Kappukōt Aenōm̧m̧m̧an eo Eaetok Jetn̄aakin im Kalōk Baam̧le ko Ejjeļo̧k Jemļo̧kier

Ito-itak eo ad ilo mour in ewōr ie tōre ko rem̧m̧an im nana jimor. Kajjojo ej letok ukoktak ko reppen jān doon. Wāween ad jeļā man̄o n̄an ukoktak kein me rej itok ippāer ej pedped ioon bauntijen eo me jej ekkal ioon. Gospel in an ad Irooj im Rilo̧mo̧o̧r ej ņa meļļan juon bauntijen edim im pen. Ej ekkal jidik ilo̧k jidik ilo an bōk jeļaļo̧kijen kōn karōk eo ejjeļo̧k jem̧ļo̧kin an Irooj n̄an ro nejin. Rilo̧mo̧o̧r ej Rūkaki eo Eļaptata. Jej ļoore E.

Jeje ko rekwōjarjar rej kam̧ool kōn E im ņa meļļan juon waanjon̄ok in jim̧we ewānōk n̄an kōj bwe jen loore. Emōj aō kar kwaļo̧k ippān ānbwinin Kraist ilo kwelo̧k ko reļļap imaanļo̧k ke ewōr ippa jet notebook ko me ie jinō ekar ļo̧o̧ki kōmmeļeļe ko ekar kōjerbali n̄an kōpooj katak ko an n̄an Doulul eo an Kōrā. Kōmmeļeļe kein rej ekkar n̄an rainin āinwōt ilo tōre ko. Juon iaer ekar quote je ilo 1908 eo jān Charles Edward Jefferson kōn kadkad eo an Jisōs Kraist. Ej konono āinwōt in:

“N̄an juōn Rikūrijin ej n̄an nōbare Jisōs ilo m̧wilaļ in m̧ool im ilo pen jon̄an aolepān mour eo an jej ajeļo̧k n̄an e ilo jibadbad eo n̄an erom āinwōt E.

“… “Jemaron̄ jeļā E kōn naan ko Eaar kōnono, kōn jerbal ko Eaar kōm̧anm̧ani, im barāinwōt kōn ikōn̄ ko An. Jemaron̄ jeļā E barāinwōt jān kabwilōn̄lōn̄ ko Eaar likut ippān ro jeran moktata im kein karuo ippān ro rar jum̧ae E, im kein kajilu ippān aolep ro ilo epepen eo An. …

“Juon ian kōmmeļeļ ko kōn mour eo ilo epepen in kein karon̄oul ej jab po bōro [im inepata].  …

“…  Laļ in ej lam̧ōj kōn juon men, ej jab jeļā ta. M̧weie emoottok,…[im] laļ in eobrak kōn…mennin elolo ko an kapeel ko im jeļāļo̧kjeņ an armej ak jej jakwōņ wōt, ak … ejjab po buruōd, im jej pok wōt … [Elan̄n̄e jej kōppeļļo̧ke] Kallimur Ekāāl jej lo karuweinene eo jān naan kein: ‘Komin itok n̄an Ippā im Inaaj kakkijeik kom, N̄a bred in mour, N̄a meram in laļ, im elan̄n̄e jabdewōt ej maro en itok n̄an Ippa im idaak, Aō aenōm̧m̧an Ij lewōj n̄an kom, kom naaj bōk kajoor, kom naaj m̧ōņōņō’” ((The Character of Jesus  [1908], 7, 11, 15–16).

Em̧m̧aan im kōra rej bok jidikin jekjek ko rej pad ie jān ro me rej kelet n̄an jokwe ilubwilijier. Ro im rej errelōn̄ļo̧k n̄an er im kajjieon̄ ļoore er rej barāinwōt ļamļam er. Jisōs ej Waanjon̄ak eo Eļap. Ial eo de in n̄an lo aenōm̧m̧an eo eaetok jetnaakin ej n̄an reilok n̄an E im mour.

Ta eo kōn Jisōs ekkartata n̄an ad ekkatak kake?

Rijeje ro an Kallim̧ur Ekāāl… raar jab kea kōn jon̄an ļap eo [an Jisōs], nuknuk ko Eaar kōnaki, ak mōko Eaar jokwe ie. … E kar lotak ilo jikin mennin mour, kar jerbal ilo jikin jerbal an kaam̧tō, kar katakin iumin jilu iiō innām kar mej ioon debwāāl. … Kallimur Ekāāl ekar jeje in em̧m̧aan ro rekar kanuij jek ilo er bwe jen … likit wōt mejād [Ioon]” (The Character of Jesus, 21–22) kōn juōn bablaļ ke em̧ool ke E ar im ej eo. Nejin Anij, Rilo̧mo̧o̧r im Ripinmuur eo an laļ.

Juōn iaan būrabōļ ko an Rilo̧mo̧o̧r, ij tōmak, eļaptata an jerbal n̄an raan kein ad.

Ej pad ilo Matu jebta 13, ijo jej konono:

“A ke armej raar kiki, an ri kōjdate ej itōm ekkat ine in tāō ko ṇa ilo bwiljin wit, im ilo̧k.

“A ke bōlōk eddek im jebar leen, iien eo tāō rej barāinwōt waḷọk.

“Innām ro ri karijeran ātōk rej itōm ba ñan e, ‘Irooj, kwaar jab ekkat ine eṃṃan ilo aṃ jikin kallib ke? Innām tāō ko raar itok jān ia?’

“Ej ba ñan er, ‘Ri kōjdat eo, e ar kōṃṃan men in.’ Ro ri karijeran re ba ñan e, ‘Innām kwōj kōṇaan bwe jen ilem aini er ke?’

“A ej ba, ‘Jaab; eḷaññe āinwōt ñe koṃij aini tāō ko, koṃ naaj tumi wit ṇa ippaer.

“Ren jiṃor eddek ñan iien jonikōn; im ilo iien jonikōn Inaaj ba ñan ro ri ṃadṃōd, “Ṃokta koṃwin aini tāō ko, im kori im tile; a koṃwin ainitok wit ṇa ilo aō iṃōn wit” (eoon 25–30).

Rikōjdāt in etto eo an armej otemjeļo̧k emōj an lo elōn̄ wāween ko emaron̄ lōmnaki n̄an kajeded tāō ko ettoļo̧k im depakpak. Emōj an loi wāween ko remaron̄ deblo̧ke ekwōjarjar eo an kapijuknen ko ad. Wāween ko renana im jān laļ in emōj aer kanuij ajeded āinwōt n̄e ejjeļo̧k juōn lukkuun ialan kōm̧akūtļo̧k er. Rej itok ilo wire im ilo mejatoto n̄an kein jerbal ko jekar kōmmani n̄an katakin im kam̧ōņōņōik kōj.Wiit ko im tāo ko emōj aer eddōk ippān doon. Eo ej lale jikin kallib in eaikuij, ilo aolepen an kajoor, najidik men eo em̧m̧an bwe en kajoor im woleo jon̄an tāō ko rejamin wōr aer maron̄ kareel māj ak lo̧jiln̄i. Jejeram̧m̧an wōt āinwōt jet ro uwaan Kabun̄ eo an Irooj bwe gospel eo eaorōk an ad Irooj im Rilo̧mo̧o̧r en baunteijen eo jemaron̄ ekkāl ioon.

Jān Bok in Mormon ilo 2 Nipai jej riit: “Bwe lo, bar juon alen ij ba n̄an kom̧ bwe n̄e kom̧ naaj deļo̧n̄ ilo ial eo, im bōk Jetōb Kwōjarjar, enaaj kwaļo̧k n̄an kom̧ aolep men ko kom̧ aikuj kōm̧m̧an” (2 Nipai 32:5).

Jen jab kōtļo̧k n̄an jidik kowaron̄ron̄ ko an laļ bwe ren anjo̧ im le ioon ainikien eo elur, edik emera.

Emōj kar lukkuun kakkōl kōj kōn men ko reļļap im jenaaj kar jelmai ilo raan kein ad. Kōttōpar eo naaj ad in ewi wāween ad pojak n̄an men ko reļļap im ad Irooj ar ba rej lukkuun itok wōt.

Elōn̄ ilo jukjukin pād in einepata ad remeļeļe ke jepeepļo̧k in baamle eo enaaj wōt bōktok būromōj im ejjeļo̧k kōjatdikdik n̄an juon laļ epok. Āinwōt ro uwaan Kabun̄ in, ewōr ad eddo n̄an onaake im kōjparoke baamle eo āinwōt juon doulul in ekkal an jukjukinpād in im an indeeo. Rikanaan ro rekar kakkōl im kar kakkōl ļo̧k imaanļo̧k kōn waļo̧k ko renana rej naaj itok wōt jān mejaļļo̧k in aorōk ko an baam̧le.

Ilo an laļ in wōnm̧aanļo̧k wōt ilo an mejōk kōj, jen lukkuun jeļā bwe waanjon̄ok eo ad enaaj rie im an̄inwōļāik karōk eo Irooj ar kōm̧m̧ane n̄an ro Nejin ilo mour in. Katakin eo em̧m̧an tata eaikuj kōm̧m̧an jān waanjon̄ok ejim̧we. Kapijuknen ko ad rej aikuij jikin ko rekwōjarjar bwe ren maron̄ jutak ņae an̄it ko an laļ. Keememej bwe ļaptata in kōjeram̧m̧an ko an Irooj ej itok kōn im rej lilo̧k n̄an baam̧le ko rejim̧we.

Jeaikuj kanuij lale wōt bwe jen etale ad jerbal āinwōt ro jemān im jinen. Katakin eo ekajoortata juon ajiri emaron̄ bōke ej itok jān ro jemān im jinen rejim̧we rej inepata kake ro nejier. Jen mokta lale mōk ijo kwonan eo jinen. Ron̄jake kout in jān Būreejtōn Gordon  B. Hinckley:

“Kōrā ro rej kōm̧m̧an bwe juon em en juon kapijuknen eļapļo̧k tōprak eo aer n̄an jukjukinpād jān ro rej tōl jarin tariņae ko reļļap ak ro rej jutak ijjōbōran pejnej ko reļļap. Juon aorōk ejjab maron̄ likūt ioon ewi jon̄an kilaan jinen jelōt ro nejin, jelōt an juon jibwin ioon ro bwijjin, ak kōrā ro jeid im jatid ioon aolepen nokwin eo?

“Je ban maron̄ jino jon̄e ak watwate jelōt eo an kōrā ro me, ilo wāween ko aer make, rej kalek juon mour an baamle ejokane im kōkajiriri n̄an em̧m̧an eo ejjeļo̧k jem̧ļo̧kin n̄an epepen ko ilju im jeklaj. Jemļo̧k ko kōm̧m̧an jān kōrā ro ilo epepen in enaaj indeeo waļo̧k ko aer. Imaron̄ ke jake m̧aantak lōmnak in bwe ro jined rainin ejjeļo̧k aer iien em̧m̧an eļapļo̧k an kanooj apan̄ n̄an kōm̧m̧an aolep men remaron̄e n̄an kōkajoorļo̧k [kapijuknen eo]” ((Standing for Something: 10 Neglected Virtues That Will Heal Our Hearts and Homes [2000], 152).

Kiiō jen lale ijo kwonan juon jemān ilo mour ko ad.

Ro jemān rej litok kōjeram̧m̧an ko im kōm̧m̧ani kain̄i ko rekwōjarjar n̄an ro nejier. Men kein renaaj men ko reaorōk ilo mour in jetōb ilo mour kein aer.

Ro jemān rej lukkuun make bōk kwonaer ilo tōl baamle eo ilo jar, ekatak jeje ko rekwōjarjar raan otemjej, im kōm̧m̧an nokon in jotan an baam̧le ko kajojo wiik.

Ro jemān rej kalōk imenene ko an baamle eo jān aer bōk kwonaer im jipan̄ karōki tūreep in limo ko im mōnōnō ko renaaj kitbuuj aolepen ro uwaan baamle eo. Ememļo̧kijen ko kon iien rot kein ippān doon ajri rein nejier rejamin meļo̧kļo̧k.

Ro jemān rej kōm̧m̧an iien bwebwenato juon-illo̧k-juon aolep iien ippān ajri ro nejier im katakin er pedped ko an gospel eo.

Ro jemān rej katak laddik im leddik ro nejin aorōk in jerbal im jipan̄ er kōm̧m̧ani mennin kōttōpar ko rekkar ilo mour ko aer make.

Ro jemān rej kwaļo̧k waanjon̄ok in niknik jerbal ilo gospel in.

Jouj im keememej m̧aan ro jeiū im jatū, kūr ko ami rekwōjarjar āinwōt juōn jemān ilo Israel—kūr eo ami eaorōktata im ej n̄an kiiō im indeeo—kūr eo me kom̧ ban rōļo̧k jān e.

Elōn̄ iiō ko remootļo̧k ilo kweilo̧k eo eļap an stake, kem kijon̄ kwaļo̧k juon pija n̄an tipdiki unin tōl eo an enaan eo kōmij itōn kwaļo̧k e. Ilo torean iiō eo, ke kemij ito-itak ipelaakin Kabun̄ in n̄an loļo̧k ko jitōn̄i n̄an kōm, kom̧ ar kanuj jeļā kōn kwobban pija in. Enaan eo ej pād wōt ilo lōmnak e aō ilo tōrean iiō kein wōj. Pija in rikonono eo ie ej Būreejtōn Harold  B. Lee im ekar letok juon bwebwenato kōn juon men eaar waļo̧k ilo kapijuknen eo an kōrā eo nejin. Ej waļo̧k āinwōt in:

Juon joteen juon jinen ilo m̧weo ekar kaer ilo an kajjieon̄ in kadedeļo̧k an likit ilo bato jet leen wōjke ko. Āliktata ajri ro rekar pād ilo jikin kiki ko aer im men otemjej rekar lur, liin ekar kōm̧m̧ane jemļo̧k in bwe kiiō emaron̄ jibwi leen wōjke ko. Ke liin ekar jino kakili im joļo̧k jān ineer, ro laddik rekar jade ilo jikin kōmat eo im ba rekar pojak n̄an jar ko aer m̧okta jān aer kiki.

Im kōn an jab kōņaan bwe ren kōmad e, jineer ekar mōkaj an ba n̄an ļaddik rein, “Etke kom̧ro ej jab kōm̧m̧ani jar ko amiro make joteenin im Mama enaaj jerbale wōt leen wōjke kā?”

Ļaddik eo erūtto iaan ļaddik rein nejin ekar katōt neen ioon laļ im kajjitōk, “Ewi wōt men in eaorōktata, jar ke ak leen wōjke?” (Lale Teachings of Presidents of the Church: Harold B. Lee [2000], 143–44.)

Jet iien jej lo kōj ilo jekjek ko n̄e ewōr an iien em̧m̧an n̄an katakin juōn ajri juōn katak eo me enaaj jelōte ilo iien eo eaetok jetn̄aakin ilo mour ko reddik aer. Aaet m̧ool, jar eaorōkļo̧k jān leen wōjke. Juōn jemān ak jinen em̧man ej jab aikuj in boub n̄an kōjerbale juon iien em̧m̧an ilo mour eo an juon ajri n̄e emaron̄ katakini juōn katak.

Ej pen in kolmenļo̧kijen eo aō in bwe ej jan̄in kar wōr ilo tōrean iiō lōn̄lōn̄ ko ilo mour e aō ke ro nejin Jemed Ilan̄ rekar ļapļo̧k aer aikuj pein tōl an ro jemān im jinen retiljek. Ewōr juon ad jolet in ro jemān im jinen reļļap im rerajimjim im remaron̄ karūttoļok baam̧le ko aer kōn tōmak im peran bwe epepen eo tok ilaļ en maron̄ ļapļo̧k iien ko rem̧m̧an n̄an er jān kar ko aer. Jej aikuij kappukōt ilo kōj ejja jetōb in eperan wōt im anjo ioon men ko reppen jej jelmai kōn ejja jetōb in katok in wōt. Jej aikuj kadeļo̧n̄ ilo epepen ko ilju im jeklaj juōn kajoorļo̧k in atartar ioon katak ko an ad Irooj im Rilo̧mo̧o̧r.

“Im kiiō, ro nejū m̧aan, kememej, kememej bwe ej ioon ejm̧aan in an ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami; bwe n̄e devil enaaj jilkintok kōto an rekajoor, aaet, mōdi ko an ilo aire, aaet, n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄” (Hilamōn 5:12).

Ej gospel eo an Jisōs Kraist eo ej ņa mellan pedped eo me ioon emaron lo aenōm̧m̧m̧an eo eaetok jetn̄aakin im kalōk baamle ko ejjelok jemļo̧kier. Kōn men in ij kam̧ool ilo etan ad Irooj im Rilo̧mo̧o̧r, em̧ool Jisōs Kraist, amen.