2010–2019
Seia Tatou Toe Feiloai
Aperila 2014


Seia Tatou Toe Feiloai

Ata
Peresitene Thomas S. Monson

Ia i ai ma ia faatasi ma i tatou le Agaga na tatou lagonaina i nei aso e lua a o tatou faatinoina a tatou galuega i aso uma.

Ou uso e ma tuafafine, oka se konafesi ina a matagofie. Ua fafagaina i tatou faaleagaga a o tatou faalogologo atu i upu musuia a alii ma tamaitai na saunoa mai ia i tatou. Ua matua faagaeetia musika, o savali na sauniaina ma fofogaina e ala uunaiga a le Agaga Paia, ma o tatalo foi na faalatalata atili atu ai i tatou i le lagi. Ua siitiaina i tatou i auala uma a o tatou auai faatasi ai.

Ou te faamoemoe o le a tatou faaaluina le taimi e toe faitau ai i savali o le konafesi pe a maua i luga o le LDS.org i totonu o nai aso ma pe a lolomiina i lomiga o le a sosoo ai o mekasini o le Ensign ma le Liahona, aua ua onomea i ai lo tatou toe iloiloina ma toe suesueina ma le toto’a.

Ou te iloa tou te aufaatasi ma au i le faailoaina o lo tatou lotofaafetai faamaoni i uso ma tuafafine o e na faamaloloina i lenei konafesi. Sa latou auauna atu ma le lelei ma na faia ni sao iloga i le galuega a le Alii. Ua atoatoa lo latou tuuto.

Ua tatou lagolagoina foi, e ala i le siilima, ia uso ua valaauina i tofiga fou o tiutetauave. Matou te faafeiloai atu ia i latou ma manao ia latou iloa ua matou tulimatai atu e auauna faatasi ma i latou i le galuega a le Matai.

A o tatou mafaufau loloto ai i mea ua tatou faalogo i ai, e ao ona tatou naunau ia faia ni mea lelei atu nai lo mea na tatou faia i le tuanai. E ao ona tatou agalelei ma agaalofa atu ia i latou e le tutusa o tatou talitonuga ma o tatou tulaga faatonuina. Na aumai e le Faaola i lenei lalolagi se savali o le alofa ma le agalelei i alii ma tamaitai uma. E tatau lava ona tatou mulimuli i Lana faataitaiga i taimi uma.

O loo tatou fetaiai ma le tele o luitau ogaoga i le lalolagi i aso nei, ae ou te faamautinoa atu ia te outou o loo manatu mai lo tatou Tama Faalelagi ia i tatou. O le a Ia taialaina i tatou ma faamanuiaina i tatou pe a tatou tuu atu lo tatou faatuatua ma le faalagolago ia te Ia ma o le a Ia fesoasoani mai ia i tatou i soo se faigata tatou te oo i ai.

Ia i ai faamanuiaga o le lagi ia i tatou uma taitoatasi. Ia faatumulia o tatou aiga i le alofa ma le faaaloalo atoa ai ma le Agaga o le Alii. Ia tatou fafagaina pea e le aunoa a tatou molimau o le talalelei, ina ia avea ma se puipuiga mo i tatou i le faasagatau mai o tu’iga a le tiapolo. Ia i ai ma ia faatasi ma i tatou le Agaga na tatou lagonaina i nei aso e lua a o tatou faatinoina a tatou galuega i aso uma, ma ia maua pea i tatou i taimi uma o loo faia le galuega a le Alii.

Ou te molimau atu e moni lenei galuega, o loo soifua lo tatou Faaola, ma o loo Ia taialaina ma taitaia Lana Ekalesia i luga o lenei fogaeleele. Ou te tuu atu ia te outou lau tautinoga ma lau molimau o loo soifua le Atua lo tatou Tama Faavavau ma e alofa ia i tatou. O Ia moni o lo tatou Tama, ma e patino ma moni lava o Ia. Tau ina ia tatou iloaina Lona naunau e fia latalata mai ia i tatou, ma Lona naunau e faia soo se mea e fesoasoani ai ia i tatou, ma le tele o Lona alofa ia i tatou.

Ou uso e ma tuafafine, ia faamanuia outou e le Atua. Ia i ai Lona filemu folafolaina faatasi ma outou i le asō ma aso uma.

Ou te faatofa atu seia tatou toe feiloai foi i le isi ono masina, ma ou te faia ai nei mea i le suafa o Iesu Keriso, lo tatou Alii ma le Faaola, amene.