ຍິນດີຕ້ອນຮັບສູ່ກອງປະຊຸມໃຫຍ່ສາມັນ
ໂດຍ ປະທານທອມມັສ ແອັສ ມອນສັນ
ພວກເຮົາ ... ເປັນໜຶ່ງໃນສັດທາ ແລະ ດ້ວຍຄວາມປາດຖະໜາທີ່ຈະຟັງ ແລະ ຮຽນຈາກຂ່າວສານຊຶ່ງເຮົາຈະໄດ້ຍິນຕໍ່ໄປນີ້.
ອ້າຍເອື້ອຍນ້ອງທີ່ຮັກແພງ, ຂ້າພະເຈົ້າຂໍຕ້ອນຮັບທ່ານສູ່ກອງປະຊຸມໃຫຍ່ສາມັນທົ່ວໂລກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ເຮົາໄດ້ມາເຕົ້າໂຮມກັນເປັນຄອບຄົວໃຫຍ່, ມີສະມາຊິກຫລາຍກວ່າ 15 ລ້ານຄົນ, ດ້ວຍຄວາມເປັນໜຶ່ງໃນສັດທາ ແລະ ດ້ວຍຄວາມປາດຖະໜາທີ່ຈະຟັງ ແລະ ຮຽນຈາກຂ່າວສານຊຶ່ງເຮົາຈະໄດ້ຍິນຕໍ່ໄປນີ້.
ຫົກເດືອນໄດ້ຜ່ານໄປຢ່າງວ່ອງໄວ ໃນຂະນະທີ່ວຽກງານຂອງສາດສະໜາຈັກດຳເນີນໄປໜ້າຢ່າງບໍ່ຢຸດຢັ້ງ. ເດືອນແລ້ວນີ້ ຖືວ່າເປັນກຽດຢ່າງຍິ່ງທີ່ຂ້າພະເຈົ້າໄດ້ໄປອຸທິດພຣະວິຫານກຽວເບີດ ອາຣິໂຊນາ, ຊຶ່ງສວຍສົດງົດງາມຫລາຍແທ້ໆ. ຄ່ຳຄືນກ່ອນການອຸທິດ ໄດ້ມີການສະແດງສິນລະປະຢູ່ເດີ່ນ Discovery ທີ່ຢູ່ໃກ້ໆນັ້ນ. ກຸ່ມຊາວໜຸ່ມສິບສອງພັນຄົນໄດ້ທຳການສະແດງປະມານ 90 ນາທີ. ການຟ້ອນລຳ, ການຮ້ອງເພງ, ແລະ ການຫລິ້ນດົນຕີຕ່າງໆແມ່ນສວຍງາມ ແລະ ມ່ວນຊື່ນຫລາຍ.
ເຂດນີ້ເປັນເຂດທີ່ແຫ້ງແລ້ງ, ແລະ ຂ້າພະເຈົ້າເຊື່ອວ່າ ຄຳອະທິຖານຂອງຫລາຍຄົນທີ່ທູນຂໍຄວາມຊຸ່ມເຢັນໄດ້ຂຶ້ນເຖິງສະຫວັນ ໃນຫລາຍອາທິດກ່ອນໜ້າມື້ສະແດງ. ແຕ່ໜ້າເສຍໃຈນຳ, ຝົນໄດ້ຕົກລົງມາກ່ອນການສະແດງໄດ້ເລີ່ມຕົ້ນ ແລະ ກໍຍັງຕົກລົງມາຢູ່ໃນໄລຍະທີ່ທຳການສະແດງ! ເຖິງແມ່ນນັກສະແດງໜຸ່ມປຽກທັງຕົວ ແລະ ໜາວເຢັນ, ແຕ່ທຸກຄົນໄດ້ຮູ້ສຶກເຖິງພຣະວິນຍານຂອງພຣະຜູ້ເປັນເຈົ້າ. ການສະແດງນັ້ນ ທີ່ຊື່ວ່າ, “ຈົ່ງດຳລົງຊີວິດໃຫ້ຈິງຈັງຕໍ່ສັດທາ,” ໃຫ້ຄິດທີ່ຈະ: “ດຳລົງຊີວິດໃຫ້ຈິງຈັງຕໍ່ສັດທາ” ໄດ້ສະແດງອອກໃນໃບໜ້າທີ່ຍິ້ມແຍ້ມແຈ່ມໃສ ແລະ ໃນຄວາມກະຕືລືລົ້ນຂອງຊາວໜຸ່ມ. ເຖິງແມ່ນຈະໜາວເຢັນ ແລະ ປຽກຈາກຝົນກໍຕາມ, ແຕ່ຊາວໜຸ່ມເຫລົ່ານັ້ນຄົງບໍ່ມີວັນລືມປະສົບການທີ່ເຕັມໄປດ້ວຍສັດທາ ແລະ ການດົນໃຈຂອງເຂົາເຈົ້າ, ແລະ ຈະບອກເລົ່າເລື່ອງເຫລົ່ານັ້ນໃຫ້ລູກຫລານຟັງໃນຫລາຍໆປີຂ້າງໜ້າ.
ມື້ຕໍ່ມາ ພຣະວິຫານກຽວເບີດ ອາຣິໂຊນາ ໄດ້ຖືກອຸທິດ. ມັນເປັນພຣະວິຫານແຫ່ງທີ 142 ທີ່ເປີດບໍລິການໃນສາດສະໜາຈັກ. ບໍ່ເໝືອນຄືນກ່ອນ, ມັນເປັນມື້ທີ່ສວຍງາມ ແລະ ແຈ່ມໃສ. ການອຸທິດແຕ່ລະພາກກໍເຕັມໄປດ້ວຍການດົນໃຈແທ້ໆ. ປະທານເຮັນຣີ ບີ ໄອຣິງ, ແອວເດີ ແລະ ຊິດສະເຕີ ແທດ ອາ ຄາລິດສະເຕີ, ແອວເດີ ແລະ ຊິດສະເຕີ ວິວລຽມ ອາ ວອກເກີ, ແລະ ແອວເດີ ແລະ ຊິດສະເຕີ ເຄັນ ແອັຟ ຣິເຈີດສ໌.
ໃນເດືອນພຶດສະພານີ້ ພຣະວິຫານຝອດ ລາເດີແດວ ຟໍຣິດາ ກໍຈະຖືກອຸທິດແລ້ວ. ສ່ວນພຣະວິຫານແຫ່ງອື່ນໆກໍໄດ້ຖືກກຳນົດທີ່ຈະສ້າງໃຫ້ສຳເລັດໃນທ້າຍປີນີ້. ໃນປີ 2015 ພວກເຮົາຈະມີການອຸທິດພຣະວິຫານໃໝ່ແຫ່ງຕ່າງໆຢູ່ໃນຫລາຍບ່ອນທົ່ວໂລກ. ການສ້າງພຣະວິຫານຈະດຳເນີນຕໍ່ໄປ. ເມື່ອພຣະວິຫານທີ່ໄດ້ປະກາດໄປແລ້ວຖືກສ້າງສຳເລັດ, ເຮົາຈະມີພຣະວິຫານເປັນຈຳນວນ 170 ແຫ່ງ ເປີດບໍລິການຕະຫລອດທົ່ວໂລກ.
ເຖິງແມ່ນວ່າ ປະຈຸບັນນີ້ ພວກເຮົາໄດ້ເອົາໃຈໃສ່ກັບການສ້າງພຣະວິຫານທີ່ໄດ້ປະກາດໄປແລ້ວນັ້ນ ໃຫ້ສຳເລັດ ແລະ ຈະບໍ່ປະກາດເຖິງການສ້າງພຣະວິຫານແຫ່ງອື່ນຕື່ມອີກໃນເວລາໝໍ່ໆນີ້, ແຕ່ພວກເຮົາຈະຍັງດຳເນີນການພິຈາລະນາເບິ່ງຄວາມຕ້ອງການ ແລະ ການຊອກຫາສະຖານທີ່ສ້າງພຣະວິຫານໃນອະນາຄົດ. ແລ້ວຈະມີການປະກາດໃຫ້ຮູ້ໃນກອງປະຊຸມໃຫຍ່ສາມັນໃນພາຍໜ້າ. ພວກເຮົາເປັນຜູ້ທີ່ມັກສ້າງພຣະວິຫານ ແລະ ມັກໄປພຣະວິຫານ.
ບັດນີ້, ອ້າຍເອື້ອຍນ້ອງທີ່ຮັກແພງ, ເຮົາຕື່ນເຕັ້ນຫລາຍທີ່ຈະໄດ້ຍິນຂ່າວສານພາຍໃນມື້ນີ້ ແລະ ໃນມື້ອື່ນ. ຜູ້ທີ່ຈະກ່າວກັບເຮົາກໍໄດ້ສະແຫວງຫາຄວາມຊ່ອຍເຫລືອ ແລະ ການຊີ້ນຳ ໃນຂະນະທີ່ພວກເພິ່ນຕຽມຂ່າວສານຂອງພວກເພິ່ນ.
ຂໍໃຫ້ເຮົາ—ທຸກຄົນ, ຢູ່ທີ່ນີ້ ແລະ ໃນບ່ອນໃດກໍຕາມ—ຈົ່ງເຕັມໄປດ້ວຍພຣະວິນຍານຂອງພຣະຜູ້ເປັນເຈົ້າ ແລະ ໄດ້ຮັບການເຊີດຊູໃຈ ແລະ ການດົນໃຈດ້ວຍເຖີດ ໃນຂະນະທີ່ເຮົາຮັບຟັງ ແລະ ຮຽນຮູ້. ໃນພຣະນາມຂອງພຣະເຢຊູຄຣິດ, ພຣະຜູ້ຊ່ອຍໃຫ້ລອດຂອງເຮົາ, ອາແມນ.