp wōt ilo tūrājet eo An.

Ilo Kallim̧ur Ekāāl, Jon ej lo̧o̧ke bwe ewōr jet ro me rejjab maron̄ wūjļepļo̧k n̄an Rilo̧mo̧o̧r im katak ko An, im “jān elōn̄ tōre me ro rikaļooran raar jepļaak, im kar jab bar etetal ippān.

“Im Jisōs e ba n̄an jon̄oulruor ro, Kom̧ barāinwōt kōņaan ilo̧k ke?

Saimōn Piter e uwaak E, Irooj, kōm naaj ilo̧k n̄an wōn? Ippam̧ naan ko naan in mour indeeo.

“Im kōm ar tōmak im jeļā, bwe kwe Kraist eo, Nejin Anij emour” (Jon 6:66–69).

Piter eaar bōk men eo me emaron̄ kar jeļā ilo an lo̧o̧r Rilo̧mo̧o̧r eo. N̄an lukkuun wūjlepļo̧k n̄an Jisōs Kraist, jej bōk E āinwōt ad Ripinmuur im kōm̧m̧ani aolep men ko kōn kajoor eo ad n̄an mour kōn katak ko An

Ālkin aolep iiō ko in aō mour im ekkatak im jerbal, ālkin milien in m̧ail ko iaar ito-itak ipeļaakin laļ in, kōn aolep en̄jake ko iaar būki, ewōr juon m̧ool eo eļap me ikōņaan kwaļo̧k. Ej kam̧ool eo aō kōn Rilo̧mo̧o̧r Jisōs Kraist.

Joseph Smith im Sidney Rigdon raar lo̧o̧ki naan kein ālikin juon en̄jake eo ekwojarjar:

Ālkin elōn̄ naan in kam̧ool ko me kar letok kōn E, en̄in ej naan in kam̧ool eo bwe Rikanaan Joseph im Sidney Rigdon raar letok kōn E: Bwe Ej mour!

Bwe kōm̧ ar loe E (lale D&C 76:22–23).

En̄in ej naan ko aō.

Ij tōmak im Ij lukkuun jeļā bwe Jisōs ej RiKraist eo, Nejin Anij eo emour. Ej mour. Ej Nejin eo Emake Wōt Nejin Jemed, im bwe kōn E; im kōn E, im kōn E, laļ ko rej im kar ejaak, im bwe men ko ilowan raar waļo̧k jen ļaddik ro im jiron̄ ro nejin Anij (lale D&C 76:24)..

Ij kwaļo̧k aō kam̧ool bwe Rilo̧mo̧o̧r ej mour. IjeļāIrooj. Ij juon An rikam̧ool. Ijeļā kōn en̄taan im iakwe eo An indeeo n̄an aolep ajri ro nejin Jemedwōj Ilan̄. Ij kwaļo̧k kam̧ool eo aō ejeno̧ļo̧k ilo aolep ettā ak kōn lukkuun jeļā ilo etan Jisōs Kraist, amen.