2010–2019
Tej uas Muaj Nqi rau Nej Nyob Qhov Twg
April 2014


Tej uas Muaj Nqi rau Nej Nyob Qhov Twg

Yog tias peb tsis xyuam xim, ces peb yuav pib xav tau tej yam ntawm lub ntiaj teb tshaj peb xav tau tej yam ntawm sab ntsuj plig.

Tsis ntev tom qab lub tuam rooj sab laj thaum lub Kaum Hli Ntuj xyoo 2007, kuv ib tug tij laug qhia kuv tias tshuav xya xyoo ua ntej kuv yuav tsum rov qab ua qhov txaus ntshai no dua. Ua rau kuv siab tus thiab kuv qhia nws tias kuv yuav hu lub sij hawm no ua “kuv xya xyoo uas muaj nplua mias.” Es, kuv nyob no; kuv xya xyoo uas muaj nplua mias twb tas lawm.

Lub Ib Hlis Ntuj tas los, kuv tus poj niam, Grace, thiab kuv twb raug txib mus xyuas cov mej zeej nyob hauv teb chaws Philippines uas raug txom nyem vim av qeeg loj thiab muaj cua daj cua dub loj kawg nkaus. Wb zoo siab vim qhov uas tau txib wb ua li no yog kev teb peb tej lus thov thiab yog ib qho pov thawj txog Leej Txiv Saum Ntuj Ceeb Tsheej uas muaj siab hlub peb txoj kev tshav ntuj thiab lub siab zoo. Qhov no tau pab wb ua raws li peb tej kev xav qhia tias peb hlub lawv thiab txhawj txog lawv.

Cov mej zeej uas peb ntsib feem coob tseem nyob hauv tej qhov chaw xws li tsev pheeb suab, qhov chaw rau zej zog koom ua ke, thiab tsev koom txoos. Cov tsev uas peb mus xyuas muaj ib feem ruv tsev xwb los sis tsis muaj ruv tsev hlo li. Cov neeg tsis tau muaj ntau yam thaum pib, thiab tej yam uas lawv muaj twb raug tshoob mus. Muaj av nkos thiab tej khoom raug puas tsuaj nyob txhua qhov chaw. Tiam sis, lawv ris txiaj thaum lawv txais kev pab thiab lawv zoo siab txawm lawv ua neej nyob thaum nyuaj npaum li no. Thaum twg wb nug lawv seb lawv nyob li cas, txhua tus teb hais tias, “Peb nyob zoo.” Peb paub hais tias, lawv txoj kev ntseeg Yexus Khetos ua rau lawv cia siab hais tias txhua yam yuav zoo thaum kawg. Ib lub tsev dhau lub tsev, tsev pheeb suab dhau lub tsev pheeb suab, Haiv Neeg Ntseeg uas rau siab ntseeg tau qhia Muam Teh thiab kuv.

Thaum peb raug txom nyem los yog kev puas tsuaj, tus Tswv txawj ua rau peb hloov peb tej kev xav thiab tej yam uas peb saib tseem ceeb. Tej yam khoom uas peb khwv ua hauj lwm kom tau txawm tsis muaj nqi lawm. Qhov uas muaj nqi rau peb yog peb tsev neeg thiab peb txoj kev sib raug zoo nrog lwm tus xwb. Ib tug muam tau hais li no tias: “Tom qab cov dej txawm thim rov qab ces yog lub sij hawm tu txhua yam, kuv saib ib puag ncig kuv lub tsev thiab xav tias, ‘Aub yauj, tau ntau xyoo kuv twb muab khib nyiab ntau khaws cia.”

Kuv xav tias tus muam no paub zoo dua ntais thiab txij no mus yuav xyuam xim txiav txim siab seb tej yam twg nws yuav tsum muaj thiab tej yam twg nws tsis tas muaj.

Ntau xyoo thaum peb ua hauj lwm nrog ntau tus mej zeej, peb zoo siab uas peb pom lawv txoj kev muaj dag zog heev ntawm sab ntsuj plig. Peb kuj tau pom ib txhia ntawm cov mej zeej rau siab ntseeg no uas muaj ntau yam khoom thiab ib txhia tsis muaj ntau yam.

Peb feem coob yuav tsum ua hauj lwm kom tau nyiaj thiab tau tej khoom ntawm lub ntiaj teb kom pab peb tsev neeg tau noj tau haus. Peb yuav tsum siv sij hawm ntau thiab tsom ntsoov rau qhov ntawd. Tsis muaj qhov kawg ntawm tej yam uas neeg ntiaj teb xav kom peb yuav, yog li ntawd peb yuav tsum paub thaum twg peb muaj txaus. Yog tias peb tsis xyuam xim, ces peb yuav pib xav tau tej yam ntawm lub ntiaj teb tshaj peb xav tau tej yam ntawm sab ntsuj plig. Qhov uas peb xav tau tej yam ntawm sab ntsuj plig thiab tej uas nyob mus ib txhis yuav ploj mus, thiab yuav tsis saib tej ntawd tseem ceeb. Tu siab uas tib neeg xav xav tau ntau yam khoom zuj zus tuaj thiab xav tau tej yam uas tshiab thiab zoo tshaj plaws.

Peb yuav tsum ua dab tsi kom peb thiaj tsis taug txoj kev no? Nifais ntuas li no hais tias: “Yog li ntawd, tsis txhob siv nyiaj rau tej uas tsis tsim nqi, los sis txhob siv nej tej zog rau tej uas yuav tsis txaus nej siab. Cia li mob siab mloog kuv, thiab nco ntsoov tej lus uas kuv tau qhia lawm; thiab cia li los cuag Ixayees Tus Dawb Huv, thiab cia siab rau tej uas yuav piam sij tsis tau, los sis tsis txawj lwj mus, thiab cia nej tej ntsuj plig nyob kaj siab rau tej khoom noj nplua mias.”1

Kuv cia siab hais tias peb tsis siv nyiaj rau tej uas tsis tsim nqi thiab tsis siv peb tej zog rau tej uas yuav tsis txaus peb siab.

Tus Cawm Seej qhia li no rau cov Neeg Yudais thiab cov Neeg Nifais:

“Nej tsis txhob khaws tej uas muaj nqi cia rau nej hauv ntiaj teb no, tej uas ntsaum kab rwg thiab xeb noj, thiab muaj tub sab nyiag:

“Tiam sis khaws tej uas muaj nqi cia rau nej tus kheej rau saum ntuj ceeb tsheej, tej uas npauj thiab xeb tsis ua kom puas tsuaj, thiab tub sab tsoo tsis tau tawg thiab tsis tuaj nyiag.

“Vim tej uas muaj nqi rau nej nyob qhov twg, nej lub siab yuav nyob qhov ntawd ib yam thiab.”2

Nyob hauv lwm qhov chaw, tus Cawm Seej hais zaj lus piv txwv no hais tias:

“Muaj ib tug txiv neej nplua nuj, nws muaj liaj muaj teb zoo thiab sau tau qoob loo ntau heev:

“Nws xav hais tias, Kuv yuav ua li cas? Kuv tsis muaj chaw txaus ntim kuv tej qoob loo no.

“Nws xav hais tias, Kuv yuav ua li no: Kuv yuav rhuav kuv lub txhab, thiab muab ua kom loj dua, thiaj txaus ntim kuv tej qoob loo thiab qhov txhia chaw.

“Ces kuv yuav hais rau kuv lub siab hais tias, koj muaj hmoo heev! Koj twb muaj txhua yam txhij zog uas kav ntau xyoo lawm. Koj cia li so nyob noj nyob haus.

“Tiam sis Vajtswv hais rau tus nplua nuj ntawd tias, Tus neeg ruam, hmo no koj txoj sia twb yuav tu; yog li ntawd, tej qhov txhia chaw uas koj npaj tseg yuav yog leej twg tug?

“Tus uas npaj tej uas muaj nqi los ua nws tug kom nws nplua nuj, Vajtswv tsis suav hais tias tus ntawd yog neeg nplua nuj.”3

Tsis ntev tas los Thawj Tswj Hwm Dieter F. Uchtdorf tau hais lus ntuas no:

“Peb Leej Txiv Saum Ntuj Ceeb Tsheej pom tias peb muaj peev xwm npaum li cas tiag tiag. Nws paub tej yam txog peb uas peb tsis paub ntawm peb tus kheej. Nws tshoov peb lub siab kom peb ua raws li qhov Nws tsim peb ua, kom ua neej zoo, thiab rov qab mus hauv Nws lub xub ntiag.

“Yog li ntawd, vim li cas peb yuav siv sij hawm thiab siv zog ua tej yam uas dhau mus sai, uas tsis tseem ceeb thiab ua rau lwm tus saib xwb? Peb tsis kam pom tias tej yam tsis tseem ceeb thiab tej yam uas tsis kav ntev yeej tsis muaj nqi li los?”4

Peb txhua tus paub hais tias tej yam uas muaj nqi rau neeg ntiaj teb yog kev muab hlob, kev nyiaj txiag, tej khoom, lub hwj chim, thiab tib neeg tej lus qhuas. Tsis ntxim siv sij hawm thiab tsom ntsoov rau tej yam no, yog li ntawd kuv yuav hais txog tej yam uas muaj nqi rau peb nyob saum ntuj ceeb tsheej.

Tej yam uas muaj nqi nyob saum ntuj ceeb tsheej uas peb khaws tau yog dab tsi? Qhov ib, yeej yog ib qho zoo yog peb coj yeeb yam zoo li Yexus Khetos xws li kev ntseeg, kev cia siab, kev txo hwj chim, thiab kev siab hlub. Cov yaj saub tau ntuas peb kom peb “tso tus neeg ntiaj teb tseg thiab … ua neeg zoo li ib tug me nyuam.”5 Tus Cawm Seej ntuas peb kom peb rau siab ua zoo tag nrho zoo ib yam li Nws thiab peb Leej Txiv Saum Ntuj Ceeb Tsheej.6

Qhov ob, peb yuav tsum siv sij hawm zoo thiab siv zog kom peb sib raug zoo nrog peb tsev neeg. Vim, “tsev neeg raug tsa los ntawm Vajtswv. Tsev neeg yog pawg neeg tseem ceeb tshaj plaws hauv lub neej no thiab lub neej uas nyob mus ib txhis.”7

Qhov peb, ib tug neeg uas ua raws li Yexus Khetos qhia yeej coj yam ntxwv pab lwm tus. Yexus hais tias, “Thaum uas nej tau pab kuv cov kwv tij no ib tug, txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag.”8

Qhov plaub, kev to taub Yexus Khetos txoj lus qhuab qhia thiab qhov uas peb ntxiv dag zog rau peb zaj lus tim khawv yog ib txoj hauj lwm uas yuav ua rau peb muaj kev xyiv fab thiab kev txaus siab. Peb yuav tsum kawm Yexus Khetos tej lus nyob hauv cov vaj lug kub thiab cov lus ntawm cov yaj saub ntawm lub caij nyoog no. “Vim saib seb, Khetos tej lus yuav qhia nej txhua txhia yam tsav uas nej yuav tsum ua.”9

Cia kuv xaus lus nrog ib zaj txog ib tug poj ntsuam uas muaj 73 xyoo uas wb tau ntsib thaum wb mus rau Teb Chaws Philippines.

Thaum av qeeg raug lub pov txwv Bohol, lub tsev uas nws thiab nws tus txiv uas tau tso ntiaj teb no tseg lawm nkawd tau sib zog ua twb vau rau hauv av, ua rau nws tus ntxhais thiab tus tub xeeb ntxwv tuag. Nim no nws nyob nws ib leeg, nws yuav tsum ua hauj lwm kom tau noj tau haus. Nws ntxhua khaub ncaws (uas nws xuas tes ua) thiab yuav tsum mus ped thiab los nram ib lub toj loj ob peb zaug txhua hnub mus hais dej. Thaum wb mus xyuas nws, nws tseem nyob hauv ib lub tsev pheeb suab.

Nws hais li no hais tias: “Txwj laug, kuv txais txhua yam uas tus Tswv tau hais kom kuv nyiaj dhau. Kuv tsis tu siab hlo li. Kuv saib kuv daim ntawv tso cai nkag tuam tsev rau nqi thiab muab ceev cia hauv qab kuv lub hauv ncoo. Thov paub tias kuv them ib feem kaum tag nrho los ntawm cov nyiaj tsawg uas kuv txais ntawm kev ntxhua khaub ncaws. Txawm raug dab tsi los, kuv yeej yuav them ib feem kaum.”

Kuv ua tim khawv tias tej yam uas peb saib yog yam tseem ceeb, tej yam uas peb nyiam ua, xav tau, thiab ntshaw yuav muaj feem nrog peb lub neej tom ntej. Cia peb nco ntsoov tus Cawm Seej tej lus hais tias: “Vim tej uas muaj nqi rau nej nyob qhov twg, nej lub siab yuav nyob qhov ntawd ib yam thiab.” Kuv thov Vajtswv kom peb lub siab yuav nyob ntawm qhov yog, los ntawm Yexus Khetos lub npe, amees.