Saoloto e Faavavau, e Galue mo i Latou Lava

E aofia i le ata faatino a Viliamu Siekisipia The Life of King Henry V se vaaiga i le po i le tolauapiga a fitafita Peretania i Agincourt a o lei o atu e tau ma le autau a Farani. I le taupulapula o moli ma le tau le iloa atoa o ia, sa savali atu ai Tupu Enele ma le leiloaina i ana fitafita. Sa ia talanoa ma i latou, taumafai e suesue le talitonuga o lana autau toalaiti, ma e talu ai latou te lei iloa po o ai o ia, sa tuusao mai ai o latou manatu. I se vaega o le latou talanoaga sa talanoaina po o ai e nafa ma le tiutetauave mo mea e tutupu i alii i le taua—o le tupu po o fitafita taitoatasi.

I se tasi taimi sa tautino atu ai Tupu Enele, “Ou te manatu e matua faamalieina au pe a ou oti i le autau a le tupu nai lo se isi mea; aua e tonu ana mafuaaga.”

Sa tali atu Mikaele Viliamu, “O lena mea e le oo i ai lo tatou iloa.”

Sa ioeina e se isi fitafita, “Ioe, pe sili atu foi i lo le mea e tatau ona tatou saili i ai, aua ua lava lo tatou iloa, afai o i tatou o auauna a le tupu: ae a sese ana mafuaaga, ia o lo tatou usiusitai i le tupu e tafiesea ai le solitulafono mai ia i tatou.”

Sa faaopoopo atu Viliamu, “Afai e le lelei le mafuaaga a le tupu, e pa’ū lava la i luga o le tupu taunuuga o mea na ia faia.”

E le o se mea e faateia ai le le ioeina e Tupu Enele, “O fitafita uma e tofu ma sona tiute e fai i le tupu; ae e nafa le tagata lava ia ma lona agaga.”¹

E lei taumafai Siekisipia e foia lenei finauga i le tala, ma i soo se tulaga lava o loo faaauau pea lenei finauga e oo mai i o tatou lava vaitaimi—o ai e nafa ma le tiutetauave mo mea e tutupu i o tatou olaga?

A oo ina le lelei ni mea, e i ai se tulaga o le tuuaia o isi ma e oo lava i le Atua. O isi taimi e manatu ai nisi e tatau ona faia e isi ni mea mo i latou, ma saili atu ai tagata taitoatasi po o ni vaega e lafo atu i isi tagata po o le malo le tiutetauave mo lo latou manuia. I mataupu faaleagaga e manatu ai nisi e faapea, e le manaomia e alii ma tamaitai ona tauivi mo amiotonu patino—aua e alofa ma laveaiina i tatou e le Atua “e pei ona tatou i ai.”

Ae ua faamoemoe le Atua e tatau i Lana fanau ona galulue e tusa ma le faitalia ua Ia tuuina atu ia i latou, “ina ia mafai e tagata taitoatasi ona tali mo ana lava agasala i le aso o le faamasinoga.”² O Lana fuafuaga ma Lona finagalo ina ia tatou maua le matafaioi autu o le faia o faaiuga o tala faatino i o tatou lava olaga. E lē soifua le Atua mo o tatou olaga mo i tatou pe pulea i tatou e pei o Ona papeti, e pei ona ofoina mai i se tasi taimi e Lusifelo ina ia faia. E lē taliaina foi e Ana perofeta le matafaioi o le avea ma “matai o papeti” e suitulaga ai i le Atua. Na ta’ua e Polika Iaga: “Ou te le manao i soo se Au Paia o Aso e Gata i lenei lalolagi, po o i le lagi, ina ia faamalieina i soo se mea ou te faia, sei vagana ai ua faamalieina i latou e le Agaga o le Alii o Iesu Keriso,—o le agaga o faaaliga. Ou te manao ia latou iloaina mo i latou lava ma malamalama ai mo i latou lava.”³

O le mea lea, e lē laveaiina i tatou e le Atua “e pei ona tatou i ai,” muamua, aua “e pei ona tatou i ai” tatou te lē mama, ma “e leai se mea lē mama e mafai ona mau … i ona luma; ona, i le gagana a Atamu, o le Tagata Paia o lona suafa lea, ma o le suafa o lana Toatasi na Fanaua o le Atalii o le Tagata [le Paia].”⁴ Ma le lona lua, e le galue le Atua ina ia avea i tatou ma se mea tatou te lei filifilia e ala i a tatou faatinoga. E moni e alofa o Ia ia i tatou, ma ona e alofa o Ia ia i tatou, e Na te le faamalosia ai i tatou pe tuulafoai i tatou. Ae e Na te fesoasoani ma taialaina i tatou. E moni lava, o faaaliga moni o le alofa o le Atua o Ona poloaiga ia.

E tatau (ma ia tatou) olioli i le fuafuaga faauuina a le Atua lea ua faatagaina ai i tatou e faia filifiliga e galue mo i tatou lava ma tofo i taunuuga, e pei ona faamatalaina e tusitusiga paia, ia “tofo i le oona, ina ia [tatou] iloa ai ona faataua le lelei.”⁵ Tatou te faafetai pea e faavavau i le faatoilaloina e le Togiola a le Faaola o le uluai agasala ina ia mafai ai ona tatou fananau mai i lenei lalolagi ae ia le faasalaina i le solitulafono a Atamu.⁶ O le togiolaina la mai le Pa’ū, e amata ai o tatou olaga i le mama i luma o le Atua ma “saoloto ai e faavavau i le iloa o le lelei mai le leaga; e fai mo i [tatou] lava ae le faamalosia.”⁷ E mafai ona tatou filifili ia avea ma tagata tatou te mananao e avea ai, ma o le fesoasoani a le Atua, e mafai ai ona tatou avea e faapei o Ia.⁸

Ua tatalaina e le talalelei a Iesu Keriso le auala i le ituaiga o tagata e mafai ona tatou avea ai. E ala i le Togiola a Iesu Keriso, e mafai ai ona tafiesea lo tatou toilalo e ola atoatoa ma tumau i le tulafono faaselesitila ma mafai ai ona tatou atiaeina se uiga faaKeriso ma faamamaina ai. Peitai, e manaomia e le faamasinotonu ia aua nei tupu se tasi o nei mea e aunoa ma lo tatou loto malie ma le auai ai. O le mea moni lava lea ua leva ona i ai. O lo tatou i ai tonu i le lalolagi o ni tagata faaletino o le taunuuga lea o se filifiliga sa faia e i tatou taitoatasi ia auai i le fuafuaga a lo tatou Tama.⁹ O le mea lea, o le faaolataga e le o se mea e na o le finagalo o le Atua e faatatau i ai.¹⁰

O le faamasinotonu o se uiga taua lea i le Atua. E mafai ona tatou le faatuatua i le Atua aua e matua faatuatuaina lava o Ia. Ua aoaoina i tatou e tusitusiga paia e faapea “E le savali le Atua i ala faapiopio, pe liliu foi o ia i le itu taumatau po o le itu tauagavale, pe ese foi o ia mai le mea na ia fetalai mai ai, o lea o ona ala e sasao, ma o lona ala o se taamilosaga faavavau e tasi”¹¹ ma “E le faailogaina tagata e le Atua.”¹² Tatou te faalagolago atu i uiga paia o le faamasinotonu ia maua ai le faatuatua, talitonuga, ma le faamoemoe.

Ae o se taunuuga o le amiotonu atoatoa, e i ai isi mea e le mafai ona fai e le Atua. E le mafai ona tuu i Lona faitalia e faaola isi ae faasala isi. E “le mafai ona [Ia] vaai i luga o le agasala ma sina tikeri itiiti o le faatagaina.”¹³ E le mafai ona Ia faatagaina le alofa mutimutivale e faoa le faamasinotonu.¹⁴

O se faamaoniga faatauanau o Lana faamasinotonu na faavae ai e le Atua le mataupu faavae o le alofa mutimutivale. Ona e amiotonu o Ia na ala ai ona Ia faavaeina ni auala e faataunuu ai e le alofa mutimutivale lana matafaioi taua i lo tatou taunuuga e faavavau. O lea la, “e faaaoga e le faamasinotonu ona manaoga uma, ma e maua foi e le alofa mutimutivale mea uma e a ia lava.”¹⁵

Ua tatou iloa o “mafatiaga ma le oti o le na le faia e ia se agasala, o le na fiafia tele i ai [le Tama]; … le toto o [Lona] Atalii na faamaligiina”¹⁶ lea ua faamalieina ia manaoga o le faamasinotonu, faalautele mai le alofa mutimutivale, ma togiola i tatou.¹⁷ E oo lava, “e tusa ma le faamasinotonu, e le mafai ona faataunuuina o le fuafuaga o le togiola, ua nao tulaga lava o le salamo.”¹⁸ O se mea e manaomia ma le avanoa mo le salamo lea e faatagaina ai le alofa mutimutivale e faatino ana galuega e aunoa ma le faatamaiaina o le faamasinotonu.

E lei maliu Keriso e tau lava ina ia faasaoina ai tagata ae ia ofo atu le avanoa e salamo ai. Tatou te faalagolago “atoa i galuega a ia o lē ua malosi aoao e laveai”¹⁹ i le faagasologa o le salamo, ae o le faatinoga e salamo o se suiga o le naunautaiga faaletagata lava ia. O le mea lea, o le avea ai o le salamo ma se tulaga manaomia mo le mauaina o le meaalofa o le alofatunoa, ua tuuina mai e le Atua le gafatia ia i tatou e faatumauina ai le tiutetauave mo i tatou lava. E faaaloalogia ma lagolagoina ai e le salamo lo tatou faitalia tatau: “Ma faapea ona mafai ai e le alofa mutimutivale ona faamalie manaoga o le faamasinotonu, ma siosiomia ai i latou i lima o le saogalemu, a o ia o le na te le faaaoga se faatuatua e salamo ai, ua tualiali i le tulafono atoa o manaoga o le faamasinotonu; o lea ua nao ia o le ua i ai le faatuatua e salamo ai, ua aumai ai le fuafuaga tele ma faavavau o le togiolaina.”²⁰

O le le malamalama i le faamasinotonu ma le alofa mutimutivale o le Atua o se tasi lea o mea; o le faafitia o le i ai o le Atua po o Lona silisiliese o le isi lea mea, ae e taitai uma atu lava i le taunuuga e tasi. O se Atua e le manaomia ni mea mai Ona tagata e tutusa lava ma se Atua e le o i ai. O se lalolagi e leai se Atua, o se lalolagi lea e leai se upumoni atoatoa po o le faamasinotonu. O se lalolagi lea e pulea aoao e talitonuga faaletagata lava ia.

O le talitonuga faaletagata o lona uiga e pule lava le tagata ia ia te ia. Ioe, e le o tagata uma o e talitonu ma mulimuli i le filisofia e faapea o soo se mea lava e talitonu i ai se tagata e moni mo ia lava, o se tagata lea e le talitonu i se Atua. O nisi o e talitonu i le Atua e talitonu lava o latou lava e filifilia le mea sao ma le mea sese. Sa faaalia mai e se tasi o talavou matua e faapea: “E le mafai ona ou faapea atu e sese le tapuaiga Hindu pe sese le Katoliko pe sese le Episcopalian—ou te manatu e fuafua lava i le mea e te talitonu i ai. … Tailo pe i ai se sao ma se sese.”²¹ Sa tali mai se tagata, sa fesiligia e uiga i le faavae o ona talitonuga faalelotu, e faapea: “O au lava ia—e toe foi mai lava i le vaega lena. O le uiga o la’u tala e faapefea ona i ai se pule i le mea e te talitonu i ai? E mafai ona fosi oe e se tagata ma fai atu e tatau ona e talitonu i le mea lea, ae e le mafai ona e fosia oe e te talitonu i se mea. O le fosi e le o se filifiliga.”²²

Mo i latou o e talitonu e moni soo se mea po o mea uma, o le folafolaga o le faamoemoega, mausali, ma le upumoni aoao e lagona ai e pei o fai faamalosi—“E le tatau ona fosia au e talitonu e moni se mea ou te le fiafia i ai.” Ae e le suia e lena mea le tulaga moni. O le le fiafia i le tulafono o le kalave o le a le taofia ai se tagata mai le pa’ū pe a ia laaese mai se tofē. E moni foi lea tulaga mo le tulafono e faavavau ma le faamasinotonu. E le oo mai le saolotoga i le tetee i ai ae o le faaaogaina. O se faavae autu lena i le mana o le Atua lava ia. Ana le seanoa le moni o upumoni mausali ma lē fesuisuiai, semanu e leai se uiga o le meaalofa o le filifiliga aua o le a le mafai lava ona tatou muai vaai atu pe faamoemoe atu i taunuuga o a tatou faatinoga. E pei ona faaalia mai e Liae: “Afai tou te fai mai ua leai se tulafono, o le a outou fai mai foi ua leai se agasala. Afai tou te fai mai ua leai se agasala, o le a outou fai mai foi ua leai se amiotonu. Ma afai e leai se amiotonu po o se fiafia, ua leai se faasalaga po o se pagatia. Ma afai e leai nei mea, ua leai se Atua. Ma afai ua leai se Atua, ua leai i tatou, po o le lalolagi; ona semanu po ua leai se foafoaga o mea, e leai foi se gaoioi po o le faagaoioi; o le mea lea, semanu po ua mou atu mea uma.”²³

I mataupu uma faaletino ma le faaleagaga, o le avanoa e talia ai le tiutetauave faaletagata lava ia o se meaalofa lea ua tuu mai e le Atua, a leai e le mafai ona tatou iloa o tatou gafatia atoatoa o afafine ma atalii o le Atua. O le tali atu o le tagata lava ia e avea ma se aia tatau ma se tiute e tatau ona tatou puipuia e le aunoa; ua leva lava ona osofaia ae lei faia le Foafoaga. E tatau ona tatou puipuia le [aia] e tali atu ai le tagata lava ia e faasaga i tagata ma malo ia o le a avea ai i tatou ma e e ola faalagolago atu ia i latou (i nisi taimi ma se faamoemoega sili). Ma e tatau ona tatou puipuia mai i o tatou lava lagona o le aloese mai galuega ia e manaomia ai ona atiae taleni, tomai, ma le matua faaleagaga.

Sa faamatalaina se tala i se tamā sa le fia faigaluega. Sa manao ia tausia o ia i ona manaoga uma. I lona lava mafaufau, o le Ekalesia po o le malo, po o vaega uma e lua, o loo nofoaitalafu i le tausiga o ia ona sa ia totogiina lana sefuluai ma ana lafoga. Sa leai sana meaai ae sa musu e faigaluega e tausi o ia. Ona o le popole ma le le fiafia, sa filifili ai i latou sa taumafai e fesoasoani ia te ia e faapea ona e talu ai e leai ma sana taumafaiga e tausi o ia lava, e sili ai lava le ave o ia i le fanua maliu ma tuu ai iina e oti ai. I le agai atu i le fanua maliu, sa fai mai se tasi tamā, “E le mafai ona tatou faia lenei mea. E i ai ni au saga o le a ou avatu ia te ia.”

O lea sa latou faamatala atu ai i le tamaloa lea e le fia galue, ae sa ia fesili mai, “Ua uma ona aveese ia pa’u?”

Sa latou tali atu, “Leai.”

“Ia, tatou o pea,” sa ia fai mai ai.

O le finagalo o le Atua ia avea i tatou o ni alii ma ni tamaitai saoloto e mafai ona tulai ae i o tatou gafatia atoatoa uma faaletino ma le faaleagaga, ia tatou saoloto mai faatapulaa faalumaina o le mativa ma le nofopologa i le agasala, ina ia tatou olioli i le faaaloalogia o oe lava ma le ola tutoatasi, ina ia tatou saunia i mea uma e auai ma Ia i Lona malo faaselesitila.

Ou te le talitonu i le manatu sese faapea ua na o a tatou taumafaiga lava e mafai ona tatou ausia ai lenei mea e aunoa ma Lana fesoasoani. “Ua matou iloa e faaolaina i tatou i le alofa tunoa, pe a uma mea uma e mafai ona tatou faia.”²⁴ Ma e tatou te le manaomia ona ausia nisi o tulaga o tomai po o ni lelei ao lei fesoasoani mai le Atua—e mafai ona avea fesoasoaniga faalelagi ma a tatou i itula uma o aso uma, e tusa lava po o fea o tatou i ai i le ala o le usiusitai. Ae ou te iloa, e sili atu nai lo le manao i Lana fesoasoani, e tatau ona galulue i tatou lava, salamo, ma filifili le Atua mo Ia ina ia mafai ona [Ia] galue pea i o tatou olaga ma le faamasinotonu ma le filifiliga saoloto. O lau aioi faigofie o le fai lea o lou lava tiutetauave ma alu e galue ina ia i ai se mea e fesoasoani mai ai le Atua ia i tatou.

Ou te molimau atu o loo soifua le Atua, o Lona Alo, o Iesu Keriso, o lo tatou Faaola, ma o loo faatasi mai le Agaga Paia ma i tatou. O lo Latou naunautaiga ina ia fesoasoani mai ia i tatou e le masalomia, ma o lo Latou gafatia e faia ai e le i’u. Sei o tatou “ala mai, ma tulai mai i le efuefu, … ina ia mafai ona faataunuuina o feagaiga a le Tama Faavavau na faia e ia ia te [i tatou].”²⁵ I le suafa o Iesu Keriso, amene.