Paingohk nuh ke Toeni

Tamuhlwel ac tahmtahel sacohk wiyuck, yohk engan luhk in pain kowos nuh ke toeni fin facluh nohfohn se inge ke Alu luhn Jisus Kraist luhn Mwet Luhlahlfongi ke Lwen-sahflah. Kuht tuhkweni nuh sie in oacna sie sucu luhlahp, puhs liki mempucr miliacn 15, sie sin sie nuh ke luhlahlfongi lasr ac ke kena lasr in lohng ac etwaclah ke pweng uh ma ac fah sruhmuhnyuck nuh sesr.

Mahlwem onkohsr tari ah sa na tari ke orekma luhn Alu uh fahsr nuh met tiacna tulohkihnyucki. Pwacr se luhk ke mahlwem se kuhtuh tari ac in kihsaci Tempuhl Gilbert Arizona, lohm na askuhlacna se. Ekuh se met liki kihsac sac, mukwikwi in ahkfuhlwact orek ke Discovery Park se fototo nuh we. Mwet fuhsr tausin singucul luo oruh mukwikwi luhn prokracm uh ke lusacn minit 90. Tacn, onon, ac sritaclkihnyacn mwe on uh arulacna suhmaht na pwacye.

Acn se inge tuh puhlakihn sie puhlamlam yohk, ac nga luhlahlfongi lah pruhe pucspucs suhpweyucklac nuh inkuhsrao wik ekahsr somlah ah ke enenuh yohk luhn af. Koluk ohiyac, af ah tuhkuh met kuhtuh liki ke mukwikwi in ahkfuhlwact sac muhtwacwacack ah ac afyaf ne ke sahflah! Mwet fuhsr ah ne wohlwack ke af ah ac mihsrihsr ke ohyohu luhn pacl uh, kuht nuh kwewa puhla Nguhn luhn Leum. Sifac ke prokracm se, “Moul Pwacye nuh ke Luhlahlfongi,”—motko ke ma inge: “Moul Pwacye nuh ke Luhlahlfongi”—tuh petsaciyucklac arlac wo ke isracsr ac kengki luhn mukul fuhsr ac muhtwacn fuhsr ah. Ne ohu ac af, pa inge luhlahlfongi sesseslah ac puhla moklweyuck se ma mwet fuhsr inge fah esam pacl nuh kwewa ac fah sruhmuhn nuh sin tuhlihk nahtuhlos ac nuhtin nahtuhlos ke yac puhs fahsruh uh.

Lwen se tohkoh uh, kihsac uh luhn Tempuhl Gilbert Arizona oreklac. Ac orwaclah tempuhl in orekma ahksiofok angngaul luo ke Alu uh. Sie na liki ekuh se met ah, lwen sac kahto ac fahtfaht. Moklweyuck na pwacye tuhkweni sac. Wiyuc pa Prestuhn Henry B. Eyring, Elder ac Sister Tad R. Callister, Elder ac Sister William R. Walker, ac Elder ac Sister Kent F. Richards.

Ke Mei Tempuhl Fort Lauderdale Florida fah kihsackihnyuck. Oasr tempuhl sahyac ma fah ahksahfyeyucklac ac kihsackihnyucklac ke pacl fahsruh ke yac se inge. Ke yac 2015 kuht kena ahksahfyelah ac kihsaci tempuhl sasuc fin acn puhkantwen fin facluh. Ohiyac se inge fah tuhtahflah. Ke tempuhl matuhkahkihnyuck met tari ac ahksahfyeyucklac uh, ac fah oasr tempuhl orekma 170 fin facluh nohfohn.

Kuht ne inge sang kuhiyacsr in ahksahfyelah tempuhl tuhkahkihnyuck tari ac fah tiac tuhkahkihn tempuhl sasuc ke pacl fototo fahsruh uh, kuht fah tahfwelah ohiyac se in liye enenuh ac konacack acn luhn tempuhl fahsruh uh. Mwe tuhkahk uh fah oreklac ke toeni luhlahp fahsruh. Kuht pa mwet muhsah tempuhl ac mwet fahsri tempuhl.

Inge, tamuhlwel ac tahmtahel, kuht ke tari lohng pweng ma ac fah ahkkahlwemyeyuck nuh sesr mihsenge ac lutu. Elos suc ac fah sramsram nuh sesr elos suk kahsruh ac kolyuck luhn inkuhsrao ke elos ahkolah pweng lalos uh.

Lwelah kuht—kuht nuh kwewa, inge ac acn sahyac—in sesseslah ke Nguhn luhn Leum ac ahkkweyeyuck ac moklweyuck ke kuht lohng ac etwaclah. Ke inen Jisus Kraist, Mwet Lahngo lasr, amen.