An Revelesōn Wōnm̧aanļo̧k

Kōjatdikdik eo aō n̄an kōj rainin ej bwe jen maron̄ aolep en̄jake iakwe im meram eo jān Anij. Elōn̄ ro rej ron̄jake rainin ro rej en̄jake aikuj eo eļap n̄an kōjeram̧m̧an eo an revelesōn an juon make jān Jemedwōj Ilan̄ eo eiakwe.

N̄an mijen būreejtōn ro, emaron̄ in ilo juon jar n̄an jeļā wāween rōjan̄ juon mijinede eo ejabolemen. N̄an baba ak m̧am̧a ilo juon jikin me eaar jorrāān jen tariņae, enaaj ke lukkuun menin aikuj n̄an jeļā n̄an kōm̧akūt baam̧le eo aer n̄an juon jikin em̧m̧an ak pād wōt ijo rej pād ie. Bukwi stake būreejtōn ro im bisop ro rej jar rainin n̄an jeļā kilen jipan̄ Irooj lo̧mo̧o̧ren e juon sip eo ejābwābwe. Im n̄an juon rikanaan, enaaj kōņaan jeļā ta eo Irooj ekōņaan bwe en kōnono n̄an Kabun̄ eo im n̄an juon laļ eo aen̄enjiwiwi.

Jej aolep jeļā bwe ekajet an armej im kōļmenļo̧kjeņ eban bwe n̄an bōk uwaak ko n̄an kajjitōk ko me raorōk ilo mour in. Jej aikuj revelesōn jān Anij. Im jeban aikuji juon wōt revelesōn ilo juon tōre ekadu jej bōk meļeļe im kaenōm̧m̧an, ak jej aikuji jeram̧m̧an in ekōnono eban jem̧ļo̧k ippān Anij.

Lukkuun pedped eo an Kabun̄ in eaar waļo̧k jān juon ļaddik edik me eaar jeļā ke em̧ool. Joseph Smith eo edik eaar jeļā bwe eaar jab jeļā kōn e make kabun̄ ta eo en koba ļo̧k ie. Kōn menin eaar kajjitōk ippān Anij, āinwōt an bok in Jemes jiron̄ e bwe en kōm̧m̧ane. Anij Jemen im Nejin Jitenbōro Jisōs raar waļo̧k ilubwiljin wōjke ko. Raar uwaake kajjitōk eo ilōn̄ in maron̄ eo an Joseph n̄an ņamejļan kajjitōk eo.

Eaar jab kūr wōt jān Anij n̄an kajutak Kabun̄ eo em̧ool an Jisōs Kraist, ak ippān eaar bar jepļaaktok kajoor eo n̄an kūr ioon Jetōb Kwojarjar bwe en itok wōt revelesōn jān Anij.

Būreejtōn Boyd K. Packer eaar kōmeļeļeik kōkaļļe eo em̧ool an Kabun̄ in ilo wāween in: “Revelesōn ej itok ilo Kabun̄ in: rikanaan eo ej bōki n̄an Kabun̄ in; būreejtōn eo n̄an stake eo an, mijen eo an, ak doulul eo an; bisop n̄an ward eo an; baba n̄an baam̧le eo an; ro kajjojo n̄an er make.”¹

Wāween eo eaiboojoj an revelesōn ej jinoe, jem̧ļo̧k, im wōnm̧aanļo̧k ilo ad bōk revelesōn eo an juon make. Jen bōk Nipai, eo nejin Liai, āinwōt ad waanjon̄ok. Eaar wōr juon an jemen ettōņak. Ro jet ilo baam̧le eo raar lo ettōņak eo āinwōt menin kam̧ool bwe ekar bōk an kōlmenļo̧kjeņ. Ettōņak eo ekobaiki juon kean̄ jān Anij n̄an ļōm̧aro nejin Liai n̄an bar jepļaak n̄an Jerusalem n̄an būki pilej ko me epād naan eo an Anij bwe ren būki ļo̧k ippāer n̄an ānen kallim̧ur.

Ekkā ad kout jen naan in kōperan eo an Nipai ke jemen eaar ba ren bar ro̧o̧l n̄an Jerusalem. Kom̧ jeļā naan kein: “Inaaj ilo̧k im kōm̧m̧ani men ko Irooj eaar kain̄.”²

Ke Liai eaar ron̄ an Nipai kōnono naan kein, jeje ko rej ba bwe “eaar lukkuun m̧ōņōņō.”³ Eaar m̧ōņōņō kōnke ejeļā bwe Nipai eaar jeram̧m̧an kōn kam̧ool eo an revelesōn bwe ettōņak eo an jemān eaar juon ennaan eo em̧ool jān Anij. Nipai eaar jab ba, “Inaaj ilo̧k im kōm̧m̧ane ta eo jema eaar jiron̄ eō n̄an kōm̧m̧an.” Ak eaar jab ba, “Inaaj ilo̧k im kōm̧m̧ani men ko Jema eaar kain̄.” Ak ekar ba, “Inaaj ilo̧k im kōm̧m̧ani men ko Irooj ekar kain̄.”

Jān en̄jake eo am̧ make ippān baam̧le eo am̧, kobarāinwōt jeļā etke Liai eaar “lukkuun m̧ōņōņō.” Lan̄lōn̄ eo an eaar itok jen an jeļā bwe Nipai eaar bōk kam̧ool eo an revelesōn eo.

Elōn̄ m̧am̧a im baba ro rej kōm̧m̧ani kakien ko n̄an eo nejin n̄āāt eo eaikuj jepļaak n̄an kapijuknen ilo jota. Bōtaab ļōmņak kōn lan̄lōn̄ eo n̄e m̧am̧a im baba ro renaaj jeļā, āinwōt juon eo eaar waļo̧k jet wiik rem̧ootļo̧k, me ajri eo eaar ilo̧k jān kapijuknen ekar make kōm̧m̧an awa im karōke bwe en aikuj jepļaak n̄an kapijuknen kajjojo wiik ak kōjparok Jabōt ilo ejja wāween eo me kar katakin e n̄an kōm̧m̧ane ilo an pād kapijuknen. Revelesōn eo an juon jinen ak jemān ewōr ijo koņaan ilo an jelet revelesōn eo an juon make eo ej pād wōt ippān juon ajri.

Jinō bōlen ekar lukkuun meļeļe kōn pedped eo an revelesōn. Ke iaar dik, ikijon̄ kiil kōjem eo ilik ilo ainikien edik n̄e ej rum̧wij aō ro̧o̧l n̄an kapijuknen ilo bon̄. Iaikuj kijoon ruum̧ in kiki eo an jinō n̄an ruum̧ eo aō. Ijoke ke ij ajjidikdikļo̧k, ij tōpar kōjem eo an epeļļo̧k jidik, iaar ron̄ an kūr eō, ilo mera, “Hal. Itok m̧okta jidik.”

Ikajoor deļo̧n̄ im jijet dem̧an jikin kiki eo an. Ruum̧ eo eaar marok. Eļan̄n̄e kwon kar ron̄jake, kwon kar ļōmņak en kar kōnono wōt kōn mour. Ak n̄an rainin, imaron̄ lukkuun meļeļe ta eo eaar ba kōn ejja kajoor eo iaar en̄jake ke iaar riiti kōjeram̧m̧an in petraik eo aō.

Ijjab jeļā ta kajjitōk ko an ilo jar ilo an kar kōttar eō bon̄on ko. Ij ļōmņak emaron̄ jet iaer kōn kōjparok eo aō. Ak ij lukkuun jeļā bwe eaar jar āinwōt an petriak kōm̧m̧ane m̧okta jen an leļo̧k juon kōjeram̧m̧an. Ej jar bwe naan ko an renaaj itok n̄an armej eo āinwōt naan in Anij, im jab an. Jar eo an jinō kōn kōjeram̧m̧an in eaar waļo̧k n̄an eō. Ej pād ilo laļ eo an jetōb im em̧ootļo̧k de 40 iiō ko. Ij lukkuun jeļā bwe eaar lukkuun m̧ōņōņō bwe ijeram̧m̧an ilo an kajjitōk bwe in ron̄jake kean̄ ko an Anij. Im iaar kajjieon̄ in etal im kōm̧m̧ani ta eo ej kōtmene bwe in kōm̧m̧ane.

Em̧ōj aō lo ejja kabwilōn̄lōn̄ in wōt an revelesōn ippān stake būreejtōn ro im bishop ro ilo Kabun̄ in. Im, āinwōt an alikkar ilo revelesōn eo n̄an ritōl ro an baam̧le, aorōk eo an revelesōn ej pedped wōt ioon ro rej bōk kam̧ool eo an revelesōn.

Iaar lo kabwilōlōn̄ eo an m̧adenļo̧k ālkin juon jorrāān ilo Teton Dam ilo Idaho ilo 1976. Elōn̄ iami rejeļā bwebwenato in im ta eo eaar waļo̧k. Bōtaab waanjon̄ok eo wōt an revelesōn me bōk jen stake būreejtōn eo emaron̄ kar kōjeram̧m̧an kōjwōj m̧okta ļo̧k.

Taujin armej ro raar em̧m̧akūt ke m̧oko im̧weer raar jorrāān. Stake būreejtōn eo eaar kōjekiik menin jipan̄ ko. Iaar pād ilo juon kūlaj ruum̧ ilo Ricks College jejjo raan ālkin jorrāān eo. Juon ritōl jān federal disaster agency eo eaar itok. E im jeban rijipan̄ ro an raar itok n̄an ruum̧ eo ijo stake būreejtōn eo eaar kobaik bisop ro im rikaki in kabun̄ ko jet. Iaar pād ijo kōnke jet iaan ro raar lanwōtwōt ilo lan̄ eo raar pād ilo kōjparok im m̧weo ilo campus eo an college ijo iaar būreejtōn ie.

Ke kweilo̧k eo eaar jinoe, ro rej itok jān federal disaster agency eo raar jutak im jino kōļļaaj aenikier kōn ta eo eaikuj in dedeļo̧k. Ālkin kōlaajraki kajjojo jerbal ko raorōk ļalem ak jiljino, stake būreejtōn eo eaar uwaak ilo ettā, “Ededeļo̧k am̧ kar kōm̧m̧ani.”

Ālkin jejjo minit, em̧m̧aan eo jān federal disaster agency eo eaar ba, “Bōlen in jijet im lale jidik.” E im rijerbal ro an raar ron̄jake an bisop ro im būreejtōn ro an doulul eo an em̧m̧aan ripoote ta eo raar kōm̧m̧ane. Raar kōm̧eļeļeik ta ijjitōn̄ ko raar būki im ļoori jān ritōl ro aer. Raar barāinwōt kōnono ta eo raar en̄jake n̄an kōm̧m̧ane ke rej bōk ennaan ko n̄an pukot baam̧le ko im jipan̄ er. Ekar le jen awa ilo raan eo. Raar aolep m̧ōk bōtaab raar kwaļo̧k aer iakwe n̄an armej ro.

Stake būreejtōn eo eaar leļo̧k tōl ko an āliktata n̄an bisop ro, innām eaar kwaļo̧k awa eo n̄an kweilo̧k, jibbon̄ōn eo juon n̄an riboot.

Jibbon̄on raan eo juon ritōl eo an federal eaar jādetok 20 minit m̧okta ļo̧k jen ripoot eo im kweilo̧k eo kar karōke bwe en jinoe. Iaar ron̄ an unojdikdik ļo̧k n̄an stake būreejtōn eo, “Būreejtōn, ta eo kwoj kōņaan bwe n̄a im ro uwaan tiim in aō ren kōm̧m̧ane?”

Ta eo em̧m̧aan in eaar loe iaar bar loe elōn̄ alen ko kōn būrom̧ōj im idajon̄jon̄ eo ipeļaakin laļ in. Ej m̧ool Būreejtōn Packer. Revelesōn ej itok wōt n̄an stake būreejtōn ro n̄an ļōn̄aj er ilōn̄in jeļāļo̧kjeņ im maron̄ ko aer make. Im, ijjeļo̧kin, Irooj eaar leļo̧k n̄an rikanaan eo ej tōl juon kam̧ool eo epen me kean̄ ko an rej itok jān Anij kōn Jetōb Kwojarjar n̄an juon armej eo ejjab wānōk.

Iaar maron̄ in jeram̧m̧an n̄an kūr n̄an ļoor im̧we eo an ritōl ro ilo mour e aō. Ke iaar juon ļaddik iaar kūr āinwōt rikakpilōklōk n̄an būreejtōn eo an doulul eo an em̧m̧aan. Tokālik iaar juon rikakpilōklōk n̄an ruo district būreejtōn, n̄an juon Bisop eo Eutiej an Kabun̄ in, āinwōt juon uwaan Doulul eo an Jon̄oulruo Rijilōk ro, im juon Rikakpilōklōk n̄an ruo Būreejtōn an Kabun̄ in. Iaar maron̄ lo an revelesōn itok n̄an kapen er innām ro rej jerbal ippāer.

Revelesōn in an juon make ej itok, me jej aolep kōņaan, ejjab pidodo an itok, ak ej itok ilo kilaan kajjitōk. Irooj ej letok tōl in n̄an jipan̄ kōj bōk kain kam̧ool in jān Anij. Ej juon tōl n̄an jabdewōt ro rej pukot revelesōn an juon make eo me jej aolep aikuji.

Irooj eaar ba ad en barāinwōt obrak kōn iakwe n̄an aolep armej im n̄an ro rej tōmak, im erreeo eaikuj kaiboojoj ļōmņak ko ad. Innām ad leke en kajoor ļo̧k im̧aan Anij, im katak eo kōn priesthood enaaj waļo̧k n̄an jetōb ko ad āinwōt m̧ōļawi jān lan̄.

Eaar barāinwōt ba bwe Jetōb Kwojarjar enaaj m̧ōttad.⁴

Ennaan in iaar bōke ej jerbal n̄an kōj aolep. Jab ļōmņak ejjab aorōk en̄jake eo kwoj bōke kōn iakwe n̄an rikanaan eo an Anij. Men̄e ij etal n̄an Kabun̄, jekdo̧o̧n rikanaan rot ilo ilo tōre eo, membōr ro renaaj ba, “N̄e koro̧o̧l n̄an headquater eo an Kabun̄ in, komaron̄ ke jiron̄ ļo̧k rikanaan eo ewi jon̄an am iakwe e?”

Menin eļap jen nōbar ak en̄jake ko jet iien jej en̄jake ilo nōbar. Ej juon menin letok jān Anij. Ilo kwe kwonaaj bōk eļap ļo̧k menin kam̧ool an m̧adenļo̧k n̄e ej kōnono ilo jerbal eo an āinwōt juon rikanaan an Irooj. Iakwe eo kwoj en̄jake ej iakwe eo Irooj ej leļo̧k n̄an rikōnono ro An.

Menin ejjab pidodo n̄an en̄jake kōnke ekkā an Irooj ba n̄an rikanaan ro An n̄an leļo̧k naan in kapilōk eo epen n̄an armej ro n̄an bōke. Rikōjdāt eo n̄an jetōb ko ad ej kajjieon̄ tōl ļo̧k kōj n̄an jum̧ae im n̄an pere kūr eo an rikanaan jān Anij.

Em̧ōj aō lo wāween an Jetōb Kwojarjar maron̄ im̧we juon bōro ettā n̄an kōjparok rikaļoor eo an Jisōs Kraist n̄an kam̧ool revelesōn eo.

Rikanaan eo ej jilkinļo̧k eō n̄an leļo̧k kajoor in liāp eo ekwojarjar ioon em̧m̧aan eo ilo juon jikin edik. Rikanaan eo wōt an Anij ewōr kii ko n̄an kālet wōn eo ej bōk kajoor eo ekwojarjar eo letok in Irooj n̄an Piter, senior Rijilōk eo. Iaar bōk ejjab kajoor in liāp in, ak kōn wōt ijjitōn̄ jen Būreejtōn eo an Kabun̄ in imaron̄ kar leļo̧k n̄an bar juon.

Kōn menin, ilo juon ruum̧ ilo juon im̧ōn jar ettoļo̧k jān Salt Lake, iaar likūt peiu ioon bōran juon em̧m̧aan kar kālete jen rikanaan eo n̄an bōki kajoor eo an liāp. Pā ko pein raar kwaļo̧k kōkaļļe ko kōn juon mour ejjeļo̧k jem̧ļo̧kin n̄an kwaļo̧k okar in jerbal in em̧ool. Kōrā eo ippān eaar jijet itūrin. Eaar barāinwōt kwaļo̧k kōkaļļe in iiō n̄an lukkuun jerbal ippān ļeo pāleen.

Iaar konono naan ko kar litok jān rikanaan eo: “Ium̧win kappe in mālim im eddo eo jān,” innām etan rikanaan eo, “eo ej kabwijer aolep kii ko an priesthood ioon laļ in ilo iien in, ij lewaj ioom̧ kajoor in liāp,” im iaar leļo̧k etan innām etan tampeļ eo enaaj jerbal ie āinwōt juon riliāp.

Eaar dānin kōmjaļļaļ turin mejān. Iaar lo bwe kōrā eo ippān eaar barāinwōt jan̄. Iaar kōttōr aer kaenōm̧m̧an er make. Eaar jutak im jibadōk tok eō. Eaar reilōn̄ tak n̄an eō innām ba ke em̧ōņōņō ak ebarāinwōt burom̧ōj. Eaar ba bwe eaar lukkuun kōņaan etal n̄an tam̧peļ ippān ļeo ippān ak kiiō ej en̄jake bwe ejjab maron̄ etal ippān ļo̧k kōnke em̧ōj an Anij kūr e n̄an kūr eo ekwojarjar im eaiboojoj. Innām eaar ba bwe en̄jake eo an ejjab karbab n̄an eo m̧ōttan ilo tam̧peļ kōnke ejjab maron̄ riit ak jeje.

Iaar ba n̄an e ke ļeo pāleen enaaj m̧ōņōņō kōn jipan̄ eo an ilo tam̧peļ kōnke kajoor in jetōb eo ippān eļap. Barāinwōt ilo meļeļe jidik kajin eo an. Iaar ba n̄an e ke Anij eaar kwaļo̧k men ko n̄an e ilōn̄in aolep jeļāļo̧kjeņ eo an laļ in.

Eaar jeļā kōn menin letok eo an Jetōb bwe Anij eaar letok kōn rikanaan eo An ļeo pālele ejitenbōro eo ej iakwe. Eaar jeļā kōn e make bwe kii ko n̄an kōm̧m̧ane kajoor eo an liāp kar kabwijer jen em̧m̧aan eo eaar jab loe im eaar jeļā kōn e make bwe ewōr juon rikanaan emour an Anij. Eaar jeļā, men̄e ejjeļo̧k juon rikam̧ool emour eaar jiron̄ e, bwe rikanaan eo eaar jar elōn̄ alen kōn ļeo pāleen. Eaar jeļā kōn e make bwe Anij eaar kōm̧m̧ane kūr eo.

Eaar barāinwōt jeļā bwe kain̄i eo ļeo pāleen eaar kōm̧m̧ane emaron̄ kapen armej n̄an indeeo ilo aelōn̄ in kiin̄ in celestial. Eaar kapene ilo kōļmenļo̧kjeņ eo an im ilo bōro ke kallim̧ur eo an Irooj kar kōm̧m̧ane n̄an Piter ej wōnm̧aanļo̧k wōt ilo Kabun̄ in: “Jabdewōt men eo kwōnaaj liāpe ioon laļ, naaj liāpe i lan̄.”⁵ Eaar jeļā kōn e make, kōn revelesōn, jān Anij.

Jen ro̧o̧l likļo̧k n̄an jibadbad eo ad. “Revelesōn ej itok ilo Kabun̄ in: rikanaan eo ej bōki n̄an Kabun̄ in; būreejtōn eo n̄an stake eo an, mijen eo an, ak doulul eo an; bisop n̄an ward eo an; baba n̄an baam̧le eo an; ro kajjojo n̄an er make.”⁶

Ij kwaļo̧k aō kam̧ool bwe ej m̧ool. Jemedwōj Ilan̄ ej ron̄jake jar ko am̧, Ej iakwe eok, im Ejeļā kajiem̧. Jisōs ej ri Kraist eo, eo Nejin Anij, im ad Rilo̧mo̧o̧r Ej iakwe eok eļap ļo̧k jen maron̄ meļeļe.

Anij ej letok revelesōn, kōn Jetōb Kwojarjar, ioon ro Nejin. Ej kōnono n̄an rikanaan ro An ioon laļ in, eo rainin ej Thomas S. Monson. Ij kam̧ool bwe ej kabwijer im kōjerbal aolep kii ko an priesthood ioon laļ in.

Ilo am̧ ron̄jake naan ko an ro em̧ōj an Anij kūr n̄an kōnono ilo Etan, ij jar bwe kwonaaj bōk kam̧ool eo an revelesōn eo kwoj aikuji n̄an pukot iaļ eo am̧ n̄an bar kapijuknen, im pād Ippān ilo juon baam̧le eo em̧ōj an liāp indeeo. Ilo āt eo ekwojarjar etan Jisōs Kraist, amen.