O Le Mea Ua I Ai Lo Outou Oa

I le faatoa maea ai o le konafesi aoao ia Oketopa 2007, sa fai mai se tasi o le usoga ia te au masalo pe tusa ma le fitu tausaga ona faatoa ou toe oo lea i lenei aafiaga lofituina. Sa ou fiafia ma fai atu ia te ia o le a ou mafaufau i ai o la’u “fitu tausaga o le mau.” Ia, o au lenei; ua faamutaina nei la’u fitu tausaga o le mau.

Ia Ianuari talu ai, sa ma maua ai ma la’u manamea o Grace se tofiga e asiasi atu ai i le au paia i Filipaina ia na afaina i se mafuie tele ma se afa fulifaō matautia. Sa ma fiafia ona o lea tofiga o se tali lea i a ma tatalo ma o se molimau o le alofa mutimutivale ma le lelei o se Tama i le Lagi alofa. Sa maua ai sina faamalieina o lo ma faananau e faailoa patino atu ia i latou lo ma alolofa ma le popole.

O le toatele o le au paia sa matou feiloai sa nonofo lava i apitaga le tumau e pei o faleie, o nofoaga autu o nuu, ma falelotu o Ekalesia. O aiga na ma asia sa na o se vaega na i ai taualuga po o le leai foi o ni taualuga o fale. Sa le tele ni mea i tagata e toe tau amata ai, ma o nai mea sa latou maua sa tafiesea uma. Sa palapala ma otaota mea uma. Peitai, sa tumu i latou i le lotofaafetai mo ni nai fesoasoaniga sa latou maua ma sa faagaeetia e ui i o latou tulaga faigata tele. Pe a ma fesili atu ia i latou pe o a mai le taulimaina o faigata, sa tali mai tagata uma i se tali maumaututu, “O loo manuia.” Sa manino lava, o lo latou faatuatua ia Iesu Keriso na latou maua ai le faamoemoe o le a iu lava ina lelei mea uma. Mai lea fale i lea fale, i lea faleie i lea faleie, na aoaoina ai maua ma Sister Teh e nei Au Paia faatuatua.

I taimi o mala ma faalavelave, ua i ai i le Alii se ala e toe faataulai ai i tatou i mea tatou te faamuamuaina. E faafuasei lava, o mea faalelalolagi uma na tatou matua galulue malosi ai ia maua ua le toe taua. Ua na o le pau le mea ua taua nei o o tatou aiga ma a tatou mafutaga ma isi. Sa faamatalaina e se tasi tuafafine lelei i le ala lenei: “Ina ua pe atu le vai ma ua oo i le taimi e amata ai galuega faamama, sa ou fetilofa’i solo i lo’u fale ma mafaufau, ‘Oka, matua anoanoai a’u faaputuga lapisi i nei mau tausaga.’”

Ou te masalo ua maua e lenei tuafafine se vaaiga sili atu, ma i le agai i luma o le a filifili ai ma le faaeteete po o a mea e talafeagai ae o a foi mea e mafai ona ia soifua e aunoa ma le manaomia.

I le galulue ai ma le tele o tagata i le gasologa o tausaga, ua ma fiafia lava e matau se faatelega o le malosi faaleagaga. Ua ma vaaia uma foi se faatelega ma le leai o ni meatotino faalelalolagi i nei tagata faamaoni o le ekalesia.

Ona o se mea e manaomia, o le tele o i tatou e aafia i le sailia o tupe ma le mauaina o nisi o oloa faalelalolagi ina ia mafai ai ona tausia o tatou aiga. E manaomia ai se vaega tele o o tatou taimi ma le gauai. E leai se mutaaga o mea e ofo mai e le lalolagi, ma o lea e taua tele ai lo tatou aoaoina ia iloa po o le a le taimi e lava ai mo i tatou. Afai tatou te le faaeteete, o le a amata ona tatou tulitausi’oina mea faaletino e sili atu i lo mea faaleagaga. Ona avea lea o la tatou sailiga mo le faaleagaga ma le faavavau o se mea e faamulimuli nai lo le faamuamuaina. O le mea e faanoanoa ai, ua foliga mai o loo i ai se lagona malosi ia maua pea lava pea ma ia umiaina mea sili ona fou ma sili ona lata mai.

E faapefea ona tatou mautinoa tatou te le o tosina atu i lalo i lenei ala? Ua tuu mai e Iakopo le fautuaga lenei: “O le mea lea, aua le faaaluina tupe mo mea ua leai se aoga, po o a outou galuega mo mea e le ma’ona ai. Faalogo mai ia te a’u ma le filiga, ma ia manatua upu ua ou tautala atu ai; ma o mai i le Paia e Toatasi o Isaraelu, ma taumamafa fiafia i mea e le faaleagaina, pe mafai ona pala, ma tuu mai o outou agaga e fiafia i le lololo.”¹

Ou te faamoemoe e le o i ai se tasi o i tatou o loo faaaluina ni tupe mo mea lē aogā pe galue foi mo mea e le o faamalieina ai.

Na aoao atu e le Faaola le vaega lenei i Tagata Iutaia ma sa Nifae:

“Aua tou te teuina mo outou lava oa i luga o le lalolagi, i le mea o i ai le mogamoga ma le ele e faaleagaina, ma osofaia e tagata gaoi ma gaoi ai:

“A ia outou teuina mo outou lava oa i le lagi, i le mea e le o i ai se mogamoga po o se ele e faaleagaina, ma osofaia e tagata gaoi pe gaoia:

“Ona o le mea e i ai lau oa, o iina o le a i ai foi lou loto.”²

I se isi nofoaga, na tuu atu ai e le Faaola lenei faataoto:

“Na fua tele mai le fanua o le tasi tagata mauoa:

“Ona manatunatu ifo lea o ia, ua faapea, Se a se mea ou te faia, aua e leai sa’u mea e faaputu ai a’u fua?

“Ua fai ane foi o ia, O lenei le mea ou te faia; ou te sa’ena o’u fale saito, a e faia ia tele; ou te faaputu i ai a’u fua ma a’u mea lelei uma.

“Ou te fai ifo foi i lo’u agaga, Lo’u agaga e, ua ia te oe mea lelei e tele ua teuina mo tausaga e tele; ina nofonofo filemu ia, ina ai ia, ma inu ma ia e olioli.

“A ua fetalai atu le Atua ia te ia, O oe na le vale, e aamiina atu lou agaga nai ia te oe i le po nanei; a e fai ma ai mea ia ua e saunia?

“O loo faapea foi lē faaputu oa ia te ia, a e le mauoa i le Atua.”³

Sa tuuina mai e Peresitene Dieter F. Uchtdorf le fautuaga lenei e lei mamao tele atu:

“O loo silasila mai lo tatou Tama Faalelagi i o tatou gafatia moni. O loo Ia silafia mea e uiga ia i tatou ia tatou te le iloa e i tatou lava. Na te uunaia i tatou i o tatou olaga e faataunuu le fuafuaga faamoemoeina o lo tatou foafoaga, ina ia ola i se olaga amiotonu, ma ia toe foi atu ai i Lona afioaga.

“Aisea la, tatou te tuuto atu ai le tele o lo tatou taimi ma le malosi i mea lē tumau, e matuā lē taua, ma e papa’u? Pe ua tatou mumusu ea e vaai atu i le faavalevalea o le tulitulimatāgauina o mea lē taua ma lē tumau?”⁴

Ua tatou iloa uma lava o le tatou lisi o oa faalelalolagi o loo i ai le faamaualuga, tupe, mea totino, pule, ma viiga a tagata. Ua latou le toe faatauaina le taimi ma le gauai atu, o lea o le a ou taulai atu ai i mea o le a maua ai a tatou oa i le lagi.

O a nisi oa i le lagi e mafai ona tatou faaputuina mo i tatou lava? Mo le amataga, o le a lelei mo i tatou le mauaina o uiga faaKeriso o le faatuatua, faamoemoe, lotomaualalo, ma le alofa mama. Ua loa ona fautuaina i tatou ia “[tuu] ese le tagata o le lalolagi ma … [avea] e pei o se tamaitiiti.”⁵ O le apoapoaiga a le Faaola e mo i tatou uma ia tauivi ina ia atoatoa e faapei o Ia ma lo tatou Tama Faalelagi.⁶

Lua, e manaomia ona faaalu atili o tatou taimi taua ma taumafaiga i le faamalosia o sootaga faaleaiga. O le taunuuga, “o le aiga ua faauuina e le Atua. O le iunite sili lea ona taua i le olaga nei ma le faavavau.”⁷

Tolu, o le auauna atu i isi o se uiga auau mama lea o se soo moni o Keriso. Sa Ia fetalai, “Aua na faia e outou i le tasi o e aupito itiiti o o’u uso nei, o a’u lea na outou faia i ai.”⁸

Fa, o le malamalama i le mataupu faavae a Keriso ma le faamalosia o a tatou molimau o se galuega o le a aumaia ai le fiafia moni ma le faamalieina. E manaomia ona tatou suesueina i taimi uma ia afioga a Keriso e pei ona maua i totonu o tusitusiga paia faapea ai ma upu a perofeta soifua. “Aua faauta, o afioga a Keriso o le a ta’u mai ai ia te outou mea uma e tatau ona outou faia.”⁹

Sei ou faamaea atu i le tala a se tina matua e 73 tausaga ua maliu lana tane sa matou feiloai i la matou malaga i le Atu Filipaina:

Ina ua lulu le mafuie i le motu o Bohol, o le fale lea na la galulue malosi ai ma si ona toalua ua maliu e fau sa solo i lalo i le eleele ma fasiotia ai lana tama teine ma lana tama. Ua tuua nei na o ia, ma e manaomia lona galue e tausi o ia lava. Ua amata ona ia aveina tagamea (e ta lima) ma e ao ona alu faatele i luga ma sau i lalo mai le mauga tele i le aso e la’u mai le vai. Ina ua ma asia o ia, o loo nofo pea i se faleie.

O ana upu la nei: “Elder, ua ou taliaina mea uma ua finagalo le Alii ia ou oo i ai. E leai ni ou lagona faatautee. Ou te faapelepele i la’u pepa malumalu ma teuina i lalo o lo’u aluga. Faamolemole ia silafia ou te totogi atoa la’u sefuluai mai sina tamai tupe ou te maua mai le faiga o tagamea. E tusa lava po o le a le mea e tupu, o le a ou totogi pea le sefuluai.”

Ou te molimau atu o mea tatou te faamuamuaina, faanaunauga, mausa, manaoga, meaai e fia ai ai, ma tuinanauga o le a i ai se aafiaga tuusao i lo tatou olaga e sosoo ai. Ia tatou manatua i taimi uma le fetalaiga a le Faaola: “Aua o le mea ua i ai lo outou oa, e i ai atoa foi ma o outou loto.” Tau ina ia i ai o tatou loto i le mea sa’o, o la’u tatalo lea, i le suafa o Iesu Keriso, amene.