Pheej Txais Kev Tshwm Sim

Hnub no kuv cia siab hais tias peb sawv daws yuav hnov Vajtswv txoj kev hlub thiab qhov kaj. Hnub no muaj neeg coob uas tab tom mloog uas xav tau txoj koob hmoov uas yog kev tshwm sim los ntawm peb Leej Txiv Saum Ntuj Ceeb Tsheej uas hlub peb.

Rau cov thawj tswj hwm ntawm qhov chaw tshaj tawm txoj moo zoo, tej zaum lawv thov Vajtswv seb lawv yuav ua li cas thiaj pab tau ib tug tub txib uas tab tom muaj teeb meem. Rau ib leej txiv los sis leej niam uas nyob hauv ib qho chaw muaj tsov muaj rog hauv ntiaj teb no, tej zaum lawv yuav thov seb puas tsim nyog lawv tsiv mus rau ib qho chaw uas puaj phais los sis kom lawv nyob twj ywm xwb. Hnub no ntau pua tus ceg txheem ntseeg tus thawj tswj hwm thiab cov npisov tab tom thov Vajtswv seb lawv yuav ua li cas pab tus Tswv mus cawm cov yaj uas twb ploj mus lawm. Thiab rau tus yaj saub, nws thov seb tus Tswv yuav kom nws hais li cas rau lub Koom Txoos thiab ib lub ntiaj teb uas tab tom muaj kev kub ntxhov.

Peb sawv daws paub hais tias tib neeg tej kev txiav txim thiab tej kev xav, yuav tsis txaus rau peb txais tau cov lus teb rau tej yam tseem ceeb tshaj plaws hauv lub neej no. Peb xav tau kev tshwm sim los ntawm Vajtswv los. Thiab tsis yog hais tias peb xav tau ib txoj kev tshwm sim thaum peb nyuaj siab xwb, tiam sis peb xav tau kev tshwm sim uas los tsis tu tsis tseg. Peb tsis xav tau ib qho kaj thiab kev nplij siab xwb, tiam sis peb pheej xav tau txoj koob hmoov uas yog nrog Vajtswv sib txuas lus.

Peb muaj lub Koom Txoos no vim yog ib tug tub hluas paub hais tias qhov ntawd muaj tseeb. Tus tub hluas Yauxej Xamiv paub tias nws paub tsis tau rau nws tus kheej tias nws yuav tsum koom lub koom txoos twg. Ces nws thiaj tau thov Vajtswv, raws li phau Yakaunpaus qhia kom nws ua. Vajtswv Leej Txiv thiab Nws Tib Leeg Tub tshwm los rau nws pom hauv ib koog ntoo. Nkawd tau teb lo lus nug uas Yauxej tsis muaj cuab kav teb.

Tsis yog thaum ntawd Vajtswv hu nws los txhim tsa Yexus Khetos lub Koom Txoos tseeb xwb, tiam sis nyob hauv thiaj muaj hwj chim txaus hu tus Vaj Ntsuj Plig Dawb Huv xwv kom tib neeg yuav txais tau kev tshwm sim los ntawm Vajtswv los tsis tu tsis tseg.

Thawj Tswj Hwm Boyd K. Packer piav txog lub cim ntawm lub Koom Txoos tseeb hais tias: “Pheej muaj kev tshwm sim hauv lub Koom Txoos: tus yaj saub txais kev tshwm sim rau lub Koom Txoos; tus thawj tswj hwm rau nws ceg txheem ntseeg, rau nws qhov chaw tshaj tawm txoj moo zoo, los sis rau nws pawg pov thawj hwj; tus npisov rau nws pawg ntseeg; leej txiv rau nws tsev neeg; ib tug neeg rau nws tus kheej.”¹

Txoj kev tshwm sim zoo kawg nkaus ntawd pib, xaus, thiab tauj mus ntxiv thaum peb txais kev tshwm sim rau peb tus kheej. Cia peb xav txog Nifais, Lihais tus tub, kom nws ua peb tus yam ntxwv. Nws txiv tau ua npau suav. Lwm tus hauv Nifais tsev neeg tsuas xav tias Lihais txoj kev npau suav ntawd qhia tseeb tias nws feeb tsis meej xwb. Nyob hauv zaj npau suav ntawd Vajtswv txib kom Lihais cov tub yuav tau rov qab mus rau Yeluxalees teb mus nqa cov phiaj uas muaj Vajtswv txoj lus hauv tab txawm ua li ntawd tej zaum lawv yuav raug xwm txheej kom lawv thiaj nqa tau nrog lawv mus rau thaj av uas tau cog lus cia lawm.

Feem ntau peb hais cov lus uas Nifais uas siab loj hais thaum nws txiv kom lawv yuav rov qab mus rau lub nroog Yeluxalees. Nej yeej paub cov lus uas hais tias: “Kuv yuav mus thiab ua tej uas tus Tswv tau txib kom ua.”²

Thaum Lihais hnov Nifais hais cov lus ntawd, cov vaj lug kub piav hais tias nws yeej “zoo siab heev.”³ Nws zoo siab vim hais tias nws paub tias Nifais tau koob hmoov vim nws tau kev tshwm sim uas qhia nws tias nws txiv zaj npau suav ntawd yog kev sib txuas lus nrog Vajtswv lawm tiag. Nifais tsis tau hais tias, “Kuv yuav mus thiab ua tej uas kuv txiv hais kom kuv ua.” Tiam sis tau hais tias, “Kuv yuav mus thiab ua tej uas tus Tswv tau txib kom ua.”

Nyob hauv nej tsev neeg, nej kuj paub yog vim li cas Lihais muaj kev “zoo siab heev.” Nws tau kev xyiv fab vim nws paub tias Nifais tau kev tshwm sim uas qhia qhov tseeb lawm.

Coob tug niam txiv tau tsa tej kev cai rau lawv tsev neeg seb cov tub ntxhais hluas yuav tau los tsev thaum pes tsawg moos thaum yav tsaus ntuj. Tiam sis nej sim xav seb niam txiv yuav zoo siab npaum li cas thaum lawv kawm, ib yam li ib tug tau kawm ob peb lim piam tas los lawm, tias ib tug me nyuam uas tawm mus nyob nws tsev twb tsa kev cai rau nws tus kheej tiam sis tau ua tib zoo saib Hnub Caiv ib yam li nws kawm ua thaum nws tseem nyob tom tsev. Niam txiv txoj kev tshwm sim yuav kav ntev mus yog tias tus me nyuam tau tib txoj kev tshwm sim thiab.

Tej zaum kuv niam to taub txoj ntsiab cai rau kev tshwm sim ntawd. Thaum kuv tseem hluas, kuv tau maj mam kaw qhov rooj thaum kuv los tsev lig heev. Kuv tau mus dhau ntawm kuv niam chav pw lub qhov rooj thaum kuv tau mus pw. Tab txawm kuv ua ntsiag to npaum li cas los, thaum kuv tab tom qhib kuv lub qhov rooj, kuv yuav hnov niam hu kuv lub npe hais tias, “Hal. Thov koj los tom no os.”

Kuv tau mus zaum ntawm nws lub txaj. Nws chav pw ntawd tsaus ntuj nti. Yog nej tau mloog, nej yuav xav tias wb tsuas sib tham pem txog lub neej no xwb. Tiam sis los txog niaj hnub nim no, kuv tseem nco qab ntsoov nws cov lus, es cov lus ntawd muaj hwj chim ntau npaum li cov lus uas nyob hauv kuv tus yawg suab txoj koob hmoov.

Kuv tsis paub tias nws tab tom thov Vajtswv li cas thaum nws tos kuv thaum tej hmo lig lig ntawd. Kuv xav tias nws tau thov kom kuv yuav nyob zoo. Tiam sis kuv xav tias nws tau thov Vajtswv ib yam li tus yawg suab thov ua ntej nws muab ib txoj koob hmoov. Nws thov kom tus neeg ntawd yuav txais nws cov lus ua yog Vajtswv cov lus, tsis yog nws cov lus xwb. Kuv niam tej zaj lus thov Vajtswv rau txoj koob hmoov yeej los rau kuv tiag. Nws twb mus nyob hauv lub ntuj ntsuj plig tau ntev tshaj 40 xyoo lawm. Kuv xav tias nws yeej zoo siab vim kuv tau koob hmoov, li nws tau thov, kom kuv yuav hnov Vajtswv cov lus hauv nws tej lus qhuab ntuas ntawd. Thiab kuv tau siv zog sim mus ua raws li nws xav kom kuv ua.

Kuv tau pom tib qhov txuj ci uas yog pheej txais kev tshwm sim rau ceg txheem ntseeg cov thawj tswj hwm thiab cov npisov hauv lub Koom Txoos. Thiab, qhov no muaj tseeb thaum hais txog tej kev tshwm sim rau cov thawj coj hauv ib tse neeg, txoj kev tshwm sim ntawd muaj nqi npaum li cas nyob ntawm seb cov uas raug kev coj ntawd puas txais kev tshwm sim hais tias tej ntawd muaj tseeb.

Kuv pom qhov txuj ci loj ntawm kev tshwm sim tom qab qhov Teev Dej Teton hauv Idaho tawg thaum xyoo 1976. Nej coob leej paub zaj dab neeg ntawd. Tiam sis tus yam ntxwv txog kev pheej txais kev tshwm sim uas mus rau ib ceg txheem ntseeg tus thawj tswj hwm yeej foom tau koob hmoov rau peb txhua tus rau tej hnub yav tom ntej no.

Ntau txhiab leej tau khiav ntawm lawv tej tsev uas raug kev puas tsuaj lawm. Ceg txheem ntseeg tus thawj tswj hwm uas nyob ntawd. uas yog neeg ua teb xwb, tau saib xyuas txhua yam kev pab. Ob peb hnub tom qab kev xwm txheej no kuv tab tom zaum hauv ib chav kawm ntawv hauv lub Tsev Kawm Ntawv Qib Siab Ricks College. Ib tug thawj coj ntawm tuam tseem fwv qhov chaw saib xyuas thaum neeg raug xwm txheej tuaj txog lawm. Nws thiab lwm cov thawj coj los rau chav loj loj ntawd es ceg txheem ntseeg tus thawj tswj hwm tau hu cov npisov thiab cov thawj coj ntawm lwm cov koom txoos los sib sau ua ke. Kuv nyob ntawd vim coob leej uas raug qhov xwm txheej no tau tuaj nyob rau hauv lub tsev kawm ntawv qib siab lawm es kuv yog tus thawj tswj hwm rau lub tsev kawm ntawv.

Thaum lawv pib sab laj, tus neeg ntawm tuam tseem fwv lub koom haum pab thaum muaj xwm txheej tau sawv tsees thiab pib qhia hais tias yuav tsum ua dab tsi thiab dab tsi. Tom qab nws hais tsib rau qhov los sim uas nws hais tias tseem ceeb heev, ceg txheem ntseeg tus thawj tswj hwm maj mam hais tias, “Peb twb ua tej ntawd lawm.”

Tom qab ob pe na this, tus txiv neej ntawm tuam tseem fwv lub koom haum ntawd hais tias, “Kuv xav tias kuv mam li zaum thiab saib nej sib sab laj ib pliag.” Nws thiab cov neeg uas tuaj pab nws tau zaum mloog cov npisov thiab tej pawg txwj laug cov thawj tswj hwm piav qhia seb lawv tau ua li cas lawm. Lawv piav tias lawv raug txib ua dab tsi lawm thiab tau mus ua raws li lawv cov thawj coj tau hais. Lawv tau sib tham seb lawv raug kev tshoov siab kom ua dab tsi kom mus nrhiav tej yim neeg thiab mus pab lawv. Hnub ntawd twb lig lawm. Ces lawv sawv daws nkees heev ces qhia tsis tau tias lawv xav li cas tsuas yog qhia lawv txoj kev hlub rau cov neeg ntawd.

Ceg txheem ntseeg tus thawj tswj hwm tau qhia ob peb lo ntxiv rau cov npisov, thiab nws tau hais tias tag kis sawv ntxov lawv mam li rov qab los sib sab laj dua.

Tag kis sawv ntxov tus thawj coj ntawm tuam tseem fwv tuaj txog 20 na this ua ntej yuav pib qhov sab laj ntawd. Kuv sawv ze ze ntawd. Kuv hnov nws hais rau ceg txheem ntseeg tus thawj tswj hwm hais tias, “Thawj Tswj Hwm, koj xav kom kuv thiab cov neeg hauv kuv pawg no ua dab tsi?”

Qhov uas tus txiv neej ntawd tau pom kuv twb pom ntau zaus thaum muaj teeb meem thiab kev nyuaj siab thoob plaws ntiaj teb no. Thawj Tswj Hwm Packer hais yog lawm. Txoj kev pheej txais kev tshwm sim los rau tej ceg txheem ntseeg cov thawj tswj hwm kom lawv thiaj muaj tswv yim thiab cuab kav ntau tshaj lawv qhov peev xwm. Thiab ntxiv rau qhov ntawd, tus Tswv qhia cov uas tus thawj tswj hwm coj kav ntawd tias cov lus txib ntawd los ntawm Vajtswv los dhau ntawm tus Vaj Ntsuj Plig Dawb Huv.

Kuv tau koob hmoov hauv kuv lub neej vim kuv raug hu los ua raws li cov thawj coj uas tau kev tshwm sim li ntawd thiab. Ua ib tug txiv neej hluas kuv raug hu los ua ib tug pab cuam rau pawg txwj laug tus thawj tswj hwm. Kuv twb ua tus pab cuam rau ob koog chaw tus thawj tswj hwm, rau Thawj Pawg Npis Sov hauv lub Koom Txoos, ua ib tug hauv Pawg Kaum Ob tug Thwj Tim, thiab tus pab cuam rau ob tug Thawj Tswj Hwm hauv lub Koom Txoos. Kuv tau pom txoj kev tshwm sim uas lawv tau txais thiab ces tau muab rau cov neeg uas raws lawv qab.

Kev tshwm sim kom txais yuav tej ntawd, uas yog ib qho uas peb sawv daws xav tau, tsis los rau peb yooj yim li, thiab yeej tsis los rau peb yog tias peb cia li thov kiag xwb. Tus Tswv tau tsa txoj kev cai no hais txog txoj kev txais ib zaj lus tim khawv los ntawm Vajtswv. Nws yog ib tug qauv rau txhua tus neeg uas xav tau kev tshwm sim rau lawv tus kheej, uas yog ib yam uas peb sawv daws xav tau.

Cia nej lub siab muaj kev hlub tshua rau tib neeg sawv daws, thiab rau txoj kev rau siab ntseeg, thiab cia li xav txog kev tsim txiaj tsis tu ncua; ces nej txoj kev tso siab yuav muaj zog nyob ntawm Vajtswv lub xub ntiag; thiab tej lus qhuab qhia ntawm lub pov thawj hwj yuav nyob rau hauv nej lub siab ib yam li cov lwg uas los saum ntuj ceeb tsheej los.

Tus Vaj Ntsuj Plig Dawb Huv yuav nrog nraim nej nyob.⁴

Los ntawm tej lus ntawd kuv hais cov lus ntuas no rau peb sawv daws. Tsis txhob xav yuam kev txog txoj kev hlub uas nej muaj rau Vajtswv tus yaj saub. Txawm kuv mus qhov twg hauv lub Koom Txoos, txawm lub sij hawm ntawd tus yaj saub yog leej twg los xij, cov mej zeej yuav nug hais tias, “Thaum koj rov qab mus rau lub hauv paus khiav hauj lwm rau lub Koom Txoos, thov koj qhia rau tus yaj saub paub tias peb hlub nws npaum li cas?”

Qhov ntawd yeej ntau tshaj txoj kev hwm ib tug phab ej los sis qhov uas tej thaum peb qhuas ib tug phab ej. Nws yog ib lub txiaj ntsim uas los ntawm Vajtswv los. Thaum muaj lub txiaj ntsim no nej haj yam yuav txais tau kev tshwm sim uas ua tim khawv txog tej lus nws hais thaum nws ua tus Tswv tus yaj saub. Txoj kev hlub uas nej muaj yog txoj kev hlub uas tus Tswv muab rau tus twg uas raug xaiv ua Nws tus neeg cev lus.

Tsis yooj yim rau peb xav li ntawd tsis tu tsis tseg vim hais tias feem ntau tus Tswv thov nws cov yaj saub los muab lus qhuab ntuas uas tib neeg tsis tshua xav hnov. Tus yeeb ncuab rau peb tej ntsuj plig yuav sim ua kom peb tu siab thiab tsis ntseeg hais tias tus Yaj Saub tej lus los ntawm Vajtswv los tiag tiag li.

Kuv tau pom seb tus Vaj Ntsuj Plig Dawb Huv ua li cas thiaj chwv tau ib tug neeg lub siab kom thiaj pov hwm tau Yexus Khetos ib tug pab coj vim lawv tau kev tshwm sim lawm.

Tus yaj saub tau txib kuv mus muab lub hwj chim sib khi tau tej yam dawb ceev rau ib tug txiv neej hauv ib lub zos me me uas nyob deb deb. Vajtswv tus yaj saub nkaus xwb thiaj muaj cov yuam sij uas cia nws txiav txim seb leej twg yuav txais lub hwj chim dawb ceev ntawd uas tus Tswv tau muab rau Petus, uas yog tus Thwj Tim siab tshaj. Kuv tau txais tib lub hwj chim muab sib khi ntawd, tiam sis tsuas yog thaum tus Thawj Tswj Hwm ntawm lub Koom Txoos txib kuv ces kuv thiaj muaj cuab kav muab tau rau lwm tus neeg.

Ces, hauv ib chav tsev hauv lub tsev teev ntuj nyob deb deb ntawm Salt Lake, kuv tau tso tes rau saum tus neeg uas tus yaj saub tau xaiv cia lawm kom nws txais lub hwj chim muab sib khi no. Nws ob txhais tes qhia tias nws yog neeg ua liaj ua teb rau tag nrho nws lub neej. Nws tus me poj niam zaum ze nws. Yus kuj pom tias nws tau ua hauj lwm khwv khwv ntawm nws tus txiv ib sab tau ntau xyoo.

Kuv tau hais cov lus uas tus yaj saub tau muab rau kuv tias: “Raws li kev txib vim tau cai thiab kev lav ris los ntawm,” thiab tau hais tus yaj saub lub npe, “tus uas tuav txhua tus yuam sij hauv lub pov thawj hwj hauv ntiaj teb rau lub caij no, kuv muab lub hwj chim sib khi rau,” ces kuv tau hais tus txiv neej ntawd lub npe thiab lub npe rau lub tuam tsev uas nws yuav ua hauj lwm ua tus neeg muab sib khi.

Nws kua muag poob dawb vog ntawm nws sab plhu. Kuv kuj pom nws tus poj niam los kua muag thiab. Kuv tos nkawd tswj tau nkawd lub siab. Tus poj niam sawv tseev thiab los rau kuv. Nws ntsia kuv thiab maj mam hais tias nws zoo siab tiam sis muaj me ntsis tu siab thiab. Nws hais tias nws nyiam nrog nws tus txiv mus tom lub tuam tsev heev tiam sis nim no nws xav tias nws yuav tsum tsis txhob nrog nws mus vim rau qhov Vajtswv tau xaiv nws tseg rau ib txoj hauj lwm zoo kawg thiab tau tso siab plhuav rau nws lawm. Ces nws hais tias nws xav tias nws tsis zoo txaus ua nws tus khub mus tom lub tuam tsev lawm vim hais tias nws tsis txawj nyeem los sis sau ntawv li.

Kuv qhia nws tias nws tus txiv yeej zoo siab kom nws ua nws tus txiv tus khub hauv lub tuam tsev vim hais tias nws sab ntsuj plig muaj hwj chim heev. Tam li kuv txawj hais lawv yam lus me ntsis, kuv qhia nws tias Vajtswv tau qhia nws ntau tshaj tej yam uas nws tau kawm hauv ntiaj teb no.

Nws paub los ntawm tus Ntsuj Plig lub txiaj ntsim uas Nws tau Yaj Saub tau muab lawm hais tias Vajtswv tau tso siab plhuav rau tus txiv uas nws hlub heev. Nws paub rau nws tus kheej tias ib tug txiv neej uas nws tsis tau pom dua muaj cov yuam sij uas muab tau lub hwj chim sib khi thiab nws paub rau nws tus kheej tias tus ntawd yog Vajtswv tus yaj saub uas muaj sia nyob. Nws paub, txawm tsis tau muaj neeg ua tim khawv qhia rau nws paub, tias tus yaj saub tau thov Vajtswv txog nws tus txiv lub npe. Nws paub rau nws tus kheej tias Vajtswv tau hu nws lawm.

Nws kuj paub tias tej kab ke uas nws tus txiv yuav ua yeej yuav khi tib neeg ua ke mus ib txhis hauv lub nceeg vaj xilethi-aus. Hauv nws lub paj hlwb thiab lub siab nws tau tus Tswv lo lus cog tseg uas nws muab rau Petus, tseem nyob hauv lub Koom Txoos hais tias: “Yam uas koj txwv hauv ntiaj teb no, Vajtswv yuav txwv yam ntawd saum ntuj ceeb tsheej. Yam uas koj tso cai hauv ntiaj teb no, Vajtswv yuav tso cai yam ntawd saum Ntuj Ceeb Tsheej.”⁵ Nws paub rau nws tus kheej, los ntawm kev tshwm sim, uas los ntawm Vajtswv los.

Cia peb rov qab tham txog peb qhov pib. “Pheej muaj kev tshwm sim hauv lub Koom Txoos: tus yaj saub txais kev tshwm sim rau lub Koom Txoos; tus thawj tswj hwm rau nws ceg txheem ntseeg, rau nws qhov chaw tshaj tawm txoj moo zoo, los sis rau nws pawg pov thawj hwj; tus npisov rau nws pawg ntseeg; leej txiv rau nws tsev neeg; ib tug neeg rau nws tus kheej.”⁶

Kuv ua tim khawv hais tias qhov no muaj tseeb. Leej Txiv Saum Ntuj Ceeb Tsheej hnov nej tej lus thov. Nws hlub nej. Nws paub nej lub npe. Yexus Khetos yog Vajtswv Leej Tub, peb tus Txhiv Dim. Nws hlub nej tshaj qhov uas nej muaj cuab kav to taub.

Vajtswv muab kev tshwm sim, dhau ntawm tus Vaj Ntsuj Plig Dawb Huv, rau Nws cov me nyuam. Nws hais lus rau Nws tus yaj saub hauv ntiaj teb no, uas niaj hnub nim no yog Thomas S. Monson Kuv hais lus tim khawv tias nws tuav thiab siv txhua tus yuam sij ntawm lub pov thawj hwj hauv lub ntiaj teb no.

Thaum nej mloog cov uas Vajtswv tau xaiv los cev lus rau Nws hauv lub rooj sab laj no, kuv thov kom nej yuav tau kev tshwm sim uas nej xav tau kom nej nrhiav tau txoj kev uas coj nej rov qab mus tsev, mus nrog Nws nyob hauv ib tse neeg uas raug muab khi ua ke tas mus ib txhis. Los ntawm Yexus Khetos lub npe dawb ceev, amees.