Ena Yasana Sa Tiko Kina Na Nomudou iYau

Ni oti ga vakalailai na koniferedi raraba vakayabaki ni Okotova 2007, a kaya e dua vei ira na veitacini ni na oti tale e vitu na yabaki ena qai yaco tale oqo vei au. Au vakacegu ka kaya vua ni na vakatoka me “vitu na yabaki vinaka sara.” Ia, oi au oqo; sa mai cava na vitu na yabaki ni noqu sautu.

Ena Janueri sa oti keirau a taura kei noqu daulomani, o Grace, e dua na ilesilesi mera sikovi na lewenilotu mai Filipaini era a vakaleqai ena dua na uneune levu kei na dua na cagilaba kaukauwa. Keirau a marautaka ni sa isau ni neirau masu na ilesilesi oqo ka ivakadinadina ni nona loloma soliwale kei na vinaka ni Tamada Vakalomalagi sa dauloloma. Sa mai vakavotukanataki kina na neirau gagadre me keirau laki vakaraitaka na neirau loloma kei na kauwai vei ira.

E vuqa vei ira na lewenilotu keirau laki sotava era se vakaicili tikoga ena valelaca, valenisoqo, kei na veivale ni Lotu. Eso na vale keirau sikova sa vo lailai se sega sara ga na delavuvu. E takiveiyaga na veika mera bula voli kina na matavuvale, kei na veika lalai se vo toka sa mai kau tani. E levu na dabibi kei na iyaya vakacacani ena yasana kecega. Ia, era vakavinavinakataka na nodra vukei ka ra yalovinaka ka yalodei, dina ga ni ra sotava tiko na dredre levu. Ni ra tarogi se vakacava tiko nodra bula, era kaya kece mai ena yaloqaqa, “Totoka tu.” E laurai, ni nodra vakabauti Jisu Karisito sa nodra inuinui ni na vinaka na ka kecega. Vale ki na vale, valelaca ki na valelaca, keirau a vakavulici kei Sisita Teh mai vei ira na Yalododonu yalodina oqo.

Ena gauna ni dredre se veivakaleqai, sa dau cakava na Turaga me vakayadrati keda kei na veika meda vakaliuca. E vakasauri ga, na iyau kece eda a gugumatua kina meda rawata e sa sega na betena. Na ka e vakabetena o ya na noda matavuvale kei na noda veimaliwai kei ira na tamata. E dua na sisita vinaka e kaya kina: “Ni sa siro sobu na wai sa tekivu sara na sasamaki, au raica na noqu vale ka vakasama kina, ‘Oilei, sa levu na benu au kumuna tu ena veiyabaki kece oqo.’”

Au kila ni o sisita oqo sa totoka sara nona rai ka yaco kina me qarauna na veika e yaga kei na veika e sega ni gadreva o koya me bula kina.

Ena cakacaka kei ira e vuqa na lewenilotu ena veiyabaki, keirau raica ka marautaka na levu ni kaukauwa vakayalo. Keirau raica talega na nodra vakaiyau se sega na nodra iyau o ira na lewenilotu yalodina oqo.

Ni gadrevi, e vuqa vei keda eda cakacakataka na ilavo ka volia eso na iyaya vakavuravura meda tokoni ira noda matavuvale. E gadrevi meda solia kina na gauna kei na noda kauwai. E sega na itinitini ni veika ni vuravura oqo, sa qai bibi dina meda vulica ka kila ni sa rauti keda. Keda sega ni qaqarauni, eda na saga sara vakalevu na veika vakavuravura ka segai na veika vakayalo. Noda saga na veika vakayalo ka tawamudu ena toka sara e muri, ka sega ni kena e donu taumada. E ka ni rarawa, sa vaka me maqusataki tikoga vakaukauwa meda vakaiyau ga vakalevu ka volia na ka vovou ka veimedreyaki.

Meda na vakadeitaka vakacava ni da na sega ni temaki ki na salatu o ya? E vakasala kina o Jekope: “Dou kakua ni volitaka na nomudou ilavo ena ka e sega na betena, kei na nomudou cakacaka ena ka dou sa sega ni mamau kina. Dou vakarorogo sara vei au ka nanuma na vosa au sa tukuna vei kemudou; dou lako mai vua na Yalosavasava ni Isireli ka kania na ka sa sega ni ca ka sega ni vuca, ia na yalomudou ena qai marautaka na ka sa uro.”¹

Au nuitaka ni da sega ni volia na veika e sega na kena yaga se cakacaka e sega ni da kune vinaka kina.

E vakavulica oqo na iVakabula vei ira na Jiu kei ira na Nifai:

“Dou kakua ni kumuna vata vei kemudou na iyau e vuravura, e dauvakacacana kina na sarasara se veveka, a sa ravabasuka kina na daubutako me butakoca:

“Ia mo dou kumuna vata na nomudou iyau mai lomalagi, sa sega ni vakacacana na sarasara se na veveka, a sa sega ni ravabasuka na daubutako me butakoca:

“Raica ena tiko na yalomudou ena yasana sa tiko kina na nomudou iyau.”²

Dua tale na gauna, a solia na iVakabula na vosa vakatautauvata oqo:

“Sa dua na tamata vutuniyau sa vakalewe vinaka sara na nona vanua:

“A sa qai vakananuma e lomana, ka kaya, A cava meu kitaka, ni sa sega na noqu lololo meu binia kina na noqu lewe ni veiwere?

“Sa qai kaya, Oqo ga kau na kitaka: au na basuka na noqu lololo, ka tara tale eso e lelevu; au na qai binia kecega kina na noqu lewe ni veiwere kei na noqu iyau.

“Au na qai kaya ki na yaloqu, Yaloqu, sa levu na nomu iyau sa bini tu ena rauta ena yabaki e vuqa; mo vakacegu marau, mo kana, mo gunu, mo marau tiko.

“Ia sa kaya vei koya na Kalou, Ko iko na lialia, ena bogi ga oqo, ena tarogi tale vei iko na yalomu: ena qai nei cei na veika ko sa vakarautaka?

“Sa vakakina ko koya sa daubinia na iyau me nona, a sa sega ni vutuniyau ena ka ni Kalou.”³

A solia o Peresitedi Dieter F. Uchtdorf na ivakasala oqo ena dua na gauna sa oti:

“E raica rawa na Tamada Vakalomalagi na ka eda rawa vakaidina ni yacova. E kila o Koya na veika e baleti keda ka da sega tu ni kila oi keda vakaikeda. Ena noda gauna ni bula e vakauqeti keda o Koya meda vakayacora na inaki ni noda a buli ena vuravura oqo, meda bulataka na bula savasava, ka lesu yani ki na Nona i serau.

“Na cava na vuna, eda vakayagataka kina vakalevu na noda gauna kei na noda igu ena veika era sega ni tudei, sega na betena, ka sa rui vovodea? Eda besetaka li meda raica na lialia ni kena tovolei me vakayacori se rawati na veika e sega ni yaga ka vakalekaleka walega?”⁴

Eda kila taucoko ni ituvatuva ni noda iyau vakavuravura e oka kina na dokadoka, iyau, veika vakayago, kaukauwa, kei na dokai mai vei ira na tamata. Meda kakua ni vakalusi gauna kina se kauwaitaka, kau sa na goleva vakatabakidua mada na ituvatuva ni noda iyau mai lomalagi.

Na cava eso na iyau mai lomalagi eda rawa ni kumuna tiko me noda? Me tekivu, ena vinaka meda taukena na itovo sa va-Karisito o ya na vakabauta, inuinui, yalomalua, kei na loloma. Eda sa dauvakasalataki tiko “meda [biuta] tani na itovo vakayago ka … meda vaka na gonelailai.”⁵ Sa veivunauci kina na iVakabula meda sa sasagataka meda uasivi sara vakataki Koya kei na Tamada Vakalomalagi.⁶

Karua, e dodonu meda vakayagataka na veigauna vinaka kei na sasaga me qaqaco na veimaliwai vakamatavuvale. Me vaka ni, “matavuvale e lumuti mai vua na Kalou. Sa ikoya e dua na tabana bibi duadua ni gauna oqo ka tawamudu.”⁷

iKatolu, na noda qaravi ira na tamata sa ivakatakilakila dina ni dua sa daumuria vakaidina na Karisito. E kaya o Koya, “Ni kemuni a cakava vua e dua sa lailai vei ira na wekaqu oqo, ni a cakava vei au.”⁸

Kava, na noda kila vinaka na vunau i Karisito ka vaqaqacotaka na noda ivakadinadina sa dua na cakacaka eda na reki kina ka yalo vakacegu. Meda sa qai vulica ena veigauna na vosa i Karisito era tiko ena ivolanikalou kei na nodra vosa na parofita bula. “Raica na vosa i Karisito sa tukuna vei kemudou na veika kece mo dou kitaka.”⁹

Meu tinia ena italanoa ni dua na yada yabaki 73 keirau a sotava ena neirau gole ki Filipaini:

Na gauna a yanaraka kina na yanuyanu o Bohol na uneune, a kasura ki ra na vale rau a tara kei watina sa mate, ka mate kina na luvena yalewa kei na makubuna tagane. Sa mai tu taudua oqo, sa gadreva me cakacaka me bula tiko kina. E dausava isulu (e ligana) ka cabe cake ka sirova tiko e dua na delana cere me laki taki wai mai vakavica e veisiga. Ni keirau sikovi koya, a se toka ga ena dua na valelaca.

A kaya kina o koya: “Elder, au sa ciqoma na ka kecega sa gadreva na Turaga meu curuma yani. Au sega ni yaloca kina. Au vakamereqeta noqu ivolatara ni valetabu kau dau vavana toka ena noqu ilokoloko. Mo ni kila niu dau sauma vakavinaka noqu ikatini mai na sede lailai ni noqu sava isulu. Se cava ga ena yaco, au na sauma ga na noqu ikatini.”

Au vakadinadinataka ni veika eda vakaliuca, ivakarau, itovo, gagadre, vinakata, kei na gagano ena veiumanaki tiko ki na noda bula e tarava. Meda sa qai nanuma kina na vosa ni iVakabula: “Ni na tiko talega na yalomudou e na yasana sa tiko kina na nomudou iyau.” Sa noqu masu me kunei ga na yaloda ena vanua dodonu, ena yaca i Jisu Karisito, emeni.