Txoj Sia Nyob Mus Ib Txhis—Kom Paub Peb Leej Txiv Saum Ntuj Ceeb Tsheej thiab Nws Leej Tub, Yexus Khetos

Ntau xyoo tas los lawm kuv tau muaj cib fim kawm txog cov yaj saub hauv txhua lub caij nyoog tej zaj lus tim khawv kawg. Txhua tus tau hais lus tim khawv muaj hwj chim txog Vajtswv Leej Txiv thiab Nws Leej Tub, Yexus Khetos.

Thaum kuv nyeem tej zaj lus tim khawv no—thiab ntau zaj zoo li lawv zaj tau ntau xyoo no—qhov uas Leej Txiv Saum Ntuj Ceeb Tsheej hlub Nws tus Tub ntau npaum li cas thiab qhov uas Yexus qhia Nws txoj kev hlub thaum Nws mloog Nws Txiv lus yeej tau tshoov kuv lub siab. Kuv hais lus tim khawv tias thaum peb ua txhua yam uas peb yuav tsum ua kom peb yuav paub Nkawd thiab Nkawd txoj kev hlub ib leeg rau ib leeg, peb thiaj yuav tau Vajtswv lub txiaj ntsim zoo tshaj plaws—uas yog txoj sia nyob mus ib txhis.¹ Rau qhov “txoj sia ntev mus ib txhis ntawd, yog qhov uas neeg paub koj thiab paub hais tias, koj tib leeg yog Vajtswv thiab paub kuv, tus uas yog Yexus Khetos uas koj txib los.”²

Ua li cas lub txiaj ntsim no thiaj yuav yog peb li? Nws los ntawm kev tshwm sim rau yus tus kheej, uas luag tau tham thiab qhia peb txog tag kis no.

Nej puas nco qab thawj zaug uas nej paub tseeb tias muaj ib tug Vajtswv thiab tau hnov Nws txoj kev hlub? Thaum kuv tseem ua ib tug tub hluas, kuv tau ntsia saum ntuj thiab tau hnov Nws tus ntsuj plig. Kuv zoo siab thaum tshawb nrhiav txog tej yam zoo uas Vajtswv tau tsim cia—hais txog tej me kab mus rau tej ntoo loj loj. Thaum kuv pom tias lub ntiaj teb zoo nkauj npaum li cas, kuv paub tias Leej Txiv Saum Ntuj Ceeb Tsheej hlub kuv. Kuv paub tias kuv yog Nws ib tug me nyuam ntsuj plig tiag tiag li, tias peb sawv daws yeej yog Vajtswv cov me tub me ntxhais.

Tej zaum nej yuav nug hais tias, kuv ua li cas thiaj paub li no? Cov vaj lug kub qhia hais tias, ib txhia kawm paub los ntawm tus Vaj Ntsuj Plig Dawb Huv tias Yexus Khetos yog Vajtswv Tib Leeg Tub, thiab kom lwm tus neeg yuav ntseeg lawv cov lus, xwv kom lawv tau txoj sia nyob mus ib txhis yog tias lawv pheej rau siab ntseeg.³ Tam li kuv xav mas, nov tsis txhais tau hais tias ib txhia neeg yuav tau vam lwm tus neeg zaj lus tim khawv tas mus li.

Kuv zaj lus tim khawv tau loj hlob tuaj thaum kuv kawm ntxiv txog Leej Txiv Saum Ntuj Ceeb Tsheej thiab tus Cawm Seej los ntawm kuv niam txiv, cov kws qhia tej lus qhia thiab zaj lus tim khawv, cov vaj lug kub—uas kuv rau siab nyeem—thiab los ntawm tus Vaj Ntsuj Plig Dawb Huv. Thaum kuv muaj kev ntseeg thiab ua raws li cov lus txib, tus Vaj Ntsuj Plig Dawb Huv tau hais lus tim khawv hais tias tej yam uas kuv tau kawm ntawd muaj tseeb. Ua li no kuv thiaj paub rau kuv tus kheej.

Thaum ua li no, kev tshawb nrhiav yog qhov tseem ceeb tshaj plaws rau kev tshwm sim. Nifais caw peb txhua tus kom “noj Khetos tej lus; vim saib seb, Khetos tej lus yuav qhia nej txhua txhia yam tsav uas nej yuav tsum ua.”⁴

Ua ntej kuv hnub yug uas nto txog yim xyoo, kuv xav kawm ntxiv txog kev cai raus dej. Kuv tau nyeem cov vaj lug kub thiab thov Vajtswv. Kuv tau kawm hais tias kuv yuav txais lub txiaj ntsim los ntawm tus Vaj Ntsuj Plig Dawb Huv thaum kuv raug pom zoo. Kuv kuj pib to taub tias Vajtswv thiab Khetos yeej yog ib Leej Txiv thiab ib Leeg Tub—nyias muaj nyias tus, sib txawv, Nkawd yeej sib koom siab rau tib lub ntsiab. “Peb hlub [Nkawd], vim [Nkawd] xub hlub peb.”⁵ Thiab kuv pom ntau zaus tias Nkawd ib leeg tau hlub ib leeg thiab sib koom siab ua tej yam uas pab tau peb. Mloog ob peb ntawm ntau nqe vaj lug kub uas qhia qhov kev tseeb no:

Qhia txog peb lub neej ua ntej peb yug los. Leej Txiv Saum Ntuj Ceeb Tsheej piav txog Yexus Khetos hais tias “yog kuv Tib Leeg Tub, uas yog tus uas kuv Hlub thiab Xaiv puag thaum chiv keeb.”⁶ Thaum Leej Txiv tsim ntuj tsim teb raug, Nws tau ua li ntawd “los ntawm [Nws] Tib Leeg Tub”.⁷

Yexus niam, Maiv Liag, raug qhia hais tias nws yuav coj “tus Tub Siab Tshaj Plaws los.”⁸ Thiab thaum Yexus ua ib tug tub hluas, Nws qhia Nws niam tias nws yuav tsum “tawm mus ua [Nws] Txiv tej hauj lwm.”⁹ Ntau xyoo tom qab ntawd, thaum tus Cawm Seej ua kev cai raus dej, Leej Txiv Saum Ntuj Ceeb Tsheej tau hais lus saum ntuj los hais tias, “Tus no yog kuv tus Tub uas kuv hlub, kuv txaus siab rau nws.”¹⁰

Kom qhia tau Nws cov thwj tim txog kev thov Vajtswv, Yexus tau hais cov lus no:

“Peb Leej Txiv tus uas nyob saum ntuj ceeb tsheej; Thov kom sawv daws hwm koj lub npe.

“Thov koj los kav neeg lub siab. Thov koj pab kom peb ua tau raws li koj lub siab nyiam yam li cov uas nyob saum ntuj.”¹¹

Nws qhia Nikaudemaus tias, “Rau qhov Vajtswv hlub neeg ntiaj teb kawg li, nws thiaj li txib nws tib leeg Tub los rau hauv ntiaj teb.”¹² Thiab Nws piav txog Nws tej txuj ci hais tias, “Leej Tub ua tsis tau dab tsi nws tus kheej, tsuas yog tej yam uas nws pom Leej Txiv ua: rau qhov tej yam uas [Leej Txiv] ua, tej ntawd Leej Tub kuj ua thiab.”¹³

Thaum txog sij hawm yuav ua Kev Theej Txhoj, Yexus thov Vajtswv hais tias: “Txiv es, twb txog sij hawm lawm. … Kuv ua rau koj tau koob meej hauv ntiaj teb no; tes hauj lwm uas koj kom kuv ua, kuv twb ua tiav lawm.”¹⁴ Ces, thaum Nws raug tej kev txom nyem ris peb tej kev txhaum, Nws taij thov hais tias, “Kuv Txiv, yog koj pom zoo, thov koj tshem lub khob no ntawm kuv mus! Txawm yog li cas los thov koj tsis txhob ua raws li kuv lub siab nyiam, tiam sis cia ua raws li koj lub siab nyiam xwb.”¹⁵ Thaum kawg uas Nws nyob saum ntoo khaub lig, Yexus thov hais tias, “Txiv, thov koj zam txim rau lawv! Rau qhov lawv tsis paub hais tias lawv ua dab tsi” thiab qw hais tias, “Txiv, kuv muab kuv txoj sia tso rau hauv koj txhais tes.”¹⁶

Ces Nws tau mus xyuas cov ntsuj plig uas tau tuag lawm, thiab tau muab hwj chim rau lawv kom tawm los, tom qab nws sawv rov qab los, mus nyob hauv nws Txiv lub nceeg vaj.¹⁷ Tom qab tus Cawm Seej Sawv Rov Qab Los, Nws tshwm los rau Maiv Liag Madalas pom, hais tias, “Kuv yuav rov mus cuag tus uas yog kuv Txiv thiab nej Txiv.”¹⁸

Thaum Nws tuaj xyuas cov neeg hauv Amelikas teb, Nws Txiv hais txog Nws hais tias, “Saib seb kuv tus Tub uas kuv Hlub, tus uas kuv zoo siab heev rau, tus uas ua rau kuv lub npe tau yeeb koob.”¹⁹ Thaum Yexus nqi los xyuas cov neeg, Nws qhia txog Nws tus Kheej hais tias: “Saib seb, kuv yog Yexus Khetos. … kuv tau … ua rau Leej Txiv tau yeeb koob nyob rau hauv txoj kev kuv ris tej kev txhaum ntawm lub ntiaj teb.”²⁰ Thaum Nws qhia Nws txoj lus qhuab qhia, Nws piav hais tias:

“Nws yog tej lus qhuab qhia uas Leej Txiv tau muab rau kuv; thiab kuv ua tim khawv txog Leej Txiv, thiab Leej Txiv ua tim khawv txog kuv.”²¹

“Muaj tseeb tiag … Leej Txiv thiab kuv yog ib tug.”²²

Peb puas pom ib tug qauv hauv tej nqe vaj lug kub no uas ua pov thawj tias Leej Txiv thiab Leej Tub nyias muaj nyias tug? Yog li ntawd nkawd ua li cas thiaj ua ib tug? Tsis yog vim Nkawd yog tib tug neeg tiam sis vim rau qhov Nkawd sib koom siab rau tib lub ntsiab, sib zog ua kom “tib neeg txais tau txoj kev tsis txawj tuag thiab txoj sia nyob mus ib txhis.”²³

Yexus yog ib tug Vajtswv, tiam sis Nws pheej hais tias Nws txawv Nws txiv, nyias muaj nyias li thaum uas Nws thov rau Nws Leej Txiv thiab hais tias Nws tab tom ua raws li Nws Txiv lub siab nyiam. Thaum Nws qhuab qhia cov Neeg Nifais, Nws taij thov hais tias, “Txiv es, kuv tsis thov rau neeg ntiaj teb, tiam sis tsuas yog rau cov uas koj tau muab rau kuv tawm ntawm neeg ntiaj teb los, … kom kuv yuav nyob hauv lawv, Txiv es, ib yam li koj nyob hauv kuv, kom peb yuav ua tau ib tug, kom kuv yuav tau yeeb koob nyob hauv lawv.”²⁴

Thaum xav txog qhov no, peb yuav xav tsis thoob thaum peb kawm tias txoj Kev Muab Txoj Moo Zoo Txum Tim Rov Qab Los pib thaum uas ob tug neeg uas muaj yeeb koob tshwm sim los. Hais txog nws Thawj Zaj Ua Yog Toog Pom, tus Yaj Saub Yauxej Xamiv hais lus tim khawv tias, “Ib tug hais lus rau kuv, tuav kuv lub npe thiab taw tes rau tus ntawd, ces tau hais tias—Nov yog Kuv tus Tub uas Kuv Hlub. Cia li mloog Nws lus!”²⁵

Tus Yaj Saub hluas, uas mus hauv koog ntoo kom nrhiav tau seb nws yuav tsum koom lub koom txoos twg, tau muaj kev ntseeg ruaj khov thiab tawm los es paub thiab ua ib tug neeg tim khawv txog tib tug Vajtswv tseeb thiab Yexus Khetos, uas Vajtswv tau txib los. Yauxej, zoo li cov yaj saub thaum ub, tau los ua ib qho cuab yeej pab muab tej tswv yim txum tim rov qab los rau hauv ntiaj teb no uas yuav coj tib neeg mus txais txoj sia nyob mus ib txhis.

Nej kuj nrhiav tau peb Leej Txiv Saum Ntuj Ceeb Tsheej thiab “tus Yexus no tus uas tej yaj saub thiab tej thwj tim tau [ua tim khawv txog]”²⁶ hauv cov vaj lug kub thiab hauv lub tuam rooj sab laj no. Thaum nej nrhiav kom tau ib qho tim khawv—nej txoj kev tshwm sim—nej yuav pom hais tias Leej Txiv Saum Ntuj Ceeb Tsheej tau muab ib txoj kev tshwj xeeb rau nej tau kawm paub qhov tseeb rau nej tus kheej: dhau ntawm tus thib peb hauv Pawg Vajtswv, ib tug neeg ntsuj plig uas peb hu ua tus Vaj Ntsuj Plig Dawb Huv.

“Thiab thaum nej yuav tau txais tej yam no”—kuj hais txog tej yam uas kuv tau hais hnub no—“kuv yuav ntuas nej kom nej yuav thov Vajtswv, Leej Txiv tus uas nyob mus ib txhis, los ntawm Khetos lub npe, saib tej yam no puas muaj tseeb; thiab yog nej yuav thov nrog lub siab dawb paug, nrog txoj kev thov tiag tiag, muaj txoj kev ntseeg Khetos, nws yuav ua kom nej paub qhov tseeb ntawm tej ntawd, los ntawm lub hwj chim ntawm tus Vaj Ntsuj Plig Dawb Huv.

“Thiab los ntawm lub hwj chim ntawm tus Vaj Ntsuj Plig Dawb Huv nej yuav paub qhov tseeb ntawm tag nrho txhua yam.”²⁷

Cov kwv tij thiab cov muam, kuv hais lus tim khawv tias peb Leej Txiv Saum Ntuj Ceeb Tsheej xav kom peb nrhiav txoj kev paub li no tas sim no. Tus yaj saub Hilamas cov lus qw hauv av los hais tias: “Nco ntsoov, nco ntsoov tias twb yog nyob rau saum lub pob zeb peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb qhov chaw cuab zog … , ib qho chaw cuab zog uas yog neeg cog rau saud lawm yuav vau tsis tau.”²⁸Muaj tseeb tiag, peb yuav tsis poob qab.

Lub hauv paus ruaj khov ntawd yog Yexus Khetos. Nws yog lub “Pob Zeb Saum Ntuj Ceeb Tsheej.”²⁹ Thaum peb ua peb lub tsev rau saum Nws, txawm los nag hlob heev hauv lub caij nyoog kawg no, los sis muaj dej nyab, thiab cua daj cua dub los xij peem, tiam sis peb yuav tsis poob qab. Peb yuav tsis poob qab, rau qhov peb lub tsev thiab tsev neeg yuav muaj hauv paus hauv ntsis nyob rau ntawm Khetos.³⁰

Kuv hais lus tim khawv tias ib lub tsev zoo li ntawd yog ib lub tsev uas muaj yeeb koob.³¹ Nyob ntawd peb yuav sib sau ua ke thov rau peb Leej Txiv Saum Ntuj Ceeb Tsheej nyob rau hauv Nws Tib Leeg Tub lub npe. Nyob ntawd peb muab yeeb koob thiab kev ris txiaj rau Nkawd. Nyob ntawd peb txais yuav tus Vaj Ntsuj Plig Dawb Huv thiab tej kev cog lus uas Nws muab rau peb uas yog txoj sia nyob mus ib txhis, uas yog yeeb koob nyob rau hauv lub nceeg vaj xilethi-aus.³²

Kuv ua tim khawv tshwj xeeb hais tias peb tus Cawm Seej yog Yexus Khetos, tias Nws muaj sia nyob, tias peb Leej Txiv Saum Ntuj Ceeb Tsheej hlub peb htiab saib xyuas peb, tias peb muaj ib tug yaj saub hauv lub caij nyoog no—uas yog Thawj Tswj Hwm Thomas S. Monson—kom coj thiab qhia peb kev. Tus Vaj Ntsuj Plig Dawb Huv ua tim khawv rau txhua tus uas mus thiab nrhiav hais tias qhov no muaj tseeb. Los ntawm Yexus Khetos lub npe, amees.