Revelesen we I Gogohed blong Kam

Hop blong mi long saed blong yumi tedei, i blong yumi evriwan i filim lav mo laet we i kam long God. I gat plante oli stap lisin tedei, we oli filim se oli nidim tumas blesing ia blong kasem revelesen blong olgetawan we i kam long Papa long Heven we i lavem yumi.

Long ol misin presiden, maet i wan strong prea blong save hao blong leftemap tingting blong wan misinari we i traehad. Long wan papa o wan mama long wan ples long wol we wo i spolem gud, i wan nid blong save sapos bae oli muvum famle blong olgeta i go long wan sef ples o stap long ples we oli stap long hem. Ol handred stek presiden mo bisop oli stap prea tedei blong save olsem wanem blong helpem Lod blong sevem sipsip we i lus. Mo long wan profet, bae i blong save wanem Lod i wantem hem blong talem long Jos mo long wan wol we i stap long trabol.

Yumi evriwan i save se jajmen blong man mo stret fasin blong tingting bae i no inaf blong kasem ansa long ol kwestin we oli impoten long laef. Yumi nidim revelesen we i kam long God. Mo yumi no nidim wan revelesen nomo long taem blong trabol, be yumi nidim revelesen we i kam oltaem. Yumi no nidim nomo wan smol taem blong laet mo kamfot, be tu, yumi nidim blesing we i gohed oltaem blong toktok wetem God.

Jos i stap tedei from wan yang boe i bin save wanem i tru. Yang Josef Smit i bin save se, hemwan, bae hem i no save wijwan jos blong joenem. Mekem se hem i askem God, olsem buk we blong Jemes i talem se hem i save mekem. God Papa, mo Pikinini blong Hem we Hem i Lavem Tumas, Tufala i kamaot long hem long wan bus blong ol tri. Tufala i ansarem kwestin ia we Josef i no gat paoa blong ansarem.

God i no singaotem hem nomo blong stanemap tru Jos blong Jisas Kraes, be tu, wetem Jos ia, hem i putumbak paoa ia blong singaotem Tabu Spirit i kam, mekem se revelesen we i kam long God i save gogohed oltaem.

Presiden Boed K. Peka i tokbaot stret mak blong tru Jos long wei ia: “Revelesen i stap gogohed insaed long Jos: profet i kasem long bihaf blong Jos; presiden i kasem long bihaf blong stek, misin, o kworom blong hem; bisop i kasem blong wod; papa i kasem blong famle blong hem; mo wanwan man o woman i kasem blong hemwan.”¹

Gudfala rod blong revelesen i stat, i finis, mo i gohed taem yumi kasem ol revelesen blong yumiwan. Bae yumi tekem Nifae, boe blong Lihae, olsem eksampol blong yumi. Papa blong hem i gat wan drim. Ol narawan long famle blong Nifae, oli luk drim blong Lihae olsem wan pruf se tingting blong hem i no stret. Drim ia, i tekem wan oda we i kam long God, blong ol boe blong Lihae oli gobak long Jerusalem, nating denja i stap, blong oli tekem ol buk we oli gat toktok blong God, blong mekem se oli save folem rod i go long graon blong promes.

Plante taem yumi talem gud toktok blong Nifae taem papa blong hem i askem olgeta blong gobak long Jerusalem. Yufala i save ol toktok ia: “Bae mi go mo mekem ol samting we Lod i bin talem.”²

Taem Lihae i harem ol toktok we Nifae i talem, skripja i talem se “hem i bin glad tumas.”³ Hem i glad from se hem i bin save se Nifae i kasem blesing ia blong wan revelesen we i konfemem se drim blong papa blong hem i wan tru toktok we i kam long God. Nifae i no talem: “Bae mi go mo mekem wanem papa blong mi i talem.” Be hem i talem: “Bae mi go mo mekem ol samting we Lod i bin talem.”

Aot long eksperiens blong yu, long famle blong yu, yu save tu from wanem Lihae “i bin glad tumas.” Glad blong hem i kam from hem i save se Nifae i kasem wan revelesen blong konfemesen.

Plante papa mo mama oli putum rul blong taem we wan yangfala i save kambak hom long naet. Be tingting long glad ia, taem papa mo mama i lanem, olsem wan i bin mekem long sam wik i pas, se wan pikinini we i aot long haos, hemwan i no putum nomo taem blong hem blong kambak, be tu, hem i kipim Sabat olsem we oli bin tijim hem long hom. Revelesen blong wan papa mo mama, i wok longtaem, long revelesen ia we i gohed wetem pikinini.

Mama blong mi i andastanem prinsipol blong revelesen ia. Taem mi yang man, bae mi sarem doa blong haos slo taem mi kam hom let long naet. Mi mas pas long fored blong rum blong mama blong mi blong go long rum blong mi. Nomata we, mi wokbaot kwaet long fingga blong leg blong mi, taem mi kasem doa blong hem we i open smol, bae mi harem nem blong mi, kwaet nomo: “Hal. Traem kam smol taem.”

Bae mi sidaon long kona blong bed blong hem. Rum bae i tudak. Sapos yu lisin, bae yu ting se i givim wan gud toktok nomo long saed blong laef. Be kasem tedei, wanem hem i talem i kambak long maen blong mi wetem sem paoa we mi stap filim taem mi ridim ol toktok blong petriakel blesing blong mi.

Mi no save se hem i stap askem wanem long prea taem hem i stap wet long ol naet ia. Mi ting se bae i prea blong mi sef. Be mi sua se hem i prea olsem wan petriak bae i prea bifo hem i givim wan blesing. Hem i prea se ol toktok blong hem bae oli go long hem we i kasem olsem ol toktok we oli kam long God, be i no blong hem. Ol prea blong mama blong mi, from blesing ia, i gat ansa antap long hed blong mi. Hem i stap long spirit wol naoia mo i stap longwe ova 40 yia nao. Mi save stret se hem i glad tumas se mi kasem blesing ia olsem hem i askem from mi luksave ol oda blong God long kaonsel blong hem. Mo mi traem blong gohed blong mekem olsem we hem i hop se bae mi mekem.

Mi luk semfala merikel ia blong revelesen we i gogohed long ol stek presiden mo ol bisop long Jos. Mo, olsem we i tru wetem revelesen long ol lida blong famle, valiu blong revelesen i bigwan nomo sapos olgeta we oli kasem, oli kasem wan revelesen we i konfemem hemia.

Mi luk merikel ia blong revelesen afta we Haedro blong Teton i brok long Aedaho long 1976. Plante long yufala i save stori blong wanem i bin hapen. Be eksampol blong revelesen we i gogohed blong kam, we i kam tru long wan stek presiden, i save blesem yumi evriwan long ol dei we oli stap kam.

Oli muvum taosen pipol aot long haos blong olgeta we i brokbrok. Man we i lidim ol wok blong givhan i foldaon long wan lokol stek presiden. Mi stap long klasrum long Riks Kolej sam dei afta long disasta. Wan lida blong gavman disasta ofis i kam. Hem mo ol jif asisten blong hem oli kam long bigfala rum we stek presiden i singaotem ol bisop, mo tu, sam minista blong ol nara jos. Mi bin stap ia from plante long ol famle ia oli kam stap long skul we mi presiden long hem.

Taem miting i stat, ripresentativ blong gavman disasta ofis i stanap, mo i stat blong talem wetem wan voes blong atoriti wanem i nid blong mekem. Afta we hem i listim daon wanwan long ol faef o sikis wok blong mas mekem, stek presiden i ansa kwaet: “Mifala i mekem ol samting ia finis.”

Afta sam minit, man ia blong gavman disasta ofis i talem se: “Mi ting se bae mi sidaon mo lisin smol.” Hem mo ol ofisa blong hem oli lisin taem ol bisop, mo ol presiden blong kworom blong ol elda oli ripotem wanem oli bin mekem. Oli tokbaot wanem instraksen oli bin kasem long ol lida mo folem. Oli tokbaot tu wanem oli kasem insperesen blong mekem taem oli mekem folem ol instraksen ia blong faenem ol famle mo helpem olgeta. I bin let taem long dei ia. Olgeta evriwan oli taed tumas blong soem filing blong olgeta, be oli soem lav we oli gat long ol pipol ia.

Presiden i givim sam las wok long ol bisop, mo hem i talem se taem blong givim nekis ripot bae i long eli moning long nekis dei.

Long nekis moning, lida blong gavman i kam 20 minit bifo ripot mo wok miting bae i stat. Mi stap stanap kolosap. Mi harem hem i talem kwaet long stek presiden: “Presiden. ?Wanem nao yu wantem mi mo ol ofisa blong mi i mekem?”

Wanem we man ia i bin luk, mi bin luk long taem blong trabol mo tes raon long wol. Presiden Peka i raet. Revelesen we i gogohed i kam long ol stek presiden blong leftemap olgeta i go bitim waes mo paoa blong olgeta. Mo bitim hem ia, Lod i givim long olgeta we presiden i lidim olgeta, wan witnes we i konfemem se, ol oda blong hem we oli kam long God tru long Tabu Spirit i go long wan man we i no stret evriwan.

Mi bin gat blesing blong folem ol lida wetem insperesen plante taem long laef blong mi. Taem mi yang man, oli singaotem mi olsem kaonsela long presiden blong kworom blong ol elda. Mi bin kaonsela blong tufala distrik presiden mo long wan Prisaeding Bisop blong Jos, wan memba blong Kworom blong Olgeta Twelef Aposol, mo wan kaonsela blong tufala Presiden blong Jos. Mi bin luk revelesen i go long olgeta ia, mo afta, mi luk konfemesen i go long ol pipol we oli stap folem olgeta.

Revelesen ia blong akseptem toktok, we yumi evriwan i wantem, i no kam isi, mo i no kam nomo olsem we yu askem. Lod i givim standet ia blong gat paoa blong kasem ol witnes ia we oli kam long God. Hem i wan gaed long eniwan we i wantem kasem revelesen blong hemwan, mo yumi evriwan i mas mekem.

Lod i talem se yu mas letem insaed long yu i fulap long bigfala lav i go long ol man, mo long haos we i gat fet, mo yu mas letem klin fasin i flasem ol tingting blong yu oltaem; afta nao, tras blong yu bae i gro i kam strong long fored blong God; mo doktrin blong prishud bae i go insaed long sol blong yu sloslo, semmak olsem smol ren blong moning i foldaon long heven i kamdaon.

Tabu Spirit bae i fren blong yu we i folem yu oltaem.⁴

Mesej we mi kasem long hemia i blong yumi evriwan. Yu no tekem laet ol filing we yu kasem we i soem lav long profet blong God. Long weaples mi go long Jos, huia i profet long tetaem ia, ol memba bae oli askem: “Taem yu gobak long hedkwota blong Jos, ?plis bae yu save talem long profet se mifala i lavem hem?”

Hemia i moa bitim blong wosipim wan hiro, o filing we yumi gat samtaem taem yumi laekem wan man we wol i save gud. Hem i wan presen we i kam long God. Wetem hemia, bae yu kasem moa isi wan revelesen blong konfemesen taem hem i toktok long ofis blong hem olsem profet blong Lod. Lav we yu filim, i lav we Lod i gat long huia i man blong hem blong toktok.

Hem i no isi blong filim hemia oltaem from se Lod i askem plante taem long ol profet blong Hem blong givim kaonsel we i had blong ol pipol oli akseptem. Enemi blong sol blong yumi bae i traem lidim yumi blong harem nogud, mo blong gat tu tingting se koling blong profet i kam long God.

Mi bin luk olsem wanem Tabu Spirit i save tajem wan hat we i sopsop blong protektem wan disaepol blong Jisas Kraes we i gat tingting i stap daon, wetem wan revelesen blong konfemesen.

Profet i sendem mi blong givim tabu siling paoa long wan man long wan smol taon. Profet blong God nomo i gat ol ki blong disaed huia bae i kasem tabu paoa we Lod i givim long Pita, we i senia Aposol. Mi bin kasem semfala siling paoa ia, be tru long daereksen blong Presiden blong Jos nomo, bae mi save givim i go long wan nara man.

So. Long wan rum long wan japel we i longwe long Sol Lek, mi putum han blong mi antap long hed blong wan man we profet i jusum, blong hem i kasem siling paoa. Han blong hem i soem wan ful laef blong wok long graon blong kasem smol mane. Smol waef blong hem i sidaon kolosap long hem. Hem tu, i soem saen blong plante yia blong had wok long saed blong hasban blong hem.

Mi talem ol toktok we profet i givim. “Wetem raet blong atoriti mo responsabiliti we i kam long” mo afta nem blong profet, “we i holem evri ki blong prishud long wol long taem naoia, mi givim siling paoa long,” mo mi givim nem blong man ia, mo afta nem blong tempol we bae hem i wok long hem blong mekem ol siling.

Wota blong ae i ron kamdaon long fes blong hem. Mi luk se waef blong hem tu i krae. Mi wet blong tufala i kam kwaet. Sista ia i stanap mo i kam long mi. Hem i lukluk i kam antap, mo afta, i talem kwaet se hem i glad, be tu, hem i no harem gud. Hem i talem se hem i lavem blong go long tempol wetem hasban blong hem, be naoia, hem i no save go wetem hem from se God i jusum hem blong mekem wan tabu wok we i bigwan tumas. Afta, hem i talem filing blong hem se hem i no inaf blong stap tempol kompanion blong hem from se hem i no save rid mo i no save raet.

Mi talem gud long hem se hasban blong hem bae i gat ona blong gat hem long tempol, from paoa blong hem long saed blong spirit. Mo tu, wetem smol save long lanwis blong hem, mi talem long hem se God i soemaot ol samting long hem we i bitim evri skul blong wol ia.

Hem i bin save, tru long presen we i Spirit, se God i givim, tru long profet blong Hem, wan bigbigfala wok long hasban blong hem we hem i lavem hem. Hem i bin save hemwan se ol ki we i givim siling paoa, wan man we hem i neva luk i holem olgeta, be yet, hemwan hem i save se man ia i profet blong God we i stap laef. Hem i save, we man i no talem hem, se profet i prea from nem blong hasban blong hem. Hemwan hem i save se God i bin givim koling ia.

Hem i save tu se ol odinens we hasban blong hem bae i mekem bae i joenem ol pipol blong taem we i no save finis long selestial kingdom. Hem i konfemem long maen mo hat blong hem se promes we Lod i bin mekem long Pita, i stap gogohed yet long Jos: “[wanem yu joenem long wol ia, bae oli joenem long heven.]”⁵ Hemwan i save samting ia, tru long revelesen we i kam long God.

Bae yumi gobak long ples we yumi stat. “Revelesen i gogohed insaed long Jos: profet i kasem long bihaf blong Jos; presiden i kasem long bihaf blong stek, misin, o kworom blong hem; bisop i kasem blong wod; papa i kasem blong famle blong hem; mo wanwan man o woman i kasem blong hemwan.”⁶

Mi witnesem se hemia i tru. Papa long Heven i harem ol prea blong yufala; Hem i lavem yufala. Hem i save nem blong yufala. Jisas Hem i Kraes, Pikinini blong God, mo Ridima blong yumi, mo Hem i lavem yufala bitim we yufala i save andastanem.

God i stap kapsaetem revelesen, tru long Tabu Spirit, long ol pikinini blong Hem. Hem i stap toktok long profet blong Hem long wol ia, we tedei, i Tomas S. Monson. Mi witnesem se hem i holem mo yusum evri ki blong prishud long wol ia.

Taem yufala i stap lisin, long konfrens ia, long ol toktok blong olgeta we God i singaotem olgeta blong toktok long bihaf blong Hem, mi prea se bae yufala i kasem revelesen blong konfemesen we yufala i nidim blong faenem rod blong yufala i gobak hom bakegen, mo stap wetem hem insaed long wan famle we i sil blong oltaem. Long nem blong Jisas Kraes, amen.