2010–2019
O A Ituaiga o Tagata?
Aperila 2014


O A Ituaiga o Tagata?

Ata
Elder Donald L. Hallstrom

O a ni suiga o manaomia mai ia i tatou ia avea ai ma ituaiga o tagata e tatau ona avea ai?

A tatou mafaufau i lenei sauniga i le lalolagi atoa, ua faamanatu mai ai ia i tatou e leai se mea e faatusalia i lenei faatasiga—i soo se mea lava. O le faamoemoega o le sauniga a le au perisitua o le konafesi aoao o le aoaoina lea o e umiaina le perisitua i le ituaiga o tagata e tatau ona avea ai i latou (tagai 3 Nifae 27:27) ma ia musuia i tatou ia ausia lena gafatia.

I tausaga o lo’u Perisitua Arona i Hawaii i le afa seneturi talu ai faapea ma se faifeautalai i Egelani, matou te potopoto ai i falelotu ma (faatasi ai ma se taumafaiga malosi) e faalogologo i le sauniga perisitua e faaaoga ai se fesootaiga i le telefoni. I ni tausaga mulimuli ane, sa mafai ai ona faasalalau atu e satelite sauniga i nofoaga filifilia o le Ekalesia i na masini ipu tetele ina ia mafai ai ona matou faalogo uma ma matamata i taualumaga. Sa matou maofa lava i lena tekinolosi! E toaitiiti i latou sa mafaufauina le lalolagi i lenei taimi, lea ua faaaoga ai e soo se tasi le Initoneti i se telefonipoto, tapeleti, po o se komepiuta ona mauaina le savali o lenei sauniga.

Peitai, o lenei avanoa faateleina naua e faafofoga ai i siufofoga o auauna a le Alii, lea e tutusa lava ma le siufofoga o le Alii lava Ia (tagai MF&F 1:38), e itiiti lava sona taua vagana ai ua tatou loto e talia le upu (tagai MF&F 11:21) ona mulimuli ai lea. I se faaupuga faigofie, o le faamoemoega o le konafesi aoao faapea ai ma lenei sauniga perisitua e faatoa faataunuuina pe afai tatou te loto e faatino—pe afai tatou te loto e sui.

Pe a ma le luasefulu tausaga talu ai sa ou auauna ai o se epikopo. Sa tele taimi faaumiumi sa ma feiloai ai ma se alii e matua tele ia te au i le matou uarota. O lenei uso sa i ai se faafitauli i lo la va ma lona toalua ma sa le toe fesootai ai ma le la fanau. Sa faigata ia te ia ona tumau i se galuega, sa leai ni uo mamae, ma sa oo ina faigata tele ona fegalegaleai ma tagata o le uarota lea na iu ai ina le toe naunau e auauna atu i le Ekalesia. I se tasi o talanoaga o’oo’o e uiga i luitau i lona olaga, sa ia soso mai ai i o’u luma—i le faaiuina ai o le ma talanoaga mulimuli o le mau talanoaga na ma faia—ma fai mai, “Epikopo, o au ou te ita leaga tele, ma e pau lava o au ia!”

O lena faamatalaga na faateia ai au i lena po ma ua faalavelave pea ia te au talu mai lena taimi. O le taimi lava na tonu ai i lenei alii—o le taimi lava e faaiuina ai e soo se tasi o i tatou—“E pau lava o au ia,” ua tatou lafoaia lo tatou tomai e sui ai. E sili ai lava la le togi o le solo, lafoai auupega, faiaina i le taua, ma siilima loa—ua leai se faamoemoe e manumalo. E ui e manatu nisi o i tatou e le o ni o tatou uiga ia, ae masalo o i tatou uma taitoatasi e faaalia e le itiiti ifo ma le tasi pe lua ni mausa leaga, “E pau lava o au ia.”

Ia, ua tatou feiloai i lenei sauniga perisitua ona o tagata o loo i ai tatou ae e le o tagata e mafai ona avea ai tatou. Ua tatou feiloai i le po nei i le suafa o Iesu Keriso. Ua tatou feiloai i se talitonuga maumaututu o Lana Togiola ua maua ai e i tatou uma taitoatasi—po o a lava o tatou vaivaiga, o tatou faaletonu, ma o tatou vaisu—le tomai e sui ai. Ua tatou feiloai ma le faamoemoe, e tusa lava po o a tatou mea na faia i le tuanai, e mafai lava ona faaleleia lo tatou lumanai.

Pe a tatou auai i lenei sauniga ma le “manatu moni” ia sui (Moronae 10:4), e mafai ona ulufale atoa le Agaga i o tatou loto ma mafaufau. E pei ona faaali atu e le Alii i le Perofeta o Iosefa Samita, “Ma o le a oo mai o le tulaga … latou [te] … faaaoga [ai] le faatuatua … ia te au”—manatua o le faatuatua o se mataupu faavae o le mana ma faatinoga—“o le a Ou sasaa atu lo’u Agaga i luga o i latou i le aso o le a latou faapotopoto faatasi ai i latou lava” (MF&F 44:2). O lona uiga o le po nei!

Afai e te manatu ua lemafaatoilaloina ou luitau, sei ou tau atu la ia te oe se alii sa ma feiloai i se tamai nuu i fafo atu o Hyderabad, Initia, i le 2006. Sa faaalia e lenei alii se naunautaiga e sui. Sa fanau mai Appa Rao Nulu i se nuu maotua o Initia. Ina ua tolu ona tausaga, sa aafia o ia i le faamai pipili ma sa tuua ai ma le le atoatoa o le malosi faaletino. Sa tau atu i ai e lona nuu ua faatapulaaina ma le matuia ona gafatia. Peitai, i le avea ai ma se talavou matua, sa ia feiloai atu i a tatou faifeautalai. Sa la aoao atu ia te ia se gafatia sili atu, e le gata i le olaga nei ae faapena foi le faavavau a sau. Sa papatisoina o ia ma faamauina o se tagata o le Ekalesia. Faatasi ai ma se vaaiga mamao na matuai siitiaina, sa ia setiina ai se sini ia maua le Perisitua Mekisateko ma auauna atu i se misiona. I le 1986 sa faauuina ai o ia o se toeaina ma valaauina ai e faamisiona i Initia. Sa le faigofie le savali—sa ia faia le mea sili, na ia mafaia e faaaoga se tootoo i ona lima uma, ma sa faafia ona ia pa’u—ae sa lei avea lava le fiu ma se filifiliga. Sa ia faia se tautinoga ia auauna atu ma le mamalu ma le tuuto i se misiona, ma sa ia faia.

Ina ua matou feiloai ma Uso Nulu, toetoe nei atoa le 20 tausaga talu ona maea lana misiona, sa ia faafeiloaia ma le fiafia i matou i le mea e gata ai le auala ma taitai atu matou i lalo i se auala gaoa ma palapala e tau atu i lona fale e lua potu o loo nonofo ai ma lona toalua ma le la fanau e toatolu. O se aso sa matua vevela ma lē toafimalie. O loo matua faigata pea ona savali o ia, ae sa leai sona faanoanoa. E auala i lona lava ia filiga, ua avea ai o ia ma se faiaoga, ua maua ai le a’oga mo tamaiti o le nuu. Ina ua matou ulufale atu i lona tamai fale, sa vave ona ia avatua au i le tulimanu ma toso mai i fafo se tamai pusa sa i ai ni ana mea totino sili ona taua. Sa ia manao ou te vaai i se fasi pepa. Sa faitauina e faapea, “Faatasi ai ma moomooga ma faamanuiaga lelei mo Elder Nulu, o se faifeautalai lototoa ma fiafia; [tusia] 25 Iuni, 1987; [sainia] Boyd K. Packer.” O le taimi lena sa asiasi atu ai Elder Packer i Initia ma saunoa atu i se vaega o faifeautalai, sa ia faamautu atu ai ia Elder Nulu ona gafatia. I lena agaga, o le mea na tau mai e Uso Nulu ia te au i lena aso i le 2006 e faapea na suia ai e le talalelei o ia—mo se taimi tumau!

I lea asiasiga i le aiga o Nulu, sa matou malaga ai ma le peresitene o le misiona. Sa alu atu e faatalanoa ia Uso Nulu, lona faletua, ma le la fanau—mo matua ina ia maua o la faaeega paia ma ia faamauina faapea ai ma le fanau ina ia faamauina i o latou matua. Sa matou faia foi fetuunaiga uma mo le aiga e malaga ai i le Malumalu o Hong Kong i Saina mo nei sauniga. Sa latou fetagisi ma le fiafia ona o le a faataunuuina la latou miti ua leva ona faatalitali i ai.

O le a se mea o loo faamoemoeina mai i se tasi o umiaina le perisitua a le Atua? O a ni suiga o manaomia mai ia i tatou ia avea ai ma ituaiga o tagata e tatau ona avea ai? Ou te faia atua ni fautuaga se tolu:

  1. E manaomia ona avea i tatou ma ni alii moni o le perisitua! Pe o i tatou o ni alii talavou e umiaina le Perisitua Arona po o alii o loo tauaveina le Perisitua Mekisateko, e manaomia ona avea i tatou ma ni alii moni o le perisitua, i le faaalia o le matua faaleagaga ona ua uma ona tatou osifeagaiga. Ma sa fai mai Paulo, “Ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti, a ua oo ina ou tagata matua, ona ou tiai lea o mea a tamaiti” (1 Korinito 13:11). E tatau ona ese i tatou ona o loo tatou umiaina le perisitua—ae le o le fiailoa po o le faamaualuga po o le fiasili—ae ia lotomaualalo ma ia aoaoina gofie ma agamalu. O le mauaina o le perisitua ma ona tofi eseese e tatau ona i ai sona uiga ia i tatou. E le tatau ona avea tau lava o se “mea ua masani ai” lea e tupu fua i ni vaitausaga patino ae o se faatinoga paia o feagaiga e osia ma le mafaufau tonu i ai. E tatau ona tatou lagonaina le faamanuiaina ma le faafetai tele i le faaalia lea i a tatou amioga uma. Afai tatou te le manatu mamafa i le perisitua, e manaomia la ona tatou sui.

  2. E manaomia ona tatou auauna atu! O le ute o le umiaina o le perisitua o le “faalauteleina o o [tatou] valaauga (tagai MF&F 84:33) e ala i le auauna atu i isi. O le aloese mai lo tatou tiute sili ona taua o le auauna atu i a tatou avā ma fanau, o le le taliaina po o le le faataunuuina atoatoa o valaauga i le Ekalesia, pe o le le popole foi i isi sei iloga lava ua talafeagai [ma ou tulaga], e le o tagata ia e tatau ona avea ai i tatou. Sa tautino mai le Faaola, “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” (Mataio 22:37) ma fetalai mulimuli ane, “Afai e te alofa mai ia te a’u, e te auauna mai ia te a’u” (MF&F 42:29). O le manatu faapito e feteenai ma o tatou tiutetauave faaleperisitua, ma afai o se vaega lea o o tatou uiga, e manaomia ona tatou sui.

  3. E manaomia ona tatou agavaa! Atonu e le ia te au le tomai o Elder Jeffrey R. Holland, ina ua ia saunoa i se sauniga perisitua i nai tausaga talu ai ia “tu latalata i o outou luma … , muāisu i le muāisu, faatasi ma se lagona o le faananau fiafia” (“Ua Tauto i Tatou Uma,” Liahona, Nov. 2011, 45); ae, uso pele, e manaomia ona tatou feala i luga ma mataala i mea faalelalolagi ua taliaina e le toatele ia ua faavaivaiina ai lo tatou mana o le perisitua. Afai tatou te manatu e mafai ona tatou tā’alo’alo i ponokalafi pe solia foi le ola mama po o le le faamaoni i soo se ituaiga ma faapea e leai sona aafiaga leaga ia i tatou ma o tatou aiga, ua faaseseina la i tatou. Na ta’ua e Moronae, “Vaai ia outou faia mea uma ma le agavaa” (Mamona 9:29). Na faatonu mai ma le mamana le Alii, “Ma ou te tuu atu nei ia te outou se poloaiga ia outou faaeteete e faatatau ia te outou lava, ia outou gauai ma le filiga i upu o le ola e faavavau” (MF&F 84:43). Afai o i ai soo se agasala e lei faaleleia lava o loo taofia ai lo tatou agavaa, e manaomia ona tatou sui.

E na o le pau lava le tali atoa i le fesili na tuu mai e Iesu Keriso “O a ituaiga o tagata e tatau ona outou i ai?” o le tali puupuu ma le o’oo’o na Ia tuu mai: “E pei lava o au nei” (3 Nifae 27:27). O le valaaulia e “o mai ia Keriso, ma faaatoatoaina ia te ia” (Moronae 10:32) e manaomiaina uma ma e faamoemoeina ni suiga. Ma le alofa mutimutivale, Na te le o tuua lava na o i tatou. “Ma afai e o mai tagata ia te au o le a ou faaali atu ia te i latou o latou vaivaiga. … Ona ou faia lea o mea vaivai ia avea ma mea malolosi” (Eteru 12:27). O le faalagolago i le Togiola a le Faaola, e mafai ai ona tatou sui. Ua ou mautinoa lenei mea. I le suafa o Iesu Keriso, amene.