Toj reetal naq taqil wi’chik qib’

Ex was wiitz’in, k’a’jo’ xchaq’al ru li nimla ch’utub’aj-ib’ a’in. Xooch’oolaniik sa’ musiq’ej rik’in li musiq’anb’il aatin xqab’i sa’ xtz’uumaleb’ re li winq ut li ixq li xe’aatinak qik’in. Li b’ich jwal chaq’al ru, li na’leb’ xe’xwotz qik’in k’uub’anb’il rik’in li xtenq’ li Santil Musiq’ej, ut eb’ li tij xoxnachob’resi rik’in li Choxa. Xwaklesiik li qaam sa’ naab’al chi na’leb’ naq xo’okenk sa’ komonil.

Nawoyb’eni naq taawanq lee honal re rilb’al ru li esilal re li nimla ch’utub’aj-ib’ naq wanqeb’ sa’ li ulul ch’iich’, sa’ li na’ajej LDS.org sa’ li kutan chalel ut naq te’xtz’iib’a xsa’eb’ li hu Ensign ut Liahona, xb’aan naq aajel ru rilb’al wi’chik ut xtz’ilb’al rix sa’ junjunqalo.

Ninnaw naq naqach’utub’ qib’ sa’ komonil re xwotz’b’al qab’antioxihom re chixjunil li qas qiitz’in li xe’raqman lix k’anjel sa’ li nimla ch’utub’aj-ib’ a’in. Xe’k’anjelak chi k’ulub’ej, yo’on xe’xb’aanu sa’ xk’anjel li Qaawa’ ut xe’xq’axtesi rib’ chi tz’aqal.

Jo’kan ajwi’ xqataqsi li quq’ re xaqab’ankileb’ xk’anjel li ak’ komon li xe’k’eeman li teneb’ank sa’ xb’eeneb’. Naqak’e jun chaab’il k’ulunik ut naqaj naq te’xnaw naq taasaho’q qach’ool chi k’anjelak rik’ineb’ sa’ xk’anjel li Tzolonel.

Naq taqatz’il rix chixjunil li na’leb’ xqab’i, nintz’aama naq taqayal qaq’e chixb’aanunkil b’ayaq qachaab’ilal chiru li xqab’aanu chaq; toowanq sa’ chaab’ilal ut rahom chiruheb’ li maji’ neke’xpaab’ li qapaab’al ut qak’utb’il na’leb’. Li Kolonel kixk’am chaq sa’ li ruchich’och’ a’in jun esil re rahok ut xchaab’ilal li rajom xch’ool re chixjunileb’ li winq. Nintz’aama naq junelik taqataaqe li retalil xyu’am.

Naqak’ul naab’al yalb’a-ix sa’ ruchich’och’ sa’ li kutan a’in, a’b’an ninyee chi yaal naq li qaChoxahil Yuwa’ yoo chiqak’aak’alenkil. A’an tab’eresik qe ut torosob’tesi wi naqak’e qapaab’al ut naqakanab’ qib’ chiru, ut toxtenq’a chixkuyb’al k’a’ruhaq chi ch’a’ajkilal taqak’ul.

Li rosob’tesihom li Choxa chiwanq qik’in sa’ junjunqal. Li qajunkab’al chinumtaaq taxaq rik’in li rahok, li sahil wank ut lix Santil Musiq’ li Qaawa’. Tooruq taxaq xch’olaninkil li qanawom chirix li Evangelio rajlal sut re naq a’anaq taakoloq qe chiru lix chiq’lehom li xik’ na’ilok qe. Chiwanq taxaq qik’in li Musiq’ej xqeek’a chiru li wiib’ kutan a’in naq taqab’aanu li qak’anjel wulaj wulaj, ut naq junelik chowanq xb’aanunkil lix k’anjel li Qaawa’.

Ninjultika lin nawom naq li k’anjel a’in tz’aqal yaal; naq li Kolonel yo’yo, ut A’an naxb’eresi lix Iglees sa’ xb’een li ruchich’och’. Ninkanab’ lix yaalalil li waatin ut lin nawom naq li Dios, li qaJunelikil Yuwa’b’ej, yo’yo ut nokoxra. A’an tz’aqal yaal li qaYuwa’, a’an wan xxaqalil ut tz’aqal yaal rilb’al. Tooruuq taxaq chixnawb’al chi yaal a’in chan ru naq toonach’oq rik’in a’an ut li jo’k’ihal naraj xb’aanunkil re qatenq’ankil ut jo’k’ihal nokoxra.

Ex was wiitz’in, li Dios chi’osob’tesink eere. Lix yeechi’ihom tuqtuukilal chiwanq eerik’in anajwan ut junelik.

Ninchaq’rab’i wi’ eerik’in, toj reetal naq taqach’utub’ wi’chik qib’ sa’ wak’ib’ po; ut ninb’aanu sa’ xk’ab’a’ li Jesukristo, li qaQaawa’ ut Kolonel. Amen.