2010–2019
Tsis Yog Peb Txhua Tus Yog Neeg Thov Khawv Los?
October 2014


Tsis Yog Peb Txhua Tus Yog Neeg Thov Khawv Los?

Txawm peb muaj nyiaj los sis peb pluag, peb yuav tsum “ua li peb ua tau” thaum lwm tus xav tau.

Yog ib qho zoo kawg uas peb pib ua nyob hauv lub tuam rooj sab laj. Bien hecho, Eduardo.

Yog ib lub sij hawm uas ua rau neeg xav tsis thoob thaum Nws pib qhuab qhia, Yexus sawv hauv lub tsev teev ntuj nyob hauv Naxales thiab nyeem tej lus uas Yaxayas hais txog yav tom ntej no nyob hauv Lukas txoj Moo Zoo hais tias: “Tus Tswv tus Ntsuj Plig nrog nraim kuv, Rau qhov nws tsa kuv ua tus qhia txoj moo zoo rau cov neeg txom nyem. Vajtswv txib nws mus qhia txoj kev cawm dim rau cov neeg uas raug kaw, thiab … tso cov uas raug kev tsim txom kom dim.”1

Yog li ntawd yog thawj zaug uas tus Cawm Seej tshaj tawm rau cov pej xeem sawv daws hais txog Nws txoj hauj lwm qhuab qhia vim Nws yog tus Mexiyas. Tiam sis nqe no kuj qhia meej hais tias ua ntej Nws yuav theej peb lub txhoj thiab sawv rov los, Yexus lub luag hauj lwm thib ib vim Nws yog tus Mexiyas yog kev mus foom koob hmoov rau cov neeg pluag, tsis hais cov uas pluag ntawm sab ntsuj plig.

Txij thaum Nws pib qhuab qhia, Yexus hlub cov neeg pluag thiab cov neeg txom nyem kawg nkaus li. Nws niam nws txiv yog ob tug neeg pluag thiab nws loj hlob tuaj nrog lwm cov neeg pluag. Peb tsis paub ntau txog Nws lub neej hauv lub ntiaj teb, tiam sis muaj ib zaug Nws hais tias, “Txawm yog hma los muaj qhov nkaum, thiab noog los muaj zes; tiam sis Neeg Leej Tub tsis muaj chaw pw.”2 Zoo li tus uas tau Tsim lub ntuj thiab lub ntiaj teb “thiab tag nrho txhua yam uas nyob haud,”3 thaum Nws yog neeg laus, tsis muaj tsev nyob.

Txij thaum chiv keeb los, qhov kev nyuaj tshaj plaws uas tib neeg nyob thoob plaws lub ntiaj teb yuav tsum kov yeej yog qhov uas tib neeg raug txom nyem. Kev txom nyem uas pom tseeb yog los ntawm sab nqaij daim tawv, tiam sis qhov mob ntawm sab ntsuj plig thiab nyob hauv neeg lub siab kuj ua rau neeg qaug zog thiab. Txawm li ntawd los, tus Txhiv Dim hu kom peb koom tes pab Nws kawg siab kawg ntsws ris lub nra no muab tshem tawm ntawm cov neeg. Vim Nws yog Yehauvas, Nws hais tias Nws yuav rau txim rau tsev neeg Ixayees vim lawv “mus txeeb cov neeg pluag tej khoom los cia rau hauv [lawv] tej tsev puv nkaus li.”

Nws hais tias, “Nej tsis muaj cai yuam kuv haiv neeg thiab tsim txom cov neeg pluag.”4

Tus uas sau Paj Lug qhia meej hais tias: “Yog koj caij tsuj cov neeg pluag, ces yog koj saib tsis taus Vajtswv tus uas tsim lawv; [thiab tus uas] ntsaws qhov ntsej tsis kam mloog cov neeg txom nyem lub suab quaj thov, thaum [tus ntawd] quaj thov luag pab yuav tsis muaj leej twg hnov.”5

Nyob hauv peb lub caij nyoog no, tseem tsis tau muab Yexus Khetos lub Koom Txoos txum tim rov qab los tau ib xyoos thaum tus Tswv txib cov mej zeej saib xyuas cov neeg pluag thiab cov neeg txom nyem, thiab pab lawv kom lawv tsis txhob raug txom nyem.6 Cia li tsom ntsoov rau lo lus ntawd nyob hauv nqe ntawd hais tias kom lawv tsis txhob raug txom nyem. Vajtswv siv tej lus no thaum Nws hais tiag tiag.

Vim kev pab neeg txom nyem thoob plaws lub ntiaj teb yeej yuav nyuaj heev, ib tug txiv neeg los yog ib tug poj niam yuav ua li cas? Tus Xib Hwb twb qhia txog qhov no. Ua ntej neeg ntxeev siab thiab muab Nws ntsia saum ntoo khaub lig, Maivliag pleev roj tsw qab kim heev rau Yexus lub taub hau. Yudas Ixakali-us yws yws txog qhov no thiab “thuam tus poj niam ntawd.”7

Yexus hais tias:

“Ua cas yuav ua rau nws nyuaj siab? Qhov uas nws ua rau kuv ntawd yog qhov zoo. …

“[Nws] yeej ua raws li nws ua tau.”8

“Nws yeej ua raws li nws ua tau”! Yog ib lub ntsiab cai luv luv! Ib tus kws sau xov xwm tau nug Mother Teresa ntawm Calcutta txog nws txoj hauj lwm pab cov neeg txom nyem hauv lub nroog ntawd. Nws hais tias, raws li kev txheeb suav, zoo li Mother Teresa tsis pab ib yam dab tsi. Tus poj niam qis taub thiab zoo no teb hais tias nws ua ib txoj hauj lwm ntawm kev hlub, tsis yog ntawm kev txheeb suav. Txawm yog muaj neeg suav tsis txheeb uas nws pab tsis tau, nws hais tias nws yuav ua raws li lus txib kom hlub Vajtswv thiab neeg zej zog los ntawm qhov uas nws pab cov uas nws pab tau thiab siv tej yam uas nws muaj. Muaj lwm zaus nws hais tias, “Tej yam peb ua zoo li ib teev dej nrog hauv dej hiav txwv. “Tiam sis yog peb tsis ua ces, ntshe dej hiav txwv yuav me dua li ib teev dej.”9 Tus kws sau xov xwm txiav txim siab hais tias Kev Ntseeg Khetos tsis yog los ntawm kev txheeb suav. Nws xav hais tias yog nyob saum ntuj lawv muaj kev xyiv fab los ntawm ib tug neeg txhaum uas hloov siab lees txim ib yam li muaj kev xyiv fab thaum muaj cuaj caum tus neeg uas tsis tas hloov siab lees txim, ces ntshe Vajtswv tsis tshua quav ntsej txog qhov uas muaj neeg zoo ntau npaum li cas.10

Ces peb yuav ua li cas kom “ua li peb ua tau”?

Muaj ib qho uas peb ua tau, raws li tus Vaj Ntxwv Npeyamis qhia, kom peb yuav tsum tsis txhob txwv tsis pub nyiaj rau cov pluag vim peb xav tias lawv twb ua rau lawv tus kheej raug txom nyem. Tej zaum ib txhia twb ua kom lawv tus kheej raug kev nyuaj siab, tiam sis peb txhua tus tsis ua zoo ib yam li ntawd los? Puas yog li no tus uas muaj siab zoo kav no nug hais tias, “Tsis yog peb txhua tus yog neeg thov khawv los?”11 Tsis yog peb txhua tus thov kom tau kev pab thiab kev cia siab thiab txais lus teb rau peb tej lus thov los? Tsis yog peb txhua tus thov kom txais kev zam txim rau tej kev ua yuam kev thiab peb tej teeb meem los? Tsis yog peb txhua tus thov kom kev tshav ntuj yuav pab peb tej kev qaug zog, kom txoj kev hlub tshua yuav kov yeej kev txim lij rau peb los? Yog li no tus Vaj Ntxwv Npeyamis thiaj hais tias peb txais tau kev zam txim rau peb tej kev txhaum thaum peb thov Vajtswv, uas muaj siab hlub teb, tiam sis peb txais tau kev zam txim rau peb tej kev txhaum tas mus li thaum peb muaj siab hlub pab cov pluag uas thov peb.12

Nrog kev muaj siab hlub ua tej yam pab lawv, peb kuj yuav tsum thov Vajtswv pab cov uas xav tau. Muaj ib cov Neeg Xaulas, raws li hais nyob hauv vaj lug kub, vim cov uas mus rau lub koom txoos nrog lawv xav tias lawv “qias neeg” thiab zoo li “tej quav hlau,” lawv thiaj raug ntiab tawm ntawm tej tsev sab laj “vim yog lawv tej ris tsho qub heev.” Maumoos hais tias lawv “pluag rau tej khoom ntawm lub ntiaj teb; thiab lawv kuj … txom nyem hauv siab thiab”13—ob qho uas yuav luag txhua zaus koom ua ke. Ob tug tub txib Amas thiab Amulej hais txog qhov uas cov hnav khaub hlab raug ntiab tawm ntawm lawv tej tsev sab laj hais tias txawm yog lwm tus yuav txwv tsis pub lawv ua tej yam ntawd los, lawv yeej thov Vajtswv los tau—nyob hauv lawv tej liaj teb thiab nyob hauv lawv tej tsev, nrog lawv tsev neeg thiab nyob hauv lawv tej siab.14

Tiam sis, rau cov neeg uas twb raug ntiab tawm, Amulej hais tias, “Tom qab uas nej tau [thov Vajtswv] …, yog nej tsis kam lees cov neeg txom nyem, thiab cov neeg liab qab, thiab tsis saib xyuas cov neeg mob thiab txom nyem, thiab tsis faib nej tej khoom, yog nej muaj, rau cov uas txom nyom--kuv hais rau nej tias, … nej txoj kev thov Vajtswv yeej tsis muaj qab hau dab tsi, thiab yuav tsis ua ib yam dab tsi rau nej, thiab nej zoo li tej neeg siab phem uas tsis kam lees txoj kev ntseeg.”15 Qhov no ua rau peb nco ntsoov tias txawm peb muaj nyuaj los sis peb pluag, peb yuav tsum “ua li peb ua tau” thaum lwm tus xav tau.

Nim no, ua ntej lwm tus liam hais tias kuv pom zoo rau tej txheej xwm uas xav tias lawv pab cov pluag tiam sis tsis ua tiag tiag los sis xav tias kuv pom zoo rau neeg uas thov khawv tom kev, kuv qhia nej hais tias kuv saib kev ua hauj lwm, kev khaws nyiaj, kev pab tau yus tus kheej, thiab kev rau siab rau nqi tshaj txhua tus neeg hauv lub ntiaj teb no. Peb yeej yuav tsum pab peb tus kheej ua ntej peb nrhiav kev pab ntawm lwm tus. Tsis tas li ntawd xwb, kuv tsis paub nej txhua tus yuav tsum ua li cas kom pab tau cov uas pab tsis tau lawv tus kheej. Tiam sis kuv paub tias Vajtswv paub, thiab Nws yuav pab nej thiab coj nej ua siab dawb siab zoo pab lwm tus yog nej ua tib zoo xav thiab thov thiab nrhiav kom ua raws li lus txib uas Nws tau muab rau peb ntau zaus.

Nej yeej paub hais tias kuv hais txog tej kev nyuaj hauv peb lub sawm fem tsis yog cov uas yog mej zeej ntawm lub Koom Txoos xwb. Yog ib qho zoo uas tus Tswv txoj kev pab peb cov yeej yooj yim: txhua tus uas noj qab nyob zoo yuav ua raws li kev cai yoo mov. Yaxayas sau hais tias:

“Txoj kev cai yoo mov uas kuv txaus siab ua yog li no: …

“Faib nej tej zaub mov rau cov neeg tshaib plab noj thiab qhib qhov rooj rau cov neeg pluag uas tsis muaj tsev nyob. Pub ris tsho rau cov neeg txom nyem tau hnav … ? daws tej saw hlau ntawm txoj kev tsim txom, thiab … tso cov neeg uas raug tsim txom tawm mus … ?”16

Kuv ua tim khawv txog tej txuj ci tseem ceeb, tsis hais los ntawm sab ntsuj plig thiab sab nqaij daim tawv, uas los rau cov uas ua raws li kev cai yoo mov. Kuv ua tim khawv txog tej txuj ci tseem ceeb uas tau los rau kuv. Muaj tseeb tiag, raws li Yaxayas sau hais tias, kuv twb thov thaum kuv yoo mov, thiab Vajtswv twb teb hais tias, “Kuv nyob no.”17 Txhua lub hlis saib lub cib fim ntawd rau nqi thiab ua siab dawb pub nyiaj yoo mov npaum li nej pub tau tsis hais thaum nej pub nyiaj rau tej kev pab tib neeg, pab neeg kawm ntawv thiab pab cov tub txib los yog. Kuv cog lus tias Vajtswv yuav ua siab dawb pub rau nej, thiab cov uas nej pab yuav foom koob hmoov rau nej lub npe. Muaj xya puas tsib caug txhiab tus mej zeej ntawm lub Koom Txoos uas txais kev pab los ntawm nyiaj yoo mov uas cov npisov thiab lub Koom Haum Niam Tsev cov thawj tswj hwm muab. Haiv Neeg Ntseeg hauv Hnub Nyoog Kawg yeej ua nej tsaug.

Cov kwv tij thiab cov muam, vim kuv hais txog qhov no, kuv kuj yuav tsum qhia txog tej koob hmoov ntawm kuv lub neej, tsis hais los ntawm sab cev nqaij daim tawv thiab sab ntsuj plig, cov koob hmoov uas kuv tsis tsim nyog txais thiab kuv txais tas mus li. Ib yam li nej, tej lub sij hawm kuv twb txhawj txog nyiaj txiag, tiam sis kuv ib txwm tsis pluag, thiab kuv tsis paub tias cov pluag xav li cas. Tsis tas li ntawd xwb, kuv tsis paub yog vim li cas nyias muaj nyias xwm txheej sib txawv thaum yug los, kawm ntawv, ua hauj lwm thiab rau peb txoj kev noj qab nyob zoo nyob hauv lub ntiaj teb no, tiam sis thaum kuv pom tias muaj neeg coob uas xav tau heev, kuv paub tias “yog los ntawm Vajtswv txoj kev tshav ntuj kuv thiaj li tsis zoo ib yam li ntawd.”18 Kuv kuj paub hais tias txawm yog kuv tsis yog tus uas saib xyuas kuv tus kwv tas li, kuv yeej yog kuv tus kwv tus tij laug, thiab “rau qhov koj tau pub ntau rau kuv, kuv yuav pub thiab.”19

Hais txog qhov no, kuv xav qhuas Thawj Tswj Hwm Thomas S. Monson. Kuv twb tau koob hmoov vim kuv paub nws tau 47 xyoo lawm, thiab qhov uas kuv yuav nco ntsoov txog nws mus txog thaum kuv tso lub ntiaj teb no tseg yog qhov uas nws caij nyab hoom los tsev los ntawm Yelemes Teb Sab Hnub Tuaj uas raug xwm txheej ntau es nws rau khau khiab vim nws twb pub ib ce xuv thiab tej lub tsho thiab nws twb pub nws nkawm khau rau lawv thiab. “Tus uas txhais ko taw zoo nkauj kawg nyob rau saum tej roob [thiab mus kev hauv chaw tsaws nyab hoom] yog tus uas coj tej moo zoo los; uas tshaj tawm kev thaj yeeb.”20 Thawj Tswj Hwm Monson yeej “ua li nws ua tau” rau cov poj ntsuam thiab cov me nyuam ntsuag, cov pluag thiab cov txom nyem, twb ua ntau tshaj lwm tus neeg uas kuv paub.

Nyob hauv kev tshwm sim rau Yaj Saub Yauxej Xamiv thaum xyoo 1831, tus Tswv hais tias muaj ib hnub cov neeg pluag yuav pom Vajtswv lub nceeg vaj los kom tso lawv dim nrog hwj chim thiab yeeb koob loj.21 Thov peb yuav pab kom muaj raws li kev qhia tej yuav muaj los yav ntej ntawd thaum peb los nrog hwj chim thiab yeeb koob ntawm qhov uas peb yog mej zeej hauv Yexus Khetos lub Koom Txoos tseeb kom tso txhua tus dim ntawm tej kev txom nyem uas khi lawv thiab qhov mob uas ua rau lawv tej zaj npau suav ploj mus, kuv thov li no los ntawm Yexus Khetos lub npe zoo, amees.