Txog Thaum Peb Rov Sib Pom Dua

Kuv cov kwv tij thiab cov muam, nov yog ib lub rooj sab laj zoo kawg nkaus. Peb sab ntsuj plig tau loj hlob thaum peb tau mloog cov txiv neej thiab cov poj niam tej lus hais rau peb uas tau los saum ntuj los. Cov nkauj yeej zoo mloog, tej zaj lus raug muab hais raws li tus Vaj Ntsuj Plig Dawb Huv tej kev tshoov siab, thiab tej lub thov Vajtswv tau pab peb txav los nyob ze lub ntuj ceeb tsheej. Peb raug txhawb nqa los rau txhua yam thaum peb los sib koom ua ke.

Kuv cia siab tias peb yuav nyeem tej zaj lus los ntawm lub tuam rooj sab laj thaum muab luam tawm hauv LDS.org ob peb hnub tom ntej no thiab thaum muab luam tawm hauv phau Ensign thiab Liahona tom ntej no, vim yuav tsum ua tib zoo kawm thiab tshawb nrhiav txog tej zaj lus no.

Kuv paub nej nrog kuv qhia peb txoj kev ris txiaj rau cov kwv tij thiab cov muam uas raug tso tawm ntawm lawv txoj hauj lwm hauv lub rooj sab laj no. Lawv tau ua tej hauj lwm zoo thiab tau pab khiav tus Tswv tej hauj lwm ntau heev lawm. Lawv yeej tau rau siab ntso ua hauj lwm.

Peb kuj raug tau txhawb nqa, tsa tes pom zoo txais yuav, cov kwv tij uas raug hu los ua tej hauj lwm tshiab hauv lub rooj sab laj no. Peb zoo siab tos txais lawv thiab xav kom lawv yuav paub tias peb zoo siab vim peb yuav nrog lawv sib koom tes ua hauj lwm rau peb tus Xib Hwb.

Thaum peb muab tej zaj lus uas peb tau hnov xav mus xav los, thov kom peb yuav cog lus tias peb yuav ua zoo dua yav tas los lawm. Thov kom peb yuav ua siab zoo thiab hlub cov uas tsis koom peb txoj kev ntseeg thiab peb tej kev cai. Tus Cawm Seej tau coj txoj kev hlub thiab kev ua siab zoo rau txhua tus txiv neej thiab poj niam los rau hauv ntiaj teb no. Thov kom peb yuav ua raws li Nws tus yam ntxwv tsis tu tsis tseg.

Niaj hnub no peb muaj teeb meem ntau heev hauv ntiaj teb no, tiam sis kuv qhia tseeb rau nej tias peb Leej Txiv Saum Ntuj Ceeb Tsheej paub txog peb. Nws yuav coj peb kev thiab foom koob hmoov rau peb thaum peb ntseeg thiab cia siab rau Nws thiab yuav pab peb nyiaj mus dhau tej teeb meem uas los thaiv peb kev.

Thov kom lub ntuj yuav nrog nraim peb txhua tus nyob. Thov kom peb vaj peb tsev yuav muaj kev hlub thiab kev ua siab zoo thiab tus Tswv tus ntsuj plig puv npo. Thov kom peb yuav saib xyuas peb zaj lus tim khawv txog txoj moo zoo, xwv kom tej zaj lus tim khawv ntawd yuav tiv thaiv peb ntawm Dab Ntxwg Nyoog tej kev tsim txom. Thov kom tus ntsuj plig uas peb tau hnov ob hnub tas los no yuav nrog nraim peb nyob thaum peb niaj hnub ua peb tej hauj lwm, thiab thov kom peb yuav ua tus Tswv txoj hauj lwm tsis tu tsis tseg.

Kuv hais kuv zaj lus tim khawv tias txoj hauj lwm no muaj tseeb, tias peb tus Cawm Seej muaj sia nyob, thiab tias Nws coj peb kev thiab coj kav Nws lub Koom Txoos hauv ntiaj teb no. Kuv hais kuv zaj lus tim khawv thiab zaj lus pov thawj tias Vajtswv peb Leej Txiv uas Nyob Mus Ib Txhis muaj sia nyob thiab hlub peb. Nws yeej yog peb Txiv, thiab Nws nyob tiag thiab paub peb. Thov kom peb yuav paub tias Nws kam txav los nyob ze peb npaum li cas, thiab Nws xav pab peb ntau npaum li cas, thiab Nws hlub peb npaum li cas.

Kuv cov kwv tij thiab cov muam, thov Vajtswv foom koob hmoov rau nej. Thov kom Nws txoj kev thaj yeeb yuav nrog nraim nej tam sim no thiab tas mus li.

Kuv hais sib ntsib dua rau nej txog thaum peb rov los sib pom dua rau lub hli tom ntej, thiab kuv hais li no los ntawm Yexus Khetos, peb tus Cawm Seej thiab tus Txhiv Dim lub npe, amees.