Mour Indeeo—n̄an Jeļā Jemedwōj Ilan̄ im Nejin, Jisōs Kraist

Elōn̄ iiō ko remootļo̧k iaar bōk iien em̧m̧an n̄an ekkatak kōn naan in kam̧ool ko āliktata an rikanaan ro ilo kajjojo tōre in bōk eddo. Kajjojo raar kwaļo̧k juon kam̧ool ekajoor kōn Anij Jemed im Nejin, Jisōs Kraist.

Ke iaar riiti naan in kam̧ool kein—im ebar lōn̄ ko jet āinwōt kein ium̧win iiō ko m̧aantak—eaar un̄ur būruō iien otemjej n̄an jeļā ewi m̧wilaļ in an Jemedwōj Ilan̄ iakwe Eo Nejin erūtto tata im ekōjkan an Jisōs kwaļo̧k An iakwe jān An pokake ankilaan Jemen. Ij kam̧ool bwe n̄e jej kōm̧m̧ane ta eo emenin aikuj n̄an jeļā Er im Aer iakwe n̄an doon, jenaaj bōk menin letok eo eļaptata iaan menin letok ko an Anij eo ej mour indeeo.¹ Bwe “men in ej mour indeeo, bwe rej jeļā Kwe juon wōt Anij e m̧ool, im Jisōs Kraist, eo Kwaar jilkintok.”²

Ekōjkan an mennin letok in maron̄ ad? Ej itok kōn juon revelesōn an juon make, eo kar kōnono kake im katak kake jibbon̄ in.

Kwoj ke kememej iien eo jino in tata kwaar jeļā ke ewōr juon Anij im maron̄ en̄jake iakwe eo An? Āinwōt juon ļaddik, ikōn kalimjōk lan̄ eobrak kon iju ko im en̄jake Piktokin. Iaar laudin̄din̄ n̄an etale menin kōm̧anm̧an ko reļļap raiboojoj an Anij—jān menin mour jiddik ko n̄an wōjke ko reutiej. Ke iaar kile aiboojoj eo an laļ in, iaar jeļā bwe Jemedwōj Ilan̄ eaar iakwe eō. Iaar jeļā iaar lukkuun jetōb eo nejin, bwe jej aolep m̧aan im kōrā ro nejin Anij.

Ekōjkan aō kar jeļā men in? kom m̧aron kajjitōk. Jeje ko rekwojarjar rej katakin bwe n̄an jet armej kar leļo̧k jān Jetōb Kwojarjar n̄an jeļā bwe Jisōs Kraist ej Nejin Anij, im … n̄an ro jet kar leļo̧k n̄an tōmak ioon naan ko aer, bwe rej barāinwōt maron̄ bōk mour indeeo eļan̄n̄e rej tiljek wōt.”³ Jān aō kalimjōke, men in ejjab meļeļe in bwe jet armej renaaj indeeo pedped ioon naan in kam̧ool ko an ro jet.

Naan in kam̧ool eo aō make eaar eddōk ilo aō kar katak kōn Jemedwōj Ilan̄ im Rilo̧mo̧o̧r jān katak im naan in kam̧ool eo an jinō im jema, rūkaki ro, jeje ko rekwojarjar, im eļaptata Jetōb Kwojarjar. Ke iaar kōjerbal tōmak im pokake kien ko, Jetōb Kwojarjar eaar kam̧ool bwe ta eo iaar katak eaar m̧ool. Ej wāween aō kar itok n̄an jeļā kōn n̄a make.

Ilo jon̄ak in, kappukōt revelesōn an juon make ej aorōk. Nipai ej karuweinene kajjojo iaad n̄an ‘kwōjkwōj ioon naan ko an Kraist; bwe lo, naan ko an Kraist renaaj jiron̄ kom̧ aolep men ko kom̧ij aikuj kōm̧m̧an.”⁴

M̧okta jān kemem eo aō kein karuwalitōk, iaar kappukōt n̄an jeļā eļapļo̧k kōn peptaij. Iaar riiti jeje ko rekwojarjar im jar. Iaar katak bwe inaaj bōk mennin letok eo an Jetōb Kwojarjar n̄e kar kapen eō. Iaar barāinwōt jino n̄an meļeļe bwe Anij im Kraist rej lukkuun juon Jemen im Nejin—rejeno̧lo̧k, reoktak, kajjojo rej juon wōt ilo kōttōpar eo Aer. “Jej iakwe [er], bwe [Raar] iakwe kōj m̧okta.”⁵Im elōn̄ iien ko iaar ekkatak ekōjkan Aer iakwe doon im jerbal ippān doon n̄an em̧m̧an eo ad. Ron̄jake jet iaan eoon ko rellōn̄ me rej katakin m̧ool in:

Katak kōn mour eo ad m̧okta, Jemedwōj Ilan̄ eaar ekonono kōn Jisōs Kraist āinwōt “Nejū Jitōnbōro, eo Eaar Nejin Jitōnbōro im kar kālet E jān jino in.”⁶ Ke Jemen eaar kōm̧anm̧an laļ in, Eaar kōm̧m̧ane kōn Nejin Jitōnbōro Emake Wōt.⁷

Jinen Jisōs, Meri, kar jiron̄ e enaaj kar keotake “Nejin Eo E utiejtata.”⁸ Im ke Jisōs eaar juon likao, Eaar jiron̄ Jinen bwe Ej aikuj “pād ilo im̧ōn Jema.”⁹ Iiō ko tokālik, ke Rilo̧mo̧o̧r eaar peptaij, Jemed Ilan̄ eaar kōnono jān lan̄ ko, im ba, “E in Nejū jitōnbōro ippa, Ij m̧ōņōņō kake.”¹⁰

N̄an katakin rikaļoor ro An n̄an jar, Jisōs eaar kōnono naan kein:

“Jememwōj i lan̄, En kwōjarjar Etam̧.

“En itok Am̧ aelōn̄, Ren kōm̧anm̧an ankil Am̧ ilo laļ, barāinwōt ilo lan̄.”¹¹

Eaar katakin Nicdemus, “Bwe kōn an Anij yokwe laļ, Ear letok juon wōt Nejin Ear keotak.”¹² Im Eaar kōmeļeļeik mennin bwilōn̄ ko An kōn An kar ba, “Nejin e jab make maron̄ kom̧anm̧an jabdewōt, a men eo Ej lo [Jemān] kōm̧m̧ane; bwe men ko barāinwōt Ej kōm̧m̧ani.”¹³

Ke awa in Pinmuur eo eaar epaaktok, Jisōs eaar jar, im ba: “Jema e moottok iien eo. … Iar kaiboojoj Eok ioon laļ; Iar kam̧ōjļo̧k jerbal eo Kwaar letok n̄an Eō.”¹⁴ Innām ke eddo an jero̧wiwi ko ad raar waļo̧k n̄an E, Eaar kajjitōk, “O Jema, eļan̄n̄e e maron̄e en ilo̧k kab in jān Eō; a en jab ankil Aō, a ankil Am̧.”¹⁵ Ilo tōre ko An āliktata ioon debwāāl eo, Jisōs eaar jar, “Jema, Kwōn joļo̧k rueir; bwe re jaje ta eo rej kōm̧m̧ane” innām kar lam̧ōj, “Jema Ij lewaj Aō ilo peim̧.”¹⁶

Innām Eaar loļo̧k jetōb ko an ro raar mej, ilo laļ eo an jetōb, n̄an leļo̧k n̄an er kajoor eo n̄an jerkaktok, ālkin jerkakpeje eo An jān mej, n̄an deļo̧n̄e aelōn̄ in kiin̄ eo an Jemen¹⁷Ālkin Jerkakpeje eo an Rilo̧mo̧o̧r, Eaar waļo̧kļo̦k n̄an Meri Magdalene, im ba, “Ij walōn̄ļo̧k n̄an Jema, im Jemami.”¹⁸

Ke Eaar itok n̄an armej ro ioon aelōn̄ in America, Jemen eaar kwaļo̧k kadkad In im ba “Lo in Nejū Jitenbōro, eo ilo E, Ebun̄buruō; ilo E Iaar kaiboojoj Eta.”¹⁹ Ke Jisōs eaar wallaļo̧k ibwilijin armej ro, Eaar kwaļo̧k kadkad in E Make im ba: “Lo, N̄a ij Jisōs Kraist. … Iaar … kaiboojoj Jema ilo bōk Io̧ō jerawiwi ko an laļ.”²⁰ Ke eaar katakin katak eo An, Eaar kōmeļeļeiki:

“En̄in ej unleplep in katak eo Jema eaar letok n̄an Eō; im Ij kam̧ool kōn Jema, im Jema ej kam̧ool kōn Eō.”²¹

“Em̧ool … Jema im N̄a rej juon wōt.”²²

Jemaron̄ ke lo juon jon̄ak ilo eoon kein me rej kam̧ool kōn Jemen im Nejin āinwōt armej ro reoktak, jeno̧lo̧k? Innām, ekōjkan, rej ke juon? Ejjab kōnke Rej juon wōt bōtaab kōnke Rej juon wōt ilo kōttōpar, jokkuun wōt juon kijejeto n̄an bōktok jab wabanban im mour indeeo an armej.²³

Jisōs ej juon Anij, ijowōt ke Ej wōnm̧aanļo̧k ilo kwaļo̧k E Make juon eo emakeļo̧k, ejeno̧lo̧k jān an jar n̄an Jemen im jān ba bwe E ej kōm̧anm̧an ankilaan Jemen. Ilo tōre in jerbal in kwaļo̧k eo An ibwilijin Rinipai ro, Eaar kajjitōk, “Jema, Ij jar jab kōn laļ, a kōn ro Kwaar letok n̄an Eō jān laļ, … bwe In maron̄ pād ilo er āinwōt Kwe, Jema, kwōj ilo N̄a, bwe jān maron̄ juon, bwe In maron̄ aiboojoj ilo er.”²⁴

Keememej menin, jejjab ilbōk bwe Jepļaaktok eo an gospel eo eaar ijjino kōn juon waļo̧kļo̧k ejjab an juon ak ruo ānbwin reaiboojoj. Jān Visōn eo mokta an, Rikanaan Joseph Smith eaar kam̧ool, “Juon iaer eaar kōnono n̄an eō, kūr eō kōn eta im ba, jitōn̄ļo̧k eo juon—En̄in ej Nejū Jitōnbōro. Ron̄jake E!”²⁵

Rikanaan eo edik, eo eaar ilo̧k n̄an bukwin wōjke eo kōn tōmak edim, eaar dieojļo̧k kōn jeļāļo̧kjeņ eo im juon kam̧ool kōn Anij emake im Jisōs Kraist em̧ool, eo Anij eaar jilkintok. Joseph, āinwōt rikanaan ro m̧okta jān e, e kar erom kein jerbal n̄an kōjepļaaktok n̄an laļ in jeļāļo̧kjeņ eo me ej tōl n̄an mour indeeo.

Kwe barāinwōt maron̄ kappukōt Jemedwōj Ilan̄ im “Jisōs in eo ri kanaan ro im ri jilōk ro rekar [kam̧ool] kake,”²⁶ ilo jeje ko rekwojarjar im ilo kweilo̧k in eļap. Ilo kappukōt in am̧ kwonaaj lo bwe Jemedwōj Ilan̄ eaar kōpooj juon iaļ āinjuon n̄an kwe n̄an jeļā m̧ool eo kōn kwe make: kōn eo kein kajilu uwaan Doulul in Anij eo, juon ānbwinnin jetōb eo jejeļā kake āinwōt Jetōb Kwojarjar.

“Im n̄e kom̧ naaj būk men kein—ekoba ta eo iaar kwaļo̧ke rainin—Ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool; im eļan̄n̄e kom̧ naaj kajjitōk kōn bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an kom̧, jān kajoor eo an Jetōb Kwojarjar.

“Im jān kajoor eo an Jetōb Kwojarjar kom̧ maron̄ jeļā m̧ool ko otemjeļo̧k.”²⁷

Ro jeiū im jatū, ij kam̧ool bwe Jemedwōj Ilan̄ ekōņaan bwe jen kappukōt jeļā in kiiō. Naan ko an rikanaan Hilamōn rej lam̧ōj jān būn̄aln̄al: “Kememej, kememej bwe ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami … , pedped eo eļan̄n̄e armej rej ekkal ioon rej jamin bun̄.”²⁸Ilo m̧ool, jejjamin naaj bun̄.

Pedped in em̧ool ej Jisōs Kraist. E ej Ejm̧aan an Lan̄.²⁹ N̄e jej kalōk im̧ōko im̧ōd Ioon, wōt ko an raan kein āliktata remaron̄ wōtlo̧k, ibwijleplep ko remaron̄ itok, im kōto ko remaron̄ in letlet, bōtaab jejjamin naaj bun̄lo̧k, bwe im̧ōko im̧ōd im baam̧le eo ad renaaj pedped ioon Kraist.³⁰

Ij kam̧ool bwe kain kapijuknen rōt in ej juon im̧ōn aiboojoj.³¹ Ijo jej kuk ippān doon n̄an jar n̄an Jemedwōj Ilan̄ ilo etan Nejin ejitōnbōro. Ijo jej kaiboojoj im leļo̧k kam̧oolol n̄an Er. Ijo jej bōk Jetōb Kwojarjar im kallim̧ur ko me Ej litok n̄an kōj an mour indeeo, em̧ool aiboojoj eo an aelōn̄ in kiin̄ in celestial.³²

Ij kwaļo̧k aō kam̧ool ejeno̧lo̧k bwe ad Rilo̧mo̧o̧r ej Jisōs Kraist, bwe E emour, bwe Jemedwōj Ilan̄ Indeeo ej iakwe im mije kōj, bwe ewōr juon ad rikanaan ilo epepen in bōk eddo in—em̧ool Būreejtōn Thomas S. Monson—n̄an tōl im kōjbwebweik kōj. Jetōb Kwojarjar ej kam̧ool bwe men in ej m̧ool n̄an kajjojo ro rej ilo̧k im pukōt jeļā eo. Ilo etan Jisōs Kraist, Amen.