Susū Maia i le Konafesi

Ou uso e ma tuafafine pele, ua ou fiafia lava e faafeiloai atu ia te outou i lenei konafesi i le lalolagi atoa a Le Ekalesia a Iesu Keriso o le Au Paia o Aso e Gata Ai. Ua tatou potopoto faatasi o se aiga tēle, ua silia ma le 15 miliona tagata malolosi, ua lotogatasi i lo tatou faatuatua ma i lo tatou manao ia faalogo atu ma aoao mai i savali o le a fofogaina mai ia i tatou.

Ua vave lava ona mou atu le isi ono masina a o agai pea i luma le galuega a le Ekalesia e aunoa ma le faalavelaveina. Sa ou maua se avanoa e silia ma se masina talu ai e faapaia ai le Malumalu o Gilbert Arisona, o se maota ofoofogia. O le afiafi a o lumanai ai le faapaiaga sa faia ai se faafiafiaga faaleaganuu i le malae na lata ane o Discovery Park. Sa faatino e le autalavou e sefululua afe se polokalama e 90 minute. Sa matua mataina ia siva, ma pesega, ma faatinoga faamusika.

O le eria lea sa taia i se vaitau mūgālā uiga ese, ma ou te talitonu sa tele ni tatalo na auina atu i le lagi i le gasologa o vaiaso ona sa matua manaomia le timu. Ae paga lea, na oo mai le timu ae o le a amata le faafiafiaga ma timu ai lava i le faafiafiaga atoa! E ui lava la i le susu uma o le autalavou i le timu ma maalilili ona o le malulu, ae sa matou lagonaina uma le Agaga o le Alii. O le autu o le polokalama o le, “Ola Tutumau i Faatuatuaga,”—mafaufau i lena mea: “Ola Tutumau i Faatuatuaga”—lea sa faatinoina ma le ofoofogia e ala i le laumata fiafia ma le naunautai o alii ma tamaitai talavou. E ui sa malulu ma timuga, ae o se aafiaga lenei sa faatumulia i le faatuatua ma musuia o le a teuloto pea e le autalavou ma o le a latou faamatalaina i a latou fanau ma fanau a fanau i tausaga o lumanai.

O le aso na sosoo ai, na faia ai le faapaiaga o le Malumalu o Gilbert Arisona. Ua avea nei ma malumalu lona 142 o loo faaaogaina i le Ekalesia. E ese mai i le afiafi na muamua ai, o lea aso sa matagofie ma faatumulia i le la susulu. Sa musuia moni lava ia sauniga. Sa matou auai faatasi ai ma Peresitene Henry B. Eyring, Elder ma Sister Tad R. Callister, Elder ma Sister William R. Walker, ma Elder ma Sister Kent F. Richards.

Ia Me o le a faapaiaina ai le Malumalu o Fort Lauderdale Florida. Ua fuafuaina isi malumalu ina ia faamaeaina ma faapaiaina i se taimi o mulimuli mai i le tausaga. I le 2015 ua matou faamoemoe ai e faamaeaina ma faapaiaina ni malumalu fou i le tele o vaega o le lalolagi. O le a faaauau pea lenei faagasologa. A maea uma loa malumalu ia na faasilasila atu talu ai nei, ona atoa ai lea o le 170 o malumalu o loo faaaogaina i le lalolagi atoa.

E ui o loo matou taulai atu a matou taumafaiga i le faamaeaina o malumalu na faasilasila atu talu ai nei ma o le a le toe faasilasilaina nisi malumalu fou i se taimi vave i le lumanai, ae o le a faaauau pea le faagasologa o le fuafuaina o manaoga ma le sailia o nofoaga mo ni malumalu i le lumanai. Ona toe fai atu ai lea o ni faasilasilaga i konafesi aoao i le lumanai. O i tatou o ni tagata fau malumalu ma ni tagata e o i malumalu.

O lenei, ou uso e ma tuafafine, ua tatou naunau lava e fia faalogologo atu i savali o le a fofogaina mai ia i tatou i le asō ma ā taeao. O i latou o le a saunoa mai na sailia le fesoasoaniga ma le taitaiga a le lagi a o latou saunia a latou savali.

Tau ina ia faatumulia—i tatou uma, iinei ma soo se mea—i le Agaga o le Alii ma ia siitiaina ma musuiaina a o tatou faalogologo atu ma aoao. I le suafa o Iesu Keriso, lo tatou Faaola, amene.