2010–2019
Muaj Kev Ywj Siab Xaiv Tas Mus Li, Kom Ua Tau Lawv tus Kheej
October 2014


Muaj Kev Ywj Siab Xaiv Tas Mus Li, Kom Ua Tau Lawv tus Kheej

Vajtswv xav kom peb muaj kev ywj siab xaiv uas muaj peev xwm rais los ua neeg zoo li nws ntawm sab nqaij daim tawv thaib ntawm sab ntsuj plig.

Kev ua yeeb yam uas William Shakespeare sau hu ua The Life of King Henry V  muaj ib zaj thaum tsaus ntuj hauv cov tub rog Akiv lub yeej nyob ntawm Agincourt ua ntej lawv sawv ua rog nrog cov tub rog Fabkis. Ntuj tsaus zem zuag es tus Vaj Ntxwv Henry zais ntsej muag kom nws cov tub rog tsis paub nws yog leej twg. Nws nrog lawv tham, vim nws xav paub nws cov tub rog lub siab xav li cas, thiab vim lawv tsis paub nws yog leej twg, lawv cia li qhib siab hais lus rau nws. Lawv sib tham tawm tswv yim seb leej twg lav ris rau tej yam uas cov neeg raug thaum lawv ua tsov ua rog—puas yog tus vaj ntxwv los yog nyias lav ris nyias.

Muaj ib lub sij hawm tus Vaj Ntxwv hais tias, “Kuv xav tias tsis muaj lwm qhov chaw uas kuv txaus siab tso lub ntiaj teb no tseg tsuas yog nyob hauv tus vaj ntxwv pab tub rog xwb; vim nws lub hom phiaj twb ncaj.”

Michael Williams cem hais tias, “Peb tsis paub qhov ko puas muaj tseeb.”

Nws tus khub pom zoo hais tias, “Aws, thiab peb tsis xav paub; vim peb paub txaus lawm, yog peb paub tias peb yog tus vaj ntxwv cov pej xeem: yog tias nws lub hom phiaj tsis yog, ces qhov uas peb mloog tus vaj ntxwv lus tsis yog peb ua txhaum.”

Williams hais ntxiv hais tias, “Yog nws lub hom phiaj tsis yog, ces nws tib leeg lav ris txhua yam.”

Tiam sis, tus Vaj Ntxwv Henry tsis pom zoo. “Txhua tus pej xeem lub luag hauj lwm yog rau tus vaj ntxwv; tiam sis txhua tus neeg nyias muaj nyias lub siab.”1

Shakespeare tsis qhia leej twg hais yog nyob hauv zaj ua yeeb yam no, thiab kev sib cav no los tseem muaj niaj hnub nim no thiab—leej twg lav ris tej yam uas tshwm sim hauv lawv lub neej?

Thaum tib neeg raug xwm txheej, feem ntau lawv liam lwm tus los yog liam Vajtswv. Tej lub sij hawm lawv xav tias lwm tus yuav tsum saib xyuas lawv, thiab tib neeg pib hais tias lwm tus neeg los yog tej tseem fwv muaj kev lav ris saib xyuas lawv. Thaum hais txog tej yam ntawm sab ntsuj plig, ib txhia xav tias peb tsis tas coj ncaj ncees—vim Vajtswv hlub peb thiab cawm peb “txawm peb zoo li cas los.”

Tiam sis Vajtswv xav kom Nws cov me nyuam ua raws li kev ywj siab coj ncaj ncees uas Nws muab rau lawv, “kom txhua tus neeg yuav lav ris rau nws tus kheej tej kev txhaum nyob rau hnub txiav txim.”2 Raws li Vajtswv lub siab nyiam thiab txoj hau kev peb muaj kev ywj siab txiav txim hais tias peb yuav ua li cas nyob hauv peb lub neej. Vajtswv yuav tsis sawv cev ua neej rau peb los sis kav peb zoo li peb yog Nws cov me nyuam roj hmab, ib yam li Dab Ntxwg Nyoog xav ua. Thiab Nws cov yaj saub kuj tsis kam sawv Vajtswv cev kav peb li ntawd. Brigham Young hais tias: “Kuv tsis xav kom ib tug Neeg Ntseeg hauv Hnub Nyoog Kawg nyob hauv lub ntiaj teb no, los yog nyob saum ntuj, txaus siab rau tej yam kuv ua, tsuas yog tus Ntsuj Plig ntawm tus Tswv Yexus Khetos, uas yog tus ntsuj plig ntawm kev txais kev tshwm sim, ua rau lawv txaus siab. Kuv xav kom lawv paub thiab to taub ntawm lawv tus kheej.”3

Yog li ntawd Vajtswv tsis cawm peb “txawm peb nyob zoo li peb,” vim txawm “peb nyob zoo li peb,” peb tsis dawb huv, thiab tsis muaj ib yam tsis dawb huv yuav nyob tau ntawm nws xub ntiag; vim, ntawm Adas yam lus ces, Txiv Neej Dawb Huv yog nws lub npe, thiab nws Tib Leeg Tub lub npe yog Neeg Leej Tub.4 Thiab qhov thib ob, Vajtswv yuav tsis yuam peb rais los ua neeg uas peb tsis xav ua. Nws hlub peb tiag tiag, thiab vim Nws hlub peb, Nws tsis yuam peb los yog tso peb tseg. Tiam sis Nws pab thiab coj peb. Qhov uas qhia hais tias Vajtswv hlub peb yog Nws cov lus txib.

Peb yuav tsum zoo siab txog Vajtswv txoj hau kev uas cia peb muaj kev ywj siab xaiv ua raws li peb xav ua, los yog zoo li cov vaj lug kub qhia, peb “saj qhov iab, kom [peb] thiaj yuav paub saib qhov zoo rau nqi.”5 Peb yeej zoo siab ua Vajtswv tsaug vim tus Cawm Seej txoj Kev Theej Txhoj kov yeej kev txhaum kom peb yuav yug los hauv lub ntiaj teb thiab tsis raug txim rau Adas txoj kev txhaum.6 Vim Yexus txhiv peb dim txoj Kev Poob, Vajtswv suav tias peb tsis muaj txim thaum peb yug los thiab peb “los mus ua ib cov neeg uas nyob ywj siab mus ib txhis li, paub qhov zoo [txawv] qhov phem; muaj cuab kav ua raws li [peb] lub siab nyiam thiab tsis raug yuam kom ua ub ua no.”7 Peb muaj cai xaiv rais los ua neeg zoo li peb xav, thiab nrog Vajtswv txoj kev pab, peb ua tau neeg zoo li Nws.8

Yexus Khetos txoj moo zoo qhib kev rau peb rais los ua neeg zoo li Vajtswv. Dhau los ntawm Yexus Khetos txoj Kev Theej Txhoj, yuav tshem tau tej yam uas peb ua tsis yog raws li kev cai xilethi-aus thiab peb muaj peev xwm ua neeg zoo li Yexus Khetos. Tiam sis kev cai txim lij tsis cia muaj tej no yog tias peb tsis txaus siab ua li no. Yeej ib txwm zoo li no. Peb yog neeg uas muaj sab cev nqaij daim tawv nyob hauv lub ntiaj teb no vim peb txhua tus tau xaiv ua raws li Vajtswv txoj hau kev.9 Yog li ntawd, peb txais txoj kev cawm seej tsis yog vim Vajtswv lam pub rau peb xwb, thiab tsis yog peb txais vim Vajtswv xav muab rau peb xwb.10

Kev txim lij yog ib tug cwj pwm tseem ceeb ntawm Vajtswv. Peb ntseeg tau Vajtswv vim Nws ncaj ncees tag nrho. Cov vaj lug kub qhia peb tias Vajtswv tsis taug tej kev nkhaus, thiab nws tsis tig mus rau sab tes xis los sis mus rau sab laug, thiab nws tsis hloov tej uas nws tau hais, yog li ntawd nws tej kev yeej ncaj, thiab nws txoj kev yog ib txoj uas ncig mus ib txhis li8 thiab “Vajtswv tsis xaiv leej twg ntsej muag.”9 Peb tso siab rau Vajtswv txoj kev txim lij thiaj muaj kev ntseeg thiab kev cia siab.

Tiam sis vim Nws ncaj tag nrho, muaj tej yam uas Vajtswv ua tsis tau. Lam cawm ib txhia thiab lam rau txim rau lwm tus mas Nws ua tsis tau. Nws “yeej ntsia tsis taus kev txhaum li txawm yuav yog qhov me dua ntais.”13 Nws tsis cia kev zam txim txeeb tau kev txim lij.14

Qhov puav pheej txog Vajtswv txoj kev txim lij yog qhov uas Vajtswv tau tsim lub ntsiab cai ntawm kev hlub tshua. Yog vim Nws ncaj Nws thiaj li npaj ib txoj kev rau kev hlub tshua kom pab peb muaj txoj sia nyob mus ib txhis. Yog li ntawd, kev txim lij yuam kom them tag nrho nws tej nqi, thiab kev zam txim muaj tug rau tag nrho tej uas yog nws li.15

Peb paub tias yog tej kev txom nyem thiab kev tuag ntawm tus tsis tau ua txhaum li, tus uas Leej Txiv txaus siab rau; … cov ntshav ntawm Nws Leej Tub uas tau nrog16 them kev txim lij tej nqi, muab kev hlub tshua thiab txhiv peb dim.17 Txawm li ntawd los, “raws li txoj kev ncaj ncees, txoj kev txhiv dim yuav ua tau hauj lwm, tsuas yog tias tib neeg yuav hloov siab lees txim.18 Yog tej nqi ntawm kev hloov siab lees txim uas cia kom muaj kev hlub tshua es tsis rhuav kev txim lij.

Yexus Khetos tuag tsis yog kom cawm txhua tus tiam sis yog muab cib fim rau lawv hloov siab lees txim. Peb “vam khom tag nrho rau tej hauj lwm zoo ntawm tus uas muaj hwj chim cawm tau”19 thaum peb hloov siab lees txim, tiam sis qhov uas peb xaiv hloov siab lees txim nyob ntawm peb tus kheej. Yog li ntawd vim peb yuav tsum hloov siab lees txim kom txais tau Vajtswv txoj kev tshav ntuj, Vajtswv cia peb muaj kev lav ris rau peb tus kheej. Yog li ntawd, kev hloov siab lees txim txhawb nqa peb txoj kev ywj siab coj ncaj ncees: “Thiab li no txoj kev zam txim thiaj them tau tej nqi ntawm txoj kev txim lij, thiab puag lawv nyob hauv txhais caj npab uas tsis muaj xwm txheej, thaum tus uas tsis xyaum kom muaj kev ntseeg mus rau txoj kev hloov siab lees txim qhib ntsa rau tag nrho tej kev txib ntawm txoj kev txim lij; yog li ntawd tsuas yog rau tus uas muaj txoj kev ntseeg [thiab] hloov siab lees txim xwb thiaj raug coj los mus rau txoj kev txhiv dim loj thiab nyob mus ib txhis.”20

Ib txhia tsis to taub Vajtswv txoj kev txim lij thiab kev hlub tshua; ib txhia tsis ntseeg Vajtswv muaj txoj sia nyob; tiam sis ob qho teeb meem no yuav ua rau peb tsis ua npaum li peb muaj peev xwm ua kom rais los ua neeg zoo li Vajtswv. Ib tug Vajtswv uas tsis muaj tej kev cai yeej zoo li ib tug Vajtswv uas tsis muaj txoj sia nyob. Ib lub ntiaj teb uas tsis muaj Vajtswv, tus Vajtswv uas tsa tej kev cai coj ncaj ncees kom pab Nws cov me nyuam ua neeg zoo tag nrho, yog ib lub ntiaj teb uas tsis muaj qhov tseeb thiab kev txim lij. Yog ib lub ntiaj teb uas kev coj ncaj ncees nyob ntawm seb yus xav li cas xwb.

Qhov no txhais hais tias txhua tus neeg nyias coj raws li nyias lub siab xav xwb. Yeej tsis yog cov uas xyeej Vajtswv uas ntseeg li no xwb. Ib txhia uas ntseeg Vajtswv tseem xav tias lawv muaj peev xwm txiav txim hais tias qhov twg yog qhov zoo thiab qhov twg yog qhov phem. Ib tug tub hluas hais li no hais tias: “Kuv tsis xav tias kuv txawj hais tias Hinduism tsis yog los sis Catholicism tsis yog los sis kev ntseeg Episcopalian tsis yog—kuv xav tias nyob ntawm seb nej ntseeg dab tsi xwb. … Kuv tsis xav tias muaj qhov yog thiab qhov tsis yog.”21 Lwm tus, thaum lawv nug nws txog nws txoj kev ntseeg ntuj, teb hais tias, “Kuv tus kheej—kuv ntseeg kuv tus kheej xwb. Yuav ua li cas kom yuam yus tus kheej ntseeg dab tsi?22

Rau cov uas ntseeg hais tias txhua tsav txhua yam tej zaum muaj tseeb, cov ntawd xav tias tej lus tshaj tawm hais tias muaj qhov tseeb uas tsis txav mus, uas muaj tiag tiag yog kev yuam lawv ntseeg—“Kuv xav tias tsis tsim nyog yuam kuv ntseeg ib yam dab tsi muaj tseeb uas kuv tsis nyiam.” Tiam sis qhov kev xav ntawd tsis hloov qhov yog. Txawm yog ib tug neeg tsis nyiam qhov uas nws yuav poob thaum nws dhia ntawm pob tsuas mus los, nws yeej yuav poob xwb. Kev cai nyob mus ib txhis thiab kev txim lij muaj tseeb zoo ib yam. Yus tsis muaj kev ywj siab xaiv vim yus tawm tsam tej yam no; yus muaj kev ywj siab xaiv vim yus coj raws li tej yam no. Qhov no yog lub hauv paus ntawm Vajtswv lub hwj chim. Yog tias tsis muaj qhov tseeb tiag tiag, ces peb txoj kev ywj siab xaiv yeej yuav tsis muaj nqi vim peb yeej yuav tsis paub tias yuav muaj li cas thaum peb ua ib yam dab tsi. Raws li Lihais piav: “Thiab yog nej yuav hais tias twb tsis muaj kev cai, nej kuj yuav hais tias twb tsis muaj kev txog kev txhaum. Yog nej yuav hais tias twb tsis muaj kev txog kev txhaum, nej kuj yuav hais tias tsis muaj txoj kev ncaj ncees. Thiab yog hais tias tsis muaj txoj kev ncaj ncees ces yeej tsis muaj txoj kev zoo siab. Thiab yog hais tias tsis muaj txoj kev ncaj ncees los sis txoj kev zoo siab ces yeej yuav tsis muaj txoj kev rau txim los sis txoj kev txom nyem. Thiab yog hais tias tsis muaj tej no ces yeej tsis muaj Vajtswv. Thiab yog hais tias tsis muaj Vajtswv ces yeej tsis muaj peb, thiab lub ntiaj teb; vim yog yuav tsis tau muaj txoj kev tsim tej yam no ces yuav tsis muaj dab tsi uas ua tau hauj lwm los sis raug tej hauj lwm uas lwm yam ua; yog li ntawd, txhua txhia yam yuav tsum ploj mus kom tas.”23

Txawm yog los ntawm sab nqaij daim tawv thiab sab ntsuj plig los, qhov uas peb muaj cib fim lav ris tej yam peb ua yog ib qho uas Vajtswv pub rau peb thiab yog peb tsis muaj li no ces ntshe peb yuav tsis ua raws li Vajtswv cov ntxhais thiab tub muaj peev xwm ua. Txoj kev lav ris tej yam peb ua yog ib qho uas peb muaj cai ua thiab ib lub luag hauj lwm uas peb yuav tsum tiv thaiv; Dab Ntxwg Nyoog twb tawm tsam qhov no txij thaum Ntuj Tsim Teb Raug. Peb yuav tsum tiv thaiv peb txoj kev lav ris kom tsis txhob tos tib neeg thiab tej txheej xwm kom tau tej yam (txawm ib txhia xav ua zoo). Thiab peb yuav tsum tiv thaiv peb txoj kev lav ris kom tsis txhob ua raws li peb tej kev xav tsis ua hauj lwm kom muaj txuj ci thiab Yexus Khetos tej cwj pwm.

Muaj ib zaj dab neeg hais txog ib tug txiv neej uas tsis kam ua hauj lwm. Lwm tus yuav tsum ua txhua yam rau nws. Raws li nws xav, lub Koom Txoos los sis lub tseem fwv, los yog ob qho tib si, yuav tsum pab nws ua neej vim nws twb them ib feem kaum thiab them se lawm. Nws tsis tau dab tsi noj tiam sis nws tsis kam ua hauj lwm kom tau noj tau haus. Cov uas sim pab nws npau taws thiab tsis paub ua dab tsi, es lawv txiav txim siab tias vim nws tsis kam ua ib yam dab tsi pab tau nws tus kheej, ces tsim nyog uas lawv kwv nws mus rau tom toj ntxas cia nws tuag. Thaum lawv kwv nws mus rau toj ntxas, ib tug txiv neej hais tias, “Peb ua tsis tau li no. Kuv muaj pob kws kuv mam li muab rau nws noj.”

Yog li ntawd lawv piav rau tus txiv neej, thiab nws nug hais tias, “Puas tau hle daim tawv pob kws?”

Lawv teb tias, “Tsis tau.”

Nws tias, “Ces, cia li mus xwb.”

Vajtswv xav kom peb muaj kev ywj siab xaiv ua neeg uas muaj peev xwm rais los ua neeg zoo li nws ntawm sab nqaij daim tawv thaib ntawm sab ntsuj plig, xav kom peb tsis txhob pluag thiab tsis txhob ua kev txhaum, xav kom peb saib peb tus kheej rau nqi thiab ua tej yam peb tus kheej, xav kom peb npaj txhua yam kom koom nrog Nws nyob hauv Nws lub nceeg vaj xilethi-aus.

Tsis yog kuv xav tias peb ua li no peb tus kheej txhais hais tias tsis muaj Nws txoj kev pab tsis tu tsis tseg. “Peb paub hais tias twb yog los ntawm txoj kev tshav ntuj uas peb … dim, tom qab uas peb ua txhua … yam uas peb ua tau.”24 Thiab peb tsis tas ua zoo tag nrho ua ntej Vajtswv yuav pab peb—Vajtswv yuav pab peb txhua lub sij hawm ntawm txhua hnub, txawm peb coj ncaj ncees npaum li cas los yog. Tiam sis kuv paub tias tsis yog peb yuav tsum xav tau Nws txoj kev pab xwb, peb yuav tsum siv zog, hloov siab lees txim, thiab xaiv Vajtswv kom peb thiaj ua neej raws li kev txim lij thiab kev ywj siab coj ncaj ncees. Kuv tsuas thov kom peb lav ris tej yam peb ua thiab cia li mus ua hauj lwm kom thiaj muaj ib yam uas Vajtswv pab tau peb ua.

Kuv ua tim khawv tias Vajtswv muaj txoj sia nyob, Nws Leej Tub, Yexus Khetos, yog peb tus Txhiv Dim, thiab tus Vaj Ntsuj Plig Dawb Huv nrog peb nyob. Lawv yeej xav pab peb, thiab Lawv muaj hwj chim tag nrho ua li ntawd. Thov kom peb yuav tsim los thiab sawv hauv av los “kom [yuav muaj raws li] tej kev khi lus ntawm Leej Txiv tus Nyob Mus Ib Txhis uas nws tau khi rau [peb].”25 Los ntawm Yexus Khetos lub npe, amees.