2010–2019
Kam Luk
Oktoba 2014


Kam Luk

Jos blong Jisas Kraes, i bin oltaem, mo bae i oltaem stap olsem wan misinari jos.

Mesej blong mi i go stret long olgeta we oli no memba blong Jos blong Jisas Kraes blong Ol Lata-dei Sent. Bae mi tokbaot wan impoten kwestin we yufala i gat: “?From wanem ol Lata-dei Sent oli wantem tumas blong talem long mi wanem nao oli biliv long hem mo invaetem mi blong lanem abaot jos blong olgeta?”

Mi prea se Spirit blong Lod bae i helpem mi blong talem klia ol samting, mo blong andastanem klia, ansa ia long impoten kwestin ia.

Wan Tabu Wok

Olgeta disaepol blong Jisas Kraes we oli gat strong tingting, oli bin mo bae oltaem oli ol strong misinari. Wan misinari i wan we i folem Kraes mo i testifae abaot Hem olsem Ridima mo i talemaot ol trutok blong gospel blong Hem.

Jos blong Jisas Kraes, i bin oltaem, mo bae i oltaem stap olsem wan misinari jos. Wanwan memba blong Jos blong Sevya oli akseptem tabu wok blong givhan long tabu wok we Lod i bin givim long ol Aposol blong Hem, olsem we i stap long Niu Testeman:

“Nao from samting ia, yufala i mas go long ol man [mo tijim, mo baptaesem olgeta long nem blong Papa blong mi, … blong Pikinini blong hem, … mo long nem blong Tabu Spirit.

“Mo yufala i mas tijim olgeta blong oli folem olgeta tok ya we mi givim finis long yufala. Mo yufala i mas save se mi bae mi stap wetem yufala oltaem, gogo wol ya i finis. Amen” (Matiu 28:19–20).

Ol Lata-dei Sent oli series long responsabiliti ia blong tijim evri pipol long evri nesen abaot Lod Jisas Kraes mo gospel blong Hem we i kambak. Mifala i biliv se semfala Jos we Sevya i stanemap bifo i kambak long wol, mo Hem nao i putumbak long ol las dei. Doktrin, ol prinsipol, prishud atoriti, ol odinens, mo ol kavenan blong gospel blong Hem oli stap tedei long Jos blong Hem.

Taem mifala i stap invaetem yufala blong kam long jos wetem mifala, o blong lanem samting wetem ol fultaem misinari, mifala i no stap traem blong salem wan samting. Olsem ol memba blong Jos, mifala i no stap kasem praes, o poen long wan kompetisen blong heven. Mifala i no stap wantem leftemap namba blong Jos. Mo antap long hemia, mifala i no traem blong fosem yu blong biliv olsem mifala. Mifala i stap invaetem yufala blong harem ol trutok we oli kambak blong gospel blong Jisas Kraes, blong mekem se yufala i save stadi, tingting hevi, prea mo kam blong save yufalawan sapos ol samting we mifala i stap serem oli tru o no.

Sam long yufala i save talem: “Be mi biliv finis long Jisas mo stap folem ol tijing blong Hem.” O “Mi no save stret se God i stap o no.” Invitesen blong mifala i no traem blong daonem fasin blong relijin o eksperiens blong laef blong yu. Tekem evri samting we yu save se oli tru, oli gud mo oli nambawan tru—mo afta, testem mesej blong mifala. Semmak olsem we Jisas i invaetem tu long ol disaepol blong Hem blong “kam luk” (Jon 1:39), semmak, mifala i invaetem yufala blong kam luk sapos gospel we i kambak blong Jisas Kraes i kam komplitim wanem we yu stap biliv finis se i tru.

I tru. Mifala i filim wan tabu responsabiliti blong tekem mesej ia i go long evri nesen, famle, lanwis mo pipol. Mo hemia nao stret wanem mifala i stap mekem wetem wan ami tedei, we i gat moa long 88 taosen fultaem misinari we oli wok long ova 150 indipenden stet raon long wol. Ol gudfala yang man mo woman ia, oli helpem ol memba blong Jos blong mifala blong mekem i hapen, tabu wok ia we i blong wanwan blong mifala, blong talemaot gospel we i no gat en blong Jisas Kraes (luk long D&C 68:1)..

I Moa Bitim Wan Diuti long Saed blong Spirit

Be, strong fasin blong mifala blong talemaot mesej ia, i no from se mifala i filim diuti ia long saed blong spirit. Be, filing blong mifala blong wantem serem gospel we i kambak blong Jisas Kraes i soemaot hamas ol trutok ia oli impoten long mifala. Mi biliv se mi save soemaot from wanem mifala i tok stret blong eksplenem ol bilif blong mifala tru long wan eksperiens we waef blong mi mo mi i bin gat plante yia i pas wetem tufala boe blong mitufala.

Wan naet, Susan mo mi i sidaon kolosap long wan windo long haos blong mifala mo stap lukluk tu long ol smol boe blong mitufala i plei aotsaed. Tufala i pleiplei gogo, smolwan long tufala i kasem wan smol kil. Mitufala i luksave se hem i no kasem wan bigfala kil, mo mitufala i disaed blong stap nomo. Mitufala i wantem luk se eni storian blong mifala abaot fasin blong stap kaen i kasem tufala. Wanem i hapen afta i intresting mo i tijim mitufala.

Bigfala brata i toktok long smol brata mo helpem hem blong gobak long haos. Susan mo mi i go kolosap long kijin blong luk wanem bae i hapen afta, mo mitufala i rere blong go luk tufala sapos i gat sam moa kil long bodi, o sapos bae i gat wan bigfala aksiden.

Bigfala brata i pulum jea i go long sink blong kijin. Hem i klaem antap long jea, helpem brata blong hem kam antap long jea, openem tap blong wota, mo i stat blong putum plante sop blong wasem plet long han we i gat kil blong smol brata blong hem. Hem i traem bes blong wasemaot sloslo graon we i stap. Smol brata, fes blong hem, bae mi save tokbaot nomo olsem we i stap long lanwis blong ol skripja: “Bae oli gat stamba tingting blong singaot strong, mo krae, mo krae laod, mo kakae tut blong olgeta” (Mosaea 16:2). !Mo yes, smol boe ia i singaot strong!

Afta we oli finis brasem han, brata i draemap han wetem wan tawel. Nao, i nomo gat singaot. Bigfala brata i klaem antap long kabod blong kijin we i stap daon, i openem wan kabod antap, i faenem wan niu pomad blong soa. Nating ol smol kil long smol brata oli no bigwan o dip nating, bigfala brata, kolosap i flatem pomad ia long han blong smol brata. Singaot i nomo gat, from i luk se smol brata i laekem naes filing blong pomad ia bitim we hem i laekem sop blong wasem plet we i klinim han blong hem.

Bigfala brata i gobak long kabod ia, antap, we hem i faenem pomad, mo i tekem wan niu bokis blong klin plasta. Afta, i karemaot pepa mo putum plasta long evri ples long han blong smol brata—stat daon long han kasem elbo blong hem. Nao we imejensi i finis, mo wetem pomad mo plasta we i olbaot long kijin, tufala smol boe i jiam daon aot long jea wetem bigfala smael mo hapi fes.

Wanem i hapen afta nao i impoten moa. Brata we i kasem kil, i pikimap ol haf plasta mo pomad we i stap, mo i gobak aotsaed. Kwiktaem, hem i lukluk ol fren blong hem mo stat blong putum pomad mo plasta long han blong olgeta. Susan mo mi i sek long tru tingting, glad tingting, mo kwik wok blong hem.

?From wanem smol boe ia i mekem wanem hemia? Plis luk se kwiktaem nomo, mo wantaem nomo hem i wantem givim ol fren blong hem stret samting ia we i bin helpem hem taem hem i kasem kil. Smol boe ia, i no gat man i talem hem, i pusum hem, o fosem hem blong mekem samting. Hem i wantem serem risal blong wan gudfala eksperiens we i bin helpem hem.

Plante long yumi, ol adalt, i mekem samting long semfala wei taem yumi faenem wan meresin, o samting we i mekem soa i nomo soa, we yumi bin harem nogud long hem longtaem, o yumi kasem kaonsel we i letem yumi fesem ol jalenj wetem strong paoa long tingting, mo ol tu tingting wetem fasin blong wet longtaem. Blong serem wetem ol nara man ol samting we oli gat moa mining long yumi, o oli bin helpem yumi, i wan nomol samting nomo.

Semfala paten ia i kamaot klia long saed blong ol samting we oli impoten mo i gat risal long saed blong spirit. Eksampol, wan stori long wan buk blong skripja we oli save olsem Buk blong Momon, i haelaetem wan drim we wan profet lida bifo, Lihae i bin kasem. Stamba samting long drim blong Lihae i tri blong laef—we i ripresentem “lav blong God” we man i wantem i bitim evri samting, mo “i wan glad we i bigwan olgeta long sol.” (Fas Nifae 11:22–23; luk tu long Fas Nifae 8:12, 15).

Lihae i eksplenem:

“Mo i bin hapen se mi bin go aot mo mi bin kakae long frut blong tri ia; mo mi bin faenem se frut ia i moa swit bitim evri frut we mi bin testem bifo. Yes, mo mi bin luk se frut blong hem i bin waet i bitim evri waet samting we mi bin luk bifo.

Mo taem we mi bin kakae long frut blong tri ia, hem i bin fulumap sol blong mi wetem bigfala glad we i bigwan tumas; from samting ia, mi bin stat blong wantem tumas se famle blong mi bae i kakae long frut ia tu”(Fas Nifae 8:11–12; oli ademap italik).

Bigfala wei we God i soemaot lav we Hem i gat long ol pikinini blong Hem i seves, long wol ia, sakrifaes we i pem praes from sin, mo Laef Bakegen long Ded blong Lod Jisas Kraes. Frut antap long tri, oli save luk olsem wan saen blong ol blesing blong Atonmen blong Sevya.

Kwik muv blong Lihae afta we hem i tekem frut blong tru mo kasem wan bigfala glad, i we hem i wantem tumas blong serem hemia mo wok blong famle blong hem. Long wei ia, taem hem i tanem hem i go long Kraes, hem i tanem hem tu i go long ol narawan mo givim lav mo seves.

Wan nara impoten pat insaed long Buk blong Momon i tokbaot wanem i hapen long wan man we nem blong hem i Inos, afta we hem i prea strong, mo God i harem mo ansarem hem.

Hem i talem:

“Mo sol blong mi i bin hanggri; mo mi bin nildaon long fored blong Man we i bin mekem mi, mo mi bin prea long hem wetem wan strongfala prea mo bin askem hem strong from sol blong miwan; mo long fuldei mi bin prea long hem; yes, mo taem we naet i bin kam mi bin stap blong leftemap voes blong mi laod mekem se i bin kasem ol heven.

“Mo wan voes i bin kam long mi, i talem se: Inos, mi mi fogivim ol sin blong yu, mo bae mi blesem yu.

“Mo mi, Inos, mi bin save we God i no save giaman; from samting ia, hem i bin tekemaot ol rong blong mi.

“Mo mi bin talem se: Lod, yu mekem samting ia olsem wanem?

“Mo hem i bin talem long mi se: ‘From fet blong yu long Kraes, we yu yu neva bin harem o lukim hem. … From samting ia, go, fet blong yu i bin mekem yu klin.’

“Nao, i bin hapen se taem we mi bin harem ol toktok ia, mi bin stat blong gat wan tingting we mi wantem wan gudfala laef blong ol brata blong mi, ol man blong Nifae; from samting ia, mi bin poremaot ful sol blong mi long God from olgeta” (Inos 1:4–9; oli ademap italik).

Taem Inos i tanem hem long Lod “wetem evri tingting blong hat” (Seken Nifae 31:13), wari blong hem long gudfala laef blong famle, fren blong hem mo olgeta we hem i save olgeta, i kam antap wantaem.

Lesen blong lanem long tufala stori ia, i we i impoten blong gat eksperiens long laef blong yumi long ol blesing blong Atonmen blong Jisas Kraes olsem wan kondisen blong save givim seves wetem lav mo tru tingting, mo hemia i go bitim fasin blong mekem samting olbaot. Semmak olsem Lihae mo Inos, smol boe blong mitufala, long stori ia, mifala, olsem ol memba blong Jos blong Jisas Kraes blong Ol Lata-dei Sent i filim wari ia we i kam wetem tu tingting long saed blong spirit mo sin. Mifala tu, i gotru long eksperiens blong kam klin, gat pis long tingting, gat spirit i hil mo i kam niu bakegen, mo kaonsel we mifala i kasem nomo taem mifala i stap lanem mo laef folem ol prinsipol blong gospel blong Sevya.

Atonmen blong Jisas Kraes i givim wanem i nid blong yumi kam klin gud, mo klin, i givim pomad ia we i hilim ol soa long saed blong spirit mo i karemaot filing blong rong, mo i givim proteksen we i mekem se yumi save stap fetful long gud mo nogud taem.

Ol Trutok we Oli Tru Oli Stap

Long yufala, ol memba blong famle mo fren we yufala i no memba blong Jos blong Jisas Kraes blong Ol Lata-dei Sent, mi bin traem blong eksplenem ol stamba risen blong from wanem mifala i ol misinari.

Ol trutok we oli tru oli stap long wan wol we moa i go, i stap sakemaot mo talem se i no gat tru samting. Long wan fiuja taem “evri ni bae i bodaon,” mo “olgeta man bambae oli talemaot we Jisas Kraes, hem i Hae God, i Masta blong olgeta blong leftemap nem blong God, Papa blong yumi” (Filipae 2:10–11). Jisas we i Kraes, i tru evriwan, se Hem i Wan Pikinini Ia Nomo blong Papa we I No Save Finis. Olsem ol memba blong Jos blong Hem, mifala i witnes se Hem i stap laef mo Jos blong Hem i bin kambak fulwan long ol las dei ia.

Ol invitesen we mifala i stap givim long yufala blong lanem abaot mo testem mesej blong mifala oli kam from ol gudfala risal we gospel blong Jisas Kraes i mekem long laef blong mifala. Samtaem, mifala i strong, o tok stret, o gohed blong toktok. Simpol tingting blong mifala i blong serem, wetem yufala, ol trutok we oli impoten tumas long mifala.

Olsem wan long ol Aposol blong Lod, mo wetem ful paoa blong sol blong mi, mi testifae se Hem i tabu mo Hem i ril. Mo mi invaetem yufala blong “kam luk” (Jon 1:39), long tabu nem blong Jisas Kraes, amen.