2010–2019
Aikuj: Pā ko im Bōro ko n̄an Kōm̧ōjkajļo̧k Jerbal in
Eprōļ 2014


Aikuj: Pā ko im Bōro ko n̄an Kōm̧ōkajļo̧k Jerbal in

Jemaron̄ leļo̧k pā ko n̄an jipan̄ juon bōro n̄an kōm̧ōkajļo̧k jerbal eo em̧m̧an an Jemedwōj Ilan̄.

Iakwe sister ro, ij iakwe kom̧! Ilo ad alooje pija in eaiboojoj, kwaar ke loe peim̧ make ej diwōjļo̧k n̄an jipan̄ juon armej ikebonin iaļ in bujen in? Iaar ļōmņak kōn juon leddik edik ilo Būraimere etan Brynn eo ewōr wōt juon pein im ej kōjerbal pein n̄an leļo̧k n̄an kōjeram̧m̧an n̄an baam̧le eo an im ro m̧ōttan—Armej ro Rekwojarjar ilo Raan-ko Āliktata im ro jen tōmak ko jet. Edeo ke? Im barāinwōt kom̧! Sister raņ, jemaron̄ leļo̧k pā ko n̄an jipan̄ im juon bōro n̄an kōm̧ōkajļo̧k jerbal in em̧m̧an an Jemedwōj Ilan̄.

Baj āinwōt sister ro ad retiljek ilo jeje ko rekwojarjar, āinwōt Eve, Sarah, Mary im elōn̄, raar jeļā kadkadier im jibadbad eo aer, Brynn ejeļā ej juon leddik nejin Anij. 1 Jebar jeļā kadkad eo ad ekwojarjar āinwōt leddik ro nejin Anij im aorōk in jerbal eo epād Ippān n̄an ad kōm̧m̧ane.

Rilo̧mo̧o̧r eaar katakin, “Eļan̄n̄e jabdewōt armej e kōņaan kōm̧anm̧an ankilaan, e naaj jeļā kōn naan in katak ko.2 Ta eo jej aikuj jeļā im kōm̧m̧ane “naaj mour im bar Iben”?3 Jemaron̄ katak jān bwebwenato eo an likao eo em̧eie eo eaar kajjitikin Jisōs ta eaar aikuj in kōm̧m̧ane n̄an maron̄ bōk mour indeeo.

Jisōs eaar uwaake, ‟A eļan̄n̄e kwō kōņaan deļo̧n̄ ilowaan mour, kwōn pokake kien ko.”

Likao eo eaar kajjitōk ewi wōt iaer Ej aikuj pokake. Innām Jisōs ej kakeememej e kōn jet iaan Kien ko Jon̄oul ko jemeļeļe kaki.

Likao eo e ba n̄an e, “Naan kein otemjej Iar pokake; ewi wōt men eo I jan̄in tōpare?”

Jisōs e ba n̄an e, ‟Eļan̄n̄e kwō kōņaan bwe kwōn weepān, kwōn ilo̧k im wiakaki men ko am̧ im leļo̧k n̄an ro re jeram̧ōl, im enaaj wor m̧weiōm̧ i lan̄, im kwōn itok im ļoor Eō.”4

Jisōs eaar kūri n̄an erom m̧ōttan jerbal in An—jerbal eo an juon rikaļoor. Jerbal eo ad ejjab oktak. Jej n̄an likūt iturājet men ko an laļ in, … eddāb n̄an bujen ko [ad],5 im itok n̄an Kraist im ļoor E. Ej ta eo rikaļoor ro rej kōm̧m̧ane!

Kiiō, sister ro, jen jino inepata kōn eddōkļo̧k eo ad kōnke Rilo̧mo̧o̧r eaar ba n̄an likao eo em̧weie kōn aikuj wāppen. Naan eo wāppen ilo bwebwenato in eaar ukook jān juon naan in Greek meļeļein “dedeļo̧k.” Ilo ad kajjieon̄ ad maron̄ n̄an wōnm̧aanļo̧k ikebonin iaļ in bujen in, jej erom likio ļo̧k im wāppen ilo mour in.

Āinwōt likao eo emeie ilo raan ko an Jisōs, jet iien jej mālijjon̄ n̄an joļo̧k ak oktak lik ļo̧k kōnke jej ļōmņak jej jab maron̄ make kōm̧m̧ane. Im jej jim̧we! Jej jab maron̄ kōm̧m̧ani men ko repen kar kajjitōk ippād n̄an kōm̧m̧ani ilo an ejjeļo̧k jipan̄. Jipan̄ ej itok jen Pinmuur eo an Jisōs Kraist, tōl eo an Jetōb Kwojarjar, im jen pein jipan̄ ko an ro jet.

Juon sister ejjeļo̧k pāleen eaar kam̧ool bwe jen Pinmuur eo, eaar lo kajoor n̄an kōjerbal pein jipan̄ ko im bōro eo em̧ōņōņō n̄an kōkkaajririik emān ajri ro sister eo an eaar em̧m̧akūt jen er ke eaar mej jān kānjer. Ej kakeememej eō juon men Elder Neal A. Maxwell eaar ba: “Aolep men kein repidodo Kabun̄ in eaar aikuj kōm̧m̧ani raar dedeļo̧k. Jān kiiō m̧aanļo̧k, ej ito itak eutiej, im jem̧jerā ej erom idajon̄jon̄ ilo jet wāween ko rekabwilōn̄lōn̄.”6 Kwaar jilkintok n̄an laļ ilo tarlepin iien in kōnke wōn kwe im ta eo kwaar m̧aanjebpopo n̄an kōm̧m̧ane! Mekarta ta Satan enaaj kajjieon̄ n̄an kareel kōj n̄an ļōmņak wōn kōj, kadkad eo ad em̧ool ej bwe juon rikaļoor an Jisōs Kraist!

Mormon eaar juon rikaļoor em̧ool eo eaar mour ilo juon raan ke “bōro otemjej eaar penļo̧k, … im eaar jan̄in kar wōr nana ekanooj ļap ilbubwilijin aolep ro nejin Liai.”7 Ekōjkan am̧ naaj kōņaan n̄an mour ilo raan ko? Im kiiō Mormon ej kajoor ilo an kwaļo̧k, “Lo, n̄a ij ri kaļran Jisōs Kraist, eo Nejin Anij.”8

Kwoj ke iakwe Mormon? Eaar jeļā wōn kar e im ta kar mijen eo an im ekar jab m̧ad kōn men eo enana eaar jebo̧o̧le. Ilo m̧ool eaar kile kūr eo an āinwōt juon menin letok.9

Ļōmņak kōn juon kōjeram̧m̧an ej iten ņaetan n̄an lewaj menin letok eo ad kōn ad rikaļoor iien otemjej n̄an Irooj, ej kwaļo̧k ilo naan im kōm̧m̧an, “Lo, n̄aij juon rikaļoor an Jisōs Kraist!”

Ij iakwe bwebwenato eo Būreejtōn Boyd K. Packer eaar kwaļo̧k kōn juon sister eo eaar kajjirere kōn kapilōk eo an rikanaan n̄an kakoņkoņ m̧ōn̄ā. Armej in eaar kōnanaik ļōmņak in bwe n̄e iien ej pād ilo aikuj, m̧ōn̄ā ko kijen naaj būki im liļo̧k n̄an ro jet. Uwaak eo an eļamwaan im kajoor āinwōt juon rikaļoor em̧ool eaar, “Diktata, ij aikuj bōk tok jidik men ko.”10

Ij iakwe kōrā ko ilo Kabun̄ in. Iaar loe kajoor eo ami. Iaar loe tōmak eo ami. Ewōr ippāmi juon men n̄an leļo̧k, im kom̧ij m̧ōņōņō in leļo̧k. Kom̧ij kōm̧m̧ane jab n̄an kwaļo̧k ilo̧bwilej ak karelel, kan̄ōltok n̄an Anij jej kabun̄jar, kōj make, im kōn ejjeļo̧k ļōmņak kōn ta jenaaj bōke.11 Ej ta eo rikaļoor ro rej kōm̧m̧ane!

Iaar ioon juon jiron̄ ilo Philippines eo baam̧le eo an raar janiknikļo̧k ilo m̧akūtkūt an Kabun̄ in ke eaar 7 iiō rūtto, kōm̧akeļo̧k iaan n̄an etetal ilo juon iaļ ekauwōtata n̄an m̧ōnjar eo wiik im bar wiik. Eaar jiron̄ eō ke eaar 14 iiō wāween an kar pepe bwe eaar aikuj m̧ool wōt n̄an bujen ko an bwe en erreo n̄an karūttoļo̧k baam̧le eo an ilju im jekļaj ilo juon em̧ “eaar jeram̧m̧an jen kajoor an priesthood eo.”12 Wāween eo em̧m̧an n̄an kōkajoorļo̧k juon em̧, kiiō ak ilju im jekļaj, ej kōjparok bujen ko, kalim̧m̧ur ko jaar kōm̧m̧ani n̄an doon im n̄an Anij.

En̄in ej ta eo rikaļoor ro rej kōm̧m̧ane!

Juon kōrā in Japan etiljek im ļeo pāleen raar lotok mijen eo am̧ ilo Korea. Eaar jaje kajin Korea im jidik wōt an maron̄ kōnono kajin Pālle, ak eaar wōr juon bōro em̧ōņōņō ippān n̄an kōjerbal menin letok eo an eaorōk im jipan̄ pā ko n̄an kōm̧m̧ani jerbal an Irooj. En̄in ta eo rikaļoor ro rej kōm̧m̧ane! Eaar katakin mijenede ro am̧ jidik origami—juon lo̧n̄i emaron̄ peļļo̧k im kilōk. Innām ej kōjerbal jet kajin Pālle ko ejeļā n̄an katakin mijenede ro n̄an “kōppeļļo̧k lo̧n̄ier” n̄an kwaļo̧k ko̧jpeļ eo—juon katak rej jamin naaj meļo̧kļo̧k.

Pijaik ium̧win juon minit kwe im n̄a rej jutak ippān doon ippān milien sister ro im būratōr ro ilo Kabun̄ in An, rej wōnm̧aanļo̧k kōn kajoor, kōm̧m̧ane ta eo rijilōk ro rej kōm̧m̧ane—jerbal im iakwe āinwōt Rilo̧mo̧o̧r eo. Ta meļeļein n̄an kwe n̄an erom rikaļoran Jisōs Kraist?

Jakit ko im jiiln̄ij ko Mormon Helping Hands kar kōņaki jen jibūkwi taujin rikaļoor ro rewijlepļo̧k an Jisōs Kraist ro raar m̧ōņōņō kōn iien eo em̧m̧an n̄an leļo̧k jerbal in jipan̄ ilo ānwbin. Ak ewōr wāween ko jet n̄an jerbal āinwōt rikaļoor ro rewijlepļo̧k. Ļōmņak ippa mōk kōn jet jain ko ilo jetōb “jipan̄ riaikuj” rejelet jerbal in lo̧mo̧o̧r in:

  • Jipan̄ riaikuj: ro jinen im jemān rej karūttoļo̧k ajri ro nejier ilo meram im m̧ool

  • Jipan̄ riaikuj: leddik im ļaddik ro, sister im būratōr ro, m̧am̧a im baba ro, riliki ro, im bubu im jim̧m̧a ro, im m̧ōtta ro rem̧ool n̄an jerbal āinwōt rikatakin ro im leļo̧k pein jipan̄ ko ikebonin iaļ in bujen eo

  • Jipan̄ riaikuj: ro rej eo̧ron̄ im̧we ko an Jetōb Kwojarjar eo im m̧akūtkūt ekkar n̄an im̧we ko rej būki

  • Jipan̄ riakuj: ro rej mour kōn ko̧jpeļ eo aolep raan ilo wāween ko reddik im reļam waan

  • Jipan̄ riaikuj: rijerbal in menmenbwij an baam̧le im tampeļ n̄an kobaik baam̧le ko indeeo

  • Jipan̄ riaikuj: mijenede ro n̄an kajedeede “nuuj ko rem̧m̧an”—ko̧jpeļ eo an Jisōs Kraist

  • Jipan̄ riaikuj: rilo̧mo̧o̧r ro n̄an pukōt ro rejbwābwe ilo iaļ eo aer

  • Jipan̄ riaikuj: rikōjparok bujen ko n̄an jutak pen kōn m̧ool im jim̧we

  • Jipan̄ riaikuj: rikaļoor ro em̧ool an Irooj Jisōs Kraist

Iiō ko ļo̧k, Elder M. Russell Ballard eaar leļo̧k juon clarion jilel n̄an sister ro ilo Kabun̄ in ke eaar ba:

“Kōtaan in kiiō im raan eo Irooj ej bar itok, Ej aikuji kōrā ro ilo aolep baam̧le, ilo aolep ward, ilo aolep jukjukinpād, ilo aolep laļ ro renaaj wōnm̧aantak ilo wāppen im ba naan ko aer im m̧akūtkūt ko aer, ‘N̄a e, jilkinļo̧k eō.’

“Kajjitōk eo aō ej, ‘Enaaj ke kwe juon iaan kōrā rein?”13

Ij kōjatdikdik kōj kajjojo maron̄ uwaak juon ainikien “Aaet!” Ij kili kōn naan ko an juon al in Būraimere:

Jej [leddik] in bujen ro kōn juon menin letok n̄an leļo̧k.

Jenaaj katakin ko̧jpeļ eo jen wāween ad mour.

Kōn kajjojo naan im m̧akūtkūt, jenaaj kam̧ool:

Jej tōmak, im jej jerbal n̄an Jisōs Kraist.14

Āinwōt rikaļoor ro rem̧ool, jemaron̄ ke leļo̧k būruwōd em̧ōņōņō im peid ejipan̄ n̄an kōm̧ōjkajļo̧k jerbal in An. Ejjab aorōk eļan̄n̄e, āinwōt Brynn, ewōr wōt juon peid. Ejjab aorōk eļan̄n̄e jej jan̄in de wāppen im likio. Jej rikaļoor ro rewijlepļo̧k ro rej pukōtļo̧k im jipan̄ doon ilo iaļ in. Sister ro ad rej kijoone epepen ko n̄an sister ro retiljek ro raar etetal m̧oktaļo̧k. Ippān doon, āinwōt sister ro im ilo juon wōt ippān rikanaan ro remour, rilolo ro, im rikwaļo̧k revelesōn ro epād kii ko an priesthood ippāer, jemaron̄ etetal āinwōt juon, āinwōt rikaļoor ro, āinwōt rikarejar ro kōn bōro em̧ōņōņō im pā ko n̄an kōm̧ōjkajļo̧k jerbal in lo̧mo̧o̧r in. Ilo ad kōm̧m̧an āindein, jenaaj erom āinwōt Rilo̧mo̧o̧r eo. Ij kam̧ool ilo etan Jisōs Kraist, amen.